Ifyakutaŋga 26
26
1Lomba mucalo mwaliŵele insala yakawumbo, itayali niyeyo iyali pansiku syakwe Ablaamu. Popele Isaci waliile kuli Abimeleci imfumu yaŵaFilisiti kuGelala.
2Popele ŵaYawe ŵalibwenekele kuli ye, nekulaŵila ati: Tekuya kuIjipiti; ulukwikele mucalo ico nakukuŵula: 3ulukulinsya mucalo ici, lomba nakulukuli naweŵo; pakuti weŵo neŵana ŵoŵe ŋkapele'tyalo ifi fyonse, kaŵili ŋkekaliko'kulayana uko nalayene nekulapa naŵaAblaamu ŵawiso; 4kaŵili ŋkafusya aŵana ŵoŵe koti tuwaŋgaŵaŋga utwamwiulu, popele ŋkaŵapela aŵana ŵoŵe ifi-fyalo fyonse; nakaŵili muŵana ŵoŵe emo ikasyucila imikoka yonse iyapacalo capansi; 5pakuti ŵaAblaamu ŵaliumfwilisye isiwi lyanji, nekulukulamo'kuŵula kwanji, nemafunde anji, nemasiwi anji, nekufunda kwanji konse.
6Popele apo Isaci aliikele kuGelala: 7popele aŵalalume aŵamumulya ŵalimwipwisye ifyamukasi wakwe; naye ati: Niŋkasi yanji; pakuti alitinine ukulaŵila ati mukasi wanji, ŵeŋganjipaya neŵo pakuti pali Libeka aŵalalume aŵamumuno: pakuti Libeka waliweme ukumutamba. 8Popele apo lomba, ili aikele uko impindi itali, Abimeleci imfumu yaŵaFilisiti yalitontomekele posonde kukambeluka, nekuŵona, lomba kusaŋga lsaci alukupukuta nakwe Libeka umukasi wakwe. 9Popele Abimeleci alimwitile lsaci, nekulaŵila ati: Ŵoneni, kansi mukasi wenu: lomba syani mwalaŵile ati niŋkasi yanji? Popele Isaci walilaŵile kuli ye ati: Pakuti kandaŵila ati: Niŋgesa kufwa pakuti pali ye. 10Popele Abimeleci ati: Cindo ici mwatucita? Cipale umbi umuntu aŋgalala lukoso nemukasi wenu lomba muŋgatufisisyo'mulandu fweŵo. 11Popele Abimeleci aliŵafundile aŵantu ŵonse ati: Uyo uŋgakuma-ko kumuntu uyu neli nikumukasi wakwe, akepaiwa icine.
12Popele apo lsaci waliŵyele mucalo ico, nekusaŋga umwako'yo wopele ifyakwikata umwanda: kaŵili ŵaYawe ŵalimusyucisye. 13Popele uyo-muntu lsaci aliŵele mukulu, nekulukukulakula, nekukumana neŵukulu ukwakuti: 14naye wali nemaŵoni amataŋga ambelele neaŋombe, newamuŋanda yakwe aŵenji: popele aŵaFilisiti ŵalimucitile icikani. 15Lombe'mikalo yonse'yo, iyi ŵatulile aŵantu ŵaŵawisi pansiku syaŵaAblaamu ŵawisi, aŵaFilisiti kale ŵaisincile nekwiisusye'loŵa.
16Popele Abimeleci walilaŵile kuli lsaci ati: Fumeni-po pali fweŵo; pakuti mweŵo mulicilile-po amakosa napali fweŵo. 17Popele apo lsaci walifumine-po palya, nekupopela'masema mumukolo waGelala, nekulukwikele mopele umo.
18Popele lsaci walitululwile imikalo yamenda, iyo ŵatulile pansiku syaŵaAblaamu ŵawisi; pakuti aŵaFilisiti ŵaliisincile, ili ŵafwile ŵaAblaamu: popele aliilicile koti masina ayo ŵaiilicile ŵawisi.
19Popele aŵantu ŵakwe lsaci ŵalitulile mumukolo, nekusaŋgana-mo umukalo wamenda alukunyunya. 20Popele aŵembesi aŵakuGelala ŵalilwile neŵembesi ŵakwe Isaci, ati amenda aya esu; popele aliwilicile umukalo isina ati niEseci, pakuti ŵalilwile nakwe. 21Popele ŵalitulile naumbi umukalo, nekulwila-po napali woyo: popele aliwilicile isina ati niSitina. 22Popele alifuminepo napapo, nekutula naumbi umukalo; sombi tawaulwilile uyo: lomba aliwilicile isina ati niLeyoboti; nekulaŵila ati: Pakuti ŵukumo ŵaYawe ŵatuleŋgele'mupunda, lomba tukalukufunuka mucalo.
23Popele, ukufumo'ko aliile kuBeyasyeba. 24Popele ŵaYawe ŵalibwenekele kuli ye uŵusiku uŵo ŵopele, nekulaŵila ati: Neŵo eneŵaLesa ŵaŵaAblaamu ŵawiso: witina, pakuti ndi noŵe, ŋkalukukusyucisya, nekufusya aŵana ŵoŵe pakuti pamuntu wanji Ablaamu. 25Popele aliŵunjile ico nto uko, nekulililile'sina lyaŵa Yawe, nekukome'sema lyakwe uko: kaŵili kopele uko aŵantu ŵakwe Isaci ŵalitulile umukalo.
26Popele apo Abimeleci waliile kuli ye, ukufuma kuGelala, pamo naAkusati iciŵusa cakwe, naFikoli icilolo icikulu iceŵumba lyakwe. 27Popele lsaci eli aŋgalawila kuli ŵo ati: Mbanindo mwisile kuli neŵo, mulibwene mulukumfitilwa; mwalintamfisye pali mweŵo? 28Naŵo ati: Ukuŵona twalibwene ati ŵaYawe ŵali namweŵo, eli tuŋgewa ati: Ŵukumo icilapo ŋgaciikale pakati pali fweŵo namweŵo, ŋgatulayane nenu; 29ati tesi mukatusomesye, koti nifyopele'fyo ifi tatwakumine-po pali mweŵo, pakuti twalimucitileni ifiweme fveŋka, nekumutumeni neŵutende: mweŵo ŵukumo emweŵasyucile kuli ŵaYawe. 30Popele aliŵepicile icitenje, naŵo kaŵalya, kaŵalukunwa. 31Popele ŵalicelele ulucelo, nekulapansyanya: lomba Isaci aliŵatumine, naŵo kaŵafuma-po pali ye neŵutende.
32Popele apo lomba akasuŵa ako kopele, aŵantu ŵakwe Isaci ŵaliisile, nekumuŵula ifyamukalo uyo ŵatulile, nekulaŵila kuli ye ati: Twaŵona amenda. 33Naye aliwilicile ati niSyeba: pakuti pali fyefyo isina lyamusi uyo niBeyasyeba nakukasuŵa kano.
34Popele ili yakumene amakumi ane imyaka yakwe Eso, aliupile Yudisi umwana wakwe Beyeli umuYeti, naBasemati, umwana wakwe Eloni umuYeti: 35naŵo ŵaliŵaleŋgele Isaci naLibeka insoni isikulu.
S'ha seleccionat:
Ifyakutaŋga 26: AAL59
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Lamba Bible Version © United Bible Societies, 1959.