Tongo nda ti aye 4
4
Kain na Abel
1Adam na wali ti lo Eve aduti si wali ni amu ngo. Lo du Kain si lo tene: “KOTA GBIA amu na mbi lege ti wara zo.” 2Na pekoni lo du Abel, ita ti Kain.
Abel ayeke wabatango-taba; Kain ayeke wafango-yaka. 3Na peko ti mbeni ngoi, Kain aga na ambeni kobe ti yaka ti lo, lo mu na *sandaga na KOTA GBIA. 4 Abel nga aga na akozo molenge ti anyama ti lo so ayeke na mafuta mingi, lo mu na sandaga na KOTA GBIA. KOTA GBIA ayamba Abel na sandaga ti lo na ngia. 5Me lo yamba Kain na sandaga ti lo na ngia pepe. Kain asara ngonzo ngangu mingi si lo yeke kanga ndö ti le ti lo. 6KOTA GBIA atene na Kain: “Mo yeke sara ngonzo ngbanga ti nyen? Ngbanga ti nyen si mo yeke kanga ndö ti le ti mo tongaso? 7Tongana mo sara ye nzoni, fade mo yeke duti na ngia. Me tongana mo sara ye sioni, siokpari ayeke lango na yanga ti da ti mo ti ku mo. Lo yeke na nzara ti mo. Ti mo, alingbi mo hon ndö ti siokpari ni.”
8 Tongaso Kain atene na ita ti lo Abel: “E gue na yaka.” Kâ na yaka ni, lo ti na ndö ti ita ti lo Abel si lo fâ lo.
9KOTA GBIA ahunda Kain, atene: “Ita ti mo Abel ayeke na ndo wa?” Kain akiri tënë, atene: “Mbi hinga? Mbi laa mbi yeke bata ita ti mbi ni?” 10 Tongaso KOTA GBIA atene: “Nyen laa mo sara tongaso? Dekongo ti mene ti ita ti mo so mo tuku so, alondo na sese kâ, aga ngbii asi na mbi ge. 11 Sese azi yanga ti lo si ayamba mene ti ita ti mo so mo fâ lo so. Fadeso, a deba mo si a tumba mo na ndö ti nzoni sese ni awe. 12Tongana mo de sese ti lu kobe daa, sese ni ayeke le kobe mingi pepe. Fade da ti li ti mo ayeke duti daa pepe; mo yeke tambula gi kirikiri na ndö ti sese.”
13Kain atene na KOTA GBIA: “Ngbanga so a fâ na li ti mbi so, ane ahon ndö ti mbi. 14Tongana mo tumba mbi na ndö ti sese so, fade mbi yeke honde tere ti mbi yongoro na le ti mo. Da ti li ti mbi ayeke duti daa pepe; mbi yeke tambula gi kirikiri na ndö ti sese. Fade zo so kue ayeke wara mbi ayeke fâ mbi.” 15KOTA GBIA atene na lo: “Oko pepe! Tongana mbeni zo afâ mo Kain, fade a fâ azo mbarambara si alingbi na kuâ ti mo.”
KOTA GBIA asara mbeni nzoroko na tere ti Kain titene zo so awara lo afâ lo pepe. 16Tongaso Kain ague yongoro na le ti KOTA GBIA, lo sara kodro na sese ti Nod, na mbage ti To ti Eden.
Ahale ti Kain
17Kain aduti na wali ti lo. Wali ni amu ngo si lo du Henok. Kain ato nda ti lekengo mbeni gbata; lo mu iri ti molenge ti lo Henok, lo zia na ndö ti gbata ni. 18Wali ti Henok adu na lo Irad. Irad adu Mehuyael. Mehuyael adu Metushael. Metushael adu Lemek.
19Lemek amu awali use. Iri ti mbeni wali ni ayeke Ada si iri ti mbeni ayeke Sila. 20Ada adu Yabal. Yabal si ayeke kotara ti azo so ayeke lango na gbe ti ada ti bongo si ayeke bata anyama so. 21Iri ti ita ti lo ayeke Yubal. Yubal si ayeke kotara ti azo so kue ayeke pika kundi si ayeke huru *ngoli so. 22Ti Sila, lo du Tubal-Kain. Tubal-Kain laa ayeke zo ti pikango ndao, lo yeke mu bengba wen nga na wen ti leke na aye so kue yanga ni aza zango. Iri ti ita ti Tubal-Kain ti wali ayeke Naama.
23Lemek atene na awali ti lo:
“Ada na Sila, ala ma mbi si!
Ala, awali ti Lemek, ala dingi mê ti ala,
ama tënë ti mbi!
Tongana a pika mbi, fade mbi yeke fâ zo.
Tongana a zia ka na tere ti mbi,
fade mbi yeke fâ mbeni molenge.
24Biani, fade a kiri peko ti sioni
so zo asara na Kain so
fani mbarambara.
Me ti Lemek, fade a kiri na ni
fani balembarambara na mbarambara.”
25Adam akiri aduti na wali ti lo. Lo du mbeni molenge-koli si lo di iri ti lo Set. Lo tene na be ti lo, lo tene: “Nzapa amu na mbi mbeni molenge na plase ti Abel so Kain afâ lo awe.”
26Set nga adu molenge-koli si lo di iri ti lo Enos. Na ngoi ni laa azo ato nda ti sambela Nzapa, ti iri lo KOTA GBIA.
Právě zvoleno:
Tongo nda ti aye 4: MNF2010
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© La Société Biblique de Centrafrique 2010