Romaanos 15
15
1Echetz jatvaʼlxh oʼ, uvaʼ kʼuqlebʼalxh kʼuul qatin kʼatz quBʼaal Tiuxh, tul aʼl qulotxht tzaqa tziʼ kaʼl kuxh ikʼuul tiʼ tatin kʼatz quBʼaal Tiuxh. Pet jit aʼ kuxh u qetz laʼ qoksa s-qujunal. 2Pet jununil oʼ, aʼ laʼ qiqʼo tetz u qumol tiʼ ibʼanax u bʼaʼn s-vatz. Echetz laʼ qulotxhte tiʼ ichʼij kʼatz quBʼaal Tiuxh. 3Tan ech uvaʼe ibʼan u quBʼaal JesuKriisto, tan jit aʼ u tetz toksa s-junal. Tan ech u yol tzʼibʼamal ka t-viyolbʼal quBʼaal Tiuxh s-eche:
—Jankʼalxh inqʼa yoqʼoʼm
uvaʼ qat alax seʼe
taʼn inqʼa nik eesan aqʼij,
tan s-viʼe nik alaxika,
—chich u yol.#Saalmo 69.9{*}#15.3 Saalmo 69.9. Aʼ u Mesiias nik alon u yol te quBʼaal Tiuxh. Tan aʼ u Mesiias nik atxhin inqʼa yol uvaʼ nik tal inqʼa xaol tiʼ quBʼaal Tiuxh.
4Tan jankʼalxh inqʼa yol, inqʼa tzʼibʼamal ka t-viyolbʼal quBʼaal Tiuxh, tan txhusuʼm nik ibʼan s-qe. Atz nik taqʼ qutial tiʼ qatineʼ. Tul nik ilotxh oʼ, tiʼ uvaʼ yeʼ laʼ qutanbʼa u qutxʼebʼon tiʼ tul u quBʼaal JesuKriisto tiʼ kam laʼ ibʼan u quBʼaal Tiuxh s-quxoʼl. 5Aʼetz u quBʼaal Tiuxh laʼ aqʼon etial, tiʼ uvaʼ yeʼ laʼ etanbʼa ebʼant vaʼl eyol tiʼ etatin tibʼaʼnil sevatzaq. Tul antxh laʼ pal etiqʼo, eche uvaʼ pal ikʼutxh ka u quBʼaal JesuKriisto. 6Tul vaʼlxh eyol laʼ ebʼana, atz vaʼlxh tiʼ equl. Tul tzumxh laʼ motx etoksat iqʼij u quBʼaal Tiuxh, viBʼaal u quBʼaal JesuKriisto.
Uvaʼs ikaʼpaqut Paʼp talax inqʼa yol tiʼ ikʼultaq tibʼ inqʼa niman tetz Jesuus s-vatzaq
7Echetz s-tiʼile nik val sete, tiʼ uvaʼ kʼulviivaq etibʼ sevatzaq, eche uvaʼ ikʼulviit ex quBʼaal JesuKriisto. Echetz laʼ toksal iqʼij quBʼaal Tiuxhe, tiʼ uvaʼ vaʼlxh eyol. 8Tan aʼ ulk u quBʼaal JesuKriisto tiʼ ilotxhox inqʼa tij imam Israeel, tiʼ ikʼutxhuxeʼ uvaʼ kʼuqlebʼ kʼuul u quBʼaal. Tan aʼ ul itzoqpisa inqʼa yol tiʼ u Kriisto, inqʼa alelich vet ka te inqʼa bʼaxa kʼuy qumam taʼn quBʼaal Tiuxh. 9Tan aʼat ul itzoqpisavat tiʼ inqʼa jit tij imam Israeel, tiʼ uvaʼ tetxhal laʼich toksaaq iqʼij quBʼaal Tiuxh. Tul laʼat toksa iqʼij quBʼaal Tiuxh tiʼ itxumt quBʼaal Tiuxh ivatz.
Tan ech nik tal val u yol uvaʼ tzʼibʼamal ka t-viyolbʼal quBʼaal Tiuxh s-eche:
—Toq voksa aqʼij,
atz toq val xoʼl inqʼa jit tij imam Israeel
uvaʼ taʼn axh quBʼaal Tiuxh.
Tul laʼ inbʼitzle vabʼij s-xoʼl,
—chich u yol.#2 Samueel 22.50; Saalmo 18.49
10Atz echat nik tal vaʼt u yol s-eche:
—Jankʼal ex, inqʼa jit ex tij
imam Israeel,
vaʼl echiibʼ tuchʼ vitenam
quBʼaal Tiuxh,
—chich u yol.#Deuteronoomio 32.43
11Atz echat nik tal invaʼt u yol s-eche:
—Oksavaq iqʼij
quBʼaal Tiuxh, jankʼalxh ex,
inqʼa jit ex tij imam Israeel.
Tul jankʼal ex tenam
sekaqaayil,
etaqʼvaq bʼen
u quBʼaal Tiuxh s-nim,
—chich u yol.#Saalmo 117.1
12Tul ech nik tal vaʼt u yol uvaʼ itzʼibʼa ka Isaiias s-eche:
—Laʼetz txhej vaʼl tij imam
Isaii.
Tul aʼ laʼ bʼanon iqʼesalil
xoʼl inqʼa jit tij imam Israeel.
Tul laʼ ikʼuqbʼa inqʼa jit
tij imam Israeel ikʼuul s-tiʼ,
—chich u yol.#Isaiias 11.10
13Aʼetz u quBʼaal Tiuxh laʼ aqʼon mam chiibʼichil tetaanima; atz laʼ taqʼ mam bʼaʼnil tetaanima, u quBʼaal Tiuxh uvaʼ nik qukʼuqbʼa qukʼuul s-tiʼ, tiʼ ibʼanax jankʼal vibʼaʼnil alel taʼn laʼ ibʼan s-quxoʼl. Tul aʼ viTiuxhil Tiuxh tuchʼ u tiqleʼm laʼ lotxhon ex. Echetz laʼ etxʼebʼte jankʼal u bʼaʼnil uvaʼ qat tal quBʼaal Tiuxh taqʼax sete.
Uvaʼs talt Paʼp uvaʼ tiqatzichxh u aqʼon xoʼl inqʼa jit tij imam Israeel
14Pet aʼetz toq val vet sete s-txheel, ex inmol s-niman tetz Jesuus, kam uvaʼ nik vitzʼa setiʼ. Aʼ nik vitzʼa uvaʼ tira nik ekʼutxh u bʼaʼnil xoʼl inqʼa xaol. Atz vaʼte uvaʼ, tira at etxumbʼal tiʼ tootzaqil u quBʼaal Tiuxh. Atz vaʼte uvaʼ tira at etxumbʼal tiʼ etxhust etibʼ sevatzaqil.
15Pet nik intzʼibʼa jolol inqʼa yol sete tiʼ vulsat sekʼuul uvaʼ laʼ ebʼana. Tul tiraxh nik intzanbʼa talax inqʼa yol sete. Tul tijxh in tiʼ talax inqʼa yol sete, tan tiʼ vibʼaʼnil quBʼaal Tiuxh uvaʼ at sinkʼatza. 16Tul qat toksa in quBʼaal JesuKriisto s-taqʼonvil xoʼl inqʼa jit tij imam Israeel. Tul qat taqʼ quBʼaal Tiuxh viqatzi ipaxsal inqʼa bʼaʼnla txhaq yol uvaʼ tzajnaʼq kʼatz quBʼaal Tiuxh. Echetz laʼ motx inimate inqʼa jit tij imam Israeel u quBʼaal JesuKriisto, tul laʼ kʼulux taʼn quBʼaal Tiuxh. Tul laʼ motx ijetxheʼl tibʼ kʼatz u paʼv, atz laʼ motx jetxhon ok kʼatz quBʼaal Tiuxh taʼn viTiuxhil, echetz laʼ motx tatin vet, eche vaʼq oya uvaʼ nik toksal vatz Tiuxh.
17Echetz nik valte sete uvaʼ tira nik inchiibʼ tiʼ u vaqʼon uvaʼ nik inbʼan tiʼ u quBʼaal Tiuxh tiʼ u vatin kʼatz quBʼaal JesuKriisto. 18Tul jit kam koq kuxh yolil saʼ txhej inyakʼil tiʼ talaxeʼ, pet taʼn kuxh inqʼa qat ilotxh in u quBʼaal JesuKriisto tiʼ ibʼanaxeʼ. Tan aʼ nik inkʼaq bʼen uvaʼ, tetxhal laʼ nimal quBʼaal Tiuxh taʼn inqʼa jit tij imam Israeel. Tan qat ilotxh in quBʼaal JesuKriisto tiʼ ibʼanax kam inqʼa nik inbʼaneʼ, atz tiʼ kam inqʼa nik valeʼ. Tan qat ibʼanbʼe in quBʼaal JesuKriisto tiʼ talax inqʼa yol, atz tiʼ ibʼanax kam inqʼa bʼaʼnla bʼanoʼm, 19atz jankʼale tiʼ ibʼanax inqʼa mamala etxhlal tuchʼ uvaʼ mam yol tilixeʼ, uvaʼ tuchʼ u tiqleʼm viTiuxhil Tiuxh qat inbʼanvat. Tul aʼ xeʼtik in tiʼ ipaxsal inqʼa bʼaʼnla txhaq yol tiʼ u quBʼaal JesuKriisto tu tenam Jerusaleen. Tul ile qat intzoqpisal ipaxsal inqʼa yol tuulbʼal jankʼal inqʼa tenam, tetxhal vopoon tiʼ ipaxsal tuulbʼal Iliiria. Ayaʼletz inqʼa tename inqʼae qat motx ex valvat inqʼa bʼaʼnla txhaq yol. 20Tul aʼxh qat inkʼaqvat vibʼ tiʼ ipaxsal inqʼa bʼaʼnla txhaq yol tiʼ Jesuus tal uvaʼ aʼxh yeʼx aqʼel ootzaqiloq. Tan yeʼ insaʼ uvaʼ antxh laʼ bʼen inpaxsavat viyolbʼal quBʼaal Tiuxh tal uvaʼ paxsamal vet taʼn vaʼtoʼq qumol. Tan yeʼ laʼ utxhi uvaʼ ech laʼ inbʼan, eche vaʼq aqʼol jaʼ otzotz uvaʼ antxh laʼ bʼen taqʼvat jaʼ vaʼq otzotz tiibʼa vixeʼ uvaʼ vaʼlen qat aqʼon kuʼ vixeʼ.
21Pet aʼ kʼaqel vaʼn laʼ innima viyolbʼal quBʼaal Tiuxh uvaʼ tzʼibʼamal ka uvaʼ ech nik tal s-eche:
—Jankʼalxh inqʼa yeʼlxh in paqxoʼq
tabʼit itziulal inqʼa yol tiʼ quBʼaal Tiuxh,
tul tetxhal laʼ motx til tabʼi vinuqul s-tiʼ.
Tul laʼ motx bʼen te inqʼa xaol
kam s-tiʼil uvaʼ at u quBʼaal Tiuxh,
inqʼa xaol, inqʼa aʼxh yeʼx abʼinaʼq
tetz inqʼa yol tiʼ quBʼaal Tiuxh,
—chich u yol.#Isaiias 52.15
Uvaʼs titzʼat Paʼp isolit inqʼa niman tetz Jesuus tu mam tenam Rooma
22Echetz tiʼ u vaqʼon uvaʼ nik val sete, aʼetz uvaʼe, nik maqon in tiʼ inbʼen tiʼ etilixeʼ. Tul jatpaqul kuxh qat imaq in tiʼ inbʼenaʼ. 23Pet s-txheel, tan laʼ utxh vet inbʼenaʼ. Tan yeʼl vet vaʼtoʼq tenam uvaʼ yeʼx koq paxsamal viyolbʼal quBʼaal Tiuxh s-xoʼl, inqʼa inaaqaʼ tibʼ tuchʼ tal uvaʼ atil in. Pet niketz insaʼeʼ laʼ bʼen vil ex. Tan naʼyxhte insaʼt inbʼen tiʼ etilixeʼ. 24Aʼetz nik val uvaʼ laʼ pal insoli ex, uvaʼs laʼ inbʼen tuulbʼal Espaanya. Tul chiibʼebʼalxh laʼ vatin sexoʼl kʼuxh yeʼxh jatvaʼl qʼij laʼ pal inbʼaneʼ. Aʼetz nik val uvaʼ, aʼ vet ex, laʼ lotxhon in tiʼ inbʼen paxsa tetz viyolbʼal quBʼaal Tiuxh tu Espaanya.
25Pet il in maʼt in s-txheel tu tenam Jerusaleen tiʼ taqʼax ka lotxhbʼal tetz inqʼa qumol s-niman tetz Jesuus. 26Tan qat motx imol inqʼa niman tetz Jesuus tuulbʼal Masedoonia, atz tuulbʼal Akaaya lotxhbʼal tetz jolt inqʼa qumol s-niman tetz Jesuus, inqʼa meebʼaʼ kuxh tatin tu tenam Jerusaleen. 27Tul bʼaʼn uvaʼ ech qat motx tzaje t-taanima. Tul ikʼulelxhtuʼ uvaʼ laʼ motx taqʼ inqʼa jit tij imam Israeel lotxhbʼal tetz inqʼa tij imam Israeel sivatzil uvaʼ motx tabʼi viyolbʼal quBʼaal Tiuxh uvaʼ motx ikʼul kʼatz inqʼa tij imam Israeel. Niketz motx inatxh vet inqʼa jit tij imam Israeel uvaʼ, ech vete itxʼoq at xeʼ inqʼa tij imam Israeel tiʼ u tabʼit viyolbʼal quBʼaal Tiuxh.
28Echetz nik valte uvaʼ maʼtetz voleʼv vet tiʼ ibʼanax vintxhaq, atz maʼt vet vaqʼt ka inqʼa oya tiqʼabʼ inqʼa niman tetz Jesuus tu tenam Jerusaleen, yaʼne laʼ bʼen vet in tu Espaanya. Aʼletz inbʼen vet t-Espaaya, tul laʼetz kuxh pal insoli ka ex. 29Laʼetz opoon vet in sexoʼl, tul vootzaqle uvaʼ sibʼ vibʼaʼnil quBʼaal JesuKriisto laʼ taqʼ s-quxoʼl. Tul laʼ ilotxh in tiʼ elotxhox tiʼ echʼij kʼatz u quBʼaal Tiuxh.
30Pet toq val sete, ex inmol s-niman tetz Jesuus, laʼ elotxh in, atz laʼ enatxh quBʼaal Tiuxh s-viʼ, ex inqʼa vaʼl kuxh vet qatin setuchʼ kʼatz quBʼaal JesuKriisto, atz ex inqʼa vaʼl kuxh nik qusaʼt vet qibʼ s-quvatzaq taʼn viTiuxhil Tiuxh. Pet natxhvaq Tiuxh s-viʼ, tiʼ inqʼa itzaʼlal nik inpal s-tuul tiʼ viyolbʼal quBʼaal Tiuxh. 31Tul abʼivaq te quBʼaal Tiuxh, tul laʼ ikol in, atz yeʼ laʼ ok in tiqʼabʼ inqʼa tij imam Israeel, inqʼa nik palsan viyol quBʼaal Tiuxh, inqʼa at tuulbʼal Judeea. Atz laʼ etabʼi te quBʼaal Tiuxh uvaʼ chiibʼebʼal koq laʼ ikʼult inqʼa niman tetz Jesuus u lotxhbʼal uvaʼ bʼen vaqʼ s-xoʼl, inqʼa niman tetz Jesuus, inqʼa een tu tenam Jerusaleen. 32Tul tiʼetz venatxht quBʼaal Tiuxh s-viʼ, tul echetz laʼ vopoone tibʼaʼnil sexoʼl. Oqetz quBʼaal Tiuxh laʼ saʼon, tul laʼ aqʼbʼ in sexoʼl tuchʼ chiibʼichil. Tul laʼ bʼen bʼeeq in ilan sexoʼl tinjoloq qʼij. 33Tul aʼ u quBʼaal Tiuxh, u aqʼol tetz bʼaʼnil tu qaanima, laʼ atin sexoʼl sekaqaayil. Tul echxh laʼ ibʼane.
Právě zvoleno:
Romaanos 15: ixlC
Zvýraznění
Sdílet
Porovnat
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2016, Wycliffe Bible Translators, Inc. All rights reserved.