ܡܬܠ̈ܐ 7
7
ܙܘܼܗܵܪܵܐ ܒܘܼܬ ܒܲܟ݂ܬܵܐ ܓܲܝܵܪܬܵܐ
1ܒܪܘܿܢܝܼ، ܢܛܘܿܪ ܗܹܡܸܙܡܵܢܝܼ̈،
ܘܦܘܼܩܕܵܢܝܼ̈ ܛܲܫܹܝܬ ܠܟܸܣ ܠܘܼܟ݂.
2ܢܛܘܿܪ ܦܘܼܩܕܵܢܝܼ̈ ܘܚܝܝܼ،
ܘܢܛܘܿܪ ܢܵܡܘܿܣܝܼ ܐܲܝܟ݂ ܒܹܒܸܠܬܵܐ ܕܥܲܝܢܘܼ̈ܟ݂.
3ܟܬܘܿܪܗܘܿܢ ܥܲܠ ܨܸܒܥܵܬܘܼ̈ܟ݂،
ܟܬܘܿܒ݂ ܠܗܘܿܢ ܥܲܠ ܠܘܼܚܵܐ ܕܠܸܒܘܼܟ݂.
4ܐ݇ܡܘܿܪ ܠܚܸܟ݂ܡܬܵܐ، ”ܚܵܬܝܼ ܝܘܲܬܝ ܐܲܢ݇ܬܝ،“
ܘܠܣܘܼܟܵܠܵܐ ܩܵܪܹܝܬ ܪܵܚܡܵܐ،
5ܠܸܢܛܵܪܘܼܟ݂ ܡ̣ܢ ܒܲܟ݂ܬܵܐ ܩܵܪܝܼܒܵܝܬܵܐ،
ܡ̣ܢ ܙܵܢܝܼܬܵܐ ܕܟܹܐ ܡܲܟ̰ܸܥܝܵܐ ܗܹܡܸܙܡܵܢܘܼ̈ܗ̇.
6ܣܵܒܵܒ ܒܟܵܘܹܐ ܕܒܲܝܬܝܼ،
ܡܓܵܘ ܦܲܢܓ̰ܲܪܝܼ ܓܘܼܫܸܩ ܠܝܼ،
7ܘܚܙܹܐ ܠܝܼ ܒܓܵܘܵܐ ܕܦܫܝܼ̈ܛܹܐ،
ܦܘܼܟܸܪܝܼ ܒܓܵܘܵܐ ܕܒܢܘܿܢܹ̈ܐ،
ܥܠܲܝܡܵܐ ܩܲܠܝܼܠ ܗܵܘܢܵܐ،
8ܒܸܥܒ݂ܵܪܵܐ ܒܫܘܼܩܵܐ ܒܕܸܦܢܵܐ ܕܩܘܼܪܢܝܼܬܘܼܗ̇،
ܘܐܘܼܪܚܵܐ ܕܒܲܝܬܘܼܗ̇ ܦܣܝܼܥ ܠܹܗ،
9ܒܓܢܵܝܬܵܐ ܕܫܸܡܫܵܐ، ܒܥܕܵܢܵܐ ܕܪܲܡܫܵܐ،
ܒܦܲܠܓܵܐ ܕܠܲܝܠܹܐ، ܘܥܲܡܛܵܢܵܐ.
10ܘܗܵܐ، ܒܲܟ݂ܬܵܐ ܠܐܘܼܪܚܹܗ،
ܒܠܒ݂ܝܼܫܬܵܐ ܕܙܵܢܝܼܬܵܐ، ܘܨܢܝܼܥܬܵܐ ܕܠܸܒܵܐ.
11ܩܵܠܵܢܬܵܐ ܝܠܵܗ̇ ܗ̇ܝ، ܘܥܵܨܝܼ،
ܓܵܘ ܒܲܝܬܘܼܗ̇ ܠܹܐ ܓ̰ܵܡܥܝܼ ܐܲܩܠܘܼ̈ܗ̇.
12ܒܥܕܵܢܵܬܹ̈ܐ ܒܥܵܠܘܿܠܵܐ ܝܠܵܗ̇، ܒܥܕܵܢܵܬܹ̈ܐ ܒܫܘܼܩܹ̈ܐ،
ܘܠܟܸܣ ܟܠ ܩܘܼܪܢܝܼܬܵܐ ܟܹܐ ܝܵܬܒ݂ܵܐ ܒܟܡܹܐܢܵܐ.
13ܘܕܒ݂ܝܼܩ ܠܵܗ̇ ܒܝܼܹܗ، ܘܩܲܡ ܢܵܫܩܵܐ ܠܹܗ،
ܡܘܼܩܘܹܐ ܠܵܗ̇ ܦܵܬܘܼܗ̇، ܘܐ݇ܡܝܼܪܵܗ̇ ܐܸܠܹܗ،
14”ܥܲܠܝܼ ܝܗ݇ܘܵܐ ܠܸܕܒ݂ܵܚܵܐ ܩܘܼܪ̈ܒܵܢܹܐ ܕܫܠܵܡܵܐ،
ܐܸܕܝܘܿܡ ܬܘܼܡܸܡ ܠܝܼ ܢܸܕܪ̈ܝܼ.
15ܒܘܼܬ ܐܵܗܵܐ ܦܠܝܼܛ ܠܝܼ ܠܐܘܼܪܚܘܼܟ݂،
ܠܸܛܥܵܝܵܐ ܐܸܠܘܼܟ݂، ܘܩܲܡ ܡܲܫ݇ܟ̰ܚܵܢܘܼܟ݂.
16ܒܡܵܠܵܦܹ̈ܐ ܫܘܼܘܹܐ ܠܝܼ ܫܘܝܼܬܝܼ،
ܥܸܙ̈ܠܹܐ ܡܢܘܼܩܫܹ̈ܐ ܕܡܸܨܪܹܝܢ.
17ܥܘܼܛܪܸܢܝܼ ܫܘܝܼܬܝܼ
ܒܡܘܼܪܵܐ، ܥܸܠܘܲܝ، ܘܕܵܪܟ̰ܝܼܢ.
18ܬܵܐ، ܪܵܘܲܚ ܒܚܘܼܒܵܐ ܗܲܠ ܨܲܦܪܵܐ،
ܡܲܒܣܸܡܲܚ ܓܵܘ ܥܘܼܒܵܐ ܕܥܘܼܕܵܠܹ̈ܐ.
19ܣܵܒܵܒ ܠܹܐ ܝܠܹܗ ܓܲܒ݂ܪܝܼ ܒܒܲܝܬܵܐ،
ܐ݇ܙܝܼܠܵܐ ܝܠܹܗ ܒܐܘܼܪܚܵܐ ܪܸܚܩܵܐ،
20ܟܝܼܣܬܵܐ ܕܙܘܼܙܹ̈ܐ ܫܩܝܼܠ ܠܹܗ ܒܐܝܼܕܹܗ،
ܒܡܸܠܝܘܼܬܵܐ ܕܣܲܗܪܵܐ ܒܸܬ ܕܵܐܹܪ ܠܒܲܝܬܹܗ.“
21ܩܲܡ ܓܵܪܫܵܐ ܠܹܗ ܒܦܸܪܝܘܼܬܵܐ ܕܡܲܡܠܠܘܼܗ̇،
ܒܟ̰ܘܼܥܝܘܼܬܵܐ ܕܣܸܦܘܵܬܘܼ̈ܗ̇ ܩܲܡ ܫܲܕܠܵܐ ܠܹܗ.
22ܟܹܐ ܐܵܙܹܠ ܒܵܬ݇ܪܘܼܗ̇ ܡܸܢܫܸܠܬܵܢܹܐ،
ܐܲܝܟ݂ ܕܐܵܙܹܠ ܬܵܘܪܵܐ ܠܩܸܛܠܵܐ،
ܘܐܲܝܟ݂ ܕܚܲܕ ܢܵܦܹܠ ܒܩܵܘܕܵܐ ܕܬܲܥܠܲܡܬܵܐ ܕܣܲܟ݂ܠܵܐ،
23ܗܲܠ ܕܟ̰ܵܠܹܦ ܓܹܐܪܵܐ ܟܲܒ݂ܕܹܗ،
ܐܲܝܟ݂ ܕܣܵܛܹܐ ܛܲܝܪܵܐ ܠܢܸܫܒ݂ܵܐ،
ܘܠܹܐ ܝܵܕܹܥ ܥܠܲܝܡܵܐ ܕܒܸܬ ܕܵܩܪܵܐ ܠܹܗ ܛܝܼܡܵܐ ܕܓܵܢܹܗ.
24ܘܐܵܕܝܼܵܐ، ܒܢܘܿܢܹ̈ܐ، ܫܡܸܥܡܘܼܢ ܐܸܠܝܼ،
ܘܡܲܨܝܸܬܘܼܢ ܠܗܹܡܸܙܡܵܢܹ̈ܐ ܕܦܘܼܡܝܼ.
25ܠܵܐ ܩܵܠܹܒ ܠܐܘܼܪ̈ܚܵܬܘܼܗ̇ ܠܸܒܘܼܟ݂،
ܠܵܐ ܚܵܠܛܹܬ ܠܸܥܒ݂ܵܪܵܐ ܒܫܒ݂ܝܼܠܘܼ̈ܗ̇.
26ܣܵܒܵܒ ܪܵܒܵܐ ܡܘܼܡܝܸܬܹ̈ܐ ܡܘܼܢܦܸܠܬܵܐ ܝܠܵܗ̇،
ܘܥܲܫܝܼܢܹ̈ܐ ܝܢܵܐ ܟܠܲܝܗܝ ܕܦܝܼܫܹܐ ܝܢܵܐ ܩܛܝܼܠܹܐ ܒܝܼܘܼܗ̇.
27ܒܲܝܬܘܼܗ̇ ܠܐܘܼܪ̈ܚܵܬܹܐ ܕܫܝܘܿܠ ܝܼܠܹܗ،
ܕܒܸܨܠܵܝܵܐ ܝܢܵܐ ܠܬܵܘܵܢܹ̈ܐ ܕܡܵܘܬܵܐ.
Právě zvoleno:
ܡܬܠ̈ܐ 7: ABTAB
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Aramaic Bible Translation Assyrian Bible © 2025 Aramaic Bible Translation