Oblíbené biblické verše z Filipi 3

Sdílet

Sudara-sudara, kita nyanda anggap kalu kita pe cara hidop so sama deng Kristus pe cara hidop, mar ini tu kita ja beking: kita so nyanda ja inga-inga apa yang so perna kita da beking, mar kita brusaha kras maju trus sama deng tu orang da iko lomba lari yang brusaha kras supaya sampe di finis. Kita brusaha trus supaya kita bole sampe pa kita pe tujuan for hidop sama deng Kristus Yesus da hidop, itu bole mo se sama deng tu orang yang iko lomba lari da brusaha balari trus sampe di garis finis supaya bole mo dapa tu piala. Tu piala yang kita mo dapa, itu no tu hidop kekal, kong Tuhan Allah pangge pa kita for dapa tu hidop kekal itu lantaran kita so percaya pa Kristus Yesus.

Tu kita pe mau, kita cuma mo kanal pa Kristus deng lei mo rasa tu kuasa yang kase hidop ulang pa Dia dari kematian. Kita so siap mendrita sama deng tu pendritaan yang Dia da rasa dulu, kong siap lei mati sama deng Dia da mati dulu. Kong de pe alasan kiapa kita suka bagitu supaya kalu kita mati Dia mo kase hidop ulang pa kita.

Mar bukang cuma itu lei, malatare samua hal kita anggap nyanda ada arti apa-apa lantaran kita skarang so bole kanal pa Kristus Yesus tu kita pe Tuhan, kong itu yang jao lebe berharga. So lantaran Dia, kita se lapas tu samua yang dulu itu, kita anggap tu samua itu sama deng sampa, supaya kita bole kanal pa Kristus

Tu kita pe hidop yang dulu itu, kita anggap bawa untung for kita. Mar serta skarang, kita pe hidop yang dulu itu kita anggap nyanda bawa untung apa-apa, lantaran kita skarang so iko pa Kristus.