1 TIMOTHI 1
1
1Isa khümkhitbuh Thrünpuh tüsho isa mulonglam Jisu Khrista yukhüm hode Jisu Khrista amüsühthsangyurü Paul kilimnü,
2 #
Yunir 16.1
Akin ching thiyuro I tsührü Timothi kilim:
Abuh Thrünpuh tüsho isa khümkhitbuh Jisu Khristanü mihmuzho, mihmüthsüm tüsho mungtsü jihshang.
Arükchih Thsangyukhi dünkheak
3I Macedonia lim yüde alachoki nü ki tuthsukkhi nangde inü nü Efisia ching lashihnelah. Ju ching mihtsürü khürünü arükchih kingaünyakzan thsangyuchoh tüsho nünü arü tukloshihpü thiyukhüm jihbeah, 4yungsho arünü mümütsankhi yukhean tüsho arün mülakhi lünkheyukheanbo ching mulong müjihbeah. Harünü akin hode alakhi Thrünpuh lümkhi yungde alanaji akhiukshihchoh. 5Ha thiyukhüm jihkhi mükkheahkih ju mulong amüsüh, lümkhi atsü tüsho düküngde akinkhi chingnü arükhi amuzho lah. 6Khürü a harü chingnü rholobah keangthapü ching tsodo. 7Arünü yakzan thsangyurü thsüpü künlah, tüshe arünü tümü dünkheak thacho yungsho tümü mütsande asukchonü mümükheah. 8Kheakü khürünü alungkinü ahorisho yakzan ju atsü ah de isanü mükheahlah, 9junangde ha anikhitpü ju, yakzan ha alungkirü thsungkheak müthsü tüshe yakzan thsümünimrü le mihyumanirü, amükinrü le aneakrü, mümüsühkhi le amüneankhi, berübuhrü laksahrü, mihkhukrü, 10müzammüram mihtsürü, yüliyürarü, bekhide-atsorü, akeangyu tharü, arükchih thiyumütsan thsürü tüsho kingaün-yakzan alungki azhihrü thsungkheak ah. 11Haju I ki thiyikhi müngühmühi Thrünpuh müretahkhi thiyusheakatsü yande lah.
Thrünpuh Mihmüthsüm thsungkheak Mungshi
12Ha thsungkheak I kilim sühmüh jihbuh isa Atungpuh Jisu Khrista kilim inü makshe jihchoh, tümütüsho ha tankihpü ching I yüzahshihde apinü I thiyuro lakhi khejih. 13#Yunir 8.3; 9.4,5Adüso inü api athruajide, thsümüchide, tüsho mükhemükimde lalashe, inü mümükheahde tüsho mükinyide arhimokhi hode I ki mihmüthsüm huh. 14Jisu Khrista ching akin tüsho amuzho kheak khiode Atungpuh amüthsüm I kheak suhdahde dungkihjih. 15Aneakrü khümkhitpü Jisu Khrista ha lomi ching arükheah de athakhi atsütsü tüsho dükde aleangkhibe athülün lah, tüsho arü kheaknü I amütsübe ah; 16tüshe I aneakrü bolung amütsübe kheaknü, api kheak lün rhangdung thsungkheak kinpü larü ki amütsan thsungkheak Jisu Khrista azhihayihkhi huhpü thsüde inü ha mihmüthsüm leangkhi. 17Amüshebuh, amüngübuh, lünbo Kiulongthsürü, Thrünpuh lang lünnü lün wüntre lashang tüsho müretahkhi thsang. Amen. 18I tsührü Timothi, akhuhlim nü dünkheak müchitkhi yande, jurü hode nünü tsüde keochihpü thsüde ha thsangdan nü kilim jihchoh, 19akin düküngang tüsho lümkhi müsühde zoang. Mihtsürü khürünü lümkhi bahyukkhinü arü akin thsümünimdo. 20Arü bolung mathruajipü anikhitshihpü thsüde inü amünean kilim jihkhi ju Mymenia tüsho Alexander ah.
Právě zvoleno:
1 TIMOTHI 1: YIMCBSI
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.