Rômiunut 5
5
Okpernikut idluarsititaumajut ilinganingat piloringnartoᴋ. Adamelo Kristuselo.
1Tagva okpernermut idluarsititaugapta, Gûdemut ulapirsauteᴋarpogut Nâlegaptigut Jêsuse Kristusikut.
2Tâpsomûnalo okpernermut apᴋotiksarsigapta saimanermut (nâpkigijaunermut) tamattomunga pigijaptingnut, nertôtivoguttauᴋ nerriungneᴋarnermik pinnarnartoᴋsoarmik, Gûdib tunijomârtanganik (okpertunut.)
3Taimaituinangilarle, kapianarnerille aglât nertôtigivavut; ᴋaujimagapta kapianarnerit ᴋenuersârtitsingmatta;
4Kenuersârnerle ôksimanermik ᴋaitsivoᴋ, ôksimanerle nerriungnermik ᴋaitsivoᴋ;
5Nerriungnerle kangusuktitsiniangilaᴋ. Gûdib naglingninga kovimangmat ômatiptingnut, Anernermut ajunginermut tunergusiarijaptingnut.
6Ajulidlalaurapta taipsomane, Kristusib naliutitsiartome toᴋotigivâtigut ajortoliksôtiluta.
7Idluartorle pivlugo toᴋojomajoᴋarajangilaᴋ; ajungitulivigijine pivlugo toᴋojomajoᴋarajaralloarune.
8Taimaimat Gûdib naglingnine uvaptingnik nalonaijarpâ, Kristuse pivluta toᴋolaungmat, sulle ajortoᴋsôtiluta.
9Mâna tâpsoma aunganut idluarsititaumagapta, anginersamik tagva piulijigijomârpavut ningautsemit.
10Gûdemut ulapirsarsimagapta Erningata toᴋunganut, sulle ômisuktiluta, anginersamik tagva piulijaujomârpogut inôsinganut, mâna ulapirsartaugapta.
11Tamannale kissimeungitoᴋ, nertôtivogulletauᴋ Gûdeme, Nâlegaptigut Jêsuse Kristusikut, tâpsomûna mâna ulapirsaumik tunitsiviogapta.
12Taimaimat sorlo ajorneᴋ silaᴋsoarmut tikingmat inungmut atautsemut, toᴋolo ajornermut, taimaglo toᴋo inungnut tamainut kiblemangmat, ilûnatik idluitulilaungmatta.
13(Ajorneᴋ silaᴋsoarmêgalloarpoᴋ perᴋojaᴋarᴋârtinago; perᴋojaᴋangitunele ajorneᴋ issumagijaungilaᴋ.
14Toᴋole Adamemit Môsese tikidlugo ataniotivoᴋ taipkonungatauᴋ idluitulilaungitunut Adamib idluituliningatut; tâmna (Adame) tagva tikituksab (Kristusib) adsingoanga.
15Idluitulinerle tunergullo saimanartoᴋ adsigêngilâk. Unuktut toᴋungmatta atautsib idluitulininganut, anginersamik unuktut Gûdib saimarsautâniglo tunergutâniglo pititaumaluarput, inûb atautsib Jêsusib Kristusib saimarsautânut.
16Sorlo idluitulinerub atautsib maliktingatut tunergut ilingangilaᴋ, atautsib idluitulijub idluitulininganut atautsemut ilûnaita asserortitaungmatta: Pidlaraksangortitauneᴋ idluitulinermit atautsemit pingmat; tunergulle saimanartoᴋ ajornernit unuktunit piuliklerpoᴋ idluarsititaunermut.
17Atautsib idluitulininganut toᴋo ataniotilaungmat atauseᴋ pivlugo; tunergumik saimanartoᴋsoarmik illangiutijut idluarsititauvlutik anginersavaksôjomik ataniotiniarput inôniarlutik atausiojokut Jêsuse Kristusikut)
18Taimaimat, sorlo atautsib idluitulininganut sutainartoᴋ inungnut tamainut pingmat, taimaktauᴋ atautsib idluarninganut inuit ilûnaita idluarsititaulerput inôniarlutik.
19Sorlo inûb atautsib nâlangininganut unuktut ajorneᴋartitaulermatta, taimaktauᴋ atautsib nâlangninganut unuktut idluarsititaulerput.
20Perᴋojalle illautitaulerput, idluitulinerub angininga nalonaititauluarᴋovlugo. Ajorneruble anginingata nalonaititauviane saimanerub anginersauninga nalonaititaumaluarpoᴋ;
21Sorlo ajorneᴋ ataniotilaungmat toᴋokut, taimaktauᴋ saimaneᴋ atanioterᴋovlugo idluarsititsinikut inôtsemut nâksaungitomut (pititsivlune), Jêsuse Kristusikut Nâlegaptigut.
S'ha seleccionat:
Rômiunut 5: LIHB08
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Labrador Inuttitut Heritage Bible © Canadian Bible Society, 2008.