Yohane 15
15
Yesu yuyo ghumtsabibu ghwa kweli
1“Nene naghumtsabibu ghwa kweli, na Aba wangu yuyo imkulima. 2Chila putila ing'alikweleka matunda, koligana, na chila putila ilikweleka ghamatunda, kolisangulila ili lyeleke ng'ani. 3Mwemwe mala mwela kwa imbuli aila yanimlongeleni. 4Kaleni mghati mwangu, kama nene pfanikala mghati mwenu. Kama apfila haduhu putila ilidaha kweleka lyenyegho, bila kukala mna ghumtsabibu, fipfila namwe ng'amdpaha baye kweleka ghamatunda bila kukala mghati mwangu.
5“Nene na ghumtsabibu, mwemwe mwaghamaputila. Munu iyokala mghati mwangu na nene nikale mghati mwake, ayo katsakweleka matunda mengi ng'ani; kwaapfila bila nene mwemwe mliyeka ng'amdaha kutenda chinu chochose baye. 6Mnu wowose yang'okala mghati mwangu, kakwasighwa kunze kulonga putila, na lyonyala. Ghamaputila agho ghokungighwa na iwanu, ghakwasighwa mmoto, gholakatsighwa. 7Mng'akala mghati mwangu, na usenga wangu ung'akala mghati mwenu, mlombe chinu chochose chambama, namwe mtsokwing'ighwa. 8Apfo Aba wangu kotunyighwa kwa apfila mwakweleka matunda mengi, namwe mtsakuwa ghendo wanafunzi wangu. 9Kama apfila Aba pfaayanikundile nene, pfipfo na nene pfaniwakundile mwemwe, apfo lelo mkale mna ukukundighwa ako na nene. 10Mng'aghakinda ghamalaghitso ghangu, mtsokala mna ukukundighwa na nene, kama apfila nene pfanighakindile ghamalaghitso gha Aba wangu na kukala mna ukukundighwa na yeye.
11“Aghano nimlongelani ili indeng'elelo yangu ikale mghati mwenu, na indeng'elelo yenu iwe ng'ulu. 12Alino lilyo lilaghitso lyangu, mwikunde kama apfila nene pfaniwakundile mwemwe. 13Kuduhu munu yaana upendo mkulu kubita auno, wa imunu kuulapfa ugima wake kwaajili ya mbwigha tsake. 14Mwemwe mwa mbwigha tsangu mng'atenda aghala ghaniwalaghitsa. 15Siwakema keli mwemwe watumwa baye, kwaapfila imtumwa ng'omanya baye chayotenda imtwatsa wake. Lekeni mwemwe nowakema mbwigha tsangu, kwaapfila ghose ghanihulike kwa Aba wangu nimlongelani. 16Si mwemwe baye yamnisaghule, ila nene yanimsaghuleni, na niweka mghende mkeleke matunda, na ghamatunda ghenu ghaleke kuhupa; ili cho chose chamumlomba Baba kwa litaghwa lyangu yamwing'eni. 17Lelo nomlaghitsani, Mwikunde.
Isi yowehila Iwanafunzi
18“Iwanu wa isi wang'awehilani, mmanye kuwa tsawalongola kunyihila nene. 19Tsamng'awile wanu wa isi aino, iwanu wa isi wang'amkundileni kama iwanu wake. Lekeni kwaapfila mwemwe si wa isi aino baye, ila nene nimsaghulani mghati mwa iwanu wa isi aino. Kwaajili ayo iwanu wa isi womwihilani. 20Mkumbuke chaniwalongele, ‘Imtumwa si mkulu kubita imtwatsa wake baye.’ Kama wanidununza nene, namwe pfipfila watsomdununzani. Wang'aghakinda ghamalangulitso ghangu, pfipfila watsoghakinda ghamalangulitso ghenu. 21Watsowatendela aghano ghose kwaajili ya litaghwa lyangu, kwaapfila ng'awammanyile baye ayula iyanitumile. 22Tsakama sitsile na kulonga nawo, ng'awabamie kuwa na nzambi baye, lekeni sambi ng'awodaha kwiyamila baye kwa inzambi yawo. 23Imunu iyonyihila nene, pfipfila komwihila na Aba wangu. 24Tsa ana sitendile sang'ano kuna wawo ng'ana tsitendighwe na munu yungi, ng'awabamile kuwa na nzambi baye. Lekeni sambi watwona, nene na Aba wangu, na watwihila wose. 25Lekeni ilawila apfino kutimitsa imbuli iyandikighwe mna Ghamalaghitso ghawo: ‘Wanyihila hela.’
26“Lekeni hayatsakutsa Imwapfitsi, ayula yanitsomghalilani kulawa kwa Baba, ayo Iloho wa kweli iyolawa kwa Baba, yeye katsakuwa mkalangama wangu. 27Pfipfila namwe mwawakalangama wangu, kwaapfila mkala na nene kulawa mwanduso.
S'ha seleccionat:
Yohane 15: LBV
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió