BVÜKESHHU 12
12
Shhukeya Kho
1 #
Lev 23.5; Scs 9.1-5; 28.16; Aye 16.1,2. Apvüwa na Ejipt wi Mosa nu Aaron manyi kiza, 2“Nthu ghena asha hawa ha pi amapi wi asha atuwa saben. 3Kecükegwe hathu hapi Israel nyithu maben cü chilo: Asha hawa tagha ghanan wi anyi tsüdila ma theghi ghena khaghaneni nyelela aneni zza kesü kessi yalo. 4Keujüla atheghi kezeng kesü ma theghi na asahang tsü maben dsaya nben lethu pi ma jenphonwa theghi gweghe gishüya mehai; tsüna atheghi keji kezeng nu anyi kesüsü dsaya kemehai kenie wina saben. 5Nthu na khaghaneni nyelela aneni kessiya mehai, isala tsüna amapi kesü sa kesa nyu ghojünkeya mangla nkemi nsathu yishü. 6Isanu asha tsüwa ghanan taghamejü ghaja Israel nyithu mabenla asahang kesü pathi ben. 7Anyithu na ajjü pahan khuya nu sen wa mathu na asa dsa keten jjenwa jenka donbvü keni nu kenthsüwa tsü nyen. 8Tsü ghaja asa tsüpi güya, nu aghang kekha pi azimi nkechi mesa tsü saghu dsaben. 9Asa tsü kemeji ndsala nyelela pi shvu ndsala, isala ma li, ma ccü, nu ma pvüsheng sa kecca mabenla pi gü dsalo. 10Nthu na tsü dsatu pi ghanenwa wi theng yishü, keujüla dsatu lethu pi mecang nsathu yishü. 11Nthu na kijünyi wa keten ghena ageshi qhangya, accüguwen pi nthu ccü wi chiya, nthu kwen wi akhhatssü khuya, nu kaghaji ntsa tsü ndsathu yishü. Hi Apvüwa, hi kekinyi ghena hawa ha Shhukeya Khowa tsüle.
12“Tsü ghaja hi Ejipt yyi tsüdi wi wa nu atsa tssütsewa nu asahang zza tssütsethu tsüdila pathi, nu Ejipt cenpvü tsüdila metenmesha ben. Hi Apvüwa. 13Ajjü na ajenka donbvü wi keben tsüna nthu ajjen ciwi hang keben zensu. Hi Ejipt nyithu metenmesha kegho wi ajjü muya lethu hi nthu ghübvü nu nthu yasa nben. 14#Bvü 23.15; 34.18; Lev 23.6-8; Scs 28.17-25; Aye 16.3-8. Hi Apvüwa mangwa sa chidha khe meshenben le kesalina nthu na keshüthangla keccüna kho kesü ti tsü sa nbenthu yishü. Ghaketen matsü tsüdi wi lela ha sabenlo.”
Azimi Nkechi Mesa pi Kemishu Kho
15Apvüwa na khi, “Ghanan tagü nthu na azimi nkechi mesa dsaben. Atsathang atuwa wi tsü nthu jjen wi azimi tsüdila khu pilo, kepaghenanye anyi kesüle kesü lela ghanan tagü jüwi azimi kechi mesa dsa lethu anyi tsüwa pi inyi le ci nten. 16Atuwa nu tagü ghanan wi la nthu saghu nu kekinyi saben. Tsü ghanan keni wi nthu kekuli nsala, isala nthu kedsakejjü kidenya mehai. 17Nthu na akho hawa ha satenlo, kepaghenanye ha ghanan wi hi Ejipt wina nthu mizzathu ssinu shhugho. Ghaketen matsü tsüdi wila nthu na ha tsathang akho ha nsathu yishü. 18Asha atuwa wi taghamejü ghaja na wala ngwe nu kesü ghaja kecu nthu na azimi nkechi mesa tsü dsalo. 19-20Ghanan tagü jüwi tsü nthu jjen wi azimi muya thsü yishü, kepaghenanye asang le ahvu sa lela thowa na azimi kechi mesa tsü dsa khe anyi tsüwa pi inyi le ci nten.”
Shhukeya Kho Atuwa
21Mosa na Israel nyi accülikesathu tsüdi cichi nu mathu kiza, “Nthu kesüsü khaghaneni nyelela aneni zza kesü kessiya nu tsü pathi pi nthu theghithu Shhukeya Kho kemini tsü saden. 22Shonphighe tsang kesü khuya nu pi aghangsa jjü chi ketheng wi tsü tenya, nu ajjü tsüpi ajenka donbvüthu nu kenthsüwa tsü nyenya. Ghanenwa npi kegho chu nthu thola ajjen nteshi lalo. 23#Ibr 11.28. Apvüwa na Ejipt yyi tsüdi wi wa Ejipt nyithu pathile kewa wi nthu jenka donbvüthu nu kenthsüwa wi ajjü muya lethu nyu kepathi nyilowa ya nthu jjen wi dula nthu pathi thsü nben. 24Nthu nu nthu tsangathu na anuphanla ayen hathu ha n-niethu yishü. 25Nthu na wa Apvüwa na ayyi pi nthu cüle khichi ketheng tsü cukeya wi nthu na keccüna ha senlo. 26Nthu tsangathu na nthu wi ‘Keccüna ha ma jjügi mangwa nu?’ isa keü lethu, 27nthu na lunengben, ‘Hana ahhansha sapi Apvüwa kecü Shhukeya Kho le, kepaghenanye ma Ejipt wi Israel nyithu jjen ghübvü nu Ejipt nyithu pathia isala ithu nyi tsü npathi.’”
Israel nyithu na akhhutsüdu nu kinyi. 28Tsaseng wi mathu na wala Apvüwa na mangwale Mosa nu Aaron manyi kiza khe tsü sa.
Tssütsewa Keshü
29 #
Bvü 4.22-31. Ghajanon wi Apvüwa na Ejipt nyi tsa tssütsethu tsüdi, kadimi tsa, ma kadipen ghong ketenwa na wa atssüzüsa kebenwa tsa kecu pathia; asahang zza tssütsewa la tsüdi pathikhia. 30Tsü ghaja kadimiwa, ma kekhu wi kedithu, nu Ejipt nyi kepathu tsüdila aghaja wi shagha. Ejipt yyi tsüdila kiqai hhai na pong, kepaghenanye ajjen kesütan wi lela atsa nkeshü nmila kesalina. 31Tsü ghaja kadimiwa na Mosa nu Aaron manyi cichi nu kiza, “Nshinyi nu Israel nyi tsüdi bvülo! Hi diyyiwa teshi nu wa nshinyi kekhie ti Apvüwa kinyi walo. 32Nthu khaghaneni, aneni, mesüsithu ssiya nu bvülo. Nu ighena la kesawegü khie cülo.”
33Ejipt nyithu na Israel nyithu wi khi, “Nthu kaghajila ithu diyyiwa teshi nu bvülo, nyelethu ithu shükhia tendha.” 34Tsalina anyithu na azimi nkechi awheng nu kegüpfü pi mathu thsümeni wi mejuya, nu pi mathu depfü wi ton pvü nu bvüa. 35Israel nyithu na Mosa na mathu kekiza ti sa, nu mathu na Ejipt nyithu wi suna, rükatssü nu athsümenithu khie. 36Apvüwa na Ejipt nyithu sapi anyithu nyuwakü thsü nu mathu na mangwa khie khe pi cü thsü. Hatinu Israel nyithu na Ejipt nyithu keben-keyeng pvü bvüa.
Israel Nyithu na Ejipt keteshi
37Israel nyithu na Ramese wina alentsen sen nu Sukkoth wi wa. Ciwi nza nu ghanyithu nsila anyi 600,000 cen wa. 38Anyi kepathu kejon nu khaghaneni, aneni, amesüsithu la mathu gweghe wa. 39Mathu Ejipt wina awheng pvü keshhugho tsüpi azimi nkechi mesa güya, kepaghenanye Ejipt wi zuli mathu jügüshi kesalina mathu na kedsakejjü nyelela azimi kechi mesa kekiden tsü nmula.
40 #
Ade 15.13; Gal 3.17. Israel nyithu na Ejipt wi amapi 430 hang. 41Amapi 430 kecen ghanan wi Israel mizzathu tsüdila Ejipt teshia. 42Tsüna aghaja kesü wi Apvüwa na hie nu Ejipt wina mathu ssi shhugho; ha ghaja ha sametha pi Apvüwa wi chi nu ghaketen wi matsü tsüdi wila Israel nyithu ghena hiekeben ghaja nsathu yishü.
Shhukeya Kho Kesa Yenthu
43Apvüwa na Mosa nu Aaron manyi wi kiza, “Hathu ha Shhukeya Kho kesa yen: Asang ya shhukeya kho tsse ndsa thsüla, 44isala nthu shüya kesa nssümaghawa tsü keujüla nthu ma hyuhandha lethu ma tsü dsaya mehai. 45Kijünyishuwa nyelela mellidsa ketenthu ya tsü ndsa thsüla. 46#Scs 9.12; Jhn 19.36.Ajjen khiewi atsse tsü sa khe ciwi tsü maben dsa nsathu yishü; tsü sen nu akhemi wi nshhula nu nthu asagü kesüla npashüla. 47Israel nyi mabenla kemishu hawa ha salo, 48isala anyi ahyuhan nkesa tsü tsü ndsala. Keujüla asang kesü nthu jawi hang nu Shhukeya Kho sapi Apvüwa kinyi mvu lethu, nthu na atuwa sa ma jjen wi npvüzathu tsüdi hyuhanlo. Tsaseng wi ccüna ma pi Israel nyi ahvu ti sa nu kemishu wi tsü saghuya mehai. 49Israel nyithu ahvu sale nthu jawi kahangthu asang sa lela ayenwa makesü saben.” 50Israel nyithu tsüdila Apvüwa na mangwale Mosa nu Aaron manyi kiza khe tsü nie nu kuliya. 51Tsü ghanan wi Apvüwa na Ejipt wina Israel nyithu ssinu shhua.
Právě zvoleno:
BVÜKESHHU 12: RENGNBSI
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.