Chivkeeb 32
32
Yakhauj Npaj Mus Ntsib Exaus
1Thaum Yakhauj tabtom taug kev los, Vajtswv cov timtswv saum ntuj txawm los ntsib nws. 2Thaum nws pom cov timtswv ntawd nws hais tias, “Ntawm no yog Vajtswv lub yeej”; yogli ntawd, nws thiaj tis npe rau thaj chaw ntawd hu ua Mahana-ees.#32:2: Mahana-ees: Lub npe no lus Henplais txhais hais tias “ob lub yeej.”
3Yakhauj tso tibneeg ua nws ntej mus hais rau nws tus tijlaug Exaus uas nyob hauv tebchaws Edoos. 4Nws kom lawv mus hais rau Exaus tias: “Kuv yog Yakhauj, yog koj tus tubtxib uas mlooglus; thov hais rau kuv tus tswv Exaus paub tias kuv mus nrog Lanpas nyob tau ntev loo thiab tamsim no kuv tabtom rovqab los lawm. 5Kuv muaj nyuj, neesluav, yaj, tshis, thiab tubhmab tubqhe coob heev. Kuv xa xov los rau koj uas yog kuv tus tswv, kuv ciasiab ntsoov hais tias koj yuav txaussiab rau kuv.”
6Thaum cov neeg uas xa xov rovqab los txog Yakhauj, lawv hais tias, “Peb twb mus cuag koj tus tijlaug Exaus lawm, mas nws tabtom sawvkev tuaj tos koj lawm ntag. Nws coj 400 leej neeg nrog nws tuaj.” 7Yakhauj ntshai heev thiab nyuajsiab kawg li. Nws thiaj muab nws cov neeg faib kiag ua ob pab; nws kuj muab nws cov yaj, tshis, nyuj thiab ntxhuav faib ua ob pab thiab. 8Nws xav tias, “Yog Exaus tuaj tua pab uantej los kom pab uaqab thiaj khiav tau dim.”
9Yakhauj thiaj thov Vajtswv hais tias, “Kuv yawgkoob Anplahas tus Vajtswv thiab kuv txiv Ixaj tus Vajtswv, thov Koj mloog kuv tej lus thov lau! Tus TSWV, Koj hais kom kuv rovqab mus rau kuv lub tebchaws thiab kuv cov kwvtij, thiab Koj yuav pub txhua yam zoo rau kuv. 10Kuv uas yog Koj tus tubtxib, twb tsis tsimnyog tau txais Koj txoj kev hlub thiab txoj kev ncajncees hlo li. Thaum kuv hla tus dej Yauladees tuaj, kuv tsis muaj ib yam dabtsi li, tsuas yog muaj tibtug nyuag pas nrig xwb, nimno kuv muaj ob pab neeg thiab ob pab tsiaj nrog kuv rovqab los. 11Kuv thov Koj pab cawm kom kuv dim ntawm kuv tus tijlaug Exaus lau. Kuv ntshai heev, ntshai nyobtsam yog nws tuaj tua peb thiab ua rau peb raug kev puastsuaj, tsis hais tej pojniam thiab menyuam huv tibsi. 12Thov Koj ncontsoov Koj tej lus cogtseg uas Koj tau hais tias Koj yuav pub txhua yam zoo rau kuv thiab pub kom kuv muaj cajces coob uas suav tsis txheeb, ib yam li tej xuabzeb nram ntug hiavtxwv.” #Chiv 22:17
13Nws thiaj pw ib hmos ntawm thaj chaw ntawd. Nws xaiv tej tsiaj uas nws muaj ibtxhia coj mus ua khoomplig rau nws tus tijlaug Exaus: 14200 tus maum tshis thiab 20 tus laug tshis, 200 tus maum yaj thiab 20 tus laug yaj, 1530 tus maum ntxhuav nrog cov menyuam uas tseem mos, 40 tus maum nyuj thiab 10 tus txiv nyuj, 20 tus maum neesluav thiab 10 tus txiv neesluav. 16Nws muab cov tsiaj ntawd faib ua tej pab thiab nws kom nws cov tubtxib ib leeg mus saib ib pab. Nws hais rau lawv tias, “Nej mus ua kuv ntej, ib pab mus kom nrug ib pab deb tsawv.”
17Nws hais rau thawjtug tubtxib tias, “Thaum kuv tus tijlaug Exaus tuaj ntsib koj thiab nws nug hais tias, ‘Koj tus tswv yog leejtwg? Koj yuav mus qhovtwg? Leejtwg yog tus tswv ntawm cov tsiaj uas ua koj ntej no?’ 18Koj yuavtsum teb tias, ‘Cov tsiaj no yog koj tus tubtxib Yakhauj li. Nws kom coj cov tsiaj no los ua khoomplig rau Exaus uas yog nws tus tswv. Yakhauj tseem tabtom los lawv peb qab.’ ”
19Yakhauj kuj hais rau tus tubtxib thib ob, thiab tus thib peb, thiab txhua tus uas saib cov tsiaj ntawd ib yam nkaus tias: “Thaum nej ntsib Exaus nej yuavtsum hais tej lus no rau nws. 20Nej yuavtsum hais tias, ‘Yakhauj uas yog koj tus tubtxib tseem los lawv peb qab.’ ” Yakhauj xav tias, “Kuv twb muab kuv tej khoomplig xa uantej mus nplig nws lawm, yogli ntawd, thaum kuv mus ntsib nws, nyaj nws yuav zamtxim rau kuv.” 21Yakhauj xa tej khoomplig ntawd mus uantej, tiamsis hmo ntawd nws tseem rov pw ib hmos ntawm lub yeej ntawd ntxiv.
Yakhauj Nrog Ib Tug Txivneej Sibqhau Ntawm Peniyees
22Hmo ntawd Yakhauj sawv coj nws ob tug pojniam, nws ob tug ntxhais qhev uas yog nws ob tug niamyau, thiab nws kaum-ib leeg menyuam mus hla tus Dej Yanpaus. 23Thaum nws xa lawv hla dhau dej tag lawm, nws kuj muab txhua yam khoom uas yog nws tug xa hla dej rau sab tim ub huv tibsi thiab, 24tiamsis nws tibleeg tseem nyob tomqab.
Ces txawm muaj ib tug txivneej los nrog Yakhauj sibqhau mus txog thaum kajntug txoog. 25Thaum tus txivneej ntawd pom tias nws yuav mos tsis yeej Yakhauj, nws thiaj ntaus Yakhauj lub ntsag kom sav ua rau nws lub pob qejtxha pluam plhuav. 26Tus txivneej ntawd hais tias, “Hnub twb yuav tawm, yogli ntawd, koj ciali tso kuv mus.”
Yakhauj teb tias, “Kuv yuav tsis tso koj mus txog thaum koj foom koobhmoov rau kuv tso.” #Hauxe 12:3-4
27Tus txivneej ntawd nug hais tias, “Koj lub npe hu licas?”
Nws teb tias, “Kuv lub npe hu ua Yakhauj.”
28Tus txivneej ntawd hais tias, “Koj lub npe yuav tsis hu ua Yakhauj ntxiv lawm, rauqhov koj tau nrog Vajtswv thiab nrog neeg sib tawmtsam, thiab koj yog tus yeej lawm. Yogli ntawd, koj lub npe yuav muab hu ua Yixalayees.” #32:28: Yixalayees: Lub npe no hais muaj ntsis thooj li lolus Henplais uas hais tias “nws nrog Vajtswv sibqhau,” lossis “Vajtswv qhau.” #Chiv 35:10
29Yakhauj hais tias, “Thov koj qhia koj lub npe rau kuv.”
Tiamsis nws teb Yakhauj hais tias, “Vim licas koj xav paub kuv lub npe?” Ces nws txawm foom koobhmoov rau Yakhauj. #Cthj 13:17-18
30Yakhauj hais tias, “Kuv twb pom Vajtswv timntsej timmuag lawm, tiamsis kuv tseem muaj sia nyob”; yogli ntawd, nws thiaj tis npe rau thaj chaw ntawd hu ua Peniyees.#32:30: Peniyees: Lub npe no hais muaj ntsis thooj li lolus Henplais uas hais tias “Vajtswv lub ntsejmuag.” 31Lub hnub tawm tuaj ces Yakhauj txawm sawvkev hauv Peniyees mus lawm. Nws mus kev cegtawv pluav rauqhov mob nws lub ntsag heev. 32Vimli ntawd niajhnub nimno cov Yixalayees thiaj tsis noj thooj nqaij leeg ntawm lub ntsag, rauqhov yog thooj uas tau raug ntaus lawm.
Právě zvoleno:
Chivkeeb 32: MWW2022
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2022 United Bible Societies. All rights reserved.