ᐁᔅᑕᕒ 2
2
ᐁᔅᑕᕒ ᐁᑭᒋᐅᑭᒫᑴᐎᒡ
1ᓈᓈᑫ ᓴ ᐊᐲ ᑭᒋᐅᑭᒫ ᓭᕒᐊᒃᓰᔅ Xerxes ᑳᐴᓂᑭᑖᓱᒡ, ᑮᐃᔑ ᒫᒥᑲᐎ ᐹᔥᑖᐃᐗᓐ Vashti ᐋᓃᓐ ᑲᔦ ᑳᐃᔑᒋᑫᓂᒡ᙮ ᑮᐃᔑ ᒫᒥᑲᐎ ᑲᔦ ᐋᓃᓐ ᑳᐃᓇᔓᐙᓈᒡ᙮ 2ᒦᑕᔥ ᑳᑮᐃᑯᒡ ᐃᐃ ᑳᐐᑕᒫᑯᒡ ᐋᓃᓐ ᑫᐃᔑᒋᑫᒡ, ᐃᓇᔥᑫ ᑕᑲᑴ ᒥᑲᐙᐗᒃ ᒋᒥᓄᓈᑯᓯᐙᒡ ᐯᑭ ᐅᔥᑭᓃᑭᑴᐗᒃ ᑭᒋᐅᑭᒫ ᑫᐐᒌᐙᒡ᙮ 3ᑮᓐ ᐅᓇᑭᒻ ᐃᑭᐌᓂᐗᒃ ᐌᑭᒫᑲᑕᒧᐙᒡ ᐁᑕᓯᑭᓐ ᐊᑮᓐ ᒋᑲᓇᐙᐸᑕᒧᐙᒡ ᒋᐲᓂᒥᓐᒡ ᐅᔥᑭᓃᑭᑴᐞ ᐃᐃᒫ ᐃᑴᐎᑲᒥᑯᕽ ᐁᔑᐊᔮᒃ ᒫᐗᒋ ᑭᒋ ᐆᑌᓈᕽ ᓲᓴ Susa᙮ ᐊᐊ ᓴ ᐄᑳᐃ Hegai ᑫᓇᐌᓂᒫᒡ ᐃᑴᐗᐞ ᐅᑲ ᓈᓈᑲᒋᐋᐞ᙮ ᐃᑭ ᓴ ᑕᔥ ᐅᔥᑭᓃᑭᑴᒃ ᑕᑑᒋᑲᓂᐎᐗᒃ ᐊᐗᔑᒣ ᒋᒥᓄᓈᑯᓯᐙᒡ᙮ 4ᑮᓐ ᐃᑕᔥ ᑭᑲ ᐅᓈᐸᒫ ᒫᐗᒡ ᑫᒥᓄᓇᐗᒡ ᑫᑭᒋᐅᑭᒫᑴᐎᒡ ᒋᓈᐱᔥᑲᐙᒡ ᐹᔥᑖᐃᐗᓐ᙮ ᐊᐊ ᓴ ᑭᒋᐅᑭᒫ ᑮᒥᓄᑕᒻ ᐅᐅ ᑳᑮᐃᓂᓐᒡ᙮ ᒦᑕᔥ ᐃᐃ ᑳᐃᔑᒋᑫᒡ᙮
5ᐃᐃ ᓴ ᑕᔥ ᒫᐗᒋᑯ ᑭᒋ ᐆᑌᓈᕽ ᓲᓴ ᑮᐊᔮ ᒎᐎᓂᓂ Jew ᐁᑮ ᐅᑕᑳᓀᓯᒡ ᐯᒋᒪᓂᕽ Benjamin, ᒸᕒᑎᑳᐃ Mordecai ᐁᑮ ᐃᔑᓂᑳᓱᒡ᙮ ᐅᑌᑌᓐ ᒉᐊᕒ Jair ᑮᐃᔑᓂᑳᓱᐗᓐ, ᑳᑮ ᐅᑌᑌᓂᒡ ᔑᒥᐋᐃᐗᓐ Shimei, ᑳᑮ ᐊᓂ ᐅᑌᑌᓂᒡ ᑭᔥ Kish ᑳᑮ ᐃᔑᓂᑳᓱᓂᒡ᙮ 6#2Ki 24.10-16; 2Ch 36.10. ᑭᒋᐅᑭᒫ ᓀᐸᑲᓈᓴᕒ Nebuchadnezzar ᐹᐱᓬᐊᓐ Babylon ᐊᑮᕽ ᑳᑮ ᐅᒌᒡ, ᑮᐃᔑᐎᓈᑯᐸᓐ ᑭᒋᐅᑭᒫᓐ ᒉᐆᔭᑭᓇᓐ Jehoiachin ᒎᑕ Judah ᐊᑮᕽ ᐌᒌᓂᒡ ᐌᑎ ᐹᐱᓬᐊᓐ ᐊᑮᕽ ᐁᑮ ᐃᔑᐎᓈᒡ᙮ ᒦᑕᔥ ᐃᐃᒫ ᑫᐐᓐ ᒸᕒᑎᑳᐃ ᑳᐃᔑ ᑕᑯ ᒫᒌᒋᑲᓂᐎᑯᐸᓀᓐ᙮ 7ᒸᕒᑎᑳᐃ ᐅᑮ ᐊᔮᐙᓐ ᐅᑑᔑᒥᑴᒪᓐ ᐋᑖᓴ Hadassah ᐁᑮ ᐃᔑᓂᑳᓱᓂᒡ᙮ ᐁᔅᑕᕒ Esther ᐃᓴ ᑲᔦ ᑮᐃᔑᓂᑳᓱᐗᓐ ᐐᑫ ᐁᑮ ᒥᓄᓈᑯᓯᓂᒡ, ᑲᔦ ᑕᔥ ᐁᑮ ᒥᓄᐐᔭᐌᓂᒡ᙮ ᐐᓐ ᐄᑐᒃ ᐃᑯ ᐅᑮ ᐅᑖᐱᓈᓐ ᐁᑮ ᐅᐱᑭᐋᒡ ᐋᓃᔥ ᑮᐃᔥᒀ ᐱᒫᑎᓯᓂᑯᐸᓐ ᐅᑌᑌᓂ, ᐅᒫᒫᓂ ᑲᔦ᙮
8ᐊᐲ ᓴ ᑭᒋᐅᑭᒫ ᑳᐐᑌᓂᒃ ᐅᑐᔥᑭ ᐅᓇᔓᐌᐎᓐ ᓃᐱᐗᐞ ᐃᓴ ᐅᔥᑭᓃᑭᑴᐗᒃ ᑮᐲᒋᑲᓂᐎᐗᒃ ᐃᐃᒫ ᐃᑴᐎᑲᒥᑯᕽ ᐁᔑᐊᔮᓂᒃ ᑭᒋ ᐆᑌᓈᕽ ᓲᓴ᙮ ᐊᐊ ᓴ ᑕᔥ ᐄᑳᐃ ᑮᐊᓅᓈ ᒋᓈᓈᑲᒋᐋᒡ ᐃᐃ ᐃᑴᐗᐞ᙮ ᒦᑕᔥ ᑫᐐᓐ ᐃᐃᒫ ᐁᔅᑕᕒ ᑳᑕᑸᒡ ᐁᑮ ᐃᔑᐎᒋᑲᓂᐎᒡ ᑭᒋᐅᑭᒫᐎᑲᒥᑯᕽ᙮ 9ᔐᒫᒃ ᐃᑕᔥ ᐃᑯ ᐄᑳᐃ ᐅᑮ ᓵᑭᐋᓐ, ᐅᑮ ᒥᓍᐸᒫᓐ ᑲᔦ ᐁᔅᑕᕒᐊᓐ᙮ ᒦᔥ ᑲᔦ ᑳᐃᔑ ᒫᒌᑲᐙᒡ ᐁᑮ ᑑᑕᐙᒡ ᒋᒥᓄᓈᑯᓯᓂᒡ, ᒦᒋᒻ ᑲᔦ ᐁᑮ ᐊᔕᒫᒡ ᑫᒥᓄᔥᑳᑯᓂᒡ᙮ ᑮᒦᓈᐗᓐ ᑲᔦ ᓃᔣᓱ 7 ᐅᔥᑭᓃᑭᑴᐗᐞ ᑳᑮ ᐅᒋ ᐅᓈᐸᒥᒥᓐᒡ ᑭᒋᐅᑭᒫᐎᑲᒥᑯᕽ ᒋᐸᒥᐃᑯᓂᒡ᙮ ᑲᔦ ᑕᔥ ᑮᐃᔑ ᐲᑎᑲᓈ ᒫᐗᒡ ᐃᑯ ᐁᔑ ᐅᓂᔑᔑᓂᓂᒃ ᐃᑴᐎᑲᒥᑯᕽ᙮
10ᐁᔅᑕᕒ ᐃᑕᔥ ᑳᐐᓐ ᑮᑎᐹᒋᒧᓰ ᒎ ᐁᑮ ᑎᓄᐎᒡ ᐋᑎ ᑲᔦ ᐌᑕᑳᓀᓯᒡ ᐋᓃᔥ ᐅᑮᐃᑰᓐ ᒸᕒᑎᑳᐃᔭᓐ ᐃᐃ ᒋᐃᔑᒋᑫᒡ᙮ 11ᐁᑕᓱᑮᔑᒃ ᐃᓴ ᒸᕒᑎᑳᐃ ᑮᓂᑖ ᐊᔮᔕᐔᓭ ᐃᐃᒫ ᐊᑾᒌᕽ ᐃᑴᐎᑲᒥᑯᕽ ᐁᑮ ᐊᑕ ᑭᑫᓂᒫᒡ ᐋᓃᓐ ᐁᔑᐊᔮᓂᒡ ᐁᔅᑕᕒᐊᓐ, ᐋᓃᓐ ᑲᔦ ᐁᔑᐌᐱᓯᓂᒡ᙮
12ᐯᔑᑯᐱᐴᓐ ᐃᑕᔥ ᑮᑕᔒᑲᐙᐗᒃ ᐃᑴᐗᒃ ᒋᒥᓄᓈᑯᓯᐙᒡ᙮ ᓂᑯᑣᓱ ᑮᓯᔅ 6 ᑮᐴᓯᓈᐗᒃ ᐱᑭᐎ ᒥᓈᑯᐅᓂ ᐱᒥᑌ myrrh, ᑲᔦ ᑕᔥ ᓂᑯᑣᓱ ᑮᓯᔅ ᒥᓈᑯᐅᓐ ᑮᐋᐸᑕᓂᓂ, ᑲᔦ ᐗᐌᔑᐅᐎᓇᓐ᙮ 13ᐃᐃ ᑕᔥ ᑳᐃᔥᒀ ᑑᑕᐎᑣ ᒦᔥ ᑳᐃᔑ ᐃᔑᐎᓂᑣ ᒣᒣᔥᑾᒡ ᐁᔑᐊᔮᓂᒡ ᑭᒋᐅᑭᒫᓐ᙮ ᐌᑯᓀᓐ ᐃᑕᔥ ᐃᑯ ᐙᑭᑭᔥᑲᒧᐙᒡ ᑮᒦᓈᐗᒃ ᐃᑴᐎᑲᒥᑯᕽ ᐁᑮ ᐅᒋ ᒫᒑᐙᒡ ᑮᐃᔖᐙᒡ ᑭᒋᐅᑭᒫᐎᑲᒥᑯᕽ᙮ 14ᐁᐅᓈᑯᔑᓂᓂᒃ ᐃᑕᔥ ᑕᐃᔖ, ᑭᔐᐹᐗᑲᓂᓂᒃ ᐃᑕᔥ ᑕᐃᔑᐎᒋᑲᓂᐎ ᐸᑳᓐ ᐃᑴᐎᑲᒥᑯᕽ ᒋᓈᓈᑲᒋᐃᑯᒡ ᔖᔥᑳᔅ Shaashgaz ᐁᔑᓂᑳᓱᓂᒡ ᑳᓈᓈᑲᒋᐋᓂᒡ ᑭᒋᐅᑭᒫᓐ ᐅᑖᓂᑫᐐᐎᓂ᙮ ᑳᐐᓐ ᐃᑕᔥ ᒦᓇᐙ ᐅᑖ ᐊᑕ ᐙᐸᒫᓰᓐ ᑭᒋᐅᑭᒫᓐ ᐹᓂᒫ ᑮᒥᓍᐸᒥᑯᒡ, ᐊᑐᒥᑯᒡ ᑲᔦ ᐁᑮ ᐐᓂᑯᒡ ᑳᐃᔑᓂᑳᓱᒡ᙮
15ᑫᑲᐲ ᑕᔥ ᑮᐅᒋᒋᓭᓂ ᐁᔅᑕᕒ ᒋᐊᑕ ᐙᐸᒫᒡ ᑭᒋᐅᑭᒫᓐ᙮ ᐁᔅᑕᕒ ᐄᑐᒃ ᐅᑌᑌᐸᓃᓐ ᐋᐱᐁᓬ Abihail ᑮᐃᔑᓂᑳᓱᐗᓐ, ᑳᑮ ᐅᑑᔑᒥᓂᒡ ᒸᕒᑎᑳᐃᔭᓐ᙮ ᒸᕒᑎᑳᐃ ᐄᑐᒃ ᑳᑮ ᐅᐱᑭᐋᒡ ᐁᔅᑕᕒᐊᓐ ᑖᐱᔥᑰ ᐁᑮ ᐅᑖᓂᓯᒡ᙮ ᐊᐲ ᑕᔥ ᑳᐃᔖᒡ ᒋᐙᐸᒥᑯᒡ ᑭᒋᐅᑭᒫᓐ ᒦ ᓴ ᐃ ᑳᐃᔑᐅᒡ ᑳᑮᐃᑯᒡ ᐄᑳᐃᐗᓐ ᑳᑮ ᑲᓇᐌᑕᒥᓂᒡ ᐃᑴᐎᑲᒥᑯᓂ᙮ ᑲᑭᓇ ᓴ ᐊᐎᔭᐞ ᐁᔅᑕᕒ ᑳᑮ ᐙᐸᒥᑯᒡ ᐅᑮ ᒥᓍᐸᒥᑰᐞ᙮ 16ᒥᑖᓱᑮᓯᓲᓐ 10 ᐁᐱᒪᑭᓱᓂᒡ, ᑌᐸᑦ Tepeth ᐁᔑ ᐐᓱᓂᒡ, ᓃᔣᓱ ᐱᐴᓐ ᑳᑭᒋᐅᑭᒫᐎᐎᓂᒡ ᐃᓂ ᓭᕒᐊᒃᓰᓴᓐ, ᒦ ᓴ ᐃᐌ ᐊᐲ ᑳᑮ ᐃᔑᐎᒋᑲᓂᐎᒡ ᑭᒋᐅᑭᒫᐎᑲᒥᑯᕽ ᒋᐙᐸᒥᑯᒡ ᑭᒋᐅᑭᒫᓐ᙮ 17ᑭᒋᐅᑭᒫᓐ ᑕᔥ ᐅᑮ ᓵᑭᐃᑰᓐ ᐊᐲᒡ ᐐᓐ ᑯᑕᒃ ᐃᐃ ᐅᔥᑭᓃᑭᑴᐗᐞ, ᐐᓐ ᐁᑕ ᑲᔦ ᐅᑮ ᑲᔥᑭᐋᓐ ᐊᐗᔑᒣ ᒋᒥᓉᓂᒥᑯᒡ ᐊᐲᒡ ᐐᓐ ᐃᐃ ᑯᑕᒃ ᐃᑴᐗᐞ᙮ ᒦᑕᔥ ᑭᒋᐅᑭᒫᓐ ᑳᑮ ᐱᑖᓄᒀᓀᐃᑯᒡ ᑭᒋᐅᑭᒫᑴᐙᓄᒀᓐ ᐁᑮ ᐃᔑᐃᓐᒡ ᒋᑭᒋᐅᑭᒫᑴᐎᒡ ᒋᓈᐱᔥᑲᐙᒡ ᐹᔥᑖᐃᐗᓐ᙮ 18ᑭᒋᐅᑭᒫ ᑕᔥ ᑮᐐᑾᑫ ᐁᑮ ᑭᒋ ᐃᓀᓂᒫᒡ ᐁᔅᑕᕒᐊᓐ, ᐁᑮ ᐊᑐᒫᒡ ᑲᑭᓇ ᐌᑭᒫᐌᑖᑯᓯᓂᒡ, ᑲᔦ ᓴ ᑳᓃᑳᓀᑖᑯᓯᓂᒡ᙮ ᑲᔦ ᑕᔥ ᑮᐃᑭᑐ ᒋᑭᐱᒌᓈᓂᐗᓂᓂᒃ ᒥᓯᐌ ᐊᑮᕽ ᐁᔑ ᐅᑭᒫᐎᒡ ᐁᑮ ᒫᒦᑭᐌᒡ ᑭᒋᐅᑭᒫ ᐁᑕ ᑳᔑ ᒦᑭᐌᒡ᙮
ᒸᕒᑎᑳᐃ ᑮᐱᒫᒋᐋᒡ ᑭᒋᐅᑭᒫᓐ
19ᐊᐲ ᓴ ᓃᔑᕽ ᑳᐅᑾᐱᐙᒡ ᐅᔥᑭᓃᑭᑴᐗᒃ, ᒦ ᓴ ᐃ ᐊᐲ ᒸᕒᑎᑳᐃ Mordecai ᐄᓴᓐ ᑳᑮ ᒦᓂᓐᒡ ᐅᑭᒫᐎ ᐊᓄᑮᐎᓐ᙮ 20ᐁᔅᑕᕒ Esther ᐃᑕᔥ ᑳᐐᓐ ᒪᔑ ᐅᑮ ᑭᑫᑖᑯᑑᓰᓐ ᒎ Jew ᐁᑮ ᑎᓄᐎᒡ, ᐋᑎ ᑲᔦ ᑳᐱᐅᒌᒡ, ᐁᑮ ᐃᔑᒋᑫᒡ ᑳᑮᐃᑯᒡ ᒸᕒᑎᑳᐃᔭᓐ᙮ ᒦ ᓴ ᑯ ᐃ ᑳᓂᑖ ᐃᔑᒋᑫᒡ ᐁᑮ ᑑᑕᕽ ᑳᑮᐃᑯᒡ ᒸᕒᑎᑳᐃᔭᓐ ᑮᐱ ᐅᐱᑭᐃᑯᒡ ᑮᐊᑳᔒᓯᒡ᙮
21ᒸᕒᑎᑳᐃ ᓴ ᑮᐅᑭᒫᐗᓄᑮ ᐃᐃᒫ ᑭᒋᐅᑭᒫᐎᑲᒥᑯᕽ᙮ ᐃᑭ ᑕᔥ ᓃᔑᓐ ᐌᑭᒫᐌᑖᑯᓯᐙᒡ ᑳᑮ ᑲᓇᐌᑕᒧᐙᒡ ᐁᔑ ᐲᑎᑫᓈᓂᐗᓂᓂᒃ ᐱᒃᑌᓇ Bigthana ᐊᐊ ᑲᔦ ᑏᕒᐁᔥ Teresh ᐅᑮ ᐊᓂ ᓂᔥᑫᓂᒫᐙᓐ ᑭᒋᐅᑭᒫᓐ ᓭᕒᐊᒃᓰᓴᓐ Xerxes᙮ ᒦᔥ ᑳᑮ ᐃᓀᑕᒧᐙᒡ ᐁᐐ ᓂᓵᐙᒡ᙮ 22ᒸᕒᑎᑳᐃ ᑕᔥ ᐅᑮ ᑭᑫᑖᓐ ᐋᓃᓐ ᐙᑑᑕᐎᒥᓐᒡ ᑭᒋᐅᑭᒫᓐ᙮ ᒦᔥ ᑳᐃᔑ ᐐᑕᒪᐙᒡ ᐁᔅᑕᕒᐊᓐ ᑭᒋᐅᑭᒫᑴᓐ᙮ ᒦᔥ ᐁᔅᑕᕒ ᑳᐃᔑ ᐐᑕᒪᐙᒡ ᑭᒋᐅᑭᒫᓐ ᐅᐅᐌᓂ, ᐁᑮ ᐐᓈᒡ ᒸᕒᑎᑳᐃᔭᓐ ᐁᑮ ᐐᑕᒫᑯᒡ᙮ 23ᑮᑲᑴ ᒥᑭᑳᑌ ᑕᔥ ᐅᐅ ᐃᓈᒋᒧᐎᓐ᙮ ᐊᐲ ᑕᔥ ᑳᑭᑫᒋᑳᑌᒃ ᐁᑌᐺᐗᕽ ᐄᓴᓐ, ᒦᔥ ᐃᑭ ᒥᒋᓃᔥ ᐌᑭᒫᐌᑖᑯᓯᐙᒡ ᑳᐃᔑ ᐊᑰᓂᑣ ᐃᐃᒫ ᑳᔑ ᐊᑰᓈᑲᓂᐎᒡ ᐊᐎᔭ᙮ ᐅᐅ ᓴ ᑲᑭᓇ ᑳᑮ ᐃᔑᓭᒃ ᑮᐅᔑᐲᐃᑳᑌ ᑳᔑ ᑭᒋ ᐃᓀᑖᑾᒃ ᒪᓯᓇᐃᑲᓂᕽ ᐁᓈᓴᒦᒡ ᑭᒋᐅᑭᒫ᙮
Ojibwe Shorter Bible (Syllabic Script) © 2008 Canadian Bible Society