ܩܘܗܠܬ 6
6
ܐ݇ܢܵܫܵܐ ܕܐܲܠܵܗܵܐ ܠܵܐ ܝܲܗ݇ܒܸܠ ܠܹܗ ܕܚܵܕܹܐ ܒܛܥܘܼܢܬܵܐ ܕܥܲܡܠܹܗ
1ܐܝܼܬ ܒܝܼܫܬܵܐ ܕܚܙܹܐ ܠܝܼ ܬܚܘܿܬ ܫܸܡܫܵܐ، ܘܪܵܒܵܐ ܝܠܵܗ̇ ܥܲܠ ܒܲܪܢܵܫܵܐ. 2ܐ݇ܢܵܫܵܐ ܕܝܲܗ݇ܒܸܠ ܐܸܠܹܗ ܐܲܠܵܗܵܐ ܥܘܼܬܪܵܐ ܘܕܵܘܸܠܬܵܐ ܘܐܝܼܩܵܪܵܐ، ܗܵܕܵܐ ܕܠܲܝܬ ܠܹܗ ܚܘܼܣܪܵܢܵܐ ܠܓܵܢܹܗ ܡ̣ܢ ܟܠ ܕܫܲܗܘܸܬ، ܐܝܼܢܵܐ ܠܵܐ ܝܲܗ݇ܒܸܠ ܠܹܗ ܫܘܼܠܛܵܢܵܐ ܐܲܠܵܗܵܐ ܠܹܐܟ݂ܵܠܵܐ ܡܸܢܘܼܗ̇، ܐܸܠܵܐ ܐ݇ܢܵܫܵܐ ܢܘܼܟ݂ܪܵܝܵܐ ܐܵܟܹܠ ܠܵܗ̇. ܐܵܗܵܐ ܣܪܝܼܩܘܼܬܵܐ ܝܠܵܗ̇ ܘܟܘܼܪܗܵܢܵܐ ܣܸܪܝܵܐ. 3ܐܸܢ ܡܲܠܸܕ ܐ݇ܢܵܫܵܐ ܐܸܡܵܐܐ، ܘܫܸܢܹ̈ܐ ܪܵܒܵܐ ܚܵܝܹܐ، ܘܗܵܘܝܼ ܪܵܒܵܐ ܝܵܘܡܵܢܹ̈ܐ ܕܫܸܢܘܼ̈ܗܝ، ܐܝܼܢܵܐ ܓܵܢܹܗ ܠܵܐ ܣܵܒ݂ܥܵܐ ܡ̣ܢ ܛܵܒ݂ܬܵܐ، ܘܐܘܼܦ ܩܒ݂ܵܪܬܵܐ ܠܵܐ ܗܵܘܝܵܐ ܠܹܗ، ܐ݇ܡܝܼܪܝܼ، ”ܒܘܼܫ ܨܦܵܝܝܼ ܝܠܹܗ ܡܸܢܹܗ ܡܘܼܪܚܸܫܵܐ،“ 4ܣܵܒܵܒ ܡܘܼܪܚܸܫܵܐ ܒܣܪܝܼܩܘܼܬܵܐ ܟܹܐ ܐܵܬܹܐ، ܘܒܚܸܫܟܵܐ ܟܹܐ ܐܵܙܹܠ، ܘܒܚܸܫܟܵܐ ܫܸܡܹܗ ܟܹܐ ܦܵܐܹܫ ܟܘܼܣܝܵܐ، 5ܐܘܼܦ ܫܸܡܫܵܐ ܠܹܐ ܚܵܙܹܐ، ܘܠܹܐ ܝܵܕܹܥ ܡܸܢܕܝܼ؛ ܐܝܼܬ ܢܝܵܚܵܐ ܠܐܵܗܵܐ ܒܘܼܫ ܡ̣ܢ ܗ̇ܘ ܐ݇ܚܹܪ݇ܢܵܐ. 6ܐܘܼܦ ܐܸܢ ܚܵܝܹܐ ܐܲܠܦܵܐ ܫܸܢܹ̈ܐ ܬܲܪܬܹܝ ܓܵܗܹ̈ܐ، ܐܝܼܢܵܐ ܛܵܒ݂ܬܵܐ ܠܵܐ ܚܵܙܹܐ، ܗܵܐ ܠܵܐ ܠܚܕܵܐ ܕܘܼܟܬܵܐ ܟܠܲܝܗܝ ܟܹܐ ܐܵܙܠ݇ܝܼ؟
ܗܘܹܝܡܘܼܢ ܪܵܙܝܼ ܒܡܘܿܕܝܼ ܕܐܝܼܬ ܠܵܘܟ݂ܘܿܢ
7ܟܠܹܗ ܥܲܡܠܵܐ ܕܒܲܪܢܵܫܵܐ ܩܵܐ ܦܘܼܡܹܗ ܝܠܹܗ، ܐܝܼܢܵܐ ܟܹܪ݇ܣܹܗ ܠܹܐ ܦܵܝܫܵܐ ܡܠܝܼܬܵܐ. 8ܡܘܿܕܝܼ ܒܘܼܫ ܙܵܘܕܵܐ ܝܘܼܬܪܵܢܵܐ ܐܝܼܬ ܠܹܗ ܚܲܟܝܼܡܵܐ ܡ̣ܢ ܣܲܟ݂ܠܵܐ؟ ܡܘܿܕܝܼ ܝܘܼܬܪܵܢܵܐ ܐܝܼܬ ܠܹܗ ܡܸܣܟܹܢܵܐ ܕܝܵܕܹܥ ܠܸܚܕܵܪܵܐ ܩܵܕ݇ܡ ܚܵܝܹ̈ܐ؟ 9ܨܦܵܝܝܼ ܝܠܹܗ ܡܘܿܕܝܼ ܕܥܲܝܢܹ̈ܐ ܒܸܚܙܵܝܵܐ ܝܢܵܐ ܒܘܼܫ ܡ̣ܢ ܫܲܗܘܲܬܬܵܐ ܕܓܵܢܵܐ. ܐܘܼܦ ܐܵܗܵܐ ܣܪܝܼܩܘܼܬܵܐ ܝܠܵܗ̇ ܘܩܦܵܝܬܵܐ ܕܦܵܘܚܵܐ.
ܣܪܝܼܩܘܼܬܵܐ ܕܚܲܝܘܼܬܵܐ
10ܡܸܢܕܝܼ ܕܗܘܹܐ ܠܹܗ ܡ̣ܢ ܓ̰ܲܠܕܹܐ ܦܝܼܫ ܠܹܗ ܩܸܪܝܵܐ ܫܸܡܹܗ، ܘܦܝܼܫ ܠܹܗ ܝ݇ܕܝܼܥܵܐ ܡܘܿܕܝܼ ܝܠܹܗ ܒܲܪܢܵܫܵܐ، ܘܠܹܐ ܡܵܨܹܐ ܠܸܕܪܵܫܵܐ ܡ̣ܢ ܗ̇ܘ ܕܝܼܠܹܗ ܒܘܼܫ ܚܲܝܠܵܢܵܐ ܡܸܢܹܗ. 11ܣܵܒܵܒ ܐܝܼܬ ܚܲܒܪ̈ܵܢܹܐ ܪܵܒܵܐ ܕܟܹܐ ܡܲܙܝܸܕܝܼ ܣܪܝܼܩܘܼܬܵܐ، ܡܘܿܕܝܼ ܝܠܹܗ ܝܘܼܬܪܵܢܵܐ ܠܒܲܪܢܵܫܵܐ؟ 12ܣܵܒܵܒ ܡܵܢܝܼ ܟܹܐ ܝܵܕܹܥ ܡܘܿܕܝܼ ܝܠܹܗ ܨܦܵܝܝܼ ܩܵܐ ܒܲܪܢܵܫܵܐ ܒܚܲܝܘܼ̈ܗܝ، ܒܡܸܢܝܵܢܵܐ ܕܝܵܘܡܵܢܹ̈ܐ ܕܚܲܝܘܼ̈ܗܝ ܣܪ̈ܝܼܩܹܐ، ܐܲܝܢܝܼ ܕܟܹܐ ܥܵܒܹܕ ܠܗܘܿܢ ܐܲܝܟ݂ ܛܸܠܵܢܝܼܬܵܐ؟ ܣܵܒܵܒ ܡܵܢܝܼ ܡܵܨܹܐ ܡܲܕܸܥ ܠܒܲܪܢܵܫܵܐ ܡܘܿܕܝܼ ܒܸܬ ܗܵܘܹܐ ܡ̣ܢ ܒܵܬ݇ܪ ܕܝܼܹܗ ܬܚܘܿܬ ܫܸܡܫܵܐ؟
Právě zvoleno:
ܩܘܗܠܬ 6: ABTAB
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Aramaic Bible Translation Assyrian Bible © 2025 Aramaic Bible Translation