Itorati 26
26
Isadaka cho nlhalha wo ukhunguriya choolhia
1Ashinna Musa ahothepa tho uhimia wiira, “Vanohalha inyu uphiya ni ukhalha mwiilhaponi unovahiya inyu ni Apwiiya Nlhuku inyu, ikhalhe yawinyu ni ukhalha wowo, 2mwakusheke muutingoni mpatta wo milhipu cho kila choolhia chinohalha inyu ukhungura wiilhaponi unovahiya inyu ni Apwiiya Nlhuku inyu, mpaka vakittu Apwiiya Nlhuku inyu vathanlhilhe aya wiira athimichelhiye. 3Mwaarwelheke opochera ishaani anopanga ntheko yeyo ikatema iyo, ni weerelha wiira, ‘Lhelho nna kinoorumelhelha umihoolho wa Apwiiya Nlhuku, Nlhuku aka wiira kihokelha mwiilhaponi yaalhenhe aya manyaapwiiya ihu wiira anoonivaha.’
4“Ni opochera ishaani ayo vanohalha aya ukusha utingo uyo mmathathani mwinyu ni weesha umihoolho wo madhubahu ya Apwiiya Nlhuku inyu, 5nromolheke malhove alha umihoolho wa Apwiiya Nlhuku inyu wiira, ‘Athumwanaka aari ntu o Uaramu, aathemwathemwa uwo ni uwo, yamalheke ahokhuruwa ni urwaa Umisri nkayaakhalha wowo thoko alheto. Yayo vamoka ni ashilhoko aya yarii attu vakani tu wowo, nansho nkaakhalha ilhapo yuulhupalhe, yo machiri ni yo attu enchi. 6Nansho attu o Umisri ahonipangelha ushilhilhi, khaanitwarusha ni unikhanyereriha upanga ntheko woorika wo upotta. 7Yamalheke naholhenlha Apwiiya Nlhuku, Nlhuku a manyaapwiiya ihu, nkayeewa wunlha wihu, ni woona uhuvihiya wihu, ntheko wo urika ni unyengiya wihu. 8Paahi, Apwiiya Nlhuku wo moono aya wo machiri wookwelhe, ahonikumiha wowo Umisri uwo iphiro yo woopopiha, yo uthikineha ni yo ushangiha. 9Nkayaaniwiiha vaa, ni univaha ilhapo inolhoka ulhima ni uhuwelha mihuwo ilha. 10Ni vano kihaawiihera Apwiiya Nlhuku, milhipu cho choolhia cho ilhapo anivahilhe aya.’
“Yamalhaka mweesheke utingo uyo vathi, umihoolho wa Apwiiya Nlhuku inyu ni ukhoroma umihoolho waya. 11Ni inyu mwattapelhelheke moombone onkhaye ovahenre ayani Apwiiya Nlhuku inyu, inyuva vamoka ni amuchi inyu. Alawi vamoka ni alheto anokhalhacha mwiilhaponi mwinyu anoottapelhelha vamoka ni inyu.
12“Kila baada yo iyaakha ttaaru, kila mmoka inyu aweeke akumiheke isadaka yo mpatta mmoka wo mipatta khumi yo choolhia chawe chonkhaye, wo nlhatu wa Alawi ni alheto, manyanankhwelhi ni achishaana ohiiya, wiira apatte yolhia yonkhaye inothanana aya vanokhalha aya mmawani mwinyu. 13Yamalhakaru, mmweeke mweera umihoolho wa Apwiiya Nlhuku inyu wiira, ‘Kihokumiha uwannyaka nifungu nitakatifu, nkakaavaha Alawi, alheto, manyanankhwelhi ni achishaana ohiiya, thoko chikilhehenre inyu wiira kipange. Akinahiya urumelhelha malhehero inyu mena akilhiyanlhe. 14Akalhilhie nifungu no yeyo isadaka iyo vaari aka kunlhaka vawo, akaakumihilhe vathe vaari aka kihirumelhelhiyaka umihoolho wa Apwiiya Nlhuku, ni mena akaakumihilhe isadaka iyo wa attu akhwilhe. Kihorumelhelhani inyu Apwiiya Nlhuku, Nlhuku aka, kihopanga kila ittu ikilhehenre inyu inaacha isadaka. 15Mmweheke vathi ukhuma makhalhelho inyu matakatifu o wiirimu, mwaavaheke ibarakha attu inyu o Israeli, ni ilhapo nnivahilhe inyu thoko chaalhupelhenlhe inyu manyaapwiiya ihu, ilhapo inolhoka ulhima ni uhuwelha mihuwo.’
Attu a Apwiiya Nlhuku
16“Lhelho va, Apwiiya Nlhuku inyu anoulheherani wiira nvareke malhehero aya onkhaye alha. Nkhalheke attu o wiiwelhelha malhehero ni upanga wo nrima wonkhaye ni wo nnepa wonkhaye. 17Lhelho nna nhaarumelhelha Apwiiya Nlhuku, ukhalha Nlhuku inyu, ni wiira nnoottwara iphiro chaya ni uvara ikano chaya, iamuri chaya, malhehero aya ni urumelhelha nlhove naya anene. 18Ni lhelho nna Apwiiya Nlhuku ahoolhumacha anene wiira mwaatti phi attu aya anenene, nthanlhiye munlhokoni mwa attu onkhaye o velhaponi va thoko chilhenhe aya. Ni ayo anoulheherani wiira nvarechesheke iamuri chaya chonkhaye. 19Anoupangani inyuva ukhalha attu o machiri upwaha ilhapo chonkhaye chuupilhe aya. Nnowinkelha nchina naya, ni attu anoushipani ni utotopelhani. Mwaatti nnookhalha attu aya atakatifu thoko chinre aya wo ulheha.”
Právě zvoleno:
Itorati 26: MOT
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
The Bible Version in Makua @The Word for The World International and Makua Language translators. All rights reserved.