ܩܘܗܠܬ 4
4
ܒܘܼܬ ܛܠܘܼܡܝܵܐ، ܘܥܲܡܠܵܐ، ܘܒܢܲܦ̮ܫܘܼܬܵܐ
1ܘܕܝܼܪܝܼ ܐܵܢܵܐ ܘܚܙܹܐ ܠܝܼ ܠܟܠܲܝܗܝ ܛܠܘܼܡܝܹ̈ܐ ܕܟܹܐ ܦܵܝܫܝܼ ܥܒ݂ܝܼܕܹܐ ܬܚܘܿܬ ܫܸܡܫܵܐ؛ ܘܚܙܹܐ ܠܝܼ ܕܸܡ̈ܥܹܐ ܕܛܠܝܼܡܹ̈ܐ، ܘܠܲܝܬ ܠܗܘܿܢ ܝܵܗ݇ܒ݂ܵܢܵܐ ܕܠܸܒܵܐ، ܘܒܐܝܼܕܵܐ ܕܛܵܠܘܿܡܲܝ̈ܗܝ ܚܲܝܠܵܐ، ܘܠܲܝܬ ܠܗܘܿܢ ܝܵܗ݇ܒ݂ܵܢܵܐ ܕܠܸܒܵܐ. 2ܘܚܩܝܼܪܝܼ ܐܵܢܵܐ ܠܡܝܼܬܹ̈ܐ ܕܡ̣ܢ ܩܵܕ݇ܡ ܐܵܕܝܼܵܐ ܡܝܼܬܹܐ ܝܢܵܐ ܒܘܼܫ ܡ̣ܢ ܚܵܝܹ̈ܐ ܕܗܹܫ ܒܸܚܵܝܵܐ ܝܢܵܐ، 3ܐܝܼܢܵܐ ܒܘܼܫ ܨܦܵܝܝܼ ܡ̣ܢ ܬܸܪܘܲܝܗܝ ܗ̇ܘ ܝܼܠܹܗ ܕܗܹܫ ܠܵܐ ܦܝܼܫ ܠܹܗ ܝ݇ܠܝܼܕܵܐ، ܕܠܵܐ ܚܙܹܐ ܠܹܗ ܥܒ݂ܵܕܵܐ ܕܒܝܼܫܘܼܬܵܐ ܕܟܹܐ ܦܵܐܹܫ ܥܒ݂ܝܼܕܵܐ ܬܚܘܿܬ ܫܸܡܫܵܐ.
4ܘܚܙܹܐ ܠܝܼ ܐܵܢܵܐ ܟܠ ܥܲܡܠܵܐ ܘܟܠ ܟܲܫܝܼܪܘܼܬܵܐ ܕܦܘܼܠܚܵܢܵܐ ܦܠܵܛܵܐ ܕܒܵܚܲܠܬܵܐ ܕܐ݇ܢܵܫܵܐ ܝܠܵܗ̇ ܒܚܲܒ݂ܪܹܗ. ܐܘܼܦ ܐܵܗܵܐ ܣܪܝܼܩܘܼܬܵܐ ܝܠܵܗ̇ ܘܩܦܵܝܬܵܐ ܕܦܵܘܚܵܐ. 5ܣܲܟ݂ܠܵܐ ܟܹܐ ܟܵܬܹܪ ܐܝܼܕܵܬܹ̈ܗ، ܘܟܹܐ ܡܲܢܘܸܠ ܒܸܣܪܹܗ. 6ܒܘܼܫ ܨܦܵܝܝܼ ܝܠܵܗ̇ ܡܠܵܝܬܵܐ ܕܐܝܼܕܵܐ ܒܢܝܵܚܵܐ، ܡ̣ܢ ܡܠܵܝܬܵܐ ܕܩܛܝܼܪܹ̈ܐ ܒܓ̰ܵܦܵܐ ܘܩܦܵܝܬܵܐ ܕܦܵܘܚܵܐ.
7ܘܕܝܼܪܝܼ ܐܵܢܵܐ ܘܚܙܹܐ ܠܝܼ ܣܪܝܼܩܘܼܬܵܐ ܬܚܘܿܬ ܫܸܡܫܵܐ. 8ܐܝܼܬ ܚܲܕ ܒܢܲܦ̮ܫܹܗ ܘܠܲܝܬ ܚܲܕ ܐ݇ܚܹܪ݇ܢܵܐ، ܐܘܼܦ ܠܲܝܬ ܒܪܘܿܢܵܐ ܘܠܵܐ ܐܲܚܘܿܢܵܐ، ܘܠܲܝܬ ܦܪܵܩܬܵܐ ܠܟܠܹܗ ܥܲܡܠܹܗ، ܐܘܼܦ ܥܲܝܢܘܼ̈ܗܝ ܠܹܐ ܣܵܒ݂ܥܝܼ ܡ̣ܢ ܥܘܼܬܪܵܐ، ܘܠܹܐ ܐܵܡܹܪ، ”ܩܵܐ ܡܵܢܝܼ ܐܵܢܵܐ ܥܒ݂ܝܼܕ ܠܝܼ ܥܲܡܠܵܐ ܘܚܣܝܼܟ݂ ܠܝܼ ܠܓܵܢܝܼ ܡ̣ܢ ܛܵܒ݂ܬܵܐ؟“ ܐܘܼܦ ܐܵܗܵܐ ܣܪܝܼܩܘܼܬܵܐ ܝܠܵܗ̇ ܘܟܸܟ̰ܚܵܐ ܩܸܫܝܵܐ.
9ܒܘܼܫ ܨܦܵܝܝܼ ܝܢܵܐ ܬܪܹܝ ܡ̣ܢ ܚܲܕ، ܣܵܒܵܒ ܐܝܼܬ ܠܗܘܿܢ ܩܢܵܝܬܵܐ ܒܘܼܫ ܨܦܵܝܝܼ ܒܥܲܡܠܲܝܗܝ. 10ܣܵܒܵܒ ܐܸܢ ܢܵܦܹܠ ܚܲܕ، ܒܸܬ ܡܲܩܸܡ ܐܸܠܹܗ ܚܲܒ݂ܪܹܗ، ܐܝܼܢܵܐ ܘܵܝ ܠܗ̇ܘ ܚܲܕ ܕܢܵܦܹܠ، ܘܠܲܝܬ ܕܬܪܹܝ ܠܡܲܩܘܼܡܹܗ. 11ܗܲܪ ܗܵܕܵܐ، ܐܸܢ ܕܵܡܟ݂ܝܼ ܬܪܹܝ ܒܸܬ ܫܵܚܢܝܼ، ܐܝܼܢܵܐ ܚܲܕ ܒܢܲܦ̮ܫܹܗ ܕܵܐܟ݂ܝܼ ܫܵܚܹܢ؟ 12ܘܐܸܢ ܚܲܕ ܡܵܨܹܐ ܙܲܒܛܸܢ ܠܐ݇ܚܹܪ݇ܢܵܐ، ܬܪܹܝ ܟܹܐ ܡܵܨܝܼ ܟܵܠܝܼ ܩܵܕ݇ܡܘܼܗܝ؛ ܘܚܲܒ݂ܠܵܐ ܕܬܠܵܬܵܐ ܓܸܕܹ̈ܐ ܠܹܐ ܩܵܛܹܥ ܓ̰ܲܠܕܹܐ.
ܡܗܲܕܝܵܢܵܐ ܚܲܟܝܼܡܵܐ ܘܣܪܝܼܩܘܼܬܵܐ ܕܥܲܡܵܐ
13ܒܘܼܫ ܨܦܵܝܝܼ ܝܠܹܗ ܝܵܠܵܕ݇ܐ ܡܸܣܟܹܢܵܐ ܘܚܲܟܝܼܡܵܐ، ܡ̣ܢ ܡܲܠܟܵܐ ܣܵܒ݂ܵܐ ܘܣܲܟ݂ܠܵܐ، ܕܠܹܐ ܝܵܕܹܥ ܠܸܦܝܵܫܵܐ ܡܘܼܠܦܵܐ ܡܸܢܕܪܸܫ. 14ܣܵܒܵܒ ܦܠܝܼܛ ܠܹܗ ܝܵܠܵܕ݇ܐ ܡ̣ܢ ܒܹܝܬ ܐܲܣܝܼܪܹ̈ܐ ܠܸܥܒ݂ܵܕܵܐ ܡܲܠܟܘܼܬܵܐ، ܐܵܦܸܢ ܕܦܝܼܫ ܠܹܗ ܝ݇ܠܝܼܕܵܐ ܡܸܣܟܹܢܵܐ ܒܡܲܠܟܘܼܬܹܗ. 15ܚܙܹܐ ܠܝܼ ܟܠܲܝܗܝ ܚܵܝܹ̈ܐ ܕܟܹܐ ܚܵܕܪܝܼ ܬܚܘܿܬ ܫܸܡܫܵܐ ܥܲܡ ܝܵܠܵܕ݇ܐ ܐ݇ܚܹܪ݇ܢܵܐ، ܗ̇ܘ ܕܒܸܬ ܫܵܩܹܠ ܫܵܘܦܹܗ. 16ܠܲܝܬ ܚܘܼܬܵܡܵܐ ܠܟܠܹܗ ܥܲܡܵܐ، ܠܟܠ ܕܗܘܹܐ ܠܹܗ ܡ̣ܢ ܩܵܕ݇ܡ ܕܝܼܲܝܗܝ، ܐܘܼܦ ܐ݇ܚܵܪ̈ܵܝܹܐ ܠܹܐ ܚܵܕܝܼ ܒܝܼܹܗ. ܐܘܼܦ ܐܵܗܵܐ ܣܪܝܼܩܘܼܬܵܐ ܝܠܵܗ̇ ܘܩܦܵܝܬܵܐ ܕܦܵܘܚܵܐ.
Právě zvoleno:
ܩܘܗܠܬ 4: ABTAB
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Aramaic Bible Translation Assyrian Bible © 2025 Aramaic Bible Translation