Maako 16
16
Jeso Wabuka ku Bafwu
(Matayo 28:1-8; Luka 24:1-12; Johani 20:1-10)
1Inzho nibwakaita buzuba bwa Sabata, Maliya waku Magadala, u Maliya baina Jemusi u Salome bakaula mafwuta aanunka kalonze kwaamba bakananike mutunta wa Jeso. 2Cifwumo fwumo mu buzuba butaanzhi bwa nsunda, mbulyakapasulila bulyo izuba, bakaya ku cuumbwe. 3Nibaakuya munzhila, kabaya bubuzhanya ati, “No nguni ukakatukunkulushizha ibwe ku mulyango wa cuumbwe?” Nkaambo kalili ikando cini cini. 4Inzho nibakasansula menso bakabona ati ibwe ndikunkulushe kale. 5Bakenjila mu cuumbwe bayana mukubushi ulishite kucilyo, ulisamine cikobelo cituba buu, ubobo bakakankamana cini cini.
6Mukubushi wezo wakabaambila ati, “Mutatiyi. Ndizhi ati mulakapula Jeso waku Nanzaleta, wezo ngubaakankamina a ciciinkano. Temo mono wabuka. Amulange ngaawa ngubaa kumoonecele. 7#Mat 26:32; Mk 14:28Inzho kamuya mukabashimwine ba shiciiya bakwe antoomwi u Pita ati, ‘Wasolola kuya ku Galilaya nkumukakoombonena, mbubona mbwaakamwaambila!’ ”
8Ngoonaawo bakahwa mu cuumbwe, balukanka kaambo bakatiya ukuzoowa cini cini.
Jeso walibonya kwa Maliya waku Magadala
(Matayo 28:9-10; Johani 20:11-18)
9Mu buzuba butaanzhi bwa nsunda cifwumo fwumo, Jeso naakabuka ku bafwu, wakataanguna kulibonya kwa Maliya waku Magadala, wezu ngumukaintu ngwaakakusha myoza mibiyabi iili ciloba. 10Ngoonaawo Maliya wakaya kushimwina babo mbucaakukala aze Jeso, koko nkubakaakuungumene balalila. 11Pele balo nibakateelela ati Jeso wabuka ku bafwu, ulimwi u kwaamba ati Maliya wamubona, bayina nibakaashoma makani aza.
Jeso Walibonya ku Bashiciiya Bobile
(Luka 24:13-35)
12Kuhwaawo Jeso wakalibonya mucimo ca mushobo unji ku bashiciiya bobile bakaakuya bweenda munzhila iiya kumatungu. 13Abo baba bakakananina banamaleya, pele bayina nibakabashoma pe.
Jeso Walibonya ku Bashiciiya bali Ikumi Uutwesha Womwi
(Matayo 28:1-20; Luka 24:36-49; Johani 20:19-23; Incito 1:6-8)
14Munshi wakeza kulibonya ku bashiciiya bali ikumi uutwesha womwi ciindi nibakaakulya. Jeso wakabatapatila ukaambo kakuzuluzha kwabo, ukutashoma babo bakamubona kaambo kakuzuma myonzo. 15#Inc 1:8Inzho wakabaambila ati, “Kamuya mu luundu loonse, mukakambauke Makani Mabotu ku bantu bamishobo yoonse. 16Wezo ukaashoma u kupapatizwa, ulaafwutuka, pele wezo uutakaashomi ulakazulwa. 17Shitondezho sheshi shilakalibonya ku bashomi, balakatanda myoza mibiyabi mwizhina lyangu, balakacilozha kwaamba mishobo yaandeene andeene. 18Balakabweza bazoka u matashi, nibakaanwa cikola cili buti, tacikabakoli. Bakabika matashi abo abalwazhi, balakapona.”
Jeso Watolwa Mwizeulu
(Luka 24:50-53; Incito 1:9-11)
19 #
Inc 1:9-11
Inzho Mwami Jeso amane kubaambila bobo, wakatolwa kwizeulu, waya kukala kwitashi lya Leza lya cilyo. 20Inzho batumwa bakaya balaya bukambauka koonse koonse, u Mwami Jeso kali abo kaya bubazumya zumya mu milimo yabo, ukuzuzukizha makani kwiita mu shitondezho.
S'ha seleccionat:
Maako 16: ILL
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Ila New Testament © Bible Society of Zambia, 2015.