KOLOSI 1
1
1Thrünpuh lümkhi hode, Jisu Khrista amüsüh-thsangyurü Paul tüsho isa keoniorü Timothi kilimnü,
2Kolosi ching amüsührü tüsho Khrista ching thiyuro larü keoniorübo kilim:
Isa Abuh Thrünpuh kilimnü nüsa kilim amüthsüm tüsho mungtsü laang.
Makshe Jihkhi Tamkhüntamnü
3Küyimki isanü nüsa thsungkheak tamkhüntamnübanü kamruhroro isa Atungpuh Jisu Khrista ki makshe jihchoh, 4tümütüsho Jisu Khrista ching nüsa akin tüsho amüsührü alala thsungkheak nüsa amuzho lakhi isanü sodo, 5thiyuro thiyusheak-atsü yu ching nüsanü akhuhlim sokhi yinmi ching nüsa thsungkheak zojihkhi mulonglam dünkheaknü, 6alomi alala ching lakhi nangde, küpü nüsa kilim arükhea, tüsho nüsanü asokhi nimungnü nüsa bolung lakhi tüsho Thrünpuh amüthsüm thiyuro ching zokhi nangde; 7#Kol 4.12; Phi 1.23nüsa thsung thsüde thiyuro lakhi Khrista tankihrü isanü amuzhokhi yamlarü Epaphra kheaknü nüsanü asokhi nangde, 8apinü Me ching nüsa amuzho isa ki she thaa huh.
9Jumonü isanü ju sokhi nimungnü, me lümlung tüsho anikhitkhi alala ching api lümkhi mükheahmudunü nüsa mide akampü keokhide nüsa thsungkheak tamkhüntamnüpü isanü anüzhak müthsü, 10Atungpuh ki athülün rhangdung lapü, api tsüde asühshihpü, rhimo atsü aban ching aso asoshihpü tüsho Thrünpuh mükheahkhi ching rünkihpü lah. 11Api müretah sühmüh yande, rünkhiungpü tüsho asühachih arümkheam alala thsungkheak wu alalanü nüsa reangzahshang, 12ayinatrüm ching amüsührü yamrüplurüp shihcham ching isa thülünde kamshihbuh, Abuh ki makshe jihde laang. 13Apinü amiting yakzan shuhkhi chingnü isa bekhit tüsho apinü muzhokhi tsührü kiulongthsü ching beakhinjih, 14#Efi 1.7api hode isa rhokhitkhi, neak bahjihkhi lah.
Khrista Mihtsürü tüsho Rhimo
15Api ju amüngübe Thrünpuh mejak, thrüna lakhi alala kheaknü adüjibuh ah; 16tümüde api hode alala thrün: Yinmi ching tüsho alomi kheak angübe tüsho amüngübe, kiulongthsü-binkiubo yungsho wubo yungsho yakzanshuhrübo yungsho thiyukhüm-sühmühbo; alala api hode tüsho api thsungkheak thrün. 17Alala müngühnü api lah, tüsho alala api kheak zamrulah. 18#Efi 1.22,23Api ju borü, pang yo aku ah; api ju atankih, asherü bolungnü adüjibuh, junangde lüpdükhi ching apinü kihokhi labah. 19Tümüde api kheak Thrünpuh khiukdahkhi alala lapü asüh, 20#Efi 2.16tüsho alomi kheak yungsho yinmi ching thsüthsü, api sangkim thiyihnü mungtsü thsüde api hode anihbuh kheak tsüarihlo.
21Tüsho nüsa sherü khülangki limshude tüsho amütsü rhimode lüm ching thiriri lakhea, 22api miki nüsa amüsüh, areak mükihde tüsho amülim mülashihpü thsüde api shekhi hode apang ching kheakü apinü tsüarihlodo. 23Judüalalashe, nüsanü akin düküngkhi ching mutukzhakde tüsho mütsanmükhi khimtan labeah, tüsho nüsanü thiyusheak-atsü sobah alü thsükhi I mulonglam chingnü nüsa matrütshihbeah. I Paul, alomiküp ching alala ki thsangyuthsangrakhi ha thiyusheak-atsü tankihrü kamkheah.
Borü thsungkheak Paul Rhimo
24Kheakü nüsa dünkheak thsünükhi ching I asühchoh, tüsho Khristanü api pang, ju borü dünkheak thsünükhi ching mübanthsangkhi I shih ching inü banthsangshihchoh. 25Tüsho nüsa tsüpü thsungkheak ha rhimo I kilim jihbuh Thrünpuhnü I borü tankihrü kamshih. Ha suhdahde api yusheak zhiyukpü rhimo, 26ahokhi lünbo alala ching mihtsürü alala kheaknü rama lakheah tüshe kheakü amüsührü ki amikheak akhiukshihdo. 27Nüsa kheak lakhi Khrista, müretah mulonglam, ha aramyu müretah lakhit khiungkerü bolung mükheahshihpü Thrünpuhnü arü ki mulongkhit. 28Isanü mihtsürü aban Khrista ching khiukdahkhi kamshihpü mihtsürü aban lümlung alala ching dande thsangyuchoh. 29Khristanü ajihkhi sühmüh tüsho I kheak rhimode alakhinü inü ha rhimochoh tüsho mürangchoh.
Právě zvoleno:
KOLOSI 1: YIMCBSI
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.