ܡܬܠ̈ܐ 15
15
ܡܲܬܠܹ̈ܐ ܕܡܲܠܟܵܐ ܫܠܹܝܡܘܿܢ
1ܓ̰ܘܼܘܵܒ ܪܲܟܝܼܟ݂ܵܐ ܟܹܐ ܡܲܦܝܸܚ ܚܸܡܬܵܐ،
ܐܝܼܢܵܐ ܚܲܒܪܵܐ ܩܸܫܝܵܐ ܟܹܐ ܡܲܪܥܸܫ ܟܲܪܒܵܐ.
2ܠܸܫܵܢܵܐ ܕܚܲܟܝܼܡܹ̈ܐ ܟܹܐ ܡܲܫܦܸܪܵܗ̇ ܝ݇ܕܲܥܬܵܐ،
ܐܝܼܢܵܐ ܦܘܼܡܵܐ ܕܣܲܟ݂ܠܹ̈ܐ ܟܹܐ ܡܲܢܒܸܥ ܣܲܟ݂ܠܘܼܬܵܐ.
3ܒܟܠ ܕܘܼܟܵܐ ܝܢܵܐ ܥܲܝܢܹ̈ܐ ܕܡܵܪܝܵܐ
ܩܲܙܘܼܕܹܐ ܒܒܝܼܫܹ̈ܐ ܘܛܵܒܹ̈ܐ.
4ܠܸܫܵܢܵܐ ܒܲܣܡܵܢܵܐ ܐܝܼܠܵܢܵܐ ܕܚܲܝܹ̈ܐ ܝܠܹܗ،
ܐܝܼܢܵܐ ܦܟ̰ܝܼܠܘܼܬܵܐ ܒܝܼܹܗ ܬܒ݂ܵܪܬܵܐ ܕܪܘܼܚܵܐ ܝܠܵܗ̇.
5ܣܲܟ݂ܠܵܐ ܟܹܐ ܡܲܣܠܹܐ ܡܲܪܕܘܼܬܵܐ ܕܒܵܒܘܼܗܝ،
ܐܝܼܢܵܐ ܝܵܕܘܿܥܵܐ ܟܹܐ ܡܲܨܝܸܬ ܠܡܲܢܟܲܣܬܵܐ.
6ܒܒܲܝܬܵܐ ܕܙܲܕܝܼܩܵܐ ܐܝܼܬ ܥܘܼܬܪܵܐ ܓܘܼܪܵܐ،
ܐܝܼܢܵܐ ܒܛܥܘܼܢܬܵܐ ܕܪ̈ܲܫܝܼܥܹܐ ܚܘܼܙܕܵܓܵܐ.
7ܣܸܦܘܵܬܹ̈ܐ ܕܚܲܟܝܼܡܹ̈ܐ ܟܹܐ ܦܵܪܣܝܼ ܝ݇ܕܲܥܬܵܐ،
ܐܝܼܢܵܐ ܠܸܒܵܐ ܕܣܲܟ݂ܠܹ̈ܐ ܠܹܐ ܝܠܹܗ ܬܪܘܼܨܵܐ.
8ܕܸܒ݂ܚܵܐ ܕܪ̈ܲܫܝܼܥܹܐ ܛܲܡܐܘܼܬܵܐ ܝܠܹܗ ܠܡܵܪܝܵܐ،
ܐܝܼܢܵܐ ܨܠܘܿܬܵܐ ܕܬܪ̈ܘܼܨܹܐ ܨܸܒ݂ܝܵܢܹܗ.
9ܛܲܡܐܘܼܬܵܐ ܝܠܵܗ̇ ܠܡܵܪܝܵܐ ܐܘܼܪܚܵܐ ܕܪܲܫܝܼܥܵܐ،
ܐܝܼܢܵܐ ܟܹܐ ܡܲܚܸܒ ܠܢܵܦܠܵܢܵܐ ܕܒܵܬ݇ܪ ܙܲܕܝܼܩܘܼܬܵܐ.
10ܬܲܥܠܲܡܬܵܐ ܣܪܝܼܬܵܐ ܐܝܼܬ ܠܫܵܒ݂ܩܵܢܵܐ ܕܐܘܼܪܚܵܐ؛
ܣܵܢܝܵܢܵܐ ܕܡܲܢܟܲܣܬܵܐ ܒܸܬ ܡܵܐܹܬ.
11ܫܝܘܿܠ ܘܐܲܒ݂ܕܵܢܵܐ ܓܸܠܝܹܐ ܝܢܵܐ ܩܵܕ݇ܡ ܡܵܪܝܵܐ،
ܟܡܵܐ ܒܘܼܫ ܙܵܘܕܵܐ ܠܸܒܵܘܵܬܹ̈ܐ ܕܒܢܲܝ̈ܢܵܫܵܐ!
12ܠܹܐ ܡܲܚܸܒ ܡܲܣܚܸܪܵܢܵܐ ܠܡܲܢܟܸܣܵܢܹܗ،
ܠܟܸܣ ܚܲܟܝܼܡܹ̈ܐ ܠܹܐ ܐܵܙܹܠ.
13ܠܸܒܵܐ ܚܸܕܝܵܐ ܟܹܐ ܡܲܦܨܸܚ ܠܵܗ̇ ܦܵܬܵܐ،
ܐܝܼܢܵܐ ܐܘܼܠܨܵܢܵܐ ܕܠܸܒܵܐ ܟܹܐ ܫܵܡܹܛ ܠܵܗ̇ ܪܘܼܚܵܐ.
14ܠܸܒܵܐ ܦܲܪܡܝܼܵܢܵܐ ܟܹܐ ܛܵܥܹܐ ܠܝ݇ܕܲܥܬܵܐ،
ܐܝܼܢܵܐ ܦܘܼܡܵܐ ܕܣܲܟ݂ܠܹ̈ܐ ܟܹܐ ܡܵܠܹܐ ܣܲܟ݂ܠܘܼܬܵܐ.
15ܟܠܲܝܗܝ ܝܵܘܡܵܢܹ̈ܐ ܕܡܘܼܠܝܸܨܵܐ ܣܸܪ̈ܝܹܐ ܝܢܵܐ،
ܐܝܼܢܵܐ ܚܸܕܝܵܐ ܕܠܸܒܵܐ ܒܡܸܫܬܘܼܬܵܐ ܝܠܹܗ ܐܲܡܝܼܢܵܐܝܼܬ.
16ܒܘܼܫ ܨܦܵܝܝܼ ܝܠܹܗ ܡܸܢܕܝܼ ܚܲܕ݇ܟ̰ܵܐ ܥܲܡ ܙܕܘܼܥܬܵܐ ܕܡܵܪܝܵܐ،
ܡ̣ܢ ܒܹܝܬ ܓܲܙܵܐ ܓܘܼܪܵܐ ܘܫܓ݂ܘܼܫܝܵܐ ܓܵܘܹܗ.
17ܒܘܼܫ ܨܦܵܝܝܼ ܝܠܹܗ ܪܸܙܩܵܐ ܕܝܲܪ̈ܩܹܐ ܘܚܘܼܒܵܐ ܥܲܡܹܗ،
ܡ̣ܢ ܬܵܘܪܵܐ ܛܪܝܼܨܵܐ ܘܣܢܵܝܬܵܐ ܒܝܼܹܗ.
18ܐ݇ܢܵܫܵܐ ܚܸܡܬܵܢܵܐ ܟܹܐ ܡܲܩܸܡ ܕܘܼܪܵܫܵܐ،
ܐܝܼܢܵܐ ܒܹܐܢܹܗ ܝܲܪܝܼܟ݂ܬܵܐ ܟܹܐ ܡܲܫܠܹܐ ܡܲܩܲܪܵܨܘܼܬܵܐ.
19ܐܘܼܪܚܵܐ ܕܡܲܟܣܸܠܵܢܵܐ ܐܲܝܟ݂ ܣܝܵܓ݂ܵܐ ܕܟܸܬܘܹ̈ܐ ܝܠܵܗ̇،
ܐܝܼܢܵܐ ܫܒ݂ܝܼܠܵܐ ܕܬܪ̈ܘܼܨܹܐ ܡܘܼܫܘܝܼܵܐ ܝܠܹܗ.
20ܒܪܘܿܢܵܐ ܚܲܟܝܼܡܵܐ ܟܹܐ ܡܲܚܕܹܐ ܠܒܵܒܵܐ،
ܐܝܼܢܵܐ ܐ݇ܢܵܫܵܐ ܣܲܟ݂ܠܵܐ ܟܹܐ ܡܲܣܠܹܐ ܠܝܸܡܹܗ.
21ܣܲܟ݂ܠܘܼܬܵܐ ܚܲܕܘܼܬܵܐ ܝܠܵܗ̇ ܠܚܣܝܼܪ ܗܵܘܢܵܐ،
ܐܝܼܢܵܐ ܐ݇ܢܵܫܵܐ ܕܦܲܪܡܵܝܬܵܐ ܬܪܝܼܨܵܐܝܼܬ ܟܹܐ ܚܵܕܹܪ.
22ܟܹܐ ܒܵܛܠܝܼ ܬܲܚܡܲܢܝܵܬܹ̈ܐ ܕܠܲܝܬ ܠܗܘܿܢ ܡܸܠܟܵܐ،
ܐܝܼܢܵܐ ܒܦܸܪܝܘܼܬܵܐ ܕܡܵܠܘܿܟܹ̈ܐ ܟܹܐ ܦܵܝܫܝܼ ܡܘܼܩܘܝܼܹܐ.
23ܓ̰ܵܘܲܒܬܵܐ ܠܚܝܼܡܬܵܐ ܚܲܕܘܼܬܵܐ ܝܠܵܗ̇ ܠܐ݇ܢܵܫܵܐ،
ܘܟܡܵܐ ܨܦܵܝܝܼ ܝܠܵܗ̇ ܗܹܡܸܙܡܵܢ ܕܐܵܬܝܵܐ ܒܥܕܵܢܘܼܗ̇!
24ܐܘܼܪܚܵܐ ܕܚܲܝܹ̈ܐ ܟܹܐ ܡܲܐܣܩܵܐ ܠܦܲܪܡܝܼܵܢܵܐ
ܠܡܲܩܠܘܼܒܹܗ ܡ̣ܢ ܫܝܘܿܠ ܬܲܚܬܵܝܬܵܐ.
25ܒܲܝܬܵܐ ܕܫܲܒ݂ܗܸܪ̈ܵܢܹܐ ܟܹܐ ܬܵܠܹܚ ܡܵܪܝܵܐ،
ܐܝܼܢܵܐ ܟܹܐ ܡܲܩܸܡ ܬܚܘܼܡܵܐ ܕܐܲܪܡܸܠܬܵܐ.
26ܛܲܡܐܘܼܬܵܐ ܝܢܵܐ ܠܡܵܪܝܵܐ ܚܘܼܫܵܒܹ̈ܐ ܒܝܼܫܹ̈ܐ،
ܐܝܼܢܵܐ ܕܸܟ݂ܝܹ̈ܐ ܝܢܵܐ ܚܲܒܪܹ̈ܐ ܒܲܣܝܼܡܹ̈ܐ.
27ܚܵܛܘܿܦܵܐ ܟܹܐ ܡܲܝܬܹܐ ܚܘܼܙܕܵܓܵܐ ܠܒܲܝܬܹܗ،
ܐܝܼܢܵܐ ܒܸܬ ܚܵܝܹܐ ܗ̇ܘ ܕܣܵܢܹܐ ܪܸܫܘܲܬ.
28ܠܸܒܵܐ ܕܙܲܕܝܼܩܵܐ ܟܹܐ ܗܲܓܹܐ ܕܵܐܟ݂ܝܼ ܠܓ̰ܲܘܘܼܒܹܐ،
ܐܝܼܢܵܐ ܦܘܼܡܵܐ ܕܪ̈ܲܫܝܼܥܹܐ ܟܹܐ ܡܲܢܒܸܥ ܒܝܼܫܵܬܹ̈ܐ.
29ܪܸܚܩܵܐ ܝܠܹܗ ܡܵܪܝܵܐ ܡ̣ܢ ܪ̈ܲܫܝܼܥܹܐ،
ܐܝܼܢܵܐ ܟܹܐ ܫܵܡܹܥ ܨܠܘܿܬܵܐ ܕܙܲܕܝܼܩܹ̈ܐ.
30ܥܲܝܢܹ̈ܐ ܒܲܗܪ̈ܵܢܹܐ ܟܹܐ ܡܲܚܕܝܼ ܠܸܒܵܐ،
ܘܚܲܒܪܵܐ ܒܲܣܝܼܡܵܐ ܟܹܐ ܡܲܛܪܸܨ ܦܲܓ݂ܪܵܐ.
31ܢܵܬܵܐ ܕܫܵܡܥܵܐ ܡܲܢܟܲܣܬܵܐ ܕܚܲܝܹ̈ܐ
ܒܓܵܘܵܐ ܕܚܲܟܝܼܡܹ̈ܐ ܒܸܬ ܫܵܪܝܵܐ.
32ܡܲܚܦܸܠܵܢܵܐ ܕܡܲܪܕܘܼܬܵܐ ܟܹܐ ܡܲܣܠܹܐ ܓܵܢܹܗ،
ܐܝܼܢܵܐ ܫܵܡܥܵܢܵܐ ܕܡܲܢܟܲܣܬܵܐ ܟܹܐ ܩܵܢܹܐ ܗܵܘܢܵܐ.
33ܙܕܘܼܥܬܵܐ ܕܡܵܪܝܵܐ ܡܲܠܦܵܢܘܼܬܵܐ ܝܠܵܗ̇ ܠܚܸܟ݂ܡܬܵܐ،
ܘܡܩܵܕ݇ܡ ܐܝܼܩܵܪܵܐ ܟܹܐ ܐܵܬܝܵܐ ܡܲܟܝܼܟ݂ܘܼܬܵܐ.
Právě zvoleno:
ܡܬܠ̈ܐ 15: ABTAB
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Aramaic Bible Translation Assyrian Bible © 2025 Aramaic Bible Translation