Oblíbené biblické verše z Исаёс 43

Sdílet

Акэ, Мэ кэра́ва нэви́ буты́, акана́ ёй сыкадёла, ци тумэ́ на камэ́на тэ джинэ́н пал дава́? Мэ кэра́ва дром пэ фэ́лда, рэ́ки (лэня́) пэ чхучи́ пхув.

Ко́ли ту явэ́са тэ пириджас пир пани́, Мэ сом ту́са; ци пир рэ́ки (лэня́) – ёнэ тут на тасадякирэна; подджаса кэ яг – ёй тут на схачкирла.

Нэ тумэ́ на пририпирэна пал прогинэ́ дывэса́, на думинэ́на пал дова́, со сыс ґара́.

Акана́ адя́кэ ракирэ́ла Рай Дэвэ́л, Саво́ создыя́ тут, Яково, и Саво́ дыя́ джиибэ́н ту́кэ, Израилё: “На дар, пал-дова́ со Мэ выкиндём тут, кхардём тут тырэ́ лавэ́са, ту сан Миро.

Пал-дова́ со ту сан дро́го дрэ Мирэ́ якха́, и яця́н древа́н куч и Ма́нгэ ту яця́н пир ило́, то Мэ отда́ва явирэ манушэ́н пал ту́тэ и народы пал тыро́ ди.

Пал-дова́ со Мэ сом Рай Дэвэ́л, тыро́ Дэвэ́л, Свэ́нто Израилёскиро, Зракхибнари тыро́; Мэ Еги́пто, Ефиопия, Савея (Шэба) отдыём пал ту́тэ, соб (кай) тэ выкинав тут.

На дар, дыкх, Мэ сом ту́са; вастоко́стыр Мэ яна́ва тыро́ кхэри́тко ро́до, западостыр скэда́ва тут.

Мэ, Мэ Кокоро́, отмэка́ва тырэ́ грэ́хи ваш Пэ́скэ Кокорэскэ, Мэ на пририпирава грэ́хи тырэ́ буты́р.

А Мирэ́ мануша́, савэ́ допхэнэна, пал чачипэ́н, – пхэнэ́ла Рай Дэвэ́л, – тумэ́ и Миро писха́ри, конэ́с Мэ выкэдыём, соб (кай) тумэ́ тэ джинэ́н и тэ патя́н Ма́нгэ, со дава́ Мэ сом; англэды́р на сыс николи явирэ Дэвлэ́с и на явэ́ла.

Мэ, Мэ сом Рай Дэвэ́л и нанэ явирэ́с Зракхибнарис апри́ч Ма́ндэ.

Англэды́р сарэ́стыр Мэ со́мас адасаво́, нико́н на зракхэ́ла Мирэ́ вастэ́стыр; Мэ кэра́ва, и кон дава́ отпарувэла?

Фэлдытка мурдала́ (звери) пэ фэ́лда Ман вышарэна, шарэна шакалы и чирикля́ (страусы), пал-дова́ со Мэ пэ чхучи́ пхув дава́ пани́, Мэ кэра́ва рэ́ки (лэня́) пэ шуки́ мал (степ), соб (кай) тэ пьел Миро народо, саво́ Мэ выкэдыём. Дава́ народо Мэ создыём ваш Пэ́скэ; ёв дэ́ла паты́в Ма́нгэ.

Кэ паш-рат (северо) пхэна́ва: “Отдэ́!” – и кэ паш-дывэ́с (юго): “На рикир, лы́джа дуралыпнастыр Мирэ́ чхаворэ́н и Мирэ́ чхае́н пхувья́кирэ ягорэндыр (краендыр); кажнонэс, кон кхарэ́лапэ Мирэ́ лавэ́са, конэ́с Мэ создыём ваш Миро барипэ́н, конэ́скэ Мэ дыём джиибэ́н.”

Адя́кэ ракирэ́ла Рай Дэвэ́л, Саво́ откэрдя дром пэ мо́рё (дэрья́в), Саво́ откэрдя дром пир зоралэ́ паня́. Саво́ вылыджия́ грэн и марибны́тка вурдэна́, халадэ́н и зор; сарэ́ пасинэ кхэтанэ́, на уштынэ́, мурдинэ, сыр момолытка (светильники), хасинэ́.

Мэ сом Рай Дэвэ́л, тумаро́ Свэ́нто, Кодова́, Кон создыя́ Израилё, тумаро́ Кра́ли.