Akintaahsonan 11
11
Kapehshiwin Kaashipiskanek Kaakii'icikaatek
1Isriyala' (Israel) itahsh okii maanshi kakanoonikoo' kaaTipenciketc ekiih tashintamaakotc omaanshihsewinini. Ahpii tahsh enoontawaatc wiinke okii nishki'ikoo'. Otishkotem okii ishinisha'aan ci‑ishi piskanenik mekweya'ii eshi'ayaanitc. Aaninta tahsh kiihtashi caakisowa' saakicaya'ii kaakii ishi kapehshiwintc. 2Pemaatisinitc itahsh Moosihs (Moses) okiih kanoonikoo', miitahsh kaaishi anami'ehtawaatc kaaTipencikenitc. Miitahsh i'i ishkote kaaishi aahtawenik. 3Miitahsh kaakii onci ishinihkaatek i'i kapehshiwin “Kaashi piskanek” (Taberah),#11.3 “Kaashi piskanek” (Taberah): I'iwe Taapera kaa'icikaatek, taapishkoo kekoon kaapiskanek, mii 'iwe enihtaakwaninik kaaishikiishwewaatc Hiiparoowak. aaniihsh mii 'imaa kaaTipenciketc otishkotem kaakii ishi piskanenik eshi'ayaanitc pemaatisinitc.
Moosihs Kii'onaapamaatc Niishwaahsimitana Keniikaanisinitc
4I'i tahsh kaakii nihtaa kihci kaakiikitonitc kaamayakisinitc kaakii wiiciiwikonitc okii mihsawentamini kotak miicim, miitahsh kaye Isriyala' peshikwan kaaishi maanshi kakitonitc o'o ekii ihkitonitc, “Awenen itahsh inaa kemiininank wiiyaahs cimiiciwank? 5Nimaamihkawimin hsa weti kiiayaayaankipan Iicipahkiink (Egypt) ekii nihtaa amwaankitwaapan kiikooyak kekoon ekii inakinsohsikwaa. Ninkii nihtaa miicimin hsa askipako nihtaawikihcikanan (cucumber, melons), shikaakomishiik (onions), shikwa mayaki shikaakomishiik (leeks), kaarlik (garlic) kaye. 6Kaawiin itahsh noonkom awahshime nintinentansiimin ciwii wiihsiniyaank. Kaawiin hsa wiihkaa kekoon niwaapantansiimin, mii ehtako wa'a mena (manna) weyaapamankitc,” kii‑ihkitowa'.
7 #
Exo 16.31. A'a hsa mena kii‑ishinaakosi taapishkoo koriyaantar (coriander) tino ahkantaamin, taapishkoo kaye pikiw. 8Pemaatisiwaatc hsa okii nihtaa maamooshakinaawaan, pikishkipoocikanahsiniink itahsh okii ishi pikishkipoonaawaan. Ahsiniink kaye okii ishi pahpahkihtehshimaawaan, ahkihkonk itahsh okii ishi kapaahshimaawaan kekwan hsa ekii onci oshi'aawaatc. Taapishkoo kekoonhs pimitenk kaashi kiishisontc, aamoowi siinsipaahkwat ehtakoncikaatek kii‑ihpokosi a'a mena. 9Ahpii hsa kiipakami ayaak i'i kaashahki'ayaak kiitipihkahk, mii hsa kaye i'imaa mena kaaishi tako pakamishkaatc.
10Moosihs itahsh okii noontawaa' kahkina pemaatisinitc ekihci kaakiikitonitc, entahshinitc eayohkokaapawinitc eshi ayiishkwaantemiwaninikin opakwaanekamikoniink. KaaTipencikenitc itahsh wiinke kiinishkaatisiwan. Kaawiin itahsh Moosihs kewiin kiiminwentansii. 11Miihsh o'o kaa'inaatc kaaTipencikenitc,
“Wekonen itahsh wenci sanaka'iyan,
kitanohkii'aakan itahsh ehtinowiyaan?
Aaniin itahsh kaaishihcikeyaan wenci minwaapamihsiwan?
Wekonen itahsh wenci tootawiyan
niin kahkina ciopapaamisiwiniyaan oko pemaatisiwaatc?
12Niin ina ninkii oshi'aak iki pemaatisiwaatc?
Niin ina ninkii nihtaawiki'aak cionci'ishiyampan,
‘Kinihkink ishi pimiwish taapishkoo kaanoona'aawaahsotc
kaashi pimiwinaatc apinoonciishan,
ci‑ishiwinakwaa weti ahkiink
kaakii ishi ayiici ahshotamawimatc okehteya'aamiwaapanii'?’
13Aaniinti tahsh keontinamowakipan wiiyaahs
kahkina ciahshamakwaapan oko pemaatisiwaatc?
Mii hsa mooshak eshi mamayehciwiwaatc e'ishiwaatc,
‘Wiiyaahs ahshamihshinaam kemiiciyaank!’
14Kaawiin hsa nintaa kashkihtoohsiin kahkina cipimiwinakwaapan oko pemaatisiwaatc,
onsaam sanakan niin ehta i'i ci‑ishihcikeyaampaan.
15Kiishpin itahsh i'i nahke wiihtootawiyan,
intawaa noonkom shemaak iko nihsihshin.
Kiishpin itahsh menwaapamiwanen
keko hsa pakitinihshihken ciwaapantisoyaan cimaanshihseyaan,”
kii‑ihkito.
16Miitahsh o'o kaaTipencikenitc kaa'ikotc, “Maawatoonamawihshin niishwaahsimitana (70) ininiwak kehkenimatwaa keani niikaanentaakosiwaatc, keni okimaahkantaakewaatc kaye, ciontinatwaa eshi'ayaanitc kaaniikaanisinitc Isriyala'. Piinaahkatwaanik itahsh maawaci'itiwi pakwaanekamikonk, miitahsh keshi wiicikaapawihtawihkwaa. 17Miitahsh weti keshi naashiiyaan, cikakanooninaan. A'a tahsh Ahcaahk kaakikishkawatc niwii onci otaahpinaa, ewii miinakwaa iki ininiwak. Miiwak itahsh iki kewiici'ihkwaa cipimiwitoowaatc i'i kaaishi opapaamisiwiniwatc pemaatisinitc onci, kaawiin itahsh kiin ehta i'i kika ishihcikehsii. 18Miihsh o'o ke'inatwaa pemaatisiwaatc, ‘Pehki'itisok hsa cikwayaanciiyek kaawii ishihsek waapank; mii hsa 'i cimiiciyek wiiyaahs. KaaTipenciketc ohsha kinoontaakowaa i'i kaashi mamayehciwiyek eihkitoyek, “Ampehsh awiya ahshamiyamintc wiiyaahs, nawac iitok ninkii minohsemin weti Iicipahkiink kiiayaayaankipan!” KaaTipenciketc itahsh kiwii miinikowaa wiiyaahs, miitahsh i'i cimiiciyek wiiyaahs. 19Kaawiin itahsh wiin ehta peshiko kiishik, niishokiishik, naano kiishik, mitaahso kiishik, niishtana tahso kiishik kika miicihsiim i'i wiiyaahs. 20Peshiko kiisihs ihsa kominihk kika miicim, piinihsh kihshankwaniwaank cionci saakicishkaak. Piinihsh kaye cini aanihsentamek aaniihsh onsaam kikii aanawenimaawaa kaaTipenciketc eyaatc eshi'ayaawek o'o ekii'inek emamayehciwi'ek, “Wekonen itahsh kaaonci nakatamaank Iicipahki?” ’ ”
21Miihsh o'o Moosihs kaaihkitotc, “Inashke o'omaa nintayaa eshi'ayaawaatc oko pemaatisiwaatc ninkotwaahswaahk mitaahswaahk teshiwaatc kaamihtohsewaatc, o'o tahsh e'ishiyan, ‘Ninka ahshamaak hsa wiiyaahsini kemiiciwaatc peshiko kiisihs minihk!’ 22Tatepihse na wiiyaahs ciahshamintwaapan kiishpin nihsimintipan kahkina maanahcaanihsha', pishihkiwa' kaye? Tatepahshamaawak ina kiishpin kahkina kiikooya' eyaanitc kihcikamiink maamooshakinimintc?” okii'inaan.
23O'o tahsh kaaTipencikenitc okii ishi nahkwehtaakoon, “Akaahsentaakwan ina nimashkawisiiwin. Aahpici hsa wiipa kika waapantaan o'o kaa'ininaan ci‑ishihsekwen, komaa kaye ci‑ishihsehsinokwen,” okii'ikoon.
24Moosihs itahsh kii‑ishaa ekii awi wiintamawaatc pemaatisinitc aaniin kaaihkitonitc kaaTipencikenitc. Okii ohkonaa' itahsh kaye niishwaahsimitana (70) kekii niikaanisinitc ekii ontinaatc eshi'ayaanitc oniikaanisii'. Miitahsh kaaishi waahkaa kaapawi'aatc i'imaa maawaci'itiwi pakwaanekamikonk. 25Miitahsh kaaTipencikenitc wahkwiink kaakiih pishi naashiinitc ekiih kakanoonikotc. Miihsh kaaonci otaahpinaanitc ahcaahkwan kaakiih kikishkawaatc, ekii miinaanitc i'i niishwaahsimitana (70) kaaniikaanisinitc. Ahpii kaaotihsikonitc ini ahcaahkwan, shemaak hsa okiih kanootamawaani Kishemanitoon, kaawiin miinawaa okiih kashkihtoohsiini i'i ci‑ishihcikenitc.
26Niishin itahsh iki kaakii niishwaahsimitanawewaatc Eltaat (Eldad) eshinihkaasotc, a'a kaye Miitaat (Medad), kiiapiwak i'imaa eshi kapehshiwintc, kaawiin kii‑ishaahsiiwak maawaci'itiwi pakwaanekamikonk. Kewiinawaa hsa kiihtako inakinsowak eniikaanisiwaatc. Ahcaahkwan itahsh okii otihsikowaan, miihsh kaaishi kanootamawaawaatc Kishemanitoon. 27Peshik itahsh oshkiniikiwan kiiahpahtoowan eshi'ayaatc Moosihs o'o ekii'ikotc, “Eltaat, a'a kaye Miitaat hsanaa okanootamawaawaan Kishemanitoon weti eshi kapehshiwintc,” okii'ikoon. 28Caahshowaan (Joshua) tahsh, wetetenitc Nanan (Nun), eoshkiniikiiwinitc kaakiih pi'onci wiici'ikotc, o'o okii'ikoon, “Nintookimaam Moosihs, taka onci' i'i ci‑ishihcikehsikwaa,” okii'ikoon.
29Miihsh Moosihs kaa'inaatc, “Kitoonci aayaashentam ina niin onci? Miitahsh niin eshi mihsawentamaan kaaTipenciketc cimiikiwaakehpan otAhcaahkwan, cimiinaahpan i'i kahkina opimaatisiima', kahkina tahsh citinowinihpan kaakanootamawaanitc Kishemanitoon,” okii'inaan. 30Miitahsh Moosihs, iki kaye kaakii niikaanisiwaatc kaaishi kiiwewaatc eshi kapehshiwintc.
KaaTipenciketc Kii'ishinisha'waatc Mayakipine'
31KaaTipenciketc itahsh kii‑ishihcike cikihci nootininik, kihcikamiink itahsh inahke kiionci piiciwepaashiwa' mayakipine'. Misiwe hsa waahkaaya'ii eshi kapehshiwintc kii‑ishi pooniiwa'. Peshiko kiishik minihk eshaank ekii anikohkwahteshkaanitc, nihsomisit ekii ahpiihta'aminitc. Waahkaaya'ii kaaishi kapehshiwintc kii‑ishi pooniiwa'. 32Miitahsh pemaatisiwaatc kapekiishik, kapetipihk, kapekiishik kaye eani waapaninik kaakii maamooshakinaawaatc i'i mayakipine'. Kaawiin hsa awiya noonta' nihsimitana kihci mashkimotan cikii mooshakiniketc. Miitahsh misiwe waahkaaya'ii eshi kapehshink kaaishi waahkaashimaawaatc cipaahsonitc. 33Mekwaa tahsh cipwaa shaashaakwantamowaatc i'i wiiyaahsini, mii hsa 'i kaaTipencikenitc kaakii nishki'aawaatc. Miitahsh kaakiih tootaakowaatc wiinke cikihci wahsitaawihsewaatc. 34Miitahsh kaaonci ishinihkaatek i'imaa kaakii ishi'ayaawaatc, “Kaashi na'inintwaa Otaaskonisiik” (Kibroth hattaavah), aaniihsh mii 'imaa kaakii ishi na'inintwaa pemaatisiwaatc kaakii aaskonentamowaatc wiiyaahs.
35Miitahsh i'imaa ecikaatenik “Eshi na'inintwaa Otaaskonisiik” kaaonci maacaawaatc weti ekii ishi takohshinowaatc Hesiiraaht (Hazeroth) ecikaatenik, miitahsh i'imaa kaaishi kapehshiwaatc.
Právě zvoleno:
Akintaahsonan 11: OJBR
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Ojibwe Shorter Bible (Roman Script) © 2008 Canadian Bible Society