BVÜKESHHU 8
8
Aqanqaethu
1Tsaseng wi Apvüwa na Mosa wi kiza, “Wala kadimiwa wi Apvüwa na hati khiben le kizalo, ‘Inyithu ya bvü thsülo, isanu mathu wa hi kinyi thsülo. 2Keujüla no tsü hhaghe lethu hi aqanqaethu ya no diyyiwa pong nu nthu metenmesha thsüben. 3Aqanqae na Nil Ghaku pong menni nu tsüthu na no kadijjen, no kejenpen, nwe, nkekhu wi kedithu nu n-nyithu jjen, nu n-nnibhon nu apfüthu lela pong shaben. 4Aqanqaethu na no, n-nyithu, nu nkekhu wi kedithu tsüdi miwi penkeghoaben.’ ”
5Apvüwa na Mosa wi kiza, “Aaron na ma khhatssü sen wa aghaku, atssü lenkehhi, nu acücengthu miwi chi, nu aqanqaethu shhugho Ejipt yyi pongya thsülo kizalo.” 6Tsalina Aaron na ma khhatssü pi atssü maben miwi kihhechi nu aqanqaethu na shhugho ayyiwa tsü pongya. 7Isala demathu la mathu kedema wina aqanqaethu sapi ayyi wi shhugho thsüa.
8Kadimiwa na Mosa nu Aaron manyi cichi nu khi, “Apvüwa wi kekhie sa nu aqanqaethu ha sen bvü thsülo, isathu hi n-nyithu ya bvü thsü nu mathu wa ahhanshathu sapi Apvüwa cüya mehai.”
9Mosa na khineng, “Hi nghena kekhie sa mvuben. Matsü ssan chilo, hi khathansha wi nghena, nkekhu wi kedithu nu n-nyithu ghena kekhie sa khe Nil Ghaku wi ketan khe nthu miwi aqanqaethu tsü nmila shaben.”
10Kadimiwa na luneng, “Ghanen wi ighena kekhie salo.”
Mosa na khi, “No kekhi ti hi nghena kekhie saben, isanu no ciwi acenpvü kesüla ithu Pvüwa Anyiza ti kesa nmile kesa chüya ben. 11Nil Ghaku wi ketan khe no, nkekhu wi kedithu, nu n-nyithu miwi aqanqae tsü nmila shaben.” 12Tsaseng wi Mosa nu Aaron manyi na Kadimiwa teshi, nu Mosa na Apvüwa wi kadimiwa miwi aqanqaethu tsü sen bvülo kekhie sa. 13Mosa kekhie ti Apvüwa na tsü sa cüa, nu ajjen, kadipen, nu alli wi aqanqaethu na shü shan. 14Ejipt nyithu na tsüthu piegho pi abhon sa nu bighe pi ayyi zügü. 15Kadimiwa na aqanqaethu tsü shü kesa mu keya wi ma leben dhu neng wa, nu Apvüwa na khi ketheng ti kadimiwa na Mosa nu Aaron manyi jüh nkinala.
Abancenthu
16Apvüwa na Mosa wi kiza, “Aaron na ma khhatssü pi ayyi kihhechi nu Ejipt yyi tsüdi wi ayyinikhu na abancethu ceng thsülo kizalo.” 17Tsalina Aaron na ma khhatssü pi ayyi kihhechi nu Ejipt yyi tsüdi wi ayyinikhu na abancenthu ceng pi anyithu nu aghangsathu miwi pong. 18Demathu na mathu kedema wina abancethu shhugho thsüle sa nu tsüti sa meyala. Apen tsüdi wila abancenthu na pong, 19#Luk 11.20. nu demathu na kadimiwa wi khi, “Anyiza na ha sachi le!” Isala kadimiwa na leben dhu ben wa, nu Apvüwa na khi ketheng ti kadimiwa na Mosa nu Aaron manyi jüh nkinala.
Alipengthu
20Apvüwa na Mosa wi kiza, “Ghanen wi mitu na shagha nu wa kadimiwa na aghaku wi wa keten wi ma metu nu Apvüwa na hati khiben le ma kizalo, ‘Inyithu ya bvü thsülo, isanu mathu wa hi kinyi thsülo. 21Hi no kitsan ben, keujüla no hhaghe lethu hi alipengthu kesun pi no, nkekhu wi kedithu, nu n-nyithu metenmesha thsüden. Ejipt nyithu jjen nu ayyi wi alipengthu na pong shaben. 22Isala hi Goshen yegu inyithu hang keben witsü tsü alipengthu na ben thsü nben. Hi ha sachi nu no yala hi Apvüwa ayyi hawi kuli benle kesa chüya thsüben. 23Hi inyithu nu n-nyithu sapi kepapa sa cüden. Dhitsü wi amankesa hawa ha saben.’ ” 24Apvüwa na alipeng tenti kesun pi kadimiwa kadijjen nu ma kekhu wi kedithu jjen wi chi. Alipengthu na Ejipt yyi mabenla yasa.
25Tsaseng wi Kadimiwa na Mosa nu Aaron manyi cichi nu khi, “Wala diyyi hewi ahhanshathu sapi nthu Nyiza cülo.” 26Mosa na khineng, “Tsüti kesawa nyele, kepaghenanye ikhang na aghangsa pi ahhansha sapi ithu Pvüwa Anyiza kecü wi Ejipt nyithu nkenen saya ben. Ikhang na aghangsa pi ahhansha sa nu Ejipt nyithu nkenen sa nu mathu na ikhang muya lethu alon pi ikhang kecenthiaben. 27Ikhang na ghanan kecheng alentsen wa ayyikeshü wi ahhanshathu sapi ithu Pvüwa Anyiza na ikhang kekiza ti nsathu yishü le!”
28Kadimiwa na khi, “Keujüla nthu na alen kesie wi nwa lethu hi nthu ya wa ayyikeshü wi ahhansha sapi nthu Pvüwa Anyiza cü thsüden. Ighena kekhie salo.”
29Mosa na luneng, “Hi no wina bvü meyi Apvüwa wi kekhie saden, nu ghanen wi alipengthu na no, nkekhu wi kedithu, nu n-nyithu wina bvüaben. Isala no kheneng ishinyi mechu nu anyithu wa ahhansha sapi Apvüwa ncü thsüla khen yishü.”
30Mosa na kadimiwa teshi nu wa Apvüwa wi kekhie sa, 31nu Apvüwa na Mosa kekhie ti sa cüa. Alipengthu na kadimiwa, ma kekhu wi kedithu, nu ma nyithu wina bvüa; alipeng kesüla nmila. 32Khili lela kadimiwa na ma leben dhu wa, isanu anyithu ya nbvü thsüla.
Právě zvoleno:
BVÜKESHHU 8: RENGNBSI
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.