ᐊᑭᑖᓱᓇᓐ 11
11
ᑲᐯᔑᐎᓐ ᑳᔑᐱᔅᑲᓀᒃ ᑳᑮᐃᒋᑳᑌᒃ
1ᐃᔅᕒᐃᔭᓬᐊᐞ Israel ᐃᑕᔥ ᐅᑮ ᒫᔑ ᑲᑲᓅᓂᑰᐞ ᑳᑎᐯᒋᑫᒡ ᐁᑮ ᑕᔑᑕᒫᑯᒡ ᐅᒫᔑᓭᐎᓂᓂ᙮ ᐊᐲ ᑕᔥ ᐁᓅᑕᐙᒡ ᐐᑫ ᐅᑮ ᓂᔥᑭᐃᑰᐞ᙮ ᐅᑎᔥᑯᑌᒻ ᐅᑮ ᐃᔑᓂᔕᐋᓐ ᒋᐃᔑ ᐱᔅᑲᓀᓂᒃ ᒣᑴᔭᐄ ᐁᔑᐊᔮᓂᒡ᙮ ᐋᓂᑕ ᑕᔥ ᑮᑕᔑ ᒑᑭᓱᐗᐞ ᓵᑭᒐᔭᐄ ᑳᑮ ᐃᔑ ᑲᐯᔑᐎᓐᒡ᙮ 2ᐯᒫᑎᓯᓂᒡ ᐃᑕᔥ ᒨᓯᔅ Moses ᐅᑮ ᑲᓅᓂᑰᐞ, ᒦᑕᔥ ᑳᐃᔑ ᐊᓇᒥᐁᑕᐙᒡ ᑳᑎᐯᒋᑫᓂᒡ᙮ ᒦᑕᔥ ᐃᐃ ᐃᔥᑯᑌ ᑳᐃᔑ ᐋᑕᐌᓂᒃ᙮ 3ᒦᑕᔥ ᑳᑮ ᐅᒋ ᐃᔑᓂᑳᑌᒃ ᐃᐃ ᑲᐯᔑᐎᓐ ᑳᔑ ᐱᔅᑲᓀᒃ Taberah,#11.3 ᑳᔑ ᐱᔅᑲᓀᒃ Taberah: ᐃᐃᐌ ᑖᐯᕒᐊ ᑳᐃᒋᑳᑌᒃ, ᑖᐱᔥᑰ ᑫᑰᓐ ᑳᐱᔅᑲᓀᒃ, ᒦ ᐃᐌ ᐁᓂᑖᑾᓂᓂᒃ ᑳᐃᔑᑮᔗᐙᒡ ᐄᐸᕒᐆᐗᒃ᙮ ᐋᓃᔥ ᒦ ᐃᒫ ᑳᑎᐯᒋᑫᒡ ᐅᑎᔥᑯᑌᒻ ᑳᑮ ᐃᔑ ᐱᔅᑲᓀᓂᒃ ᐁᔑᐊᔮᓂᒡ ᐯᒫᑎᓯᓂᒡ᙮
ᒨᓯᔅ ᑮᐅᓈᐸᒫᒡ ᓃᔣᓯᒥᑕᓇ ᑫᓃᑳᓂᓯᓂᒡ
4ᐃᐃ ᑕᔥ ᑳᑮ ᓂᑖ ᑭᒋ ᑳᑮᑭᑐᓂᒡ ᑳᒪᔭᑭᓯᓂᒡ ᑳᑮ ᐐᒌᐎᑯᓂᒡ ᐅᑮ ᒥᓴᐌᑕᒥᓂ ᑯᑕᒃ ᒦᒋᒻ, ᒦᑕᔥ ᑲᔦ ᐃᔅᕒᐃᔭᓬᐊᐞ ᐯᔑᑾᓐ ᑳᐃᔑ ᒫᔑ ᑲᑭᑐᓂᒡ ᐅᐅ ᐁᑮ ᐃᑭᑐᓂᒡ, ᐊᐌᓀᓐ ᐃᑕᔥ ᐃᓈ ᑫᒦᓂᓇᕽ ᐐᔮᔅ ᒋᒦᒋᐗᕽ? 5ᓂᒫᒥᑲᐎᒥᓐ ᓴ ᐌᑎ ᑮᐊᔮᔮᑭᐸᓐ ᐄᒋᐸᑮᕽ Egypt ᐁᑮ ᓂᑖ ᐊᒸᑭᑣᐸᓐ ᑮᑰᔭᒃ ᑫᑰᓐ ᐁᑮ ᐃᓇᑭᓱᓯᒀ᙮ ᓂᑮ ᓂᑖ ᒦᒋᒥᓐ ᓴ ᐊᔅᑭᐸᑯ ᓂᑖᐎᑭᒋᑲᓇᓐ cucumber, melons, ᔑᑳᑯᒥᔒᒃ onions, ᔑᑾ ᒪᔭᑭ ᔑᑳᑯᒥᔒᒃ leeks, ᑳᕒᓬᐃᒃ garlic ᑲᔦ᙮ 6ᑳᐐᓐ ᐃᑕᔥ ᓅᑯᒻ ᐊᐗᔑᒣ ᓂᑎᓀᑕᓰᒥᓐ ᒋᐐ ᐐᓯᓂᔮᕽ᙮ ᑳᐐᓐ ᓴ ᐐᑳ ᑫᑰᓐ ᓂᐙᐸᑕᓰᒥᓐ, ᒦ ᐁᑕᑯ ᐗᐊ ᒣᓇ manna ᐌᔮᐸᒪᑭᒡ, ᑮᐃᑭᑐᐗᐞ᙮
7 # Exo 16.31. ᐊᐊ ᓴ ᒣᓇ ᑮᐃᔑᓈᑯᓯ ᑖᐱᔥᑰ ᑯᕒᐃᔮᑕᕒ coriander ᑎᓄ ᐊᑲᑖᒥᓐ, ᑖᐱᔥᑰ ᑲᔦ ᐱᑭᐤ᙮ 8ᐯᒫᑎᓯᐙᒡ ᓴ ᐅᑮ ᓂᑖ ᒫᒨᔕᑭᓈᐙᓐ, ᐱᑭᔥᑭᐴᒋᑲᓇᓯᓃᕽ ᐃᑕᔥ ᐅᑮ ᐃᔑ ᐱᑭᔥᑭᐴᓈᐙᓐ᙮ ᐊᓯᓃᕽ ᑲᔦ ᐅᑮ ᐃᔑ ᐸᐸᑭᑌᔑᒫᐙᓐ, ᐊᑭᑯᕽ ᐃᑕᔥ ᐅᑮ ᐃᔑ ᑲᐹᔑᒫᐙᓐ ᑫᑾᓐ ᓴ ᐁᑮ ᐅᒋ ᐅᔑᐋᐙᒡ᙮ ᑖᐱᔥᑰ ᑫᑰᔅ ᐱᒥᑌᕽ ᑳᔑ ᑮᔑᓱᓐᒡ, ᐋᒨᐎ ᓰᓯᐹᑾᑦ ᐁᑕᑯᒋᑳᑌᒃ ᑮᐃᐳᑯᓯ ᐊᐊ ᒣᓇ᙮ 9ᐊᐲ ᓴ ᑮᐸᑲᒥ ᐊᔮᒃ ᐃᐃ ᑳᔕᑭᐊᔮᒃ ᑮᑎᐱᑲᒃ, ᒦ ᓴ ᑲᔦ ᐃᐃᒫ ᒣᓇ ᑳᐃᔑ ᑕᑯ ᐸᑲᒥᔥᑳᒡ᙮
10ᒨᓯᔅ ᐃᑕᔥ ᐅᑮ ᓅᑕᐙᐞ ᑲᑭᓇ ᐯᒫᑎᓯᓂᒡ ᐁᑭᒋ ᑳᑮᑭᑐᓂᒡ, ᐁᑕᔑᓂᒡ ᐁᐊᔪᑯᑳᐸᐎᓂᒡ ᐁᔑ ᐊᔩᔥᒀᑌᒥᐗᓂᓂᑭᓐ ᐅᐸᒀᓀᑲᒥᑯᓃᕽ᙮ ᑳᑎᐯᒋᑫᓂᒡ ᐃᑕᔥ ᐐᑫ ᑮᓂᔥᑳᑎᓯᐗᓐ᙮ ᑳᐐᓐ ᐃᑕᔥ ᒨᓯᔅ ᑫᐐᓐ ᑮᒥᓉᑕᓰ᙮ 11ᒦᔥ ᐅᐅ ᑳᐃᓈᒡ ᑳᑎᐯᒋᑫᓂᒡ,
ᐌᑯᓀᓐ ᐃᑕᔥ ᐌᒋ ᓴᓇᑲᐃᔭᓐ,
ᑭᑕᓄᑮᐋᑲᓐ ᐃᑕᔥ ᐁᑎᓄᐎᔮᓐ?
ᐋᓃᓐ ᐃᑕᔥ ᑳᐃᔑᒋᑫᔮᓐ ᐌᒋ ᒥᓍᐸᒥᓯᐗᓐ?
ᐌᑯᓀᓐ ᐃᑕᔥ ᐌᒋ ᑑᑕᐎᔭᓐ
ᓃᓐ ᑲᑭᓇ ᒋᐅᐸᐹᒥᓯᐎᓂᔮᓐ ᐅᑯ ᐯᒫᑎᓯᐙᒡ?
12ᓃᓐ ᐃᓇ ᓂᑮ ᐅᔑᐋᒃ ᐃᑭ ᐯᒫᑎᓯᐙᒡ?
ᓃᓐ ᐃᓇ ᓂᑮ ᓂᑖᐎᑭᐋᒃ ᒋᐅᒋᐃᔑᔭᐸᓐ,
ᑭᓂᑭᕽ ᐃᔑ ᐱᒥᐎᔥ ᑖᐱᔥᑰ ᑳᓅᓇᐋᐙᓱᒡ
ᑳᔑ ᐱᒥᐎᓈᒡ ᐊᐱᓅᒌᔕᓐ,
ᒋᐃᔑᐎᓇᒀ ᐌᑎ ᐊᑮᕽ
ᑳᑮ ᐃᔑ ᐊᔩᒋ ᐊᔓᑕᒪᐎᒪᒡ ᐅᑫᑌᔭᐋᒥᐙᐸᓃᐞ?
13ᐋᓃᑎ ᑕᔥ ᑫᐅᑎᓇᒧᐗᑭᐸᓐ ᐐᔮᔅ
ᑲᑭᓇ ᒋᐊᔕᒪᒀᐸᓐ ᐅᑯ ᐯᒫᑎᓯᐙᒡ?
ᒦ ᓴ ᒨᔕᒃ ᐁᔑ ᒪᒪᔦᒋᐎᐙᒡ ᐁᐃᔑᐙᒡ,
ᐐᔮᔅ ᐊᔕᒥᔑᓈᒻ ᑫᒦᒋᔮᕽ!
14ᑳᐐᓐ ᓴ ᓂᑖ ᑲᔥᑭᑑᓰᓐ ᑲᑭᓇ ᒋᐱᒥᐎᓇᒀᐸᓐ ᐅᑯ ᐯᒫᑎᓯᐙᒡ,
ᐅᓵᒻ ᓴᓇᑲᓐ ᓃᓐ ᐁᑕ ᐃᐃ ᒋᐃᔑᒋᑫᔮᐹᓐ᙮
15ᑮᔥᐱᓐ ᐃᑕᔥ ᐃᐃ ᓇᑫ ᐐᑑᑕᐎᔭᓐ,
ᐃᑕᐙ ᓅᑯᒻ ᔐᒫᒃ ᐃᑯ ᓂᓯᔑᓐ᙮
ᑮᔥᐱᓐ ᐃᑕᔥ ᒣᓍᐸᒥᐗᓀᓐ
ᑫᑯ ᓴ ᐸᑭᑎᓂᔑᑫᓐ ᒋᐙᐸᑎᓱᔮᓐ ᒋᒫᔑᓭᔮᓐ,
ᑮᐃᑭᑐ᙮
16ᒦᑕᔥ ᐅᐅ ᑳᑎᐯᒋᑫᓂᒡ ᑳᐃᑯᒡ, ᒫᐗᑑᓇᒪᐎᔑᓐ ᓃᔣᓯᒥᑕᓇ 70 ᐃᓂᓂᐗᒃ ᑫᑫᓂᒪᑣ ᑫᐊᓂ ᓃᑳᓀᑖᑯᓯᐙᒡ, ᑫᓂ ᐅᑭᒫᑲᑖᑫᐙᒡ ᑲᔦ, ᒋᐅᑎᓇᑣ ᐁᔑᐊᔮᓂᒡ ᑳᓃᑳᓂᓯᓂᒡ ᐃᔅᕒᐃᔭᓬᐊᐞ᙮ ᐲᓈᑲᑣᓂᒃ ᐃᑕᔥ ᒫᐗᒋᐃᑎᐎ ᐸᒀᓀᑲᒥᑯᕽ, ᒦᑕᔥ ᑫᔑ ᐐᒋᑳᐸᐎᑕᐎᒀ᙮ 17ᒦᑕᔥ ᐌᑎ ᑫᔑ ᓈᔒᔮᓐ, ᒋᑲᑲᓅᓂᓈᓐ᙮ ᐊᐊ ᑕᔥ ᐊᒑᒃ ᑳᑭᑭᔥᑲᐗᒡ ᓂᐐ ᐅᒋ ᐅᑖᐱᓈ, ᐁᐐ ᒦᓇᒀ ᐃᑭ ᐃᓂᓂᐗᒃ᙮ ᒦᐗᒃ ᐃᑕᔥ ᐃᑭ ᑫᐐᒋᐃᒀ ᒋᐱᒥᐎᑑᐙᒡ ᐃᐃ ᑳᐃᔑ ᐅᐸᐹᒥᓯᐎᓂᐗᒡ ᐯᒫᑎᓯᓂᒡ ᐅᒋ, ᑳᐐᓐ ᐃᑕᔥ ᑮᓐ ᐁᑕ ᐃᐃ ᑭᑲ ᐃᔑᒋᑫᓰ᙮ 18ᒦᔥ ᐅᐅ ᑫᐃᓇᑣ ᐯᒫᑎᓯᐙᒡ, ᐯᑭᐃᑎᓱᒃ ᓴ ᒋᑾᔮᒌᔦᒃ ᑳᐐ ᐃᔑᓭᒃ ᐙᐸᕽ; ᒦ ᓴ ᐃ ᒋᒦᒋᔦᒃ ᐐᔮᔅ᙮ ᑳᑎᐯᒋᑫᒡ ᐅᔕ ᑭᓅᑖᑯᐙ ᐃᐃ ᑳᔑ ᒪᒪᔦᒋᐎᔦᒃ ᐁᐃᑭᑐᔦᒃ, ᐊᐯᔥ ᐊᐎᔭ ᐊᔕᒥᔭᒥᓐᒡ ᐐᔮᔅ, ᓇᐗᒡ ᐄᑐᒃ ᓂᑮ ᒥᓄᓭᒥᓐ ᐌᑎ ᐄᒋᐸᑮᕽ ᑮᐊᔮᔮᑭᐸᓐ! ᑳᑎᐯᒋᑫᒡ ᐃᑕᔥ ᑭᐐ ᒦᓂᑯᐙ ᐐᔮᔅ, ᒦᑕᔥ ᐃᐃ ᒋᒦᒋᔦᒃ ᐐᔮᔅ᙮ 19ᑳᐐᓐ ᐃᑕᔥ ᐐᓐ ᐁᑕ ᐯᔑᑯ ᑮᔑᒃ, ᓃᔓᑮᔑᒃ, ᓈᓄ ᑮᔑᒃ, ᒥᑖᓱ ᑮᔑᒃ, ᓃᔥᑕᓇ ᑕᓱ ᑮᔑᒃ ᑭᑲ ᒦᒋᓰᒻ ᐃᐃ ᐐᔮᔅ᙮ 20ᐯᔑᑯ ᑮᓯᔅ ᐃᓴ ᑯᒥᓂᒃ ᑭᑲ ᒦᒋᒻ, ᐲᓂᔥ ᑭᔕᑾᓂᐙᕽ ᒋᐅᒋ ᓵᑭᒋᔥᑳᒃ᙮ ᐲᓂᔥ ᑲᔦ ᒋᓂ ᐋᓂᓭᑕᒣᒃ ᐋᓃᔥ ᐅᓵᒻ ᑭᑮ ᐋᓇᐌᓂᒫᐙ ᑳᑎᐯᒋᑫᒡ ᐁᔮᒡ ᐁᔑᐊᔮᐌᒃ ᐅᐅ ᐁᑮᐃᓀᒃ ᐁᒪᒪᔦᒋᐎᐁᒃ, ᐌᑯᓀᓐ ᐃᑕᔥ ᑳᐅᒋ ᓇᑲᑕᒫᕽ ᐄᒋᐸᑭ?
21ᒦᔥ ᐅᐅ ᒨᓯᔅ ᑳᐃᑭᑐᒡ, ᐃᓇᔥᑫ ᐅᐅᒫ ᓂᑕᔮ ᐁᔑᐊᔮᐙᒡ ᐅᑯ ᐯᒫᑎᓯᐙᒡ ᓂᑯᑣᔂᒃ ᒥᑖᔂᒃ ᑌᔑᐙᒡ ᑳᒥᑐᓭᐙᒡ, ᐅᐅ ᑕᔥ ᐁᐃᔑᔭᓐ, ᓂᑲ ᐊᔕᒫᒃ ᓴ ᐐᔮᓯᓂ ᑫᒦᒋᐙᒡ ᐯᔑᑯ ᑮᓯᔅ ᒥᓂᒃ! 22ᑕᑌᐱᓭ ᓇ ᐐᔮᔅ ᒋᐊᔕᒥᑣᐸᓐ ᑮᔥᐱᓐ ᓂᓯᒥᑎᐸᓐ ᑲᑭᓇ ᒫᓇᒑᓂᔕᐞ, ᐱᔑᑭᐗᐞ ᑲᔦ? ᑕᑌᐸᔕᒫᐗᒃ ᐃᓇ ᑮᔥᐱᓐ ᑲᑭᓇ ᑮᑰᔭᐞ ᐁᔮᓂᒡ ᑭᒋᑲᒦᕽ ᒫᒨᔕᑭᓂᒥᓐᒡ? ᐅᑮᐃᓈᓐ᙮
23ᐅᐅ ᑕᔥ ᑳᑎᐯᒋᑫᓂᒡ ᐅᑮ ᐃᔑ ᓇᑴᑖᑰᓐ, ᐊᑳᓭᑖᑾᓐ ᐃᓇ ᓂᒪᔥᑲᐎᓰᐎᓐ᙮ ᐋᐱᒋ ᓴ ᐐᐸ ᑭᑲ ᐙᐸᑖᓐ ᐅᐅ ᑳᐃᓂᓈᓐ ᒋᐃᔑᓭᑴᓐ, ᑯᒫ ᑲᔦ ᒋᐃᔑᓭᓯᓄᑴᓐ, ᐅᑮᐃᑰᓐ᙮
24ᒨᓯᔅ ᐃᑕᔥ ᑮᐃᔖ ᐁᑮ ᐊᐎ ᐐᑕᒪᐙᒡ ᐯᒫᑎᓯᓂᒡ ᐋᓃᓐ ᑳᐃᑭᑐᓂᒡ ᑳᑎᐯᒋᑫᓂᒡ᙮ ᐅᑮ ᐅᑯᓈᐞ ᐃᑕᔥ ᑲᔦ ᓃᔣᓯᒥᑕᓇ 70 ᑫᑮ ᓃᑳᓂᓯᓂᒡ ᐁᑮ ᐅᑎᓈᒡ ᐁᔑᐊᔮᓂᒡ ᐅᓃᑳᓂᓰᐞ᙮ ᒦᑕᔥ ᑳᐃᔑ ᐙᑳ ᑳᐸᐎᐋᒡ ᐃᐃᒫ ᒫᐗᒋᐃᑎᐎ ᐸᒀᓀᑲᒥᑯᕽ᙮ 25ᒦᑕᔥ ᑳᑎᐯᒋᑫᓂᒡ ᐗᑸᕽ ᑳᑮ ᐱᔑ ᓈᔒᓂᒡ ᐁᑮ ᑲᑲᓅᓂᑯᒡ᙮ ᒦᔥ ᑳᐅᒋ ᐅᑖᐱᓈᓂᒡ ᐊᒑᑾᓐ ᑳᑮ ᑭᑭᔥᑲᐙᒡ, ᐁᑮ ᒦᓈᓂᒡ ᐃᐃ ᓃᔣᓯᒥᑕᓇ 70 ᑳᓃᑳᓂᓯᓂᒡ᙮ ᐊᐲ ᑳᐅᑎᓯᑯᓂᒡ ᐃᓂ ᐊᒑᑾᓐ, ᔐᒫᒃ ᓴ ᐅᑮ ᑲᓅᑕᒪᐙᓂ ᑭᔐᒪᓂᑑᓐ, ᑳᐐᓐ ᒦᓇᐙ ᐅᑮ ᑲᔥᑭᑑᓰᓂ ᐃᐃ ᒋᐃᔑᒋᑫᓂᒡ᙮
26ᓃᔑᓐ ᐃᑕᔥ ᐃᑭ ᑳᑮ ᓃᔣᓯᒥᑕᓇᐌᐙᒡ ᐁᓬᑖᑦ Eldad ᐁᔑᓂᑳᓱᒡ, ᐊᐊ ᑲᔦ ᒦᑖᑦ Medad, ᑮᐊᐱᐗᒃ ᐃᐃᒫ ᐁᔑ ᑲᐯᔑᐎᓐᒡ, ᑳᐐᓐ ᑮᐃᔖᓰᐗᒃ ᒫᐗᒋᐃᑎᐎ ᐸᒀᓀᑲᒥᑯᕽ᙮ ᑫᐐᓇᐙ ᓴ ᑮᑕᑯ ᐃᓇᑭᓱᐗᒃ ᐁᓃᑳᓂᓯᐙᒡ᙮ ᐊᒑᑾᓐ ᐃᑕᔥ ᐅᑮ ᐅᑎᓯᑯᐙᓐ, ᒦᔥ ᑳᐃᔑ ᑲᓅᑕᒪᐙᐙᒡ ᑭᔐᒪᓂᑑᓐ᙮ 27ᐯᔑᒃ ᐃᑕᔥ ᐅᔥᑭᓃᑭᐗᓐ ᑮᐊᐸᑑᐗᓐ ᐁᔑᐊᔮᒡ ᒨᓯᔅ ᐅᐅ ᐁᑮᐃᑯᒡ, ᐁᓬᑖᑦ, ᐊᐊ ᑲᔦ ᒦᑖᑦ ᓴᓈ ᐅᑲᓅᑕᒪᐙᐙᓐ ᑭᔐᒪᓂᑑᓐ ᐌᑎ ᐁᔑ ᑲᐯᔑᐎᓐᒡ, ᐅᑮᐃᑰᓐ᙮ 28ᒑᔓᐙᓐ Joshua ᑕᔥ, ᐌᑌᑌᓂᒡ ᓇᓇᓐ Nun, ᐁᐅᔥᑭᓃᑮᐎᓂᒡ ᑳᑮ ᐱᐅᒋ ᐐᒋᐃᑯᒡ, ᐅᐅ ᐅᑮᐃᑰᓐ, ᓂᑑᑭᒫᒻ ᒨᓯᔅ, ᑕᑲ ᐅᒋᐞ ᐃᐃ ᒋᐃᔑᒋᑫᓯᒀ, ᐅᑮᐃᑰᓐ᙮
29ᒦᔥ ᒨᓯᔅ ᑳᐃᓈᒡ, ᑭᑑᒋ ᐋᔮᔐᑕᒻ ᐃᓇ ᓃᓐ ᐅᒋ? ᒦᑕᔥ ᓃᓐ ᐁᔑ ᒥᓴᐌᑕᒫᓐ ᑳᑎᐯᒋᑫᒡ ᒋᒦᑭᐙᑫᐸᓐ ᐅᑕᒑᑾᓐ, ᒋᒦᓈᐸᓐ ᐃᐃ ᑲᑭᓇ ᐅᐱᒫᑎᓰᒪᐞ, ᑲᑭᓇ ᑕᔥ ᒋᑎᓄᐎᓂᐸᓐ ᑳᑲᓅᑕᒪᐙᓂᒡ ᑭᔐᒪᓂᑑᓐ, ᐅᑮᐃᓈᓐ᙮ 30ᒦᑕᔥ ᒨᓯᔅ, ᐃᑭ ᑲᔦ ᑳᑮ ᓃᑳᓂᓯᐙᒡ ᑳᐃᔑ ᑮᐌᐙᒡ ᐁᔑ ᑲᐯᔑᐎᓐᒡ᙮
ᑳᑎᐯᒋᑫᒡ ᑮᐃᔑᓂᔕᐙᒡ ᒪᔭᑭᐱᓀᐞ
31ᑳᑎᐯᒋᑫᒡ ᐃᑕᔥ ᑮᐃᔑᒋᑫ ᒋᑭᒋ ᓅᑎᓂᓂᒃ, ᑭᒋᑲᒦᕽ ᐃᑕᔥ ᐃᓇᑫ ᑮᐅᒋ ᐲᒋᐌᐹᔑᐗᐞ ᒪᔭᑭᐱᓀᐞ᙮ ᒥᓯᐌ ᓴ ᐙᑳᔭᐄ ᐁᔑ ᑲᐯᔑᐎᓐᒡ ᑮᐃᔑ ᐴᓃᐗᐞ᙮ ᐯᔑᑯ ᑮᔑᒃ ᒥᓂᒃ ᐁᔖᕽ ᐁᑮ ᐊᓂᑯᑾᑌᔥᑳᓂᒡ, ᓂᓱᒥᓯᑦ ᐁᑮ ᐊᐲᑕᐊᒥᓂᒡ᙮ ᐙᑳᔭᐄ ᑳᐃᔑ ᑲᐯᔑᐎᓐᒡ ᑮᐃᔑ ᐴᓃᐗᐞ᙮ 32ᒦᑕᔥ ᐯᒫᑎᓯᐙᒡ ᑲᐯᑮᔑᒃ, ᑲᐯᑎᐱᒃ, ᑲᐯᑮᔑᒃ ᑲᔦ ᐁᐊᓂ ᐙᐸᓂᓂᒃ ᑳᑮ ᒫᒨᔕᑭᓈᐙᒡ ᐃᐃ ᒪᔭᑭᐱᓀᐞ᙮ ᑳᐐᓐ ᓴ ᐊᐎᔭ ᓅᑕᐞ ᓂᓯᒥᑕᓇ ᑭᒋ ᒪᔥᑭᒧᑕᓐ ᒋᑮ ᒨᔕᑭᓂᑫᒡ᙮ ᒦᑕᔥ ᒥᓯᐌ ᐙᑳᔭᐄ ᐁᔑ ᑲᐯᔑᕽ ᑳᐃᔑ ᐙᑳᔑᒫᐙᒡ ᒋᐹᓱᓂᒡ᙮ 33ᒣᒀ ᑕᔥ ᒋᑆ ᔖᔖᑾᑕᒧᐙᒡ ᐃᐃ ᐐᔮᓯᓂ, ᒦ ᓴ ᐃ ᑳᑎᐯᒋᑫᓂᒡ ᑳᑮ ᓂᔥᑭᐋᐙᒡ᙮ ᒦᑕᔥ ᑳᑮ ᑑᑖᑯᐙᒡ ᐐᑫ ᒋᑭᒋ ᐗᓯᑖᐎᓭᐙᒡ᙮ 34ᒦᑕᔥ ᑳᐅᒋ ᐃᔑᓂᑳᑌᒃ ᐃᐃᒫ ᑳᑮ ᐃᔑᐊᔮᐙᒡ, ᑳᔑ ᓇᐃᓂᑣ ᐅᑖᔅᑯᓂᓰᒃ Kibroth hattaavah, ᐋᓃᔥ ᒦ ᐃᒫ ᑳᑮ ᐃᔑ ᓇᐃᓂᑣ ᐯᒫᑎᓯᐙᒡ ᑳᑮ ᐋᔅᑯᓀᑕᒧᐙᒡ ᐐᔮᔅ᙮
35ᒦᑕᔥ ᐃᐃᒫ ᐁᒋᑳᑌᓂᒃ ᐁᔑ ᓇᐃᓂᑣ ᐅᑖᔅᑯᓂᓰᒃ ᑳᐅᒋ ᒫᒑᐙᒡ ᐌᑎ ᐁᑮ ᐃᔑ ᑕᑯᔑᓄᐙᒡ ᐁᓰᕒᐋᑦ Hazeroth ᐁᒋᑳᑌᓂᒃ, ᒦᑕᔥ ᐃᐃᒫ ᑳᐃᔑ ᑲᐯᔑᐙᒡ᙮
Právě zvoleno:
ᐊᑭᑖᓱᓇᓐ 11: OJBS
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Ojibwe Shorter Bible (Syllabic Script) © 2008 Canadian Bible Society