मत्ती 3
3
बप्तिस्मा बीम्ह यूहन्नां भिंगु खँ न्यंकाजूगु
मर्क १:२-८; लूक ३:१-१८; यूह १:१९-२८
1उगु हे इलय् बप्तिस्मा बीम्ह यूहन्नां यहूदियाया मरुभूमिइ वनाः 2थथे धकाः भिंगु खँ न्यंकाजुल –
“पश्चाताप या,
छाय्धाःसा स्वर्गयागु राज्य न्ह्यःने
थ्यंकः वःगु दु।”#मत्ती ४:१७; मर्क १:१५
3थ्व हे यूहन्नायागु खँ यशैया अगमवक्तां थथे च्वया थकूगु दु –
“मरुभूमिइ छम्ह मनू थथे धकाः
हालाः वइ –
‘प्रभुयात लँ ब्यु,
वय्कःयागु लँ छिंकाब्यु।’”#यशै ४०:३
4थ्व यूहन्नां उँटयागु सं थानातःगु वसः पुनातःगु दु। अले जँय् छेंगूयागु जनी चिनातःगु दु। वयागु नसा क्वःबुइँचा व गुँ कस्ति खः।#२ राज १:८ 5यरूशलेमं, यहूदियाया फुक्क गामं व यर्दन खुसिया जःखः च्वंपिं मनूत वयाथाय् वल। 6अले थथःगु पाप स्वीकार यानाः यर्दन खुसिइ यूहन्नापाखें बप्तिस्मा काल।
7यक्व हे फरिसीत व सदुकीत नं बप्तिस्मा कायेत वयाच्वंगुलिं वं इमित थथे धाल – “हे सर्पया सन्तान, परमेश्वरयागु तंपाखें बिस्युं वनेत छिमित सुनां ख्याच्वः बिल?#मत्ती १२:३४; २३:३३ 8पश्चाताप याःथें छिमिसं थःगु चालचलन नं अथे हे या। 9‘अब्राहाम हे जिमि बाः खः, उकिं जिमित छुं नं जुइ मखु’ धकाः धयाजुइ मते, छाय्धाःसा जिं छिमित धाये – परमेश्वरं अब्राहामया निंतिं थुपिं ल्वहँतं नं मस्त दय्कादी फु।#यूह ८:३३ 10सिमायागु हाप्वलय् पा लाये हे त्यंगु दु। उकिं भिंगु फल मसःगु सिमा पालाः छ्वय्काछ्वइ।#मत्ती ७:१९
11“जिं ला छिमित पश्चातापया निंतिं लखं बप्तिस्मा बियाच्वना। जिगु लिपा जि सिबय् तसकं तःधंम्ह झायाच्वंगु दु। जि ला वय्कःयागु लाकां ज्वनाजुइत तक नं मल्वः। वय्कलं हे छिमित पवित्र आत्मां व मिं बप्तिस्मा बियादी। 12वय्कलं ल्हातिइ हासा ज्वना तयादीगु दु। वय्कलं फुक्क छ्व हायाः थःगु धुकुतिइ स्वथनादी। अले छ्वस जुक्व गुबलें मसीगु मिइ छ्वय्कादी।”
येशूं बप्तिस्मा कयादीगु
मर्क १:९-११; लूक ३:२१-२२; यूह १:३२-३४
13येशू नं बप्तिस्मा कायेत गालीलंनिसें यर्दन खुसिइ यूहन्ना दुथाय् थ्यंकः झाल। 14यूहन्नां वय्कःयात थथे धकाः पनेत स्वल – “छिं जक जितः बप्तिस्मा बियादीमाः। छि जिथाय् झायादीयागु ला?”
15वय्कलं लिसः बियादिल – “आःयात थथे हे थजु। थुकथं झीसं फुक्क धार्मिकता पूवंके माःगु दु।” अले वं “ज्यू” धाल।
16वय्कः बप्तिस्मा कयाः उघ्रिमय् लखं थाहां झाल। उबलय् हे स्वर्ग चाल, अले वय्कलं परमेश्वरयागु आत्मा सुकुभतु थें जुयाः थःगु म्हय् जूवयाच्वंगु खन। 17अले स्वर्गं थथे धयाहल – “थ्व जि यःम्ह काय् खः, थ्व खनाः जि तसकं लय्ताः।”#उत २२:२; भज २:७; यशै ४२:१; मत्ती १२:१८; १७:५
Právě zvoleno:
मत्ती 3: NEW
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2024 Nepal Bible Society, Newa Christian
Literature Center and Wycliffe Bible Translators, Inc.