ᐁᔅᑕᕒ 3
3
ᐁᒪᓐ ᑮᐃᓀᑕᕽ ᐁᐐᓂᓵᒡ ᒎᐗᐞ
1ᓈᓈᑫ ᑕᔥ ᐁᐊᓂ ᐃᔑᓭᒃ ᑭᒋᐅᑭᒫ ᓭᕒᐊᒃᓰᔅ Xerxes ᐅᑮ ᐃᔥᐸᑭᒫᓐ ᐁᒪᓐ Haman ᐁᔑᓂᑳᓱᓂᒡ ᐁᑮ ᐃᓇᑭᒫᒡ ᒫᐗᒡ ᒋᓃᑳᓀᑖᑯᓯᓂᒡ ᐊᐲᒡ ᐐᓐ ᐃᐃ ᑯᑕᒃ ᐌᑭᒫᐌᑖᑯᓯᓂᒡ᙮ ᐁᒪᓐ ᐄᑐᒃ ᑮᐅᑌᑌ ᐊᒥᑌᑕ Hammedatha ᑳᑮ ᐅᑕᑳᓀᓯᓂᒡ ᐁᑳᒃ#3.1 ᐁᑳᒃ: ᒦ ᐊᐌ ᑳᑎᓄᐎᓂᒡ ᐊᒪᓬᐁᑮ ᑳᑮ ᐅᑭᒫᑲᑕᐙᒡ ᐃᓂᐌᓂᐗᐞ ᑎᓄ ᐊᒪᓬᐁᑮ ᐊᐸᓀ ᐱᑯ ᑳᑮ ᐱ ᔒᑫᓂᒥᑯᐙᒡ ᐃᔅᕒᐃᔭᓬᐊᒃ᙮ Agag ᐁᔑᓂᑳᓱᓂᒡ᙮ 2ᑭᒋᐅᑭᒫ ᓴ ᐅᑮ ᐃᓈᐞ ᑲᑭᓇ ᐌᑭᒫᐌᑖᑯᓯᓂᒡ ᒋᐅᒋᒌᑾᓇᐲᑕᐙᓂᒡ, ᒋ ᐊᓂᒥᑯᑕᐙᓂᒡ ᐃᓂ ᐁᒪᓇᓐ ᒋᓈᑯᑑᓂᒡ ᐁᑭᑌᑖᑯᓯᓂᒡ᙮ ᐊᐊ ᑕᔥ ᒸᕒᑎᑳᐃ Mordecai ᑳᐐᓐ ᐅᑮᐅᒋᒌᑾᓇᐲᑕᐙᓰᓐ, ᑳᐐᓐ ᑲᔦ ᒋᑮ ᑭᑌᓂᒫᒡ᙮ 3ᐃᐃ ᑕᔥ ᑯᑕᒃ ᐌᑭᒫᐌᑖᑯᓯᓂᒡ ᐌᑭᒫᐗᓄᑮᓂᒡ ᐅᑮ ᑲᑴᒋᒥᑰᐞ ᐁᑮᐃᑯᒡ, ᒸᕒᑎᑳᐃ, ᐌᑯᓀᓐ ᐃᑕᔥ ᐌᒋ ᔕᔒᐱᑕᒧᐗᒡ ᑭᒋᐅᑭᒫ ᐁᓇᔓᐌᒡ? 4ᐁᑕᓱ ᑮᔑᒃ ᐃᓴ ᑰᑮᑲᓅᓂᑰᐞ, ᑳᐐᓐ ᐃᑕᔥ ᑮᐃᓀᑕᓰ ᐃᐃ ᒋᐃᔑᒋᑫᒡ᙮ ᒦᔥ ᑳᐃᔑ ᐐᑕᒪᐙᒡ ᒎ Jew ᐁᑎᓄᐎᒡ᙮ ᒦᑕᔥ ᑳᐃᔑ ᐐᑕᒪᐙᓂᒡ ᐁᒪᓇᓐ ᑕᑲ ᒋᐱᓯᔅᑫᓂᒫᐎᑎᐸᓐ ᒸᕒᑎᑳᐃ ᑳᑮ ᐃᔑᒋᑫᒡ᙮ 5ᐊᐲ ᑕᔥ ᐁᒪᓐ ᑳᑭᑫᑕᕽ ᐁᐐ ᐅᒋᒌᑾᓇᐲᑖᑯᓯᒃ, ᐁᐐ ᐊᓂᒥᑯᑖᑯᓯᒃ ᑲᔦ ᒋᑭᑌᓂᒥᑯᐸᓐ, ᐐᑫ ᓴ ᑮᓂᔥᑳᑎᓯ᙮ 6ᐊᐲ ᑕᔥ ᑳᑭᑫᑕᕽ ᒸᕒᑎᑳᐃᔭᓐ ᒎ ᐁᑎᓄᐎᓂᒡ, ᐊᐗᔑᒣ ᑕᔥ ᑮᐃᓀᑕᒻ ᐁᐐ ᑑᑕᐙᒡ᙮ ᑮᐃᓀᑕᒻ ᐁᐐ ᒑᑭᐋᒡ ᑲᑭᓇ ᐁᓇᐌᒫᓂᒡ ᒸᕒᑎᑳᐃᔭᓐ᙮ ᑲᑭᓇ ᓴ ᑯ ᐁᐐ ᓂᓵᒡ ᒎᐗᐞ ᐁᔮᓂᒡ ᐁᔑ ᐅᑭᒫᐎᓂᒡ ᐊᑮᕽ ᑭᒋᐅᑭᒫᓐ ᓭᕒᐊᒃᓰᓴᓐ᙮
7ᒥᑖᔑᓃᔓᐱᐴᓐ 12 ᑳᑭᒋᐅᑭᒫᐎᒡ ᓭᕒᐊᒃᓰᔅ, ᐯᔑᑯᑮᓯᓲᓐ ᐁᐱᒪᑭᓱᓂᒡ ᓃᓵᓐ Nisan ᐁᔑᓂᑳᓱᓂᒡ, ᒦ ᓴ ᐃ ᐊᐲ ᑳᐊᑕᐅᑖᐱᓂᑫᕽ ᐁᓈᓴᒦᒡ ᐁᒪᓐ᙮ ᒦᑕᔥ ᑳᑮ ᐅᒋ ᐃᔑᒋᑫᕽ ᐁᐐ ᐅᓇᒋᑳᑌᒃ ᑮᔑᑲᓐ, ᑲᔦ ᑕᔥ ᑫᐱᒪᑭᓱᒡ ᑮᓯᔅ᙮ ᒦᔥ ᑳᑮ ᒥᑲᐎ ᐅᑖᐱᓂᓐᒡ ᒥᑖᔑᓃᔓᑮᓯᔅ 12, ᐁᑕᕒ Adar᙮
8ᒦᑕᔥ ᐁᒪᓐ ᑳᐃᓈᒡ ᑭᒋᐅᑭᒫᓐ ᓭᕒᐊᒃᓰᓴᓐ, ᐊᔮᐗᒃ ᐃᓴ ᐃᑭ ᑎᓄ ᐯᑳᓉᐙᓇᑭᓯᐙᒡ ᐯᒫᑎᓯᐙᒡ ᒥᓯᐌ ᐁᐊᔮᐙᒡ ᑭᑕᑮᒥᕽ ᑳᔑ ᑎᐯᒋᑫᔭᓐ ᐸᑳᓐ ᐁᐸᑫᐌᓂᑎᓱᐙᒡ᙮ ᐸᑳᓐ ᑲᔦ ᐃᔑᑣᐗᒃ ᐁᔑᑣᓂᒡ ᑯᑕᒃ ᐊᐎᔭᐞ᙮ ᑳᐐᓐ ᑲᔦ ᐅᐸᐹᒥᑕᓰᓈᐙ ᑭᑑᓇᔓᐌᐎᓇᓐ᙮ ᑳᐐᓐ ᑕᐃᔑᓭᓯᓅᓐ ᒋᐸᐹ ᐱᓯᔅᑫᓂᒫᓯᐎᑣᐸᓐ᙮ 9ᑮᔥᐱᓐ ᐃᑕᔥ ᑭᒋᐅᑭᒫ ᐁᔑ ᒥᓍᐸᑕᕽ, ᐅᓇᑑᓐ ᐅᓇᔓᐌᐎᓐ ᑲᑭᓇ ᒋᓂᓯᑣ᙮ ᑮᔥᐱᓐ ᐃᑕᔥ ᐃᔑᒋᑫᔭᓐ, ᓃᓐ ᐃᓴ ᐱᑯ ᓂᑲ ᐸᑭᑎᓈ ᓃᔣᓯᒥᑕᓇᔑᓈᓇᓐ ᒥᑖᔂᒃ ᑕᓱ ᑎᐹᐲᔥᑰᒋᑲᓐ 75,000 lbs ᐙᐹᐱᑯ ᔔᓂᔮ ᐙᐱᒃ ᐃᐃᒫ ᐁᔑ ᐊᓯᓐᒡ ᑭᒋᐅᑭᒫ ᔔᓂᔮ᙮ ᒦᔥ ᐊᐊ ᔔᓂᔮ ᑫᐋᐸᑎᓯᒡ ᐅᐅᐌ ᑳᐐ ᐃᓇᔓᐌᔭᓐ᙮
10ᒦᑕᔥ ᑭᒋᐅᑭᒫ ᑳᐃᔑ ᑮᒋᑯᔥᑲᐙᒡ ᐅᓈᐱᓂᒌᐱᓱᓇᓐ ᐁᑮ ᒦᓈᒡ ᐁᒪᓇᓐ ᐌᑌᑌᓂᒡ ᐊᒥᑌᑕᐗᓐ ᑳᑮ ᐅᑕᑳᓀᓯᓂᒡ ᐁᑳᒃ ᐁᔑᓂᑳᓱᓂᒡ᙮ ᐁᒪᓐ ᐄᑐᒃ ᑳᑮ ᔒᑫᓂᒫᒡ ᒎᐗᐞ᙮ 11ᒦᔥ ᑭᒋᐅᑭᒫ ᑳᐃᓈᒡ, ᑲᓇᐌᓂᒻ ᑭᔔᓂᔮᒻ, ᐱᓵᓐ ᐃᑯ ᑑᑕᐤ ᐃᑭ ᐯᒫᑎᓯᐙᒡ ᐁᔑ ᒥᓴᐌᑕᒪᓐ᙮ 12ᒥᑖᔑᓂᓱᑮᔑᒃ 13 ᐃᑕᔥ ᐁᐃᔑᓭᓂᒃ ᐁᐱᒪᑭᓱᓂᒡ ᐯᔑᑯᑮᓯᓲᓐ, ᒦ ᐃ ᐁᒪᓐ ᑳᑮ ᐊᑐᒫᒡ ᑭᒋᐅᑭᒫ ᐅᑐᔑᐲᐃᑫᐎᓂᓃᒪᐞ ᐁᑮ ᐐᑕᒪᐙᒡ ᐋᓃᓐ ᑫᐃᔑᐲᐃᑫᓂᒡ, ᑲᔦ ᑕᔥ ᒋᐃᔑᐲᐃᑳᑌᓂᒃ ᐁᑕᓱ ᐃᔑᑮᔗᓂᒡ ᑲᑭᓇ ᐊᐎᔭᐞ᙮ ᑲᑭᓇ ᑕᔥ ᐌᑭᒫᐌᑖᑯᓯᓂᒡ, ᑳᓃᑳᓂᓯᓂᒡ, ᐃᐃ ᑲᔦ ᑌᐯᑕᒥᓂᒡ ᐯᐸᑳᓐ ᐊᑮᓐ ᑮᐃᔑᓂᔕᐊᒪᐙᐗᐞ ᐅᐅ ᐅᓇᔓᐌᐎᓐ᙮ ᑭᒋᐅᑭᒫ ᓴ ᐅᐐᓱᐎᓐ ᑮᐋᐸᑕᓂᓂ, ᑲᔦ ᐁᑮ ᒪᓯᓂᔑᒫᒡ ᑭᒋᐅᑭᒫ ᐅᓈᐱᓂᒌᐱᓱᓂᓂ᙮ 13ᐃᑭ ᑕᔥ ᑳᑮ ᐱᒥᐸᑣᐙᒡ ᐃᓈᒋᒧᐎᓇᓐ ᒥᓯᐌ ᐊᑮᕽ ᐅᑮ ᐃᔑᐎᑑᓈᐙ ᐅᐅ ᐅᓇᔓᐌᐎᓐ᙮ ᒦᑕᔥ ᑳᐃᔑᐲᐃᑳᑌᒃ ᑲᑭᓇ ᒎᐗᒃ ᒋᓂᓯᑣ ᐯᔑᑯ ᑮᔑᒃ ᐊᐲ ᒥᑖᔑᓂᓯᓐ 13 ᐃᓇᑭᓱᓂᒡ ᐁᑕᕒ ᑮᓯᓲᓐ᙮ ᑲᑭᓇ ᒎ ᑳᑎᓄᐎᐙᒡ, ᐅᔥᑲᔭᐋᒃ, ᑭᒋ ᐊᔭᐋᒃ, ᐃᑴᐗᒃ, ᐊᐱᓅᒌᔕᒃ ᐃᑯ ᑲᔦ᙮ ᑲᑭᓇ ᓴ ᒋᓂᓯᑣ, ᐅᑕᔭᐄᒥᐙᓐ ᑲᔦ ᒋᐅᑖᐱᓂᑳᑌᓂᑭᓐ᙮ 14ᐃᐃ ᓴ ᐁᔑᐲᐃᑳᑌᒃ ᐅᓇᔓᐌᐎᓐ ᑮᐃᓈᑯᓂᑫᓈᓂᐗᓐ ᒥᓯᐌ ᐊᑮᕽ ᐊᔮᐙᒡ ᐊᐎᔭᒃ ᒋᑭᑫᑕᒧᐙᒡ, ᑲᑭᓇ ᑕᔥ ᐊᐎᔭᒃ ᒋᑾᔮᒌᐙᒡ ᐃᐃ ᐊᐲ ᐃᔑ ᑮᔑᑲᓂᓂᒃ᙮
15ᐃᐃ ᓴ ᑕᔥ ᐅᓇᔓᐌᐎᓐ ᑮᑭᑫᑖᑯᒋᑳᑌ ᐃᐃᒫ ᒫᐗᒡ ᐃᑯ ᑭᒋ ᐆᑌᓈᕽ ᓲᓴ Susa᙮ ᒦᔥ ᐃᑭ ᑳᑮ ᐱᒥᐸᑣᐙᒡ ᐃᓈᒋᒧᐎᓇᓐ ᑳᐃᔑ ᒫᒌ ᐋᒋᒧᐙᒡ ᒥᓯᐌ ᐊᑮᕽ᙮ ᑭᒋᐅᑭᒫ ᓴ ᐊᐊ ᑲᔦ ᐁᒪᓐ ᑮᓇᓇᒪᑕᐱᐗᒃ ᐁᑮ ᒥᓂᑴᐙᒡ ᒣᒀ ᐱᑯ ᐁᐗᓈᔦᑖᑾᓂᓂᒃ ᐃᐃᒫ ᑭᒋ ᐆᑌᓈᕽ ᓲᓴ᙮
Ojibwe Shorter Bible (Syllabic Script) © 2008 Canadian Bible Society