Apostelit Piniarningit 25
25
Atanivingmut pititaujomagame Paulusib oᴋarninganik. Saᴋᴋijârtitauninganik Agrippasemut.
1Festusele nunamut tamattomunga (Jûdêamut) tikisimagame, uvlut pingasut kingorngatigut Zesarêamit majorarpok Jerusalemut.
2Tagva ajoᴋertuijoksuit Jûdillo angajoᴋângita tikipât, Pauluse pivlugo tuksiarvigivât.
3Kenuvigivlugolo tusartaujomavlutik taimna pivlugo, ᴋaiᴋojerᴋovlugo taipsominga Jerusalemut, pinasuarpâllo apᴋome ingergatilugo toᴋotsomavlugo.
4Tagva Fêstuse kiovok, Pauluse udjertortauniarmat Zesarêame, nangminerlo mânakut taunungarniarmigame.
5Ilapse nalît mâna, oᴋarpok, sapingitut, taunungaᴋattaulit, angullo taimna uneᴋsiornerlôtigilitsuk, idluitomik pilaukpat.
6Tâpkonanele uvlunit 10 init ununersanik uvlerᴋârlune, Zesarêamut atersârpok, uvlublo aipangane kiglisiniarviub iksivautanganut ingilerpok, Pauluselo aijauᴋovâ.
7Tâmnale tikingmat, Jûdit Jerusalemit atersâlauktut ilumavât, pasiklerlutiglo unuktunik oᴋumaitoksoarniglo Paulusemut, tangeᴋangigalloartunik.
8Imâgle akiorvigivait: Idluitomik pilaungilanga Jûdit perᴋojanginullônêt, katimaviksoarmullônêt, atanivingmullônêt.
9Festusible nertortaujomavlune Jûdinut, Pauluse kiovâ oᴋarlunelo: Jerusalemut pijomavêt, taikane erᴋartortaujomavlutit uvamnut tamakkoa pivlugît?
10Paulusele oᴋarpok: Ataniviksûb kiglisiniarvingata sânganut pijuksauvunga, tagvane kiglisiniartaujariaᴋarpunga; Jûdinut idluitomik pilaunginama, sorlo igvit nangminek ᴋaujimatsiaramga.
11Idluitulilaurumale, toᴋotaujutiksamiglonêt pilauruma, ᴋunulungilanga toᴋotaulunga; pasiklerutingille uvamnik sulilungipatta, tâpkonunga tunijaujungnangitunga; atanivingmut pijomavunga.
12Tagva Festusib kiglisiniartut oᴋaᴋatigilauᴋârdlugit kiovâ: Atanivingmut pijomagavit, atanivingmut piniarpotit.
13Uvlut ilangit nângmatta atanek Agrippase Bernizelo Zesarêamut pivuk, Festuse takorngiordlugo.
14Uvluniglo unuktunik tagvanêngmanik, Festusib atanek unipkaupâ Paulusemik, oᴋarlunelo: Angut ovanepok Fêliksib ᴋemaktanga ᴋelaksorsimajok.
15Jerusalemêtilunga ajoᴋertuijoksuit Jûdillo angajoᴋângita unersiornerlôtigijartorpât uvamnut, ᴋenuvlutik, erᴋartortauᴋovlugo.
16Taipkoa kiovakka: Rômiut iluseᴋangilat, inuk toᴋotaunermut pitilugo, pasijaujok akiorungnarᴋârtinago pasijaunine pivlugo pasijime takoane.
17Tamaungale tâpkoa pingmatta, nokᴋalaungilanga, ᴋaungmallo kiglisiniarviub iksivautanganut ingipunga, angullo tâmna aijauᴋolaukpara.
18Pasiklertulle ilumagamitsuk, tâpsomunga ilingajomik patsitiksaᴋangilat pijariaᴋarasugijamnik.
19Aperᴋuteᴋarpulle tâpsomunga okpernikullungminik, toᴋungajomiglo Jêsusemigôk, Paulusib ômartomik oᴋautigijanganik.
20Aperᴋutingalle tamanna tukisinginapko, aperivara, Jerusalemut aijomamangât, taikanelo erᴋartortaujomavlune tamattominga.
21Paulusele ataniviksûb oᴋausinga nâlegomagamiuk oᴋarmat, tagvanêᴋovara, atanivingmut pititsomavlugo.
22Agrippasele Festusemut oᴋarpok: Angut tâmna nangminek tusaromavara. Oᴋarporle: Kaupat tusarniarpat.
23Uvluble aipangane Agrippase Bernizelo tikingmanik ânanausavaksoadlarlutik, kiglisiniarvingmut iterput, aulatsijut, angajoᴋaunerojullo iglugasaksoarne ilagivlugit. Festuselo perᴋojingmat, Pauluse aijauvok.
24Festuselo oᴋarpok: Atanek Agrippase, angutaujoselo ilipse ilûnase, ovane uvaptingnut ilaujose, tagga tâmna takovase, Judit ilûnatik oᴋautigijangat uvamnut, Jerusalemelo mânelo, nipliadlarlutik, inôjungnaituksaujok.
25Uvangale tukisilerapko, toᴋotaujutiksamik pilaungimat, nangminerlotauk atanivingmut pijomangmat, isumasivunga tilijomavlugo.
26Atanivingmulle sumik tukilingmik aglagutiksaᴋanginama tâmna pivlugo; ilipsingnut sakᴋertauᴋovara, ilingnulle piluartomik ataneᴋ Agrippase! (tusartauᴋovlugo) Aglagutiksaᴋaromavlunga kiglisiniartauᴋârtilugo.
27Tamanna idluarasuginginapko ᴋelaksorimajok âtautilugo, paisijauningalo tainago.
S'ha seleccionat:
Apostelit Piniarningit 25: LIHB08
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Labrador Inuttitut Heritage Bible © Canadian Bible Society, 2008.