Itorati 23
23
Uthamihiya munlhokoni mwa attu a Nlhuku
1Ashinna Musa ahothepa uhimiacha wiira, “Nlhopwana riyoothe huniye ama tupulhiye ittu awe ye ilhopwana, hihiyereriye eethakanihe ni nlhoko wa attu, vanaathimicha aya Apwiiya Nlhuku.
2“Ni ntu yariye mmaphumbulhuni, hihiyereriye ukhalha munlhokoni mwa attu a Apwiiya Nlhuku, wala iyari awe, wala ata mpaka iyari awe yo khumi.
3“Khaawo ntu riyoothe o Uamoni, ama o Umoabu, ni iyari chaya chonkhaye, ata iyari aya yo khumi, nohalha uhiyereriya ukelha munlhokoni mwa attu a Apwiiya Nlhuku. 4Ukhalhawaya yayo manyaattu ayo ahokhota uuvahani yolhia ni maashi vaari inyu mphironi vaakhuma inyu Umisri, ni ukhalhawaya ahaalhalhia Nabalaamu anaaya Nabeori ukhuma Upethori, ilhapo yo Umesopotamiya, wiira oolhaveni. 5Nansho aneeraka chiicho, Apwiiya Nlhuku inyu khamwiiwelhenlhe Balaamu, ulhava wawe uwo wahorukunuwa nkawaakhalha ibarakha, ukhalhawaya Apwiiya Nlhuku inyu ahouttunani. 6Paahi etu, mena nhaakavihe yayo manyaattu ayo wiira ahipatte mpuha, wala ahichine mmakhalhelhoni mwaya.
7“Nhaapangelhe ichimwa attu o Uedomu, yayo amuchi inyu, ni wala nhaapangelhe ichimwa attu o Umisri, ukhalhawaya mwahokhalha uwannyaya vaari inyu alheto. 8Achishaana aya ni uchuulhu wo yayo attu o Umoabu ni o Umisri ayo, yayo mwaahiyerereke akelheke munlhokoni mwa attu a Apwiiya Nlhuku.
Ukwecherera nipuro wiira nikhalhe rata
9“Mwarwaaka ukhotoni nkamweesha nipuro, kila mmoka inyu eeshungeke hiinyalhihe wo iphiro iriyoothe, nkoochelha urumelhelhiya umihoolho wa Apwiiya Nlhuku. 10Yakhalhaka munlhokoni mwinyu haawo ntu eenyalhinhe wo ukhumiya ikhanja vaarumpe awe uhiyu, yoyo athameke mwanene, arweeke vachereshere nipuro, hikhalhe vakhiviru ni nipuro. 11Nansho yaphiyaka uchechilho arapeke, ni nchuwa neelhaka ahokolhieke vanipuroni.
12“Nkhalheke ni vakittu vachereshere nipuro unohalha inyu urwaa uriindini. 13Nhina ikaruma chinyu chinohalha inyu ukusha, chikhalheke ni ihipa chinohalha inyu uthipelha malhikiti ni uwuhelha ichoroni chinyu. 14Mapuro inyu areereke, ukhalhawaya Apwiiya Nlhuku inyu anoovira eetakachaka mmapuroni mwinyu mmo, wiira owenkelheni ni waakottolhacha amalhaponi inyu. Paahi etu nhiwe mwooniha ittu iriyoothe yo unanara munlhokoni mwinyu, mwaahireke chiicho anouhiyani.
Malheheriyo makina makina
15“Yakhalhaka ipotta noottawelha uwannyu, nhinhokolhoshe wa mwanene. 16Munkhalhaneke vamoka munlhokoni mwinyu, vakittu vanohalha awe uthanlha vawo. Nhimpangelhe ichimwa.
17“Hikhalhe ntu riyoothe, nlhopwana ama nthiyana munlhokoni mwa attu o Israeli, nohalha ulhavalhava mmanupani mwo ulhapelha milhuku chaya. 18Tho, nchurukhu uriyoothe unohalha upattiya ukhuma muulhavalhavani mmo, uhirweehiye unupani wa Apwiiya Nlhuku inyu, uthaphulha ishaani. Ukhalhawaya nlhopwana ama nthiyana nopanga yoyo nhapo uyo, nowaathunalhiha Apwiiya Nlhuku.
19“Vanonkopiha inyu ntu o Israeli naninyu nchurukhu ama yoolhia, hinlhivihe mahalha o vachulhu. 20Nlheto munlhiviheke mahalha o vachulhu vanomwaashimiha inyu, nansho kuhii wa nlhoko inyu. Ukhalhawaya mwapangaka chiicho, nnoovahiya ibarakha mmithekoni mwinyu mwonkhaye, ni wiilhaponi unokelha inyu urwaa ukhalhelhani uwo.
21“Vanottuka inyu ishaani wa Apwiiya Nlhuku inyu, nhicherewihe uthaphulha, ukhalhawaya Apwiiya Nlhuku inyu anoukohani, ni inyu nnowiirelhiya wiira nhowonya. 22Mwaahittukeke ishaani khannopatta milhatu cho uwonya, 23nansho muupuwelheke ishaani ittukilhe inyu. Ukhalhawaya mwaahaalhelha Apwiiya Nlhuku inyu wo uttuna winyu.
24“Mwaviraka mmatani mwa amwaatamana inyu mwaalhiye izabibu, nlhieke izabibu chinothanana inyu mwaanene, nansho nhirukulhe izabibu chikina cho ukusha muutingoni mwinyu. 25Mwaviraka mmatani mwa amwaatamana inyu nlhimiye choolhia, nnowooria uthikilha machashi ni ukhuura, nansho nhiwie imboopo wiira nkhwache choolhia cho ukusha uwannyu.
Právě zvoleno:
Itorati 23: MOT
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
The Bible Version in Makua @The Word for The World International and Makua Language translators. All rights reserved.