San Lucas 7
7
Jesús centuriónta sáulero tütek
(Mt. 8:5-13)
1Chúkula Jesús jü gentetau noksuka, pueblo Capernaumpo kibakek. 2Senu sontarommeu yäut áma jóakay ïri éntok nésaulerota áma jípurey íkäi éntok áapo tüisi ä nákkey, të mukiapo kökorey. 3Jü centurión, Jesústa bétana nokhuamta jíkkajaka, yorem yoiyöturim gente Israelpo joomem áu bíttuak áman ä núnuka ä nésaulerota ä jítto ïaaka. 4Huanärim bempo Jesústau yájaka, jiokot áu jiaahua, ínel jíakari:
—Ïri capitan íkäi át ä buanähuë áu yáapo yúmala, 5bueïtuk áapo juka itom génte nákke; huépü sinagogata itom yáariala.
6Huanäi Jesús ámemak siika. Të abe ä jóau ä yebisisey, jü centurión huate ä amiigohuam áu bíttuak, ínel jíakari:
—Señor, kate jáchin éiya, kanne áma näikiapo yúmala jum ín jóa jöta bétuk inou em nóitinakëhui. 7Huäri béchïbo ínapo kanne áman émou siika kaa tüisi ino ériaka. Ímïre ín jóa päku nésauta nooka, huanäi béja jü ín jóapo ín sáulero türinake. 8Ínapo két yäurata bétuk káttek, éntokne yäurata jípure. Huanäine huépü sontarotau ínel jiaunake huëe, huanäi huéenake; senukuhui éntok binë huéiye, huanäi inou huéenake; éntok ín sáulerota jita nee ä yáa sáhuëu, ä yáanake.
9Huanäi Jesús, íkäi jíkkajaka át guómtek, huanäi jume géntem ä guojaasemmeu kúakteka ínel jiaahua:
—Ínapone én ínel jiaahua, Israelpo júnene kaa ínëli úttesi Diostat ehuamta téula ï yoremtat bénasi.
10Huanäi jume áman sáyhuakäme jóau nótteka, huaka kökoremta türilata téuhuak.
Jesús jámut jókoptulata asoa jíabitetuak
11Chúkula Jesús jü pueblo Naín tí téhuakäu bíchaa huéiyey, jume ä discíipulommaki éntok juebena gentetamaki. 12Pueblopo áman kíkkimuhuäpo ä yepsako, mukilata hueriyhuamta bitchak, ä mäabokam kaatey, ï mukila jámut jókoptula ä asoakay kaabeta éntok jípurey. Juebénaka huate áamak kaatey pueblopo jóakame. 13Huanäi Señor ä bíchaka, ä jiokoleka, ínel áu jiaahua:
—Katë buaana.
14Huanäi jü ánimatau rúkteka kajat mámtek; huanäi jume ä huériame jáptek. Huanäi Jesús mukilatau ínel jiaahua:
—Jübua yötume, émoune ínel jiaahua: ¡Yejtëe!
15Huä mukilatukäu yejteka nok táytek, huanäi Jesús ä áyehuata ä mákkak. 16Íkäi bíchaka, sïmetaka guómtilataka taahuak, éntokim Diosta úttil táytek, ínel jíaka:
—Senu profeeta kaa náksi yörisi machika ito násuk áu tóboktiala.
Ínëlim ket jiaahua:
—Dios ä pueblo ania báreka äbo kóm yebij‑la.
17Huanäi sïme Judea buiärapo éntok áa chíkola jíkkaijhuak juka Jesústa yáakähui.
Juan Bautistata bétana Jesústau sáyhuakäme
(Mt. 11:2-19)
18Juan Bautistata íkäi jita sïmeta bemelasi huémta ä jüneriak, bueïtuk jume ä discíipulom ä ejtejhuariak. Huanäi guoy ä discíipulom núnnuk, 19huanäi Jesústau am jaasek ä temaij ïaaka: ¿Jachu áapörik ájäriatukähui jü Cristo yebijnakeme, o täbuik bem boobinnakëhui? 20Jume Juanta áman jaasekäu, Jesústahuim rúkteka, ínel áu jiaahua:
—Juan Bautista itom émou bíttuak enchi itom temaij ïaaka: ¿Jachë émpotuk ájäria jäni jü Cristo yebijnakeme, öte täbuik boobinnake?
21Sep huämï horapo, Jesús juebena kökoreme éntok juëna kökoata jípureme tütek, éntok kaa türi espíritum jípureme yeu am béb‑riak, éntok két juebena liliptim bíttuak. 22Huanäi Jesús ínel am yómmiak:
—Sájakem juka enchim bíchakäu ä ejtejhuaria juka Juanta éntok enchim jíkkajakähui. Jume liliptim bitcha; jume lolöim naa kaate; éntok huame sähua lepra téamta jípureme türia, nanakapim jíkkaja, kókkolam jíabite, éntok huaka nokta yore jínëuhuamta bétana huémta poloobemmeu nokhua. 23Tühuata jájamla jü nee súaleka kaa áu náyoteme.
24Jume Juanta áman jaasekäu am sákasuk, Jesús jume géntemmeu nok táytek jü Juanta bétana, ínel jíaka:
—¿Jítasem bít báreka éiyay jum see päriapo? ¿Júya bakuliata jekay yoohuamta jäni? 25Éntok jútchi, ¿jitasem bít báreka áman yeu sájjak? ¿Senu yoremta tülisi sánkokamta jäni? Të jume ujyorisi tülisi sánkokame, éntok jume tülisi kaitat obisi éaka, éntok sïmeta jípureka ímï buíapo jiápsame, reyim jóapom aane. 26Të, ¿jitasem bít báreka áman yeu sájjak? ¿Senu profeeta Diosta bétana nokamta jäni? Jeehui, tua lútüriapo senu profeetata béppa chë yörisi maachik. 27Ïri Juanta bétana huéeme jiöjteri:
In noki huériamtane emopat jaase,
juka böota em huéenake páman tütenakë béchïbo.
28Enchimmeune nooka sïme géntem násuk kaabe chë yörisi maachi jü Juan Bautistata béppa; të júnentaka junne, huam Diosta reytaka nésahuepo jü chë ilitchisi ériahuame huäri chë yörisi maachi áa béppa.
29Huanäi íkäi jíkkajaka, sïme gente éntok jume impuestom tómi náu totojame, Juanta batöhuamta mabet‑latukäihui, Diostam súsualek éntokim ä lútüria tíaka taahuak. 30Të jume pariseerom éntok huame leyta am mamajtíame, katim Juantau emo batötebokähui, inëlim béja kaitapo ä yáuhuak juka Diosta áme bétana näikiari. 31Huanäi Señor ínel jiaahua:
—¿Jábeta bénasine am bínnake jäni, jume yoremem én kat‑riame? ¿Éntok, jita bénamsamme? 32Jume usim pláazapo jokame bénasim ántuari entok náu nokaka éntok ínel jíame: ‘‘Baka kusiaite enchim jiponriak të eme kaa yëkak. Buikimte siroksi machisi jíame enchimmeu buiikak jiöbe të eme kaa buaanak.” 33Bueïtuk Juan Bautistata yepsak, kaa páanim buäyey éntok kaa vino jëyey, huanärem Juanta lemooniota ä jiápsipo jípurë tíiya. 34Huanäi jü Yoremta Üusi ím yepsak, jïbuäka éntok vino jëyeka; huanärem ínel jiaahua, ï yoreme tepa jíjjïbuä éntok vino jejëye. Jume yäura tómita náu tóij‑lerommaki éntok jume kaa Diosta yöremmaki tüisi áu huéria. 35Jü kóba súahua Diosta bétana huéeme ä üusimmet bíttu.
Jesús, Símon pariserota jóapo aane
36Senu parisero juka Jesústa jïbuä núnnuk, huanäi ä jóau kibakeka mesau yejtek. 37Huanäi senu jámut áma pueblopo jóakame kaa tühuata boojoriaka, jünéaka Jesústa Símonta jóapo mesau kátekäu, ili téta sótöpo perfumeta musäla jubak, áma nüpak. 38Áma bétana áu sika ä guókpo áu yejtek, buanaka ópuammea ä kómoniria táytek jume guókkim. Ëntok ä chonimmea am huaachaka, am bebesiitoy éntok bäa musäla jubak ámet töak. 39Jü parisero Jesústa jïbuä núnulame íkäi bíchaka, ä jiápsipo ínel éiyay: “Ï yoreme tua profeetatuko, ä jüneria éiyey ä jábe jámuttukähui, ï jámut chïcha machik jiápsek, éntok kaa tü böota boojoria, éntok áachä mámmatua.” 40Huanäi Jesús ínel áu jiaahua:
—Símon, senu huémtane émou nok báare.
Huanäi ínel áu jiaahua:
—Nokäe, Maestro.
41Huanäi Jesús ínel áu jiaahua:
—Senu yoreme guoy yoremem tómita am réuhuakäy. Huépülaka mamni cien denariom ä huikiriiyay, senu éntok cincuentam. 42Huanärim kaitay ä béjtua máchika taahuak. Të áapo náhuichim jiokorek junëlim béja kaita ä huikiriaka taahuak. Nokäe, ¿bueïtuk jábesu júntuk chë júne ä nákeka taahuak?
43Símon ä yómmiaka ínel áu jiaahua:
—Jíba tua jü chë juebena tómit jiokorihuakame.
Jesús ínel áu jiaahua:
—Tepë tüisi ammäli jiaahua.
44Huanäi Jesús, jámuttau kúakteka, Símontau ínel jiaahua:
—¿Íkäi jámuttë bitcha? Em jóaune kibakek, të bäam júne kaa nee miikak ín guókim béchïbo; të ï jámut ín guókim ä ópuammea kómoniala, éntok ä chonimmea am huaachak. 45Katë nee besiitok, të ï jámut éntok, nee ím yepsak naateka, kaa chúkteka ín guókim bebesiito. 46Katë aceiteta júne kóbat inot huáttiak; të ï jámut bäa musäla jubak ín guókimmet huáttiak. 47Huäri béchïbone ínel émou jiaahua, jume ä yún Dios bejrimmet jiokorituri; bueïtuk tüisi kaa béttek ä jiápsekä béchïbo. Bueïtuk hua jábe kaa jaiki béchïbo jiokorihuakame, kaa tua jábeta nákke.
48Huanäi Jesús jü jámuttau ínel jiaahua:
—Béjë jiokorihuak em Dios bejrim bétana.
49Huanäi jume mesau áamak jokame, náhuim ínel jiau táytek:
—¿Jábesa ïri, jume Dios bejrim júne jábeta jiokoreme?
50Të áapo jámuttau ínel jiaahua:
—Jü chíkti em jíapsimak Diosta em súalekäu enchi jínëuk. Kaitachë jáchin éaka huéiye.
Právě zvoleno:
San Lucas 7: mfy
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2014, Wycliffe Bible Translators, Inc. All rights reserved
