Oblíbené biblické verše z Filipi 4

Sdílet

Ngoni jang kuatir tentang apa-apa, mar basombayang jo minta pa Tuhan Allah tentang samua hal. Ngoni se tau jo samua tu ngoni pe perlu pa Dia, deng bilang jo makase pa Dia.

Deng ngoni beking bagitu, Tuhan Allah mo beking ngoni hidop deng hati tenang, kong manusia nyanda mampu mo mangarti bagimana sampe tu ngoni pe hati bole rasa tenang bagitu. Tu rasa tenang yang dari pa Tuhan Allah itu mo jaga tu ngoni pe hati deng pikiran supaya nyanda kuatir lantaran ngoni so percaya pa Kristus Yesus.

Jadi sudara-sudara, de pe laste kita minta pa ngoni supaya ngoni pikir jo slalu tentang samua hal ini: samua yang butul, samua kalakuan yang pantas dapa hormat, samua yang adil, samua yang suci, samua yang bae, samua yang bagus tu orang suka mo dengar, samua kalakuan yang pe bagus skali, deng lei samua yang pantas for dapa puji, ngoni pikir-pikir jo tentang tu samua hal itu.

Kita bole mangada samua tu keadaan lantaran Kristus yang kase kita kekuatan for mangada itu.

Sudara-sudara, ngoni yang percaya pa Tuhan, ngoni musti slalu snang.

Tuhan Allah yang kita semba mo kase samua tu ngoni perlu dari tu Dia pe kekayaan yang pe luar biasa. Dia kase tu ngoni pe perlu itu lantaran ngoni so percaya pa Kristus Yesus.

Samua yang ngoni so blajar dari pa kita, yang ngoni so dengar deng trima dari pa kita, deng lei yang ngoni so lia dari pa kita, ngoni beking jo tu samua itu. Kalu ngoni beking bagitu, Tuhan Allah yang ja beking orang pe hati tenang, Dia mo sama-sama deng ngoni.

Kong biar jo samua orang bole mo lia ngoni pe kalakuan yang bae-bae. So nyanda lama lei Tuhan so mo datang ulang.

Kita tau bagimana hidop deng kekurangan, deng kita lei tau bagimana hidop deng talebe-lebe. Kita so blajar bagimana tu de pe rahasia for hidop beking cukup tu diri sandiri di samua keadaan, biar itu waktu kanyang ato lapar, biar itu waktu kita kekurangan ato di waktu kita talebe-lebe.

Kita da bilang bagitu bukang lantaran kita ada kekurangan kong minta ngoni bantu lei pa kita, bukang bagitu. Soalnya kwa kita so blajar beking cukup tu kita pe diri sandiri di samua keadaan.