Khiav Dim 17
17
Dej Tawm Hauv Pobzeb Los
(Teev Npe 20:1-13)
1Tagnrho cov Yixalayees sawvkev ntawm tiaj suabpuam Xees los, lawv tshais chaw ib qho rau ib qho ua ntu zus rawsli tus TSWV tau xaaj tseg. Lawv los tsuam chaw so rau ntawm Lefidees, tiamsis qhov chaw ntawd tsis muaj dej haus. 2Lawv thiaj yws Mauxes hais tias, “Ciali nrhiav dej rau peb haus!”
Mauxes teb lawv hais tias, “Vim licas nej thiaj yws kuv? Uacas nej thiaj sim tus TSWV siab?”
3Tiamsis cov neeg nqhis dej heev, lawv thiaj pheej yws Mauxes tsis tseg li. Lawv yws hais tias, “Vim licas koj thiaj coj peb tawm hauv tebchaws Iziv los? Koj yuav ua kom peb thiab peb cov menyuam, thiab peb tej tsiajtxhu, tuag dej no lov?”
4Mauxes thiaj quaj qw thov tus TSWV hais tias, “Kuv yuav ua licas rau cov neeg no? Lawv twb tshuav muab pobzeb txawb kuv lawm xwb!”
5Tus TSWV hais rau Mauxes tias, “Coj cov Yixalayees tej thawjcoj qeeleej nrog koj, thiab nej ciali ua sawvdaws ntej mus. Nqa koj tus pas nrig uas koj siv nplawm tus Dej Nais nrog koj mus. 6Kuv yuav sawv ntawm koj hauvntej saum lub pobzeb uas nyob saum roob Xinais. Ciali ntaus lub pobzeb ntawd, dej yuav tawm hauv los rau cov neeg haus.” Mauxes tau ua li ntawd rau cov Yixalayees tej thawjcoj ntsiantsoov.
7Thiaj tis npe rauqhov chaw ntawd hu ua Maxas thiab Melinpas,#17:7: Maxas … Melinpas: Ob lub npe no lus Henplais txhais hais tias “simsiab” thiab “yws.” rauqhov cov Yixalayees tau yws thiab sim tus TSWV siab thaum lawv nug hais tias, “Tus TSWV nrog peb nyob los tsis nrog?” #Teev 20:2-13
Uarog Rau Cov Amalej
8Cov tubrog Amalej tau tuaj tua cov Yixalayees ntawm Lefidees. 9Mauxes hais rau Yausuas tias, “Koj ciali xaiv peb cov txivneej ibtxhia mus tua cov Amalej. Tagkis kuv yuav mus sawv saum ncov roob thiab tsa tus pas nrig uas Vajtswv kom kuv nqa.” 10Yausuas ua rawsli Mauxes tau xaaj rau nws thiab tawm mus tua cov Amalej, tiamsis Mauxes, Aloos, thiab Hawj lawv nce mus rau saum roob.
11Thaum twg uas Mauxes tsa nws txhais tes, no ces cov Yixalayees tua yeej, tiamsis yog nws tso nws txhais tes, no ces cov Amalej txawm tua yeej zujzus lawm. 12Thaum Mauxes tsaug npab lawm, Aloos thiab Hawj nkawd thiaj mus nqa ib lub pobzeb los rau Mauxes zaum, ces nkawd ib leeg sawv ib sab tuav Mauxes ob txhais npab, thiab tsa khovkho mus txog thaum hnub poobqho. 13Lawv ua li ntawd, Yausuas thiaj tua yeej cov Amalej.
14Ces tus TSWV hais rau Mauxes tias, “Ciali sau zaj no tseg cia, kom sawvdaws thiajli yuav nco tau. Ncontsoov qhia rau Yausuas paub tias Kuv yuav ua kom cov Amalej puastsuaj tag huv tibsi mus.” #2Kev 25:17-19; 1Xamu 15:2-9 15Mauxes ua tau ib lub thaj thiab tis npe rau lub thaj ntawd hu ua, “Tus TSWV yog kuv tus Chij.” 16Mauxes hais tias, “Tsa tus TSWV tus chij kom siab!#17:16: Nqe no sau hais tias Tsa tus TSWV tus chij kom siab; paub tsis meej tias lolus Henplais yog txhais licas tiag txog qhov no. Tus TSWV yuav tawmtsam cov Amalej ib tiam rau ib tiam mus ibtxhis!”
Právě zvoleno:
Khiav Dim 17: MWW2022
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2022 United Bible Societies. All rights reserved.