ܡܬܠ̈ܐ 27
27
ܡܲܬܠܹ̈ܐ ܕܡܲܠܟܵܐ ܫܠܹܝܡܘܿܢ ܡܟܘܼܦܫܹܐ ܒܝܲܕ ܐ݇ܢܵܫܹ̈ܐ ܕܚܹܙܲܩܝܵܐ
1ܠܵܐ ܥܵܒ݂ܕܹܬ ܫܘܼܒ݂ܗܵܪܵܐ ܒܩܘܼܕܡܹܐ،
ܣܵܒܵܒ ܠܹܐ ܝܵܕܥܹܬ ܡܘܿܕܝܼ ܒܸܬ ܝܵܠܹܕ ܝܵܘܡܵܐ.
2ܫܒ݂ܘܿܩ ܚܵܩܹܪܘܼܟ݂ ܩܵܪܝܼܒܵܝܵܐ ܘܠܵܐ ܦܘܼܡܘܼܟ݂،
ܢܘܼܟ݂ܪܵܝܵܐ ܘܠܵܐ ܣܸܦܘܵܬܘܼ̈ܟ݂.
3ܝܲܩܘܼܪܵܐ ܝܠܹܗ ܟܹܐܦܵܐ ܘܡܵܪܹܐ ܬܩܘܼܠܬܵܐ ܝܠܹܗ ܣܹܠܵܐ،
ܐܝܼܢܵܐ ܟܲܪܒܵܐ ܕܣܲܟ݂ܠܵܐ ܒܘܼܫ ܝܲܩܘܼܪܬܵܐ ܝܠܵܗ̇ ܡ̣ܢ ܬܸܪܘܲܝܗܝ.
4ܛܵܠܘܿܡܘܼܬܵܐ ܝܠܵܗ̇ ܚܸܡܬܵܐ، ܘܛܵܘܦܵܢܵܐ ܝܠܵܗ̇ ܟܲܪܒܵܐ،
ܐܝܼܢܵܐ ܡܵܢܝܼ ܡܵܨܹܐ ܟܵܠܹܐ ܩܵܕ݇ܡ ܒܲܚܸܠܵܢܘܼܬܵܐ؟
5ܒܘܼܫ ܨܦܵܝܝܼ ܝܠܵܗ̇ ܡܲܢܟܲܣܬܵܐ ܓܠܝܼܬܵܐ
ܡ̣ܢ ܚܘܼܒܵܐ ܛܸܫܝܵܐ.
6ܡܗܘܼܡܢܹ̈ܐ ܝܢܵܐ ܕܲܪ̈ܒܵܬܹܐ ܕܐܵܬܝܼ ܡ̣ܢ ܪܵܚܡܵܐ،
ܘܦܸܪ̈ܝܹܐ ܝܢܵܐ ܢܫܲܩܝܵܬܹ̈ܐ ܕܣܵܢܝܵܢܵܐ.
7ܓܵܢܵܐ ܣܒ݂ܝܼܥܬܵܐ ܟܹܐ ܕܲܫܕܸܫܵܐ ܕܵܘܒܵܐ،
ܐܝܼܢܵܐ ܠܓܵܢܵܐ ܟܦܝܼܢܬܵܐ ܟܠ ܡܲܪܝܼܪܵܐ ܚܸܠܝܵܐ ܝܠܹܗ.
8ܐܲܝܟ݂ ܛܲܝܪܵܐ ܕܥܵܪܹܩ ܡ̣ܢ ܩܸܢܹܗ،
ܗܲܕܟ݂ܵܐ ܝܠܹܗ ܐ݇ܢܵܫܵܐ ܕܥܵܪܹܩ ܡ̣ܢ ܒܲܝܬܹܗ.
9ܡܸܫܚܵܐ ܘܒܸܣܡܵܐ ܟܹܐ ܡܲܚܕܝܼ ܠܸܒܵܐ،
ܗܲܕܟ݂ܵܐ ܒܲܣܝܼܡܬܵܐ ܝܠܵܗ̇ ܠܚܲܒ݂ܪܵܐ ܝܲܗ݇ܒܲܠܬܵܐ ܕܡܸܠܟܵܐ ܡ̣ܢ ܥܘܼܡܩܵܐ ܕܠܸܒܵܐ.
10ܠܚܲܒ݂ܪܘܼܟ݂ ܘܠܚܲܒ݂ܪܵܐ ܕܒܵܒܘܼܟ݂ ܠܵܐ ܫܵܒ݂ܩܹܬ،
ܘܠܒܲܝܬܵܐ ܕܐܲܚܘܿܢܘܼܟ݂ ܠܵܐ ܐܵܙܹܠ݇ܬ ܒܝܵܘܡܵܐ ܕܓܘܼܢܚܘܼܟ݂،
ܒܘܼܫ ܨܦܵܝܝܼ ܝܠܹܗ ܫܒ݂ܵܒ݂ܵܐ ܕܩܘܼܪܒܵܐ ܡ̣ܢ ܐܲܚܘܿܢܵܐ ܕܪܸܚܩܵܐ.
11ܗܘܝܼ ܚܲܟܝܼܡܵܐ، ܒܪܘܿܢܝܼ، ܘܡܲܚܕܝܼ ܠܸܒܝܼ،
ܕܡܲܕܸܪܸܢ ܠܠܵܝܡܵܢܝܼ ܓ̰ܘܼܘܵܒ.
12ܝܵܕܘܿܥܵܐ ܚܙܹܐ ܠܹܗ ܒܝܼܫܬܵܐ ܘܛܘܼܫܝܵܐ ܠܹܗ ܓܵܢܹܗ،
ܐܝܼܢܵܐ ܦܫܝܼ̈ܛܹܐ ܐ݇ܙܝܼܠ ܠܗܘܿܢ ܠܩܵܕ݇ܡܵܐ ܘܦܝܼܫ ܠܗܘܿܢ ܬܘܼܥܠܸܡܹܐ.
13ܫܩܘܿܠ ܠܒ݂ܘܼܫܵܐ ܕܐ݇ܢܵܫܵܐ ܟܲܕ ܗܵܘܹܐ ܥܲܪܵܒ݂ܵܐ ܠܩܵܪܝܼܒܵܝܵܐ،
ܘܟܲܕ ܗܵܘܹܐ ܒܘܼܬ ܢܘܼܟ݂ܪܵܝܬܵܐ ܫܩܘܿܠ ܠܹܗ ܓܸܪܵܘ.
14ܗ̇ܘ ܕܩܲܕܸܡ ܒܨܲܦܪܵܐ ܘܒܲܪܸܟ݂ ܠܚܲܒ݂ܪܹܗ ܒܩܵܠܵܐ ܪܵܡܵܐ،
ܠܵܘܛܬܵܐ ܒܸܬ ܦܵܝܫܵܐ ܚܘܼܫܒܸܢܬܵܐ ܐܸܠܹܗ.
15ܐܲܝܟ݂ ܕܵܠܘܿܦܵܐ ܕܠܵܐ ܫܠܵܝܵܐ ܒܝܵܘܡܵܐ ܕܩܲܫܩܲܫܬܵܐ،
ܗܲܕܟ݂ܵܐ ܝܠܵܗ̇ ܒܲܟ݂ܬܵܐ ܡܲܩܪܸܨܵܢܬܵܐ،
16ܗ̇ܘ ܕܙܲܒܛܸܢܵܗ̇ ܟܹܐ ܡܵܨܹܐ ܙܲܒܛܸܢ ܠܦܵܘܚܵܐ،
ܝܲܢ ܕܵܒܹܩ ܡܸܢܕܝܼ ܒܝܲܡܝܼܢܵܐ ܡܸܫܚܵܢܬܵܐ.
17ܦܪܸܙܠܵܐ ܠܦܪܸܙܠܵܐ ܟܹܐ ܡܲܚܪܸܦ،
ܗܲܕܟ݂ܵܐ ܐ݇ܢܵܫܵܐ ܟܹܐ ܡܲܚܪܸܦ ܠܚܲܒ݂ܪܹܗ.
18ܗ̇ܘ ܕܢܵܛܹܪ ܐܝܼܠܵܢܵܐ ܕܬܹܐܢܵܐ ܒܸܬ ܐܵܟܹܠ ܡ̣ܢ ܛܥܘܼܢܬܹܗ،
ܘܗ̇ܘ ܕܚܲܡܹܐ ܠܡܵܪܹܗ ܒܸܬ ܦܵܐܹܫ ܡܝܘܼܩܪܵܐ.
19ܐܲܝܟ݂ ܕܦܵܬܵܐ ܟܹܐ ܦܵܝܫܵܐ ܚܙܝܼܬܵܐ ܓܵܘ ܡ̈ܝܼܵܐ،
ܗܲܕܟ݂ܵܐ ܠܸܒܵܐ ܕܒܲܪܢܵܫܵܐ ܟܹܐ ܡܲܚܙܹܐ ܠܒܲܪܢܵܫܵܐ.
20ܫܝܘܿܠ ܘܐܲܒ݂ܕܵܢܵܐ ܠܹܐ ܣܵܒ݂ܥܝܼ،
ܘܥܲܝܢܹ̈ܐ ܕܒܲܪܢܵܫܵܐ ܠܹܐ ܣܵܒ݂ܥܝܼ.
21ܐܲܝܟ݂ ܣܹܐܡܵܐ ܒܡܵܐܢܵܐ ܕܨܵܪܲܦܬܵܐ، ܘܕܲܗܒ݂ܵܐ ܒܟܘܼܪܵܐ،
ܗܲܕܟ݂ܵܐ ܐܘܼܦ ܐ݇ܢܵܫܵܐ ܟܹܐ ܦܵܐܹܫ ܬܩܝܼܠܵܐ ܒܚܩܵܪܬܵܐ ܕܐ݇ܚܹܪ̈݇ܢܹܐ.
22ܐܸܢ ܚܵܫܠܹܬ ܠܣܲܟ݂ܠܵܐ ܓܵܘ ܚܵܫܘܿܠܬܵܐ ܒܓܵܘܵܐ ܕܓܠܘܼܠܹ̈ܐ ܒܚܵܫܘܿܠܵܐ،
ܠܹܐ ܦܵܪܫܵܐ ܡܸܢܹܗ ܣܲܟ݂ܠܘܼܬܹܗ.
23ܝ݇ܕܵܥܵܐ ܝܵܕܥܹܬ ܐܲܝܟܲܢܵܝܘܼܬܵܐ ܕܥܸܪ̈ܒܘܼܟ݂،
ܡܲܣܸܡ ܒܵܠܘܼܟ݂ ܥܲܠ ܦܸܣܩܘܼܟ݂،
24ܣܵܒܵܒ ܠܹܐ ܝܠܹܗ ܠܥܵܠܲܡ ܥܘܼܬܪܵܐ،
ܐܵܦܠܵܐ ܬܵܓ݂ܵܐ ܠܕܵܘܪܵܐ ܘܕܵܘܪܵܐ.
25ܦܝܼܫ ܠܹܗ ܚܨܝܼܕܵܐ ܓܸܠܵܐ، ܘܦܝܼܫ ܠܹܗ ܚܸܙܝܵܐ ܝܸܩܢܵܐ ܚܵܕ݇ܬܵܐ،
ܘܦܝܼܫ ܠܹܗ ܓ̰ܘܼܡܥܵܐ ܥܸܣܒܵܐ ܕܛܘܼܪ̈ܵܢܹܐ.
26ܦܹܐܪܹ̈ܐ ܒܸܬ ܗܵܘܝܼ ܩܵܐ ܠܒ݂ܘܼܫܘܼܟ݂،
ܘܛܝܼܡܵܐ ܕܚܲܩܠܵܐ ܢܹܐܪ̈ܝܼܹܐ،
27ܘܒܲܣܵܐ ܚܲܠܒ݂ܵܐ ܕܥܸܙܹ̈ܐ ܒܸܬ ܗܵܘܹܐ ܩܵܐ ܡܹܐܟ݂ܘܼܠܬܘܼܟ݂،
ܩܵܐ ܡܹܐܟ݂ܘܼܠܬܵܐ ܕܒܲܝܬܘܼܟ݂،
ܘܬܘܼܪܣܵܝܵܐ ܩܵܐ ܚܵܡܵܬܘܼ̈ܟ݂.
Právě zvoleno:
ܡܬܠ̈ܐ 27: ABTAB
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Aramaic Bible Translation Assyrian Bible © 2025 Aramaic Bible Translation