Chivkeeb 48
48
Yakhauj Foom Koobhmoov Rau Efalayees Thiab Manaxes
1Tomqab ntawd muaj neeg mus qhia rau Yauxej hais tias nws txiv mob. Yauxej thiaj coj nws ob tug tub uas yog Manaxes thiab Efalayees mus saib nws txiv Yakhauj. 2Thaum muaj neeg mus qhia rau Yakhauj paub tias nws tus tub Yauxej tuaj saib nws, nws thiaj ua tiag peem sawv los nyob zaum saum txaj.
3Yakhauj hais rau Yauxej tias, “Vajtswv tus uas muaj Hwjchim Loj Kawg Nkaus tau tshwm los rau kuv pom pem lub nroog Lus uas nyob hauv tebchaws Kana-as thiab foom koobhmoov rau kuv. 4Vajtswv tau hais rau kuv tias, ‘Kuv yuav pub rau koj muaj tubki coob, koj cajces yuav huamvam mus ua ntau haivneeg, Kuv yuav muab lub tebchaws no pub rau koj cajces nyob ua lawv tug mus ibtxhis li.’ ”
5Yakhauj rov hais rau Yauxej tias, “Koj ob tug tub uas yug uantej kuv los nyob hauv tebchaws Iziv no puavleej yog kuv li huv tibsi. Efalayees thiab Manaxes nkawd puavleej yog kuv tubki ib yam li Lunpees thiab Xime-oos nkawd thiab. 6Yog koj tseem muaj tub ntxiv, lawv yuav tsis yog kuv cov tub lawm. Tej qubtxeeg qubteg uas lawv yuav tau txais yog los ntawm Efalayees thiab Manaxes nkawd lawm xwb. 7Thaum kuv rov pem tebchaws Padas#48:7: Padas: lub npe luv-luv rau Padas Alas, lossis Mexuputamias. los, koj niam Laxees tau tuag rau hauv tebchaws Kana-as, tsis deb ntawm Efalas, mas ua rau kuv tau kev quajntsuag; kuv thiaj muab nws log rau ntawm ib sab ntug kev uas mus rau hauv lub zos Efalas.” (Nimno Efalas yog lub nroog Npelehees.) #Chiv 35:16-19
8Thaum Yakhauj pom Yauxej ob tug tub, nws nug hais tias, “Ob tug tub no yog leejtwg?”
9Yauxej teb tias, “Ob tug no yog kuv ob tug tub uas Vajtswv muab pub rau kuv hauv lub tebchaws Iziv no.”
Yakhauj txawm hais tias, “Coj nkawd los rau kuv es kuv yuav foom koobhmoov rau nkawd.” 10Yakhauj ob lub qhovmuag plooj thiab pomkev tsis tseeb vim nws laus lawm. Yauxej thiaj coj nws ob tug tub los rau Yakhauj, ces Yakhauj thiaj puag nkaus thiab nwj nkawd. 11Yakhauj hais rau Yauxej tias, “Kuv tsis xav tias kuv yuav rov pom koj lub ntsejmuag ib zaug ntxiv li lawm, tiamsis nimno Vajtswv twb pub kuv pom koj cov menyuam lawm thiab.” 12Ces Yauxej thiaj tshem nkawd ntawm Yakhauj txhais ncejpuab los thiab nws nyo hau ua ntsejmuag ti nkaus hauv av pe Yakhauj.
13Yauxej tuav nws ob tug tub mus ze-ze nws txiv. Nws sab tes xis tuav Efalayees mus rau Yakhauj sab laug, thiab nws sab laug tuav Manaxes mus rau Yakhauj sab xis. 14Tiamsis Yakhauj muab nws ob txhais tes sibqhaib, thiab cev nws sab tes xis mus tuav Efalayees uas yog tus kwv lub taubhau, thiab nws cev nws sab tes laug mus tuav Manaxes uas yog tus tijlaug lub taubhau. 15Ces Yakhauj txawm foom koobhmoov rau Yauxej#48:15: Yauxej: Qhov uas Yakhauj foom koobhmoov rau Efalayees thiab Manaxes, qhov tseeb tiag yog nws foom koobhmoov rau Yauxej. li no:
“Thov Vajtswv tus uas kuv yawgkoob Anplahas thiab kuv txiv Ixaj ibtxwm tiam los, foom koobhmoov rau ob tug metub no!
Thov Vajtswv tus uas coj kuv txoj haukev los txog niajhnub no, foom koobhmoov rau nkawd!
16Thov tus timtswv ceebtsheej uas tau cawm kuv dim ntawm txhua yam kev phem, foom koobhmoov rau nkawd!
Thov kom kuv lub npe thiab kuv yawg Anplahas lub npe thiab kuv txiv Ixaj lub npe nyob nrog ob tug tub no mus li!
Thov kom nkawd muaj tubki coob thiab muaj cajces huamvam thoob ntiajteb!”
17Yauxej tsis txaussiab thaum nws pom nws txiv muab nws txiv sab tes xis tso rau saum Efalayees taubhau; yogli ntawd, nws thiaj muab nws txiv txhais tes saum Efalayees taubhau mus tso rau saum Manaxes taubhau. 18Nws hais rau nws txiv tias, “Txiv, ua li ko tsis yog lawm. Tus no yog tus tub hlob, tso koj txhais tes xis rau saum nws taubhau.”
19Tiamsis Yakhauj tsis tseev li, nws hais tias, “Kuv paub los mas kuv tub, kuv paub los mas. Manaxes cajces yuav dhau mus ua ib haivneeg tseemceeb. Tiamsis nws tus kwv Efalayees tseem yuav tseemceeb dua nws, thiab nws cajces tseem yuav dhau mus ua ntau haivneeg.”
20Yogli ntawd, hnub ntawd Yakhauj thiaj foom koobhmoov rau nkawd hais tias, “Thaum cov Yixalayees foom koobhmoov rau ib tug twg, lawv yuav tuav neb ob lub npe. Lawv yuav hais tias, ‘Thov Vajtswv pub kom koj npluanuj ib yam li Nws tau pub rau Efalayees thiab Manaxes nkawd.’ ” Qhov no yog Yakhauj muab Efalayees tso ua Manaxes ntej.
21Ces Yakhauj hais rau Yauxej tias, “Koj twb pom lawm hais tias kuv twb yuav tuag, tiamsis Vajtswv yuav nrognraim koj thiab yuav coj koj rovqab mus nyob pem koj cov yawgkoob lub tebchaws. 22Kuv yuav muab lub nroog Sekhees, cheebtsam uas zoo ua noj ua haus uas kuv nqa ntaj nqa hneev mus txeeb tau ntawm cov neeg Amaules los, pub rau koj ua koj tug, tsis yog yuav pub rau koj cov tijlaug.”
Právě zvoleno:
Chivkeeb 48: MWW2022
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2022 United Bible Societies. All rights reserved.