If you have would like a copy of this version please contact info@davarpartners.org

Text: Dotyali New Testament, CC-BY-SA-4.0, The Love Fellowship. Audio: Dotyali New Testament Audio Bible, CC-BY-SA-4.0, Davar Partners International, The Love Fellowship, 2022

Dotyali New Testament

Dotyali (डोटेली) New Testament, by The Love Fellowship is licensed under Creative Commons Attribution-ShareAlike 4.0 License.

येशू ख्रीष्टका पुर्खेउलीको नाउँको सुचि यो हो। उन राजा दाउदका बंस हुन, रे राजा दाउद अब्राहामका बंस हुन। अब्राहाम इसहाकका बा थ्या। इसहाक याकुबका बा थ्या। याकुब यहूदा रे तिनरा दाइ-भाइका बा थ्या। यहूदा फारेस रे जाहेरका बा थ्या। तिनरि इजा तामार थिन। फारेस हेस्रोनका बा, हेस्रोन आरामका बा थ्या। आराम अम्मीनादाबका बा, अम्मीनादाब नहशोनका बा, नहशोन सल्मोनका बा, सल्मोन बोअजका बा थ्या। बोअजकि इजा राहाब थिन। बोअज ओबेदका बा थ्या। ओबेदकि इजा रुथ थिन। ओबेद यिशैका बा, यिशै दाउद राजाका बा थ्या। राजा दाउद सोलोमनका बा थ्या। सोलोमनकि इजा राजा दाउद सित ब्या अद्दाहै पइल्ली उरियाहकी स्वानी थिन। सोलोमन रहबामका बा, रहबाम अबियाका बा, अबिया आसाका बा, आसा यहोसापातका बा, यहोसापात यहोरामका बा, यहोराम उज्जियाहका बा, उज्जियाह योतामका बा, योताम आहाजका बा, आहाज हिजकियाका बा, हिजकिया मनश्शेका बा, मनश्शे अमोनका बा, अमोन योशियाहका बा, योशियाह यकोनियास रे तइका भाइनका बा थ्या। तिनन बेबिलोन देशमि इस्राएलिलाइ कैदी बनाइबर लैना हइ पइल्ली जन्मिरइथ्या।
बेबिलोन देशमि बन्दी बनाइबर लैय्या बठेइ येशूको जन्म सम्मको बंसजका सुचि यिन हुन: यकोनियास शालतियलका बा थ्या, शालतियल यरुबाबेलका बा, यरुबाबेल अबिउदका बा, अबिउद एल्याकिमका बा, एल्याकिम आजोरका बा, आजोर सादोकका बा, सादोक आखिमका बा, आखिम एलिउदका बा, एलिउद एलाजारका बा, एलाजार मत्तानका बा, मत्तान याकुबका बा थ्या। याकुब योसेफका बा थ्या, योसेफकि स्वानी मरियम थिन। मरियम येशूकी इजा थिन, जो ख्रीष्ट भणिनाहान। इसेरि अब्राहाम बठेइ राजा दाउद सम्म चौद्द पुस्ता भया, रे राजा दाउदका समय बठेइ बेबिलोन देशमि इस्राएलिलाइ कैदी बनाइबर लैया बेला सम्म चौद्द पुस्ता, रे बेबिलोन देशमि इस्राएलिलाइ कैदी बनाइबर लैया बेला बठेइ येशू ख्रीष्टको बेला सम्म चौद्द पुस्ता भया।


येशू ख्रीष्टको जन्म हुनाहइ पइल्ली यिसो भयाथ्यो। उनरी इजा मरियम सित योसेफकि मगनि भइरइथ्यो। उनरो ब्या हुनाहइ पइल्ली मरियम पबित्र आत्माको सक्ति बठेइ कुमारिकन्या छनजेइ बालक पाउनेइ भइन। तइको बैकान योसेफ धर्मि मान्स भया हुनाले, तइलाइ शरममि पाड्ड्या मन नभया हुनाले गोप्यमी मगनि तोडया निर्णय अर्यो। उइले इसो सोच्यो क्याकि उन ब्या अद्दाहइ पइल्ली गर्भवती भइन जो कानुनको बिरुद्दमि थ्यो। तइ पछा जब उन यिन कुरणी बिचार अद्दाथ्या, सुइनामी प्रभुका स्वर्गदुत धेका पड्या, रे उनलाइ यिसो भण्यो, “योसेफ, राजा दाउदका बंस, मरियमलाइ तेरि स्वानिका रुपमि स्वीकार अद्दाइ जनडराइ, क्याकि जो तइका गर्भइनि छन, उन पबित्र आत्माका सक्ति बठेइ हुन। तिनले एक बालक जन्माउनेइ हुन, रे तुइले उनरो नाउँ येशू राख्दया हइ, क्याकि उनले आफना मान्सलाइ तिनरा पाप बठेइ बचाउन्या हुन।” यशैया अगमबक्ता बठेइ येशूका जन्मको बारेमि परमेश्वर बोल्या बचन पुरा हुनाइलाइ यिन सब भया हुन। यशैयाले इसेरि लेख्यो,
“हेर, एक कुमारिकन्या गर्भ बोक्देइ हो, रे तइले एक बालक जन्माउनेइ हो, रे उनरो नाउँ इम्मानुएल राखिन्या हो, जइको अर्थ हो, परमेश्वर हामसित।” योसेफ निन बठेइ बिउज्यो, रे प्रभुका स्वर्गदुतले उइलाइ भण्या अन्सार उइले मरियमलाइ ब्या अरिबर आफ्ना घरमि लेयो। मरियमले चेलो नजन्माउन्ज्याँ सम्म तिननले शारीरिक सम्बन्ध अरेइन। रे योसेफले बालकको नाउँ येशू राख्यो।

Poslouchat मत्ती 1