ᐊᑭᑖᓱᓇᓐ 14
14
ᐃᔅᕒᐃᔭᓬᐊᒃ ᑮᑭᒋᑳᑮᑭᑐᐙᒡ
1ᑲᐯᑎᐱᒃ ᓴ ᑲᑭᓇ ᐯᒫᑎᓯᐙᒡ ᐃᔅᕒᐃᔭᓬᐊᒃ Israel ᑮᒪᐎᐗᒃ ᐁᑮ ᑭᔒᐌᐙᒡ᙮ 2ᑲᑭᓇ ᓴ ᐃᔅᕒᐃᔭᓬᐊᒃ ᐅᑮ ᑭᒋ ᑲᑲᓅᓈᐙᓐ ᒨᓯᓲᓐ Moses, ᐁᕒᐊᓅᓐ Aaron ᑲᔦ ᐁᑮ ᐃᑭᑐᐙᒡ, ᓇᐗᒡ ᐄᑐᒃ ᑖᑮ ᐅᓂᔑᔑᓐ ᒋᑮ ᑕᔑ ᓂᐳᔮᑭᐸᓐ ᐌᑎ ᐄᒋᐸᑮᕽ᙮ ᑖᑮ ᐅᓂᔑᔑᓐ ᑲᔦ ᑕᔑ ᓂᐴᔮᑭᐸᓐ ᐅᐅᒫ ᐱᑾᑕᑲᒥᒃ᙮ 3ᐌᑯᓀᓂᓂ ᑕᔥ ᑳᑎᐯᒋᑫᒡ ᐌᒋ ᐃᔑᐎᔭᒥᒡ ᐅᐅᒫ ᐊᑮᕽ? ᐁᐐ ᓂᔑᔭᒥᒡ ᐃᓇ? ᐃᓇᔥᑫ ᓂᐐᐎᓈᓂᒃ, ᓂᓃᒑᓂᓯᓈᓂᒃ ᑲᔦ ᑕᓂᑕᒨᑮᐗᒃ᙮ ᓇᐗᒡ ᐄᑐᒃ ᑕᐅᓂᔑᔑᓐ ᒋᑮᐌᔮᑭᐸᓐ ᐌᑎ ᐄᒋᐸᑮᕽ Egypt? ᐅᑮᐃᑰᐞ᙮ 4ᒦᔥ ᑳᐃᑭᑐᐙᒡ ᐁᑲᑲᓅᓂᑎᐙᒡ, ᑕᑲ ᐅᓀᓂᒫᑖ ᐊᐌᓀᓐ ᑫᓃᑳᓃᑕᒪᐎᓇᕽ, ᑫᑮᐌᐎᓂᓇᕽ ᐌᑎ ᐄᒋᐸᑮᕽ, ᑮᐃᑭᑐᐗᒃ᙮
5ᒦᑕᔥ ᒨᓯᔅ, ᐊᐊ ᑲᔦ ᐁᕒᐊᓐ ᑳᑮ ᐊᓂᒥᑯᑖᐙᒡ ᒥᑕᑲᒥᒃ ᐁᔑᐊᔮᓂᒡ ᑲᑭᓇ ᐃᔅᕒᐃᔭᓬᐊᐞ᙮ 6ᐊᐊ ᑕᔥ ᒑᔓᐙ Joshua ᐅᑌᑌᓐ ᓇᓐ Nun ᑳᑮ ᐃᔑᓂᑳᓱᓂᒡ, ᐊᐊ ᑕᔥ ᑲᔦ ᑫᓬᐊᑉ Caleb ᐅᑌᑌᓐ ᒉᐳᓀ Jephunneh ᑳᑮ ᐃᔑᓂᑳᓱᓂᒡ, ᑫᐐᓇᐙ ᐄᑐᒃ ᑳᑮ ᐊᑕ ᑮᒨᓵᐸᑕᒧᐙᒡ ᐊᑮᓂ᙮ ᒦᑕᔥ ᐅᑮ ᑖᔥᑮᑭᐱᑑᓈᐙᓐ ᐅᑭᑭᔥᑭᑲᓂᐙᓐ ᐁᒫᓀᑕᒧᐙᒡ᙮ 7ᒦᑕᔥ ᑳᐃᓈᐙᒡ ᑲᑭᓇ ᐃᔅᕒᐃᔭᓬᐊᐞ ᐃᐃᒫ ᐁᔮᓂᒡ, ᐃᐃ ᓴ ᐊᑭ ᑳᑮ ᐊᑕ ᐙᐸᑕᒫᕽ ᐋᐱᒋ ᐅᓂᔑᔑᓐ᙮ 8ᑮᔥᐱᓐ ᑕᔥ ᑳᑎᐯᒋᑫᒡ ᒥᓍᐸᒥᓇᕽ, ᑭᑲ ᐃᔑᐎᓂᑯᓈᓐ ᓴ ᐌᑎ ᐊᑮᕽ᙮ ᐐᑫ ᐅᔕ ᐌᓅᑕᓐ, ᐐᑫ ᑲᔦ ᐌᒋ ᓂᑖᐎᑭᓐ ᑫᑰᓐ᙮ 9#Heb 3.16. ᑫᑯ ᑕᔥ ᐐᓐ ᔕᔒᐱᑕᐙᑫᒃ ᑳᑎᐯᒋᑫᒡ᙮ ᑫᑯ ᑲᔦ ᑯᓵᑫᒀᓂᒃ ᐯᒫᑎᓯᐙᒡ ᐌᑎ ᑳᐃᔑᑖᐙᒡ᙮ ᑭᑲ ᔖᑰᒋᐋᓈᓂᒃ ᐅᔕ, ᑳᐐᓐ ᐄᑐᒃ ᑫᑰᓐ ᐅᓈᑕᒫᑯᓰᓈᐙ᙮ ᑳᑎᐯᒋᑫᒡ ᐅᔕ ᑮᓇᐎᓐᑦ ᑭᐐᒌᐎᑯᓈᓐ, ᐁᑮ ᔖᑰᒋᐋᒡ ᐅᒪᓂᑑᒥᓂ ᑫᑮ ᓈᑕᒫᑯᓂᐸᓐ, ᑫᑯ ᑕᔥ ᑯᓵᑫᒀᓂᒃ, ᑮᐃᑭᑐᐗᒃ᙮ 10ᑲᑭᓇ ᑕᔥ ᐯᒫᑎᓯᐙᒡ ᐃᐃᒫ ᑳᑮ ᐊᔮᐙᒡ ᑮᐃᑭᑐᐗᒃ ᒋᑮ ᐱᒶᓯᓇᐃᒥᑎᐸᓐ᙮ ᓭᓴᑰᒡ ᐃᑕᔥ ᑮᓈᑾᓂᓂ ᑳᑎᐯᒋᑫᓂᒡ ᐅᑭᒋ ᐃᓀᑖᑯᓯᐎᓂᓂ ᐃᐃᒫ ᒫᐗᒋᐃᑎᐎ ᐸᒀᓀᑲᒥᑯᕽ, ᑲᑭᓇ ᓴ ᐊᐎᔭᐞ ᐅᑮ ᐙᐸᑕᒥᓂ᙮
ᒨᓯᔅ ᑮᐊᓇᒥᐁᑕᒪᐙᒡ ᐯᒫᑎᓯᓂᒡ
11ᒦᔥ ᐅᐅ ᒨᓯᔅ ᑳᐃᑯᒡ ᑳᑎᐯᒋᑫᓂᒡ, ᐋᓃᓐ ᑕᔥ ᒥᓂᒃ ᐅᑯ ᐯᒫᑎᓯᐙᒡ ᑫᐋᓇᐌᓂᒥᐙᒡ? ᐋᓃᓐ ᑕᔥ ᒥᓂᒃ ᑫᑌᐺᔦᓂᒥᓯᒀ? ᓂᑕᓇᑮ ᐙᐸᑕᐋᒃ ᐄᑐᒃ ᑭᑭᓇᐙᒋᒋᑫᐎᓇᓐ᙮ 12ᐃᓇᔥᑫ ᓂᑲ ᐃᔑᓂᔕᐊᒪᐙᒃ ᐋᑯᓯᐎᓐ ᐊᐗᔑᒣ ᒦᓇᐙ ᒋᑎᐯᓂᒫᓯᐗᒀ᙮ ᑮᓐ ᑕᔥ ᐐᓐ ᑭᑲ ᐃᔑᐃᓐ ᓇᐗᒡ ᒋᑭᒋ ᐃᓀᑖᑯᓯᐙᒡ ᑭᐲᐌᓰᒪᒃ, ᐊᐲᒡ ᐐᓐ ᐃᑭ ᐃᔅᕒᐃᔭᓬᐊᒃ Israel, ᐅᑮᐃᑰᓐ᙮
13 # Exo 32.11-14. ᐅᐅ ᑕᔥ ᒨᓯᔅ ᐅᑮᐃᓈᓐ ᑳᑎᐯᒋᑫᓂᒡ, ᑮᓐ ᐄᑐᒃ ᑭᑮ ᓵᑭᒋᐎᓈᒃ ᐃᔅᕒᐃᔭᓬᐊᒃ Israel ᐌᑎ ᐄᒋᐸᑮᕽ Egypt ᑭᒪᔥᑲᐎᓰᐎᓐ ᐁᑮ ᐋᐸᒋᑑᔭᓐ᙮ ᐃᓇᔥᑫ ᑕᔥ ᐄᒋᐸᑮᕽ ᑳᐅᒌᐙᒡ ᐊᐲ ᓅᑕᒧᐙᒡ ᐋᓃᓐ ᑳᑑᑕᐎᒪᒡ ᑭᐱᒫᑎᓰᒪᐞ, 14ᐅᑲ ᐐᑕᒪᐙᐙᐞ ᐅᔕ ᐯᒫᑎᓯᓂᒡ ᐅᐅᒫ ᐊᑮᕽ ᐁᔮᓂᒡ᙮ ᐅᑭᑫᑖᓈᐙ ᐄᑐᒃ ᐋᔕ ᐅᑯ ᐯᒫᑎᓯᐙᒡ ᑮᓐ ᑳᑎᐯᒋᑫᐗᒡ ᐁᐐᒌᐎᔮᕽ᙮ ᐋᐱᒋ ᑲᔦ ᑭᐯᑌᓈᑯᔅ ᐊᐲ ᐃᐃᒫ ᑭᐗᑸᒥᕽ ᑮᐊᔮᔭᓐ᙮ ᐁᑮᔑᑲᒃ ᑕᔥ ᐁᐃᔑᐊᔮᔭᓐ ᐃᐃᒫ ᑳᔑ ᐸᑕᑭᑌᐙᓇᑾᒃ ᑮᓃᑳᓃᑕᒪᐎᔮᕽ᙮ ᐁᑎᐱᑲᒃ ᑕᔥ ᐃᐃᒫ ᐃᔥᑯᑌᕽ ᑳᐸᑕᑾᑯᓀᒃ ᐁᐃᔑᐊᔮᔭᓐ ᑮᓃᑳᓃᑕᒪᐎᔮᕽ᙮ 15ᑮᔥᐱᓐ ᓴ ᓂᓴᑣ ᐅᑯ ᐯᒫᑎᓯᐙᒡ ᑖᐱᔥᑰ ᑳᔑ ᓂᓯᓐᒡ ᐯᔑᒃ ᐃᓂᓂ, ᒦ ᓴ ᑕᔥ ᐃᑭ ᐯᒫᑎᓯᐙᒡ ᑳᓅᑕᒧᐙᒡ ᐁᑭᑫᑖᑯᓯᔭᓐ ᑕᐃᑭᑐᐗᒃ, 16ᐁᑮ ᑲᔥᑭᑑᓯᒃ ᐅᔕ ᑳᑎᐯᒋᑫᒡ ᒋᐃᔑᐎᓈᒡ ᐃᔅᕒᐃᔭᓬᐊᐞ ᐊᑮᕽ ᑳᑮ ᐊᔓᑕᒪᐙᐸᓐ ᐁᑮ ᐊᐱᒧᐸᓐ ᐅᑎᔑᓂᑳᓱᐎᓐ, ᒦ ᐅᔕ ᐃ ᑳᑮ ᐅᒋ ᓂᓵᒡ ᐌᑎ ᐱᑾᑕᑲᒥᒃ ᐃᐃ ᐅᐱᒫᑎᓰᒪᐞ᙮ 17ᓅᑯᒻ ᑕᔥ ᐅᐅ ᑭᑎᔑ ᑲᑴᒋᒥᓐ ᑳᑎᐯᒋᑫᔭᓐ, ᑕᑲ ᓂᑲ ᐙᐸᑖᒥᓐ ᑭᒪᔥᑲᐎᓰᐎᓐ, ᐃᔑᒋᑫᓐ ᑲᔦ ᐃᐃ ᑳᑮ ᐃᔑ ᐊᔓᑕᒫᑫᔭᓐ ᐅᐅ ᑮᐃᑭᑐᐗᐸᓀᓐ, 18#Exo 20.5,6; 34.6,7; Deu 5.9,10; 7.9,10. ᓃᓐ ᓴ ᑳᑎᐯᒋᑫᒡ, ᐐᑫ ᓴ ᓂᐯᒋᑭᑖᔅ, ᐌᓅᑕᓐ ᑲᔦ ᓂᒥᓄᑑᑖᑫᐎᓐ᙮ ᓂᐴᓀᑖᓇᓐ ᑲᔦ ᒪᒋᑑᑕᒧᐎᓇᓐ, ᔕᔒᐱᑕᒧᐎᓇᓐ ᑲᔦ᙮ ᔖᑰᒡ ᑕᔥ ᑳᐐᓐ ᓂᑲ ᑭᓰᐊᒧᐙᓰᓐ ᑳᔑ ᐐᔭᑭᔥᑫᑕᒧᐃᐌᒪᑲᒃ ᒪᒋᑑᑕᒧᐎᓐ ᑳᑮ ᐃᔑᒋᑫᐙᒡ ᐅᑌᑌᒫᒃ ᐲᓂᔥ ᓂᓯᕽ, ᑯᒫ ᑲᔦ ᓃᐎᕽ ᒋᓂ ᐊᔮᓂᑫ ᐊᔮᓂᒡ ᐅᐲᐌᓰᒥᐙᐞ᙮ 19ᒦ ᓴ ᑕᔥ ᐁᔑ ᑲᑴᒋᒥᓈᓐ ᒋᐴᓀᑕᒪᐗᑣ ᐃᐃ ᑳᔑ ᒪᒋᑑᑕᒧᐙᒡ ᐅᑯ ᐯᒫᑎᓯᐙᒡ, ᐋᓃᔥ ᐌᓅᑕᓐ ᑭᓵᑭᐃᐌᐎᓐ ᐐᑳ ᑳᐴᓂᓭᓯᓄᒃ, ᑖᐱᔥᑰ ᑳᑮ ᐃᔑ ᐴᓀᑕᒪᐗᑣ ᐌᑎ ᐊᐲ ᑮᓇᑲᑕᒧᐙᒡ ᐄᒋᐸᑭ ᐲᓂᔥ ᐃᑕᔥ ᓅᑯᒻ ᐅᐅ ᐃᔑ ᐊᐲ, ᐅᑮᐃᓈᓐ᙮
20ᒦᔥ ᐅᐅ ᑳᑎᐯᒋᑫᓂᒡ ᑳᐃᑯᒡ, ᐋᔕ ᓂᑮ ᐴᓀᑕᒪᐙᒃ ᓴ ᐃᐃ ᑳᔑ ᑲᑴᒋᒥᔭᓐ᙮ 21#Heb 3.18. ᓂᑕᔮᒀᒥᔅ ᐁᐊᔓᑕᒪᐎᓈᓐ, ᑌᐺ ᓴ ᑯ ᑳᔑ ᒨᔥᑭᓀᔦᑖᑾᒃ ᑲᔦ ᐃᐃ ᓂᑭᒋ ᐃᓀᑖᑯᓯᐎᓐ ᐅᐅᒫ ᒥᓯᐌ ᐊᑮᕽ, 22ᑳᐐᓐ ᓴ ᐊᐙᒡ ᐯᔑᒃ ᐃᑭ ᐅᑲ ᐙᐸᑕᓰᓈᐙ ᐃᐃ ᐊᑮᓂ ᑳᑮ ᐊᔓᑕᒪᐎᒪᒃ ᐅᑫᑌᔭᐋᒥᐙᐸᓃᐞ ᐁᐐ ᒦᓂᒪᒃ, ᑳᐐᓐ ᑲᔦ ᐃᑭ ᑳᐋᓇᐌᓂᒥᐙᒡ ᐋᐲᒋᑯ ᐅᑲ ᐙᐸᑕᓰᓈᐙ᙮ 23ᒦᐗᒃ ᐃᑭᐌᓂᐗᒃ ᐯᒫᑎᓯᐙᒡ ᑳᑮ ᐙᐸᑕᒧᐙᒡ ᓂᑭᒋ ᐃᓀᑖᑯᓯᐎᓐ, ᐃᓂ ᑲᔦ ᑭᑭᓇᐙᒋᒋᑫᐎᓇᓐ ᑳᑮ ᐃᔑᒋᑫᐗᒃ ᐌᑎ ᐄᒋᐸᑮᕽ, ᐱᑾᑕᑲᒥᒃ ᑲᔦ, ᔖᑰᒡ ᐃᑕᔥ ᓂᑮ ᑲᑳᒋᐃᑰᒃ ᒥᑖᒌᕽ ᐋᓇᑮᑭᑫᓂᒥᐙᒡ, ᔖᑰᒡ ᐃᑕᔥ ᑳᐐᓐ ᓂᐱᓯᑖᑯᓰᒃ᙮ 24#Jos 14.9-12. ᐊᐊᐌ ᑕᔥ ᐐᓐ ᓂᑕᓄᑮᐋᑲᓐ ᑫᓬᐊᑉ Caleb ᐸᑳᓐ ᐃᔑ ᓈᓈᑲᑕᐌᑕᒻ, ᐗᐐᑫ ᑲᔦ ᓂᐱᒥᓂᔕᐅᒃ᙮ ᓂᑲ ᐃᔑᐎᓈ ᐃᐃᒫ ᐊᑮᕽ ᑳᑮ ᐊᑕ ᐙᐸᑕᑭᐸᓐ, ᒦᑕᔥ ᐃᐃ ᐅᐲᐌᓰᒪᐞ ᑫᓂ ᑎᐯᑕᒥᓂᒡ᙮ 25ᐌᑎ ᐄᑐᒃ ᑳᔑ ᐸᐸᓴᑎᓈᓂᒃ ᐃᔑᑖᐗᒃ ᐃᑭ ᐊᒪᓬᐁᒃ Amalekites ᑳᑎᓄᐎᐙᒡ ᐃᑭ ᑲᔦ ᑫᓇᓐ Canaanites ᑳᑎᓄᐎᐙᒡ᙮ ᐙᐸᕽ ᐃᑕᔥ ᐊᔐ ᑮᐌᑫᒃ, ᐌᑎ ᐃᓇᑫ ᐱᑾᑕᑲᒥᒃ ᐊᓂ ᐃᔖᑫᒃ ᑭᒋ ᒥᔅᑯᑲᒦᕽ ᐃᓇᑫ, ᐅᑮᐃᑰᓐ᙮
ᑳᑎᐯᒋᑫᒡ ᑮᓇᓇᐊᓵᒡ ᐃᐃ ᑳᑮ ᒫᔑ ᑲᑭᑐᓂᒡ
26ᒦᑕᔥ ᐅᐅ ᒨᓯᔅ, ᐊᐊ ᑲᔦ ᐁᕒᐊᓐ ᑳᐃᑯᐙᒡ ᑳᑎᐯᒋᑫᓂᒡ, 27ᐋᓃᓐ ᐃᑕᔥ ᑫᔮᐱ ᒥᓂᒃ ᐅᑯ ᐯᒫᑎᓯᐙᒡ ᐙᒫᔑ ᑲᑲᓅᔑᐙᒡ? ᓂᓅᑕᐙᒃ ᓴ ᐃ ᐃᔅᕒᐃᔭᓬᐊᒃ ᐋᓃᓐ ᐁᔑ ᒫᔑ ᑳᑮᑭᑐᐙᒡ ᓃᓐ ᐅᒋ! 28ᐅᐅ ᓴ ᐃᔑ ᐃᑭ ᐯᒫᑎᓯᐙᒡ, ᐅᐅ ᐁᐃᑭᑐᐗᒃ, ᓃᓐ ᑳᑎᐯᒋᑫᔮᓐ, ᑌᐺ ᓴ ᑯ ᑭᑲ ᑑᑕᐎᓂᓂᒻ ᐃᐃ ᑳᔑ ᓅᑕᐎᓇᑰᒃ ᐁᐃᑭᑐᔦᒃ᙮ 29#Heb 3.17. ᐅᐅᒫ ᓴ ᐱᑾᑕᑲᒥᒃ ᑭᑲ ᐃᔑ ᑲᐎᓭᒻ ᒋᔑ ᓂᐳᔦᒃ, ᑲᑭᓇ ᐱᑯ ᑳᑕᔑᔦᒃ ᓃᔥᑕᓇ 20, ᐊᐗᔑᒣ ᑲᔦ ᑌᓱ ᐱᐴᓉᔦᒃ, ᑳᑮ ᑕᑾᑭᒥᑰᔦᒃ ᑮᐊᑭᒥᑰᔦᒃ, ᐅᓵᒻ ᐋᓃᔥ ᑭᑮ ᒫᔑ ᑲᑲᓅᔑᒻ᙮ 30ᑌᐺ ᓴ ᑳᐐᓐ ᑭᑲ ᐲᑎᑫᔥᑳᓰᒻ ᐃᐃ ᐊᑭ ᑳᑮ ᐊᔩᒋ ᐊᔓᑕᒫᐹᓐ ᐁᐐ ᐃᔑ ᑲᐯᔑᐃᓇᑰᑭᐸᓐ᙮ ᐊᐊ ᓴ ᐁᑕ ᑫᓬᐊᑉ ᑳᐅᑌᑌᒡ ᒉᐳᓀᐗᓐ, ᐊᐊ ᑕᔥ ᑲᔦ ᒑᔓᐙ ᑳᐅᑌᑌᒡ ᓇᓇᓐ ᑕᐲᑎᑫᔥᑳᐗᒃ᙮ 31ᐃᑭ ᑕᔥ ᑭᓃᒑᓂᓯᐙᒃ ᑳᑮ ᐃᑭᑐᔦᑭᐸᓐ ᒋᓂᑕᒨᑮᐃᑣ, ᒦᐗᒃ ᓴ ᐃᑭ ᑫᐲᑎᑫᐎᓇᒀ ᒋᒨᒋᑭᐃᑯᐙᒡ ᐃᐃ ᐊᑮᓂ, ᑮᓇᐙ ᑳᑮ ᐋᓇᐌᑕᒧᐌᒃ᙮ 32ᑮᓇᐙ ᑕᔥ ᐐᓐ ᑭᑲ ᑲᐎᓭᒻ ᒋᓂᐳᔦᒃ ᐅᐅᒫ ᐱᑾᑕᑲᒥᒃ᙮ 33#Act 7.36. ᑭᓃᒑᓂᓯᐙᒃ ᓴ ᐅᐅᒫ ᐱᑾᑕᑲᒥᒃ ᑕᔑ ᐗᐗᓀᑕᒥᔥᑳᐗᒃ ᓃᒥᑕᓇ 40 ᑕᓱ ᐱᐴᓐ ᒥᓂᒃ᙮ ᑮᓇᐙ ᐃᑕᔥ ᐃᐃ ᑭᑎᔑᒋᑫᐎᓂᐙ ᑫᐅᒋ ᑲᒀᑕᑭᑑᐙᒡ ᐁᑌᐺᔦᑖᑯᓯᓯᐌᒃ, ᐲᓂᔥ ᒋᒑᑭ ᑲᐎᓭᐌᒃ ᐃᐃᒫ ᐱᑾᑕᑲᒥᒃ ᒋᑲᒀᑕᑭᑑᐙᒡ᙮ 34ᒥᓂᒃ ᓴ ᑯ ᐁᑕᓱ ᑮᔑᒃ ᑳᑮ ᑮᒨᓵᐸᑕᒣᒃ ᐅᐅ ᐊᑭ, ᐯᔑᑯ ᑮᔑᒃ ᓴ ᐯᔑᑯᐱᐴᓐ ᑕᐃᓇᑭᒋᑳᑌ ᒋᓇᓇᐊᓯᑰᔦᒃ ᑭᒪᒋᑑᑕᒧᐎᓂᐙᓐ ᐅᒋ ᓃᒥᑕᓇ 40 ᑕᓱ ᐱᐴᓐ ᒥᓂᒃ᙮ ᒦᑕᔥ ᒋᑭᑫᑕᒣᒃ ᐁᓀᑖᑾᒃ ᓃᓐ ᒋᓇᑳᔥᑲᐎᓇᑰᒃ᙮ 35ᓃᓐ ᑌᐯᒋᑫᔮᓐ ᓴ ᐅ ᑳᐃᑭᑐᔮᓐ, ᑌᐺ ᓴ ᓂᑲ ᑑᑕᐙᒃ ᐅᑯ ᑲᑭᓇ ᒣᒋᐃᔑᐌᐱᓯᐙᒡ ᑳᑮ ᐅᑸᓄᐃᑎᐙᒡ ᐁᐐ ᓇᑳᔥᑲᐎᐙᒡ᙮ ᒦ ᓴ ᐅᒫ ᐱᑾᑕᑲᒥᒃ ᑫᔑ ᓂᔑᐗᓈᑎᓯᐙᒡ, ᑲᑭᓇ ᒋᓂᐳᐙᒡ, ᐅᑮᐃᑰᓐ᙮
36-37ᐃᐃ ᑕᔥ ᐃᓂᓂᐗᐞ ᒨᓯᔅ ᑳᑮ ᐃᔑᓂᔕᐙᐸᓐ ᒋᐊᑕ ᑮᒨᓵᐸᑕᒥᓂᒡ ᐊᑭ, ᒦᐗᒃ ᓴ ᐃ ᑮᐱᑮᐌᓂᒡ ᓅᒋᑯ ᑳᑮ ᐃᓈᑐᑕᒥᓂᒡ ᐃᐃ ᐊᑭ᙮ ᒦᑕᔥ ᐯᒫᑎᓯᓂᒡ ᑳᑮ ᐅᒋ ᒫᔑ ᑲᑲᓅᓈᓂᒡ ᑳᑎᐯᒋᑫᓂᒡ᙮ ᐃᐃ ᐃᑕᔥ ᐃᓂᓂᐗᐞ ᓅᒋᑯ ᑳᑮ ᐃᓈᒋᒧᓂᒡ, ᑳᑎᐯᒋᑫᒡ ᓴ ᐅᑮ ᐃᔑᐋᐞ ᒋᐋᑯᓯᓂᒡ, ᒦᔥ ᑳᐃᔑ ᓂᐳᓂᒡ᙮ 38ᐃᑭ ᑕᔥ ᐃᓂᓂᐗᒃ ᑳᑮ ᐊᑕ ᑮᒨᓵᐸᑕᒧᐙᒡ ᑫᓇᓐ ᐊᑭ, ᓃᔑᓐ ᐁᑕ ᑮᐃᔥᑯᓀᐗᒃ᙮ ᒦᐗᒃ ᓴ ᐅᑯ ᒑᔓᐙ ᑳᑮ ᐅᑌᑌᒡ ᓇᓇᓐ, ᐊᐊ ᑕᔥ ᑲᔦ ᑫᓬᐊᑉ ᑳᑮ ᐅᑌᑌᒡ ᒉᐳᓀᐗᓐ᙮
ᐃᔅᕒᐃᔭᓬᐊᒃ ᑮᑲᑴᒋᑑᐙᒡ ᐁᐐᒪᑲᑗᐙᒡ ᐃᐃ ᐊᑮᓂ
(Deuteronomy 1.41-46)
39ᐊᐲ ᑕᔥ ᒨᓯᔅ ᑳᐃᔥᒀ ᐐᑕᒪᐙᒡ ᐅᐅ ᑲᑭᓇ ᐃᔅᕒᐃᔭᓬᐊᐞ Israel, ᒦ ᓴ ᐃ ᑳᐃᔑ ᑭᒋ ᒪᐎᓂᒡ᙮ 40ᐐᐸ ᑕᔥ ᑭᑭᔐᑉ ᑮᐃᔖᐗᐞ ᐌᑎ ᓇᑫ ᐁᔑ ᐊᔨᔥᐸᑎᓈᓂᒃ, ᐅᐅ ᐁᑮ ᐃᑭᑐᓂᒡ, ᓂᑮ ᒪᒋᐃᔑᒋᑫᒥᓐ ᓴ᙮ ᓂᑲ ᐃᔖᒥᓐ ᓴ ᐌᑎ ᐊᑮᕽ ᑳᑎᐯᒋᑫᒡ ᑳᑮ ᐊᔓᑕᒪᐎᔭᒥᓐᒡ, ᑮᐃᑭᑐᐗᐞ᙮
41ᒦᑕᔥ ᐅᐅ ᒨᓯᔅ Moses ᑳᐃᓈᒡ, ᐌᑯᓀᓐ ᐃᑕᔥ ᐌᒋ ᓇᐃᑕᓯᐌᒃ ᑳᔑ ᐊᓅᓂᓀᒃ ᑳᑎᐯᒋᑫᒡ? ᑳᐐᓐ ᐅᔕ ᑭᑲ ᔖᑰᒋᑣᓰᒻ! 42ᑫᑯ ᐃᔖᑫᒃ, ᑭᑲ ᔖᑰᒋᐃᑯᐙᒃ ᐅᔕ ᑳᔒᑫᓂᒥᓀᒀ, ᑳᑎᐯᒋᑫᒡ ᐋᓃᔥ ᑳᐐᓐ ᑭᐐᒌᐎᑯᓰᐙ᙮ 43ᐃᑭ ᓴ ᐊᒪᓬᐁᒃ Amalekites ᑳᑎᓄᐎᐙᒡ, ᐃᑭ ᑲᔦ ᑫᓇᓐ Canaanites ᑳᑎᓄᐎᐙᒡ ᑭᑲ ᓇᑭᔥᑲᐙᐙᒃ ᐁᔖᔦᒃ, ᐸᔑᐸᐃᑫᐎᑯᒫᓂᕽ ᐃᑕᔥ ᑭᑲ ᐅᒋ ᓂᓯᑰᒻ᙮ ᒥᓂᒃ ᓴ ᐃᑯ ᑳᔑ ᓇᑲᓀᒃ ᑳᑎᐯᒋᑫᒡ, ᑳᐐᓐ ᓴ ᑭᑲ ᐐᒌᐎᑯᓰᐙ, ᐅᑮ ᐃᓈᐞ᙮
44ᔖᑰᒡ ᐃᑕᔥ ᑮᐃᔖᐗᐞ ᐁᑮ ᐸᐹᒥᑕᓯᓂᒃ ᐌᑎ ᓇᑫ ᑳᑮ ᐃᔑ ᐸᐲᑾᑎᓈᓂᒃ᙮ ᐃᐃ ᑕᔥ ᐐᓐ ᐊᔓᑕᒫᑫᒪᑲᑯᓂ ᑫᔮᐱ ᐌᑎ ᑮᐊᔮᓂ ᐁᔑ ᑲᐯᔑᐎᓐᒡ, ᑳᐐᓐ ᑲᔦ ᒨᓯᓲᓐ ᐅᑮ ᓇᑲᑕᓰᓂ ᐃᐃ ᑲᐯᔑᐎᓐ᙮ 45ᒦᑕᔥ ᐃᑭ ᐊᒪᓬᐁᒃ ᑳᑎᓄᐎᐙᒡ, ᐃᑭ ᑲᔦ ᑫᓇᓐ ᑳᑎᓄᐎᐙᒡ ᑳᑮ ᑖᐙᒡ ᐃᐃᒫ ᑳᔑ ᐸᐲᑾᑎᓈᓂᒃ, ᑮᓃᓴᒋᐌᐗᒃ ᐁᑮ ᒦᑳᓈᐙᒡ ᐃᔅᕒᐃᔭᓬᐊᐞ, ᐁᑮ ᔖᑰᒋᐋᐙᒡ ᑲᔦ᙮ ᐌᑎ ᑕᔥ ᐊᕒᒪ Hormah ᐁᒋᑳᑌᓂᒃ ᐅᑮ ᐃᓈᒶᐙᐙᐞ᙮
19
ᑳᐊᓂ ᐅᔑᐲᐃᑳᑌᑭᓐ ᑳᑮ ᐊᓂ ᐃᔑᐌᐸᒃ ᐃᒫ ᐊᐲ ᓃᒥᑕᓇ 40 ᑕᓱ ᐱᐴᓐ ᑮᐸᐹᒥ ᐊᔮᐙᒡ ᐃᔅᕒᐃᔭᓬᐊᒃ ᐱᑾᑕᑲᒥᒃ᙮
Právě zvoleno:
ᐊᑭᑖᓱᓇᓐ 14: OJBS
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Ojibwe Shorter Bible (Syllabic Script) © 2008 Canadian Bible Society