ᐊᑭᑖᓱᓇᓐ 23

1ᒦᑕᔥ ᐅᐅ ᐯᓬᐊᒻ Balaam ᑳᐃᓈᒡ ᐯᓬᐊᑰᓐ, ᑕᑲ ᐅᔑᑕᒪᐎᔑᓐ ᓃᔣᓱ ᑳᔑ ᐸᑭᑎᓈᓱᕽ ᐅᐅᒫ, ᑾᔮᒋᐞ ᑲᔦ ᓃᔣᓱ ᐊᔮᐯ ᐱᔑᑭᐗᒃ, ᓃᔣᓱ ᑲᔦ ᐊᔮᐯ ᒫᓇᒐᓂᔕᒃ, ᐅᑮᐃᓈᓐ᙮

2ᒦᑕᔥ ᐃᑯ ᐃ ᐯᓬᐊᑰᓐ ᑳᐃᔑᒋᑫᓂᒡ ᑳᑮᐃᓈᒡ᙮ ᐁᔑ ᓃᔑᐙᒡ ᐃᑯ ᐅᑮ ᐸᑭᑎᓈᐙᓐ ᐊᔮᐯ ᐱᔑᑭᐗᓐ, ᐊᔮᐯ ᒫᓇᒑᓂᔕᓐ ᐃᐃᒫ ᐯᐯᔑᒃ ᐸᑭᑎᓈᓱᐎᓂᕽ᙮ 3ᒦᔥ ᐯᓬᐊᒻ ᑳᑮ ᐃᑭᑐᒡ, ᑕᑲ ᐅᐅᒫ ᐃᔑ ᓃᐸᐎᓐ ᐃᔑ ᐅᐱᒣ ᑳᔑ ᐊᒀᑭᓴᒪᓐ ᑭᐸᑭᑎᓈᓱᓐ, ᓃᓐ ᐃᑕᔥ ᐸᑫᔭᐄ ᓂᑲ ᐃᔖ᙮ ᒫᑭᔖ ᓴ ᑳᑎᐯᒋᑫᒡ ᓂᑲ ᐱᐊᑕ ᐙᐸᒥᒃ, ᒋᐐᑕᒪᐎᒡ ᐋᓃᓐ ᑫᐃᓂᓈᓐ, ᑮᐃᑭᑐ᙮ ᒦᔥ ᑳᐃᔑ ᐃᔖᒡ ᐁᔑ ᐸᔥᑾᑎᓈᓂᒃ᙮ 4ᑭᔐᒪᓂᑑᓐ ᐃᑕᔥ ᐅᑮ ᓈᓯᑳᑰᓐ ᒦᔥ ᐅᐅ ᑳᐃᓈᒡ, ᓂᑮ ᐅᔑᑑᓇᓐ ᓴ ᓃᔣᓱ ᑳᔑ ᐸᑭᑎᓈᓱᕽ᙮ ᐯᐯᔑᒃ ᐃᑕᔥ ᐊᔮᐯ ᐱᔑᑭᐗᒃ, ᐯᐯᔑᒃ ᑲᔦ ᐊᔮᐯ ᒫᓇᒑᓂᔕᒃ ᓂᑮ ᐃᔑ ᐸᑭᑎᓈᒃ ᐁᑕᓯᑭᓐ ᐃᓂ ᑳᔑ ᐸᑭᑎᓈᓱᕽ, ᑮᐃᑭᑐ᙮

5ᑳᑎᐯᒋᑫᓂᒡ ᐃᑕᔥ ᐯᓬᐊᒻ ᐅᑮ ᒦᓂᑯᓐ ᐋᓃᓐ ᑫᐃᑭᑐᒡ ᐁᑮᐃᑯᒡ, ᒫᒑᓐ ᐊᑕ ᐙᐸᒻ ᐯᓬᐊᒃ, ᐅᐅ ᑕᔥ ᐃᔑ ᐐᑕᒪᐙᑲᓐ, ᐅᑮᐃᑰᓐ᙮ 6ᑮᐃᔖ ᓴ ᐯᓬᐊᑰᓐ ᐁᔑᐊᔮᓂᒡ᙮ ᑫᔮᐱ ᑕᔥ ᑮᓃᐸᐎᐗᓐ ᐃᔑ ᐅᐱᒣ ᑳᑮ ᐃᔑ ᐸᑭᑎᓈᓱᓂᐸᓐ, ᐁᐐᒋᑳᐸᐎᑖᑯᓂᒡ ᑲᑭᓇ ᐅᓃᑳᓂᓰᐞ ᐃᐃᒫ ᑯ ᑳᐅᒌᓂᒡ ᒨᐗᑉ Moab ᐊᑮᕽ᙮

7ᒦᑕᔥ ᐯᓬᐊᒻ ᑳᐃᔑ ᒫᑖᒋᒧᒡ,

ᐯᓬᐊᒃ ᓴ ᒨᐗᑉ ᑭᒋ ᐅᑭᒫ, ᐁᕒᐊᒻ ᐊᑮᕽ ᓂᑮ ᐅᒋ ᐊᑐᒥᒃ,

ᐙᐸᓄᕽ ᐃᓇᑫ ᑳᔑ ᐸᐲᑾᑎᓈᓂᒃ᙮

ᐅᐅ ᐁᑮᐃᔑᒡ, ᐊᐯ, ᒪᒐᑭᑕᒪᐎᔑᓐ ᐃᑭ ᒉᑲᐳᕽ ᐌᑕᑳᓀᓯᐙᒡ,

ᒪᒐᑭᒻ ᐃᑭ ᐃᔅᕒᐃᔭᓬᐊᒃ᙮

8ᐋᓃᓐ ᐃᑕᔥ ᑫᑮ ᐃᔑ ᒪᒐᔓᐙᓇᒀᐸᓐ

ᐃᑭ ᑭᔐᒪᓂᑑ ᑳᒪᒐᑭᒫᓯᒃ?

ᐋᓃᓐ ᐃᑕᔥ ᑕᓂᔑᐗᓈᑎᓯᐗᒃ ᑫᔑ ᐃᓇᒀᐸᓐ

ᑭᔐᒪᓂᑑ ᐁᓇᑭᒫᓯᒃ ᒋᓂᔑᐗᓈᑎᓯᓂᒡ?

9ᐌᑎ ᓴ ᐁᔑ ᐊᔨᔥᐹᐱᑳᓂᒃ ᐗᑭᒐᔭᐄ ᓂᑑᓵᐸᒫᒃ,

ᐁᔑ ᐊᔨᔥᐹᒪᑎᓈᓂᒃ ᓂᑐᒌ ᑲᓇᐙᐸᒫᒃ᙮

ᐯᒫᑎᓯᐙᒡ ᓴ ᓂᐙᐸᒫᒃ ᐯᑳᓀᑖᑯᓯᐃᑎᓱᐙᒡ,

ᐁᐃᓇᑭᑎᓱᓯᒀ ᒋᐐᒋ ᐯᔑᑴᑖᑯᓰᒫᐙᒡ

ᑯᑕᑴᐙᓐ ᐯᒫᑎᓯᓂᒡ᙮

10ᐊᐌᓀᓐ ᐃᑕᔥ ᑫᑲᔥᑭᐋᐸᓐ ᒋᐊᑭᒫᐸᓐ

ᐁᐲᒋ ᐹᑏᓄᓂᒡ ᒉᑲᐳᕽ ᐌᑕᑳᓀᓯᓂᒡ?

ᐊᐌᓀᓐ ᑲᔦ ᑫᑲᔥᑭᑑᐸᓐ ᒋᐊᑭᒫᐸᓐ ᐯᔑᑾᔭᐄ ᐃᐃ ᑳᔑ ᓃᐌᐙᓇᑭᓯᒡ?

ᑕᑲ ᓃᓐ ᓂᑲ ᐃᔑ ᓂᑉ ᐃᓇᑫ

ᐅᑾᔭᒀᑎᓰᒃ ᑳᔑ ᓂᐳᐙᒡ,

ᑕᑲ ᐃᓇᑫ ᐁᔑ ᐃᔥᒀ ᐱᒫᑎᓯᐙᒡ

ᒦ ᐃ ᑫᓃᓐ ᐃᐃ ᓇᑫ ᑫᔑ ᐃᔥᒀ ᐱᒫᑎᓯᔮᓐ! ᑮᐃᑭᑐ᙮

11ᒦᔥ ᐅᐅ ᐯᓬᐊᑰᓐ ᑳᐃᑯᒡ, ᐋᓃᓐ ᐃᑕᔥ ᐃᓈ ᐁᑑᑕᐎᔭᓐ? ᒦ ᐄᑐᒃ ᑳᐅᒋ ᐊᑐᒥᓈᓐ ᒋᒪᒐᑭᒪᑣ ᑳᔒᑫᓂᒥᐙᒡ! ᑳᐐᓐ ᐃᑕᔥ ᑫᑰᓐ ᒪᔑ ᑭᑎᔑᒋᑫᓰ, ᒦ ᐁᑕ ᐁᐃᓇᑣ ᒋᒥᓄᓭᐙᒡ! ᐅᑮᐃᑰᓐ᙮

12ᐅᐅᔥ ᐯᓬᐊᒻ ᑮᐃᔑ ᓇᑴᑕᒻ, ᒦ ᓴ ᐃ ᐁᔑᓈᑾᒃ ᒋᐃᑭᑐᐗᒃ ᐁᑕ ᑳᑎᐯᒋᑫᒡ ᑳᔑ ᒦᔑᒡ ᓂᑑᓂᕽ ᒋᐃᑭᑐᐗᒃ, ᑮᐃᑭᑐ᙮

ᐯᓬᐊᒻ ᓃᔑᕽ ᑳᑮᐃᔑᑲᑭᑐᒡ

13ᒦᔥ ᐯᓬᐊᑰᓐ Balak ᑳᐃᑯᒡ, ᑕᑲ ᐊᐯ ᐐᒌᐎᔑᓐ ᐸᑳᓐ ᒋᐅᓵᐸᒪᑣ, ᐋᓇ ᑯᑕ ᐐᓐ ᐋᓂᑕ ᐁᑕ ᒋᐙᐸᒪᑣ ᐃᔅᕒᐃᔭᓬᐊᒃ Israel᙮ ᑳᐐᓐ ᓴ ᑲᑭᓇ ᑭᑲ ᑌᑕᒀᐸᒫᓰᒃ᙮ ᒦᑕᔥ ᐁᔑ ᐊᓅᓂᓈᓐ ᒋᒪᒐᑭᒪᑣ, ᐅᑮᐃᑰᓐ᙮ 14ᐌᑎ ᑕᔥ ᐅᑮ ᐃᔑᐎᓂᑰᓐ ᒥᔕᐗᑲᒥᒃ ᓲᐱᒻ Zophim ᐁᒋᑳᑌᓂᒃ, ᐁᑮ ᐊᒀᒪᒋᐌᐎᓂᑯᒡ ᐗᒌᕽ ᐱᔅᑲ Pisgah ᐁᒋᑳᑌᓂᒃ᙮ ᐅᑮ ᐅᔑᑑᓂ ᑕᔥ ᓃᔣᓱ ᑳᔑ ᐸᑭᑎᓈᓱᕽ, ᐯᐯᔑᒃ ᐃᑕᔥ ᐊᔮᐯ ᐱᔑᑭᐗᓐ, ᐯᐯᔑᒃ ᑲᔦ ᐊᔮᐯ ᒫᓇᒑᓂᔕᓐ ᐅᑮ ᐸᑭᑎᓈᓱᐙᑫᓂ ᐁᑕᓯᓂᓂᑭᓐ ᑳᔑ ᐸᑭᑎᓈᓱᕽ᙮

15ᒦᔥ ᐯᓬᐊᒻ Balaam ᑳᐃᓈᒡ ᐯᓬᐊᑰᓐ, ᒦ ᓴ ᐃᐃᒫ ᐃᔑ ᓃᐸᐎᓐ ᐃᔑ ᐅᐱᒣ ᑳᔑ ᐊᒀᑭᑌᒃ ᑭᐸᑭᑎᓈᓱᓐ, ᓃᓐ ᐃᑕᔥ ᐐᓐ ᐌᑎ ᓂᑲ ᐊᑕ ᓇᑭᔥᑲᐙ ᑳᑎᐯᒋᑫᒡ, ᑮᐃᑭᑐ᙮

16ᑳᑎᐯᒋᑫᓂᒡ ᐃᑕᔥ ᐅᑮ ᓇᑭᔥᑳᑰᓐ, ᒦᔥ ᑳᐃᔑ ᒦᓂᑯᒡ ᐅᑑᓂᕽ ᐋᓃᓐ ᑫᐃᑭᑐᒡ, ᑮᐌ ᐊᑕ ᐙᐸᒻ ᐯᓬᐊᒃ, ᐅᐅ ᒋᐃᓇᒡ, ᐅᑮᐃᑰᓐ᙮ 17ᒦᑕᔥ ᑳᐃᔑ ᐊᑕ ᐙᐸᒫᒡ, ᑫᔮᐱ ᑕᔥ ᑮᓃᐸᐎᐗᓐ ᐃᐃᒫ ᐃᔑ ᐅᐱᒣ ᐅᐸᑭᑎᓈᓱᐎᓂᓃᕽ, ᐃᐃ ᑲᔦ ᐁᐐᒋᑳᐸᐎᑖᑯᓂᒡ ᐅᓃᑳᓂᓰᐞ ᐃᐃᒫ ᑯ ᑳᐅᒌᓂᒡ ᒨᐗᑉ Moab ᐊᑮᕽ᙮ ᒦᔥ ᐯᓬᐊᑰᓐ ᑳᐃᑯᒡ, ᐋᓃᓐ ᐃᑕᔥ ᑳᑎᐯᒋᑫᒡ ᐁᑭᑐᒡ, ᐁᑮᐃᑯᒡ᙮ 18ᒦᑕᔥ ᐯᓬᐊᒻ ᑳᐃᔑ ᒫᑖᒋᒧᒡ ᐁᑮ ᐃᑭᑐᒡ,

ᐯᓬᐊᒃ ᐊᐯ ᐌᑌᑌᔭᓐ ᓯᐳᕒ ᒋᓅᑕᐎᔭᓐ,

ᐱᓯᑕᓐ ᐅᐅ ᐙᐃᓂᓈᓐ!

19ᑭᔐᒪᓂᑑ ᐅᔕ ᑳᐐᓐ ᐃᓂᓃᐎᓰ, ᒋᑮᐗᓂᒧᐸᓐ,

ᑳᐐᓐ ᑲᔦ ᐃᓂᓂᐗᓐ ᐅᑑᑯᓯᓯᒥᑯᓰᓐ ᒋᐋᑌᑕᑭᐸᓐ᙮

ᐁᑭᑐᒡ ᐃᓴ ᑯ ᐃᔑᒋᑫ᙮

ᐁᑭᑐᒡ ᐃᓴ ᑯ ᒦ ᐃ ᐁᔑᓭᓂᒃ!

20ᐃᓇᔥᑫ ᓴ ᓂᑮ ᐃᔑ ᒦᓂᑰᐎᔅ,

ᒋᐃᑭᑐᔮᓐ ᐊᐎᔭᒃ ᒋᒥᓄᓭᐙᒡ;

ᑭᔐᒪᓂᑑ ᓴ ᑮᒥᓄᓭᐃᐌᒡ,

ᑳᐐᓐ ᓴ ᓂᑖ ᐋᒋᑖᐙᓰᓐ᙮

21ᓃᔮᒃ ᓴ ᓂᐙᐸᑕᒧᐙᓐ

ᒉᑲᐳᕽ ᐌᑕᑳᓀᓯᐙᒡ ᐃᔅᕒᐃᔭᓬᐊᒃ,

ᑫᑰᓐ ᒋᐃᔑ ᒫᔑᓭᓯᒀ,

ᑫᑰᓐ ᑲᔦ ᒋᐃᔑ ᑲᒀᑕᑭᓭᓯᒀ᙮

ᑳᑎᐯᒋᑫᓂᒡ ᓴ ᐅᑭᔐᒪᓂᑑᒥᐙᓐ ᐅᐐᒌᐎᑯᐙᓐ,

ᒦᑕᔥ ᐁᓈᒋᒧᐙᒡ ᐅᑭᒋ ᐅᑭᒫᒥᐙᓐ ᐁᐐᒌᐎᑯᐙᒡ᙮

22ᑭᔐᒪᓂᑑᓐ ᐄᑐᒃ ᐄᒋᐸᑮᕽ ᐅᑑᒋ ᓵᑭᓯᐃᑯᐙᓐ;

ᐅᒦᑳᓲᑕᒫᑯᐙᓐ ᐁᐃᓀᑖᑯᓯᓂᒡ

ᑖᐱᔥᑰ ᐱᔑᑭᐗᓐ ᒣᔥᑲᐌᑖᑯᓯᓂᒡ᙮

23ᑳᐐᓐ ᓴ ᑕᑲᔥᑭᒋᑳᑌᓯᓂᓂ

ᒋᐋᐸᑕᓂᓂᑭᐸᓐ ᒫᒫᑖᐎᓯᐎᓐ,

ᒥᑌᐎᐎᓐ ᑲᔦ ᑫᑰᓐ ᒋᑑᑕᐎᑣᐸᓐ

ᒉᑲᐳᕽ ᐌᑕᑳᓀᓯᐙᒡ ᐃᔅᕒᐃᔭᓬᐊᒃ᙮

ᒦᑕᔥ ᐅᐅ ᑫᐃᓂᑣ ᒉᑲᐳᕽ ᐌᑕᑳᓀᓯᐙᒡ ᐃᔅᕒᐃᔭᓬᐊᒃ,

ᐃᓇᔥᑫ ᐙᐸᑕᒧᐙᒃ ᑭᔐᒪᓂᑑ ᐁᔑᒋᑫᒡ᙮

24ᐃᑭ ᓴ ᐃᔅᕒᐃᔭᓬᐊᒃ ᐯᒫᑎᓯᐙᒡ

ᒦ ᐃ ᐁᓀᑖᑯᓯᐙᒡ ᑖᐱᔥᑰ ᓅᔐ ᒥᔑᐱᔑᐤ,

ᑖᐱᔥᑰ ᒥᔑᐱᔑᐤ ᑳᐸᓯᑸᒡ;

ᑳᐅᔑᔑᓯᒃ ᐃᑕᔥ ᐹᓂᒫ ᓴ ᐁᑭᑕᒸᒡ ᑳᑮ ᓂᓵᒡ,

ᒦᔥ ᐁᔑ ᒥᓂᑴᒡ ᐅᒥᔅᑸᒥᓂ ᑳᑮ ᓂᓵᒡ,

ᑮᐃᔑ ᑲᑭᑐ᙮

25ᒦᔥ ᐯᓬᐊᑰᓐ ᑳᐃᑯᒡ, ᑫᑯ ᑕᔥ ᐃᑕᐙ ᐊᐙᒡ ᐸᑮ ᒪᒐᑭᒫᑫᓐ, ᑫᑯ ᑲᔦ ᐃᑕᐙ ᐊᐙᒡ ᐸᑮ ᐃᓈᑫᓐ ᒋᒥᓄᓭᐙᒡ! ᐅᑮᐃᑰᓐ᙮

26ᒦᑕᔥ ᐅᐅ ᐯᓬᐊᒻ ᑳᐃᑭᑐᒡ, ᑭᑖᓇᑮ ᐐᑕᒪᐎᓐ ᐄᑐᒃ ᑲᑭᓇ ᒋᐃᑭᑐᐗᒃ ᑳᑎᐯᒋᑫᒡ ᐁᔑ ᐊᓅᔑᒡ, ᑮᐃᑭᑐ᙮

ᐯᓬᐊᒻ ᓂᓯᕽ ᑳᑮᐃᑭᑐᒡ

27ᒦᔥ ᐅᐅ ᐯᓬᐊᑰᓐ Balak ᑳᐃᑯᒡ, ᐊᐯ ᐐᒌᐎᔑᓐ, ᑭᐐ ᐃᔑᐎᓂᓐ ᑯᑕᑭᔪᕽ᙮ ᒫᑭᔖ ᒦ ᐌᑎ ᑭᔐᒪᓂᑑ ᑫᔑ ᐃᓀᑕᕽ ᐱᓵᓐ ᒋᒪᒐᑭᒥᒪᒡ ᐃᔅᕒᐃᔭᓬᐊᐞ Israel, ᓃᓐ ᐅᒋ ᒋᐐᒋᐃᔭᓐ, ᐅᑮᐃᑰᓐ᙮ 28ᒦᔥ ᑳᐃᔑᐎᓂᑯᒡ ᐌᑎ ᐗᒌᕽ ᐲᔪᕒ Peor ᐁᒋᑳᑌᓂᒃ, ᑳᑮ ᐅᒋ ᓇᐃᓈᑾᓂᓂᒃ ᐃᐃ ᐱᑾᑕᑲᒥᒃ᙮ 29ᐯᓬᐊᒻ Balaam ᐃᑕᔥ ᑮᐃᑭᑐ, ᐅᔑᑕᒪᐎᔑᓐ ᓃᔣᓱ ᑳᔑ ᐸᑭᑎᓈᓱᕽ ᐅᐅᒫ, ᑾᔮᒋᐞ ᑲᔦ ᓃᔣᓱ ᐊᔮᐯ ᐱᔑᑭᐗᒃ, ᓃᔣᓱ ᑲᔦ ᐊᔮᐯ ᒫᓇᒑᓂᔕᒃ, ᑮᐃᑭᑐ᙮ 30ᒦᑕᔥ ᐯᓬᐊᑰᓐ ᑳᐃᔑᒋᑫᓂᒡ ᑳᑮᐃᓈᒡ, ᐁᑮ ᐸᑭᑎᓈᓱᐙᑫᓂᒡ ᐯᐯᔑᒃ ᐊᔮᐯ ᐱᔑᑭᐗᐞ, ᐯᐯᔑᒃ ᑲᔦ ᐊᔮᐯ ᒫᓇᒑᓂᓴᐞ ᐁᑕᓯᓂᓂᑭᓐ ᑳᔑ ᐸᑭᑎᓈᓱᕽ᙮

Právě zvoleno:

ᐊᑭᑖᓱᓇᓐ 23: OJBS

Zvýraznění

Sdílet

Kopírovat

Chceš mít své zvýrazněné verše uložené na všech zařízeních? Zaregistruj se nebo se přihlas

Zjisti více o ᐅᒋᐺ ᑭᒋᒪᓯᓇᐃᑲᓐ