2. Tesaloničanenge 3
3
O Pavol peske mangel modľitbi
1Dureder, phralale, modľinen tumen vaš amenge, hoj pes o lav le Rajeskro sig te rozľiďžal a te prilel andre pačiv the avrether avke sar ke tumende. 2A modľinen tumen, hoj te avas avricirdle andral e zor le nalačhe the napačivale manušendar, bo na sakones hin pačaben. 3Ale o Raj hino pačivalo. Ov tumen dela zor a chraňinela le nalačhestar. 4Pačas tumenge andro Raj, hoj imar keren a the kerena, so tumenge amen prikazinas. 5O Raj mi ľidžal tumare jile ko kamiben le Devleskro the ke trpezľivosť le Kristoskri.
Sako te kerel buči
6Prikazinas tumenge, phralale, andro nav amare Rajeskro le Ježišoskro Kristoskro, hoj tumen te odcirden dojekhe phralestar, savo dživel leňivones a na dživel pal oda sikaviben, so amendar chudňan. 7Tumen korkore džanen, hoj kampel te kerel avke sar amen, bo amen na dživahas maškar tumende leňivones: 8Na chahas o maro ňikastar hijaba, ale andre buči phares kerahas rat-džives, hoj te na avas ňikaske tumendar pro starišagos. 9Amen kerďam oda, na vašoda, hoj amen na sas pre oda pravos, ale hoj tumenge te avas priklados, hoj te keren avke sar amen. 10A sar samas ke tumende, prikazinahas tumenge kada: „Oda, ko na kamel te kerel buči, aňi te na chal!“
11Bo šunas, hoj varesave džene maškar tumende pes namištes ľikeren – ňič na keren, ča pes thoven andre ola veci, so lenge na kampel. 12Ajsenge prikazinas a priphenas prekal amaro Raj Ježiš Kristus, hoj šukares te keren buči, a avke te chan peskro maro. 13Ale tumen, phralale, ma preačhen te kerel o lačhipen, 14a te vareko na šunel amaro lav andre kada ľil, pre oda manuš tumenge den pozoris a ma zdžan tumen leha, hoj pes te ladžal. 15Ma len les sar ňeprijaťeľis, ale dovakeren leske sar phraleske.
O posledna pozdravi
16Korkoro o Raj, savestar avel o smirom, tumen mi del o smirom andre dojekh časos the andre savoreste. O Raj mi el tumenca savorenca!
17Me, o Pavol, pisinav mire vasteha kada pozdravos. Avke pisinav. Kada hin o znakos#3,17 Abo: o podpisos andre savore mire ľila.
18E milosť amare Rajeskri le Ježišoskri Kristoskri mi el tumenca savorenca!
S'ha seleccionat:
2. Tesaloničanenge 3: RMC
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
©The Word for the World International and ©The Word for the World Slovakia, 2023.