EFISIA 4
4
Pang Arihako
1Jumonü I Atungpuh thsungkheaknü aramrünü nüsa küpü ching jia lanü ju thülünde rhangdung lapü nüsa ki tuthsukchoh, 2#Kol 3.12,13azhihayihde tüsho tsüyihde, arümkheamde, amuzho ching khülangnü khülang arümkheamachihde, 3mungtsü shuründe Me arihako lapü mulong jihang. 4Nüsa mulonglam khülang ching jia lakhi nangde pang khülang tüsho Me khülang, 5Atungpuh khülang, akin khülang, baptikhi khülang, 6Thrünpuh khülang tüsho alala kumung tüsho alala ching labuh isa alala Abuh. 7Tüshe Khrista thsambah adünkhi yande isa aban kilim amüthsüm jih. 8Jumonü ha tha,
“Küyimki api achang kheak yükihkheanü apinü aramrü boto khülang be
tüsho apinü mihtsürübo kilim thsambahbo jih.”
9(Api wutukhi amütsan tümü a? Ha amütsan akhuhde api alomi abobe ching aki. 10Jumonü alomi alala mishihpü thsüde shepü akikheanü, thüningbo alala hode awutubuh ju khülang lang ah.) 11Tüsho api thsambahbo ju khürü amüsühthsangyurü, khürü wukihrü, khürü thsangyuthsangrarü, khürü namfimihnu neakrü tüsho thsangyurü, 12tankih rhimo thsungkheak amüsührü düküngshihpü, Khrista pang zokihshihpü, 13isa alala akin arihako tüsho Thrünpuh tsührü mükheahkhi mukhiungyi khiungde, tüsho Khrista trungdung akekhitkhi ching mihzo mükamyi khiungde; 14junangde kheaküa isa thsunga yüla arüla de tüsho kingaün-yakzan apungnü yünde, arü rük amütsü ching azürü nangde müla. 15Tüshe amuzho ching thiyuro thade, Khrista aku thsübah alakhi limro aban ching isa zokihbah. 16#Kol 2.19Api kilimnü pang abümnü, müchina tüsho awuhrupung wuhrude, shihcham thsükhi abannü tsüde rhimosho, pang abümnü zochoh tüsho amuzho hode aküdahnü zokihchoh.
Khrista ching Rhangdung Aso
17Kheaküa khiungkerü amüthülünkhi lümkhi nangde nüsa düla de inü Atungpuh mung chingnü mütsande thachoh; 18arü mulong müküpde arü kheak yakli mümükheahkhi lakhi hode arü lümkhi mitingde, Thrünpuhnü ajihkhi rhangdung chingnü chamkhibah lah; 19achihayak alala dükheakabahbah mutukzhakde alü amümüsüh rhimopü arünü amütsübe kamabah. 20Nüsanü Khrista manikhitdebahdo! 21dükdüpüa nüsanü api dünkheak sodo tüsho Jisu kheak lakhi thiyuro nüsa ki thsangyudo. 22#Kol 3.9Khakhih nüsa rhangdung yakli tüsho mülapmüji shihkünkhi hode athsümünimkhi bahang, 23tüsho nüsa mulong tüsho lümkhi aso kamloang, 24#Kol 3.10tüsho thiyuro-lungki tüsho amüsüh ching Thrünpuh kiphahkhi ching thrünkhi yakli aso khümyukang.
25Jumonü arükchih lakhi bahbah mihbüm abannü yamhingrü ki thiyuro thaang, tümüde isa rukhüh kheyukrü ah. 26Nü bukakhiukkhi ching neak düyihbeak; nü bukakhiukde ani düyüzahshih, 27tüsho amünean kilim kim düjih. 28Ahührünü kheaküa dahüh, tüshe apinü rhimoang, api khahnü thiyuro rhimo rhimoang, junangde apinü küpkhukrü kilim jihpü kukbah. 29Asorü kilim amüthsüm ngüde alü thsüpü yihnüpü atsü kheak hode nüsa mün chingnü amütsü dakhiukshih. 30Arhokhitpü nimung thsungkheak nüsa yümkih-a lakhi Thrünpuh Amüsüh Me mulong dütukthsüshih. 31Akhüh, mulong zhipzhip, bukakhiuk, alanaji tüsho dünthamungtha athsümünim alala bede bahang, 32#Kol 3.13tüsho Khrista ching Thrünpuhnü nüsa neak bahjihkhi nangde khülangnü khülang neak bahachihde, amuzho mulongnü khülangnü khülang muzhoachihang.
Právě zvoleno:
EFISIA 4: YIMCBSI
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.