Itorati 21
21
Ntu eeviye wo uhichuwania wiira eeviye ni apani
1“Mwamphwanyaka ntu neeviye ni urihelhiya mmatani wiilhaponi unovahiya inyu ni Apwiiya Nlhuku, Nlhuku inyu uwo, wo uhichuwania wiira eeviye ni apani, 2paahi etu ashulhupalhe ni attu o waamulha milhatu inyu arweeke aphimeke urekama uri varii ntembo uyo ni iwani chirii vakhiviru chiyo. 3Yamalhaka, ashulhupalhe o iwani yo vakhiviru chinene ni ntembo uyo, ankusheke mwaang'ope mwanthiyana ri hinaaya upangihiya ntheko uriyoothe wala hinaya uttukelhiya nikongwa, 4anrweeheke unikooteni uri nshepa nihinooma, nikoote nihinolhimiya ama waalhiya ittu. Wowo amuntheke ishiko mwaang'ope uyo. 5Ni opochera ishaani o nikosho ni Alawi ayo aatameke vavawo, ukhalhawaya Apwiiya Nlhuku inyu ahaathanlha yayo, ni ayo phiri ni ipilhi yo waanyulha milhatu chiriyoothe, ni cho kila nlhatu wo urakalhihaniya. 6Mwaang'ope uyo onthiyaka ishiko iyo, ashulhupalhe onkhaye o iwani aatamme ntembo uyo anyawelheke mathatha aya vachulhu mwaang'ope uyo, 7ni wiira, ‘Khaninamwiiva ulha ntu ulha, ni wala khaninchuwenlhe ntu mwiivilhe. 8Chonte, inyu Apwiiya Nlhuku, mwaahiyerereke attu inyu Aisraeli, mwooponlhe inyu mwaanene ukhuma Umisri, nhaahike iphome ya ntu eeviye hiittenke ulha, nansho mwaahiyerereke wowo utteka uwo.’ 9Paahi wo upanga chiicho khannokhalha ni nlhatu unaacha wiiviya wa yoyo ntu uyo, ukhalhawaya nhopanga ittu ithananiye ni Apwiiya Nlhuku wiira mpange.
Mwaha wo manyaathiyana avariye mateeka ukhotoni
10“Mwarwaaka ukhotoni waatakana ni amalhaponi inyu, ni Apwiiya Nlhuku nkayooworihani waakottolha, nkamwaavara mateeka, 11nkamwamoona mwommo nthiyana orera nkamwaachivelhiya wiira munthelhe, 12paahi, inyu alhopwana nnothanana wiira chiicho va, munkusheke nthiyana uyo uwannyu, ni wowo oowulheke ikharari chawe ni waakulha ihatha chawe, 13arulheke ni ikuwo chaawanre awe vanvanre inyu mateeka vawo, ni awareke ikuwo chikina. Akhalheke mattanga mweeri mmoka, wonlhelha manyanaangoro awe, paahi yamalhaka vavawo nrweeke etu mwankhalhaneke uwannyu, ntu ni ahanu awe. 14Nansho yakhalhakaru kaanyuma nnowoona wiira khanoochivelhani, munhiyerereke etu arweeke uriwoothe unothanana awe urwaa. Nhiwe mena mwanthumiha ama umwiiriha thoko ipotta, ukhalhawaya mwahonkhalhana ni unrupana.
Mwaha wo mahalha anomwaacha mwaana o nttara
15“Yakhalhaka haawo nlhopwana thenlhe mavasha a manyaathiyana eelhi, ni uyo nonttuna chinene mmoka, umpwaha nkina uyo, ni oyeelhi ayo ahaayaracha achishaana ashilhopwana, ni mwaana o nttara yariye ni nthiyana hinottuniya chinene uyo, 16naphiyaka nihuku no ukawelhachiya achishaana ayo nhakhu aya wo uhiyeriya, yoyo nlhopwana uyo himpange mwaana a nthiyana nonttuna awe chinene uyo ukhalha phi mwaana o nttara, ni unhiya ulhe yariye ni nthiyana hinonttuna awe uyo, ri phi o nttaara wo ikekheene. 17Anttuneke yoyo mwaana o nttara a nthiyana hinonttuna aya uyo, ammaheke mahalha awe o uhiyeriya ayo, ammaheke nhakhu awe uyo mikwaha miilhi.
Mwaha wo achishaana o itiyamaru
18“Yakhalhaka ntu hanaa mwaana mwanlhopwana o itiyamaru, o urukunia, hineewelhelha athumwanawe ama anumwanawe vanomwaamuka aya, 19paahi athumwanawe ama anumwanawe ayo ankusheke ukhuma unupani unokhalha aya ni unrweeha wa ashulhupalhe varii nlhako muulhupalhe wo ukelha vawani. 20Yeereke wo ashulhupalhe ayo wiira, ‘Ulha mwaamwanihu ulha, o itiyamaru ni o urukunia. Khanoniiwelhelha, o umenyekha ni uhapalhiya.’ 21Paahi vavawo etu, manyaalhopwana onkhaye o yeyo iwani awe iyo, amwaateke malhuku mpaka akhweeke. Vavawo etu, phi nohalha inyu umalhiha mwaha wo uwonya thoko yolha munlhokoni mwinyu. Paahi attu onkhaye o Uisraeli anowa wiiwa ni woova.
Malheheriyo makina makina
22“Yakhalhakaru ntu howonya chinene, chinophwanelhiya uhukumulhiya wiira eeviye, nkeeviya wo uthomeiya vamwirini, 23iruttu awe iyo ihirupe vamwirini vawo. Nansho avithiyeke nenno nihuku, ukhalhawaya ntu riyoothe nothomeiya vamwirini yoyo holhaviya ni Apwiiya Nlhuku. Nhiwe mwaananariha ittaya ya Apwiiya Nlhuku inyu, inokelha aya uuvahani wiira ikhalhe yawinyu iyo.
Právě zvoleno:
Itorati 21: MOT
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
The Bible Version in Makua @The Word for The World International and Makua Language translators. All rights reserved.