ᐊᑭᑖᓱᓇᓐ 24

1ᒦᑕᔥ ᐯᓬᐊᒻ Balaam ᑳᑮ ᑭᑫᑕᕽ ᐁᐃᔑ ᒥᓍᐸᑕᒥᓂᒡ ᑳᑎᐯᒋᑫᓂᒡ ᒋᒥᓄᓭᐋᓂᒡ ᐃᔅᕒᐃᔭᓬᐊᐞ Israel, ᑳᐐᓐ ᐅᑮ ᓇᓈᑐᒫᓰᓐ ᑎᓄ ᒣᒫᑖᐎᓯᓂᒡ ᑳᑮ ᓂᑖ ᐃᔑᒋᑫᐸᓐ᙮ ᐌᑎ ᑕᔥ ᐃᓇᑫ ᐁᔑᐊᔮᓂᒃ ᐱᑾᑕᑲᒥᒃ ᑮᐃᓈᐱ᙮ 2ᒦᑕᔥ ᑳᑮ ᐙᐸᒫᒡ ᐃᔅᕒᐃᔭᓬᐊᐞ ᐁᔑ ᐯᐸᑳᓉᐙᓇᑭᓯᓂᒡ ᐁᐃᔑ ᐊᔪᑯ ᑲᐯᔑᓂᒡ᙮ ᒦᔥ ᑳᑮ ᐅᑎᓯᑯᒡ ᑭᔐᒪᓂᑑᓐ ᐅᑕᒑᑯᓂ᙮ 3ᒦᑕᔥ ᐯᓬᐊᒻ ᑳᑮ ᒫᒌ ᑳᑮᑭᑐᒡ ᐅᐅ ᐁᑮ ᐃᑭᑐᒡ,

ᒦ ᓴ ᐅᐌ ᐁᑭᑐᔮᓐ ᓃᓐ ᐯᓬᐊᒻ ᐌᑌᑌᔮᓐ ᐲᐅᕒ,

ᐁᑭᑐᔮᓐ ᓃᓐ ᐃᓂᓂ ᓀᐋᐱᒡ,

4ᒦ ᓴ ᐁᑭᑐᔮᓐ

ᑳᑮ ᐃᔑ ᓅᑕᐗᒃ ᑭᔐᒪᓂᑑ ᐁᐃᑭᑐᒡ,

ᐃᔑᓇᒧᐎᓂᕽ ᓴ

ᓂᑮ ᐃᔑ ᐙᐸᒫ ᑳᒫᐗᒋ ᒪᔥᑲᐎᓰᒡ, ᐁᑮ ᑲᐎᓭᔮᓐ,

ᔖᑰᒡ ᐃᑕᔥ ᓂᑮ ᐃᔑᐃᑰ ᒋᐙᐱᔮᓐ᙮

5ᐁᑕᑕᐌ ᓴ ᒉᑲᐳᕽ ᐌᑕᑳᓀᓯᐙᒡ

ᐊᔪᓂᔑᔑᓂᓂᐙᓐ ᐅᐸᒀᓀᑲᒥᑯᐙᓐ ᐁᔑᑖᐙᒡ ᐃᔅᕒᐃᔭᓬᐊᒃ᙮

6ᑖᐱᔥᑰ ᑳᑮᓍᐲᑲᒧᐙᒡ ᒥᑎᑰᒃ

ᑯᒫ ᑲᔦ ᑭᑎᑫᐎᓐ ᐃᒫ ᐃᓇᑫ ᓰᐱᕽ

ᑖᐱᔥᑰ ᑳᒥᓄᒫᑯᓯᓂᒡ ᒥᑎᑰᓴᐞ

ᑳᑮ ᑭᑎᑳᓈᒡ ᑭᔐᒪᓂᑑ

ᑯᒫ ᑲᔦ ᑮᔥᑳᑎᑰᒃ ᐃᒫ ᐃᓇᑫ ᓂᐲᕽ᙮

7ᒨᔕᒃ ᐃᓴ ᑕᑭᒥᐗᓂᓂ ᑫᔑᐊᔮᐙᒡ,

ᑫᔑ ᒥᓄ ᔖᐳᐲᑲᒥᑳᓂᒃ ᐃᑕᔥ

ᐅᑲ ᐊᔨᔑ ᑭᑎᑳᑖᓈᐙᓐ ᑭᑎᑳᓀᓴᓐ᙮

ᐅᑭᒋ ᐅᑭᒫᒥᐙᓐ ᓴ ᓇᐗᒡ ᑕᑭᒋ ᐃᓀᑖᑯᓯᐗᓐ

ᐊᐲᒡ ᐐᓐ ᐃᓂ ᐁᑲᒃ ᑳᑮᐃᓂᒥᓐᒡ ᑭᒋ ᐅᑭᒫᓐ,

ᑫᔑ ᑎᐯᒋᑫᒡ ᓴ ᑕᐃᔥᐯᑖᑾᓂᓂ᙮

8ᐄᒋᐸᑮᕽ ᓴ ᐅᑑᒋ ᓵᑭᒋᐎᓂᑯᐙᓐ ᑭᔐᒪᓂᑑᓐ,

ᐅᒦᑳᓲᑕᒫᑯᐙᓐ ᑲᔦ

ᐁᓀᑖᑯᓯᓂᒡ ᑖᐱᔥᑰ ᐱᔑᑭᐗᓐ ᒣᔥᑲᐌᑖᑯᓯᓂᒡ᙮

ᐅᔖᑰᒋᐋᐙᐞ ᓴ ᑳᔒᑫᓂᒥᑯᐙᒡ,

ᐅᐴᐴᑯᑲᓀᔥᑲᐙᐙᐞ ᑲᔦ,

ᐅᐱᑾᑯᐙᓐ ᓴ ᐅᑖᐸᒋᑑᓈᐙᓐ ᐁᔖᑰᒋᐋᐙᒡ᙮

9 # Gen 49.9; Gen 12.3. ᒦ ᓴ ᐁᓀᑖᑯᓯᐙᒡ

ᑖᐱᔥᑰ ᒥᔑᐱᔑᐤ ᑳᐸᐱᒥᔑᕽ,

ᐊᐌᓀᓇᓐ ᐃᑕᔥ ᑫᑲᔥᑭᑌᐁᓂᐸᓐ ᒋᐊᒪᒋᐃᑯᒡ?

ᐊᐌᓀᓐ ᓴ ᐃᑯ ᑫᒥᓋᑭᒫᒡ ᐃᔅᕒᐃᔭᓬᐊᐞ,

ᒦ ᓴ ᐊᐌ ᑫᒥᓄᓭᐗᑭᓱᒡ,

ᐊᐌᓀᓐ ᐃᑕᔥ ᐃᑯ ᑫᒪᒐᑭᒫᒡ ᐃᔅᕒᐃᔭᓬᐊᐞ,

ᒦ ᓴ ᐊᐌ ᑫᒪᒐᑭᒥᓐᒡ, ᑮᐃᑭᑐ ᐯᓬᐊᒻ᙮

10ᐯᓬᐊᒻ ᐃᑕᔥ ᐐᑫ ᐅᑮ ᓂᔥᑭᐋᓐ ᐯᓬᐊᑰᓐ, ᒦᔥ ᑳᔑ ᐸᓯᓂᒌᐅᑎᓱᓂᒡ ᐁᑮᐃᑯᒡ, ᐯᓬᐊᒻ, ᑭᑮ ᐊᑐᒥᓐ ᐅᔕ ᒋᒪᒐᑭᒪᑣ ᑳᔒᑫᓂᒥᐙᒡ᙮ ᑌᑾᒡ ᐃᑕᔥ ᒦ ᐃ ᐁᔑᒋᑫᔭᓐ ᓃᔣ ᐁᐃᓇᑣ ᒋᒥᓄᓭᐙᒡ᙮ 11ᒫᒑᓐ ᐃᑕᔥ ᐊᓂ ᑮᐌᓐ᙮ ᑭᑮᐃᓂᓐ ᐄᑐᒃ ᐁᐐ ᑭᒋ ᑎᐸᐊᒪᐎᓈᓐ, ᑳᑎᐯᒋᑫᒡ ᑕᔥ ᑭᒦᑖᑴᓂᒃ ᒋᑮ ᑎᐸᐊᒫᑰᔭᐸᓐ, ᐅᑮᐃᑰᓐ᙮

12ᒦᑕᔥ ᐅᐅ ᐯᓬᐊᒻ ᑳᐃᔑ ᓇᑴᑕᕽ, ᓂᑮ ᐐᑕᒪᐙᒃ ᐄᑐᒃ ᐃᓂᓂᐗᒃ ᑳᑮ ᐲᒋᓂᔕᐊᒪᐎᔭᓐ, ᐅᐅ ᐁᑮ ᐃᓇᒀᐸᓐ, 13ᑮᔥᐱᓐ ᓴ ᐯᓬᐊᒃ ᒦᔑᒡ ᒥᓂᒃ ᐅᓵᐎ ᔔᓂᔮ ᐙᐱᑰᓐ, ᐙᐹᐱᑯ ᔔᓂᔮ ᐙᐱᑰᓐ ᒋᒨᔥᑭᓀᓂᒡ ᐅᐙᑳᐃᑲᓂᕽ, ᑳᐐᓐ ᓴ ᓇᐹᒡ ᓂᑖ ᐃᔑᒋᑫᐙᓰᓐ ᐁᓈᑯᓂᑫᒡ ᑳᑎᐯᒋᑫᒡ, ᒋᑲᑮᑭᓇᓰᐙᓐ ᓃᓐ ᐃᑯ ᑫᐃᔑᒋᑫᔮᓐ ᒥᓴᐙ ᑯ ᐅᓂᔑᔑᓂᓂᒃ, ᑯᒫ ᑲᔦ ᐌᓂᔑᔑᓯᓂᓂᒃ᙮ ᐋᓃᓐ ᓴ ᑯ ᑳᑎᐯᒋᑫᒡ ᐁᑭᑐᒡ, ᒦ ᓴ ᐁᑕ ᑯ ᐃ ᑫᐃᑭᑐᔮᓐ᙮

ᐯᓬᐊᒻ ᐃᔥᒀᒡ ᑳᑮᐃᑭᑐᒡ

14ᒦᑕᔥ ᓅᑯᒻ ᑳᐐ ᐊᓂ ᑮᐌᔮᓐ ᐁᐐ ᐃᔖᔮᓐ ᐁᔑᐊᔮᐙᒡ ᓂᐐᑖᑎᓰᒫᑲᓇᒃ᙮ ᐊᐯ ᑕᔥ ᑭᐐ ᐐᑕᒪᐎᓐ ᐋᓃᓐ ᐃᑭ ᐃᔅᕒᐃᔭᓬᐊᒃ Israel ᑫᓂ ᑑᑕᐙᐙᒡ ᐃᐃ ᑭᐱᒫᑎᓰᒪᐞ ᐱᒌᓇᒃ, ᑮᐃᑭᑐ᙮ 15ᒦᔥ ᐯᓬᐊᒻ Balaam ᒦᓇᐙ ᑳᑮ ᒫᒌ ᑳᑮᑭᑐᒡ,

ᒦ ᓴ ᐅ ᓃᓐ ᐯᓬᐊᒻ ᐌᑌᑌᔮᓐ ᐲᐅᕒ ᐁᑭᑐᔮᓐ,

ᓃᓐ ᓴ ᐃᓂᓂ ᐌᐌᓂ ᑳᓇᐋᐱᒡ,

16ᒦ ᓴ ᐃ ᐁᑭᑐᔮᓐ ᐁᑮ ᓅᑕᐗᒃ ᑭᔐᒪᓂᑑ ᐁᑭᑐᒡ,

ᐁᑮ ᐅᑎᓇᒫᓐ ᑲᔦ ᑭᑫᑕᒫᐎᓐ

ᑳᒫᐗᒋ ᐃᔥᐯᑖᑯᓯᒡ,

ᓃᓐ ᓴ ᐃᔑᓇᒧᐎᓂᕽ ᑳᑮ ᐙᐸᒪᒃ

ᑭᔐᒪᓂᑑ ᑳᒫᐗᒋ ᒪᔥᑲᐎᓰᒡ,

ᐁᑮ ᑲᐎᓭᔮᓐ ᔖᑰᒡ ᐃᑕᔥ ᓂᐙᐱᐃᑰ᙮

17ᓃᔮᒃ ᓴ ᓂᐙᐸᒫᒃ,

ᑳᐐᓐ ᐐᓐ ᓅᑯᒻ ᑳᐃᑕᒫᓐ,

ᓂᐙᐸᒫᒃ ᓴ ᐯᒫᑎᓯᐙᒡ ᐃᔅᕒᐃᔭᓬᐊᒃ᙮

ᒦᑕᔥ ᐃᐃᒫ ᑫᐅᒌᒡ ᑭᒋ ᐅᑭᒫ,

ᐗᓇᑯᔑᕽ ᒋᐃᓀᑖᑯᓯᒡ᙮

ᑖᐱᔥᑰ ᓴ ᐗᓇᑯᔥ ᑳᐅᓱᐎᒡ ᑕᐃᔑᓈᑯᓯ

ᒋᐅᒌᒡ ᐃᔅᕒᐃᔭᓬᐃᕽ᙮

ᐅᑲ ᔑᑯᑎᒀᓀᔥᑲᐙᐞ ᓴ ᐅᓃᑳᓂᓰᐞ

ᐌᒌᓂᒡ ᒨᐗᑉ ᐊᑮᕽ,

ᐅᑲ ᔖᑰᒋᐋᐞ ᑲᔦ ᑲᑭᓇ ᐯᒫᑎᓯᓂᒡ

ᓭᑎᕽ ᐌᑕᑳᓀᓯᓂᒡ᙮

18ᐄᑕᒻ ᐊᑮᕽ ᐌᒌᓂᒡ ᓴ

ᐅᑲ ᔖᑰᒋᐋᐞ;

ᓰᔭᕒ ᐊᑮᕽ ᓴ ᑲᔦ ᐌᒌᓂᒡ

ᑳᔒᑫᓂᒥᑯᒡ ᐅᑲ ᔖᑰᒋᐋᐞ,

ᐃᔅᕒᐃᔭᓬᐊᒃ ᓴ ᐐᑫ ᑕᓂ ᒪᔥᑲᐌᑖᑯᓯᐗᒃ᙮

19ᑫᓂ ᑎᐯᒋᑫᒡ ᐃᑕᔥ ᒉᑲᐳᕽ ᑖᓂ ᐅᒌ,

ᐅᑲ ᓂᓵᐞ ᐃᑕᔥ ᑲᔦ ᐃᐃᒫ ᐆᑌᓈᕽ ᐌᒋ ᐃᔥᑯᐃᒥᓐᒡ᙮

20ᐯᓬᐊᒻ ᑕᔥ ᐁᐙᐸᒫᒡ ᐊᒪᓬᐁᒃ ᑳᑎᓄᐎᓂᒡ, ᒦᔥ ᑳᐃᔑ ᒫᒌ ᑳᑮᑭᑐᒡ,

ᐊᒪᓬᐁᒃ ᑳᑎᓄᐎᐙᒡ ᓴ

ᒫᐗᒡ ᓃᑳᓐ ᑮᒪᔥᑲᐌᑖᑯᓯᐗᒃ,

ᐌᑎ ᑕᔥ ᐃᔥᒀᒡ ᑕᓀᐱᒋ ᓂᔑᐗᓈᒋᒋᑲᓂᐎᐗᒃ᙮

21ᐁᐃᓈᐱᒡ ᐃᑕᔥ ᐅᑮ ᐙᐸᒫᐞ ᑫᓐ ᑳᑎᓄᐎᓂᒡ, ᒦᔥ ᑳᐃᔑ ᒫᒌ ᑳᑮᑭᑐᒡ,

ᑳᐃᔑᑖᔦᒃ ᓴ ᐐᑫ ᑫᒋᓈᐅᐌᑖᑾᓐ,

ᑖᐱᔥᑰ ᐗᓯᓱᓐ ᑳᐊᔮᒃ ᐲᑖᐱᒃ ᐃᓀᑖᑾᓐ,

22ᔖᑰᒡ ᐃᑕᔥ ᑮᓇᐙ ᑫᓇᓐ ᑳᑎᓄᐎᐙᒡ

ᑭᑲ ᓂᔑᐗᓈᒋᐃᑰᒻ,

ᐊᐲ ᐊᓰᕒᐃᔭ ᐊᑮᕽ ᐌᒌᐙᒡ

ᑳᒋᑎᓂᓀᒀ, ᑮᐃᑭᑐ᙮

23ᒦᔥ ᐯᓬᐊᒻ ᑳᐊᓂ ᐃᑭᑐᒡ,

ᐊᐌᓀᓐ ᐃᑕᔥ ᑫᑲᔥᑭᑑᐸᓐ ᒋᐱᒫᑎᓯᐸᓐ,

ᐅᐅ ᑯᑕ ᑭᔐᒪᓂᑑ ᐁᐃᔑᒋᑫᒡ?

24ᐯᒫᑎᓯᐙᒡ ᓴ ᓵᐃᐸᕒᐊᔅ ᐊᑮᕽ

ᑕᐱᐅᒋ ᐸᑲᒫᔑᐗᒃ

ᑭᒋ ᒌᒫᓂᕽ ᒋᐱᐴᓯᐙᒡ,

ᒦᐗᒃ ᐃᑕᔥ ᐃᑭ ᑫᔖᑰᒋᐋᐙᒡ

ᐊᓰᕒᐃᔭ ᐊᑮᕽ ᐌᒌᓂᒡ,

ᐄᐸᕒ ᐊᑮᕽ ᑲᔦ ᐌᒌᓂᒡ,

ᔖᑰᒡ ᑫᐐᓇᐙ ᑕᓀᐱᒋ ᓂᔑᐗᓈᑎᓯᐗᒃ, ᑮᐃᑭᑐ᙮

25ᒦᑕᔥ ᐯᓬᐊᒻ ᑳᐃᔑ ᐸᓯᑸᒡ ᐁᑮ ᐊᓂ ᒫᒑᒡ ᐁᑮᐌᒡ ᐅᑖᐎᓂᕽ᙮ ᐯᓬᐊᑰᓐ ᐃᑕᔥ ᑮᐊᓂ ᒫᒑᐗᓐ᙮

Právě zvoleno:

ᐊᑭᑖᓱᓇᓐ 24: OJBS

Zvýraznění

Sdílet

Kopírovat

Chceš mít své zvýrazněné verše uložené na všech zařízeních? Zaregistruj se nebo se přihlas

Zjisti více o ᐅᒋᐺ ᑭᒋᒪᓯᓇᐃᑲᓐ