2 TIMOTHI 3
3
Akheam Nimungbo
1Akheam nimungbo ching thsümütsü kimbo labah de ha anikhitang. 2Tümüde mihtsürübo ju nihbuh muzhorü, sho muzhorü, akükheang, bukakhiuk, lülüshishi, bebuhrü ki mihyumanikhi, makshemüjihkhi, mümüsühkhi, 3mümuzhokhi, neak mübahjihkhi, dünthamungtha, nihbuh müdanyukkhi, bukmükekhi, atsü thraneanrü, 4rükmütsü, adüngakhi mülakhi, shilode alümrü, Thrünpuh muzhorü yungde shihkünkhi muzhorü, 5kingaün yakli shuhbah tüshe ju wu reanglokhi labah. Hadürü mihtsürü bahkhiang. 6Arü khürünü mihtsürü yambo ching yüzahchoh tüsho arü neak ching mülimde, reangmüzahkhi tüsho shihkünkhi mungji alalanü bephülapkhi liberübo, 7kamruhroro anikhita luchoh tüshe thiyuro mükheahpü mukukkhibo rükyuka luchoh. 8Jannea tüsho Jambrea bünenü Mosa azhihkhi nangde lümkhi amütsü tüsho akin thsümünimkhi mihtsürübonü she thiyuro azhihchoh; 9tüshe arübo limshude müyü, tümütüsho mihtsürü mahne nangde arü makhakhi alala ki mütsanbah.
Akheam Thsangdankhibo
10Kheakü nünü I thsangyukhi, rhimo, I rhangdung mükkheahkih, akin, arümkheam, amuzho, arorikhi, 11#Yunir 13.14-52; Yunir 14.1-7; Yunir 14.8-20thsümüchikhi, thsünükhi, Antiok le Ikonium tüsho Lystra ching I kheak dünjibah inü arümkheamkhi mükheahdo; tütüshe jurü alala chingnü Atungpuhnü I khümkhit. 12Atsütsü, Jisu Khrista ching kinde alapü künkhi rhangdung alala athsümüchibah; 13mihtsürü amütsü tüsho rükmütsürü a mülapyukde tüsho mülapyukabahde amütsü chingnü amütsübe kambah. 14Tüshe nü a she kheaknü anikhitkheanü mükheahde, anikhitkhi tüsho düküngde akinpü ching mutuklode laang, 15tüsho nü azüchokinü Jisu Khrista kheak kinkhi hode akhümkhit lim bepü lümlung jihkhukpü amüsühyubo nünü mükheahlah de nünü lümkhitang. 16Amüsühyu alala Thrünpuhnü mütyukjihkhi tüsho thsangyupü, athürühpü, thsülangpü tüsho thiyuro-lungki ching zükhitpü thsungkheak yihnüpü lah, 17junangde Thrünpuh mihtsürü ju rhimo atsü alala thsungkheak banthsangde, yeankhita labah.
Právě zvoleno:
2 TIMOTHI 3: YIMCBSI
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.