1 TESALONIKA 4
4
Thrünpuh Asühshihpü Rhangdung
1Akheam ching, keoniorübo, nüsanü künangde alaba tüsho Thrünpuh asühshihbanü isa kheaknü anikhitbah rhimode alakhi nangde alü thsüde rhimoang de Atungpuh Jisu mung chingnü nüsa ki mushude tuthsukchoh. 2Tümüde Atungpuh Jisu hode isanü nüsa kilim thsangdankhi tümü jihkheanü nüsanü mükheahlah. 3Nüsa tsangkhitpü ju Thrünpuh lümkhi lah: junangde nüsanü müzammüram bahkhibeah; 4nüsa mihbüm abannü amüsüh tüsho wüntre ching nihbuh niuberü lung lapü mükheahbeah, 5Thrünpuh mümükheahrü amükinrü nangde shihkünkhi ching yung; 6junangde mihtsürü shenü she hadürü ching nihbuh keoniorü ki müthsümünim, tüsho amülim müthsü, tümütüsho isanü nüsa ki amüngühnü düh de athakhi nangde harü alala ching Atungpuh ju royimrü lah. 7Tümüde Thrünpuhnü mümüsühde alapü yungde amüsüh ching lapü isa jikheah. 8Jumonü sherünü ha bahyukchonü mihtsürü yungde nüsa kilim Amüsüh Me jihbuh Thrünpuh bahyukchoh.
9Tüshe keoniorü muzhopü dünkheaknü khürünü nüsa ki thrütpü thsüde yihnüpü müla, tümüde khülangnü khülang muzhoachihpü Thrünpuhnü nüsa ki thsangyudo. 10Tüsho atsütsü nüsanü Macedonia ching keoniorü alala muzhochoh, tüshe keoniorübo, nüsanü alü thsüde arhimopü tuthsukchoh. 11Isanü nüsa ki thakhi nangde, akhimahe rhangdung lapü, nüsa nihbuh shothsümolo lümpü tüsho nüsa khahnü arhimopü nüsa mükkheahkih thsang, 12junangde nimung aban nü rhangdung lakhinü aleangkheakrü wüntre ngübah tüsho she kheak she nü düthsün angüde müla.
Atungpuh Arükhi
13Keoniorübo, shea larü dünkheak nüsanü mümükheahde mülashihne, yungsho mulonglam mülakhi mihtsürübo nangde mulong murozhakshihne. 14Tümütüsho Jisu shebah arhang kamlokheah de isanü kinlah, junangde Jisu hode Thrünpuhnü api lung asherübo bede arübah. 15#1 Kor 15.51,52Tümüde isa sherü Atungpuh arüpü khiungde rhangdung lanü asherü kheaknü akhuhde müyü de Atungpuh yu hode isanü nüsa ki khipkhitchoh. 16Tümütüsho Atungpuh ju thiyukhüm jihkhi zhide, yunirü-atobuh düsheak thsüde, tüsho Thrünpuh yo hulipungpung mütde yinmi chingnü akibah. Tüsho Khrista ching shea larü akhuhde asürübah; 17judüki isa aninga larü, thüning ching Atungpuh shorupü arü lung amo ching rukhüh bemukhungbah tüsho isa lünnü Atungpuh lung labah. 18Jumonü harü yubonü khülangnü khülang mulong shukheamachihang.
Právě zvoleno:
1 TESALONIKA 4: YIMCBSI
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.