Apostelit Piniarningit 23
23
Paulusib kiglisiniartauninganik Judit aulatsijoᴋotinginut. Tilikliutigijauninganiglo Zesarêamut.
1Paulusible kiglisiniartut takonârpait oᴋarlunelo: Ilipse angutit ᴋatangutigêt, idluartomik isumaᴋarlunga Gûdib sângane arvertalaukpunga, uvlok tamanna tikidlugo.
2Ajoᴋertuinerojuble Ananîasib ᴋaneroktauᴋovâ sanianêtunut.
3Tagva Paulusib oᴋautivâ: Gûdib annaulidlaromârpâtit, ᴋarmaujotit mingoarsimajok: perᴋojat maliklugit iksivavlutit erᴋartorpingâ? perᴋojallo nâlangnagit ᴋaneroᴋtauᴋovingâ?
4Nangertulle saniane oᴋarput: Gûdib ajoᴋertuinerojunga suadlarpiûk?
5Pauluselo oᴋarpok: Nagliktakka ᴋatangutiget, ᴋaujimalaungilara ajoᴋertuinerongmangât. Aglaksimangmat: Inuᴋotivit angajoᴋauneroninganut oᴋauserluktuksaungilatit.
6Paulusible ᴋaujimagamigit, ilangit Saduzêeriongmatta, ilangillo Farisêeriongmatta, niplialerpok kiglisiniartut akorngane. Ilipse angutit ᴋatangutigêt, Farisêeriovunga, Farisêeriblo ernerivanga; erᴋartortauvunga nerriukama toᴋungajut makitsomârninginik.
7Taimagle oᴋarmat, Farisêerillo Saduzêerillo akerartulerput, inugiartoksuillo maggoilivut.
8Saduzêerit makiviksaᴋangitomik, engeleᴋangitomiglo anerneᴋangitomiglo oᴋarmatta; Farisêerille tamangnik kigligiutjivut.
9Nipliajoksôlerput tagva; aglangniglo ilisimajut Farisêerekunit nikovidlutik akerartulerpait, oᴋarlutiglo: Inungme tâpsomane idluitomik nagvângilagut, anernerille engelillônêt ilangata oᴋarviginerpago, akerartorungnangilagut Gûdemut.
10Angijomik pikablâdlalermatta, angajoᴋâviksoak sivorâlerpok, Pauluse aliktortauniarasugilugo tâpkonunga, sorsuktuksallo atersârᴋovait, aᴋsârnigauᴋolâllo tâpkonangat, pitilugolo sorsuktuksat igloᴋarvinganut.
11Uvluble aipangane unnuame Nâlegak Paulusib saniane nangerpok, oᴋarlunelo: Pauluse manigorit; sorlo Jerusaleme kigligiutsilauravit uvamnik, taimaktuak kigligiutsijariaᴋarivotit Rômeme.
12Kaulermalle Jûdit ilangit katilerput, angeᴋatigêlerlutiglo nerrijomanginermik imeromanginermiglo Paulusemik toᴋotsilauᴋâratik.
13Taipkoale taimaitomik angerᴋatigêktut ununersaulaukput 40 nit.
14Tâpkoa ajoᴋertuijoksoarnut angajoᴋânullo oᴋariartorput: Soᴋoserungnangitomik angeᴋatigêlaukpogut êsijomanata sumiglônêt Paulusemik toᴋotserᴋârtinata.
15Mânna tagga kiglisiniartut ilagilugit angajoᴋâviksoarmut oᴋaritse, ᴋaupat taimna âtautitserᴋovlugo (Paulusemik) ilipsingnut, sorlo piluartomik kiglisiniaromavlugo, uvagulle opalungairsimavogut toᴋotsomavlugo tikerᴋârtinago ilipsingnut.
16Paulusible ujorungata kajusimaneᴋ tamanna tusaramiuk, parngnailerpok, ailunelo sorsuktuksat igloᴋarvinganut oᴋautigivâlo Paulusemut.
17Paulusible angajoᴋât ilangat ᴋaiᴋovâ oᴋautilâllo: Inôsuktoᴋ una pititsuk angajoᴋâviksoarmut, oᴋausiksaᴋarmat tâpsomunga.
18Tâpsoma tagva naksarpâ pitilâllo angajoᴋâviksoarmut oᴋarlunelo: Paulusib ᴋelaksorsimajub ᴋaiᴋovânga, ᴋenuvigivlungalo, inôsuktoᴋ una ilingnut pitilugo, oᴋausiksaᴋarmat ilingnut.
19Angajoᴋâviksûb tagva aggangitigut tiguvâ, iglerterupâlo, aperivâlo: Sumik oᴋautsomavingâ?
20Oᴋarporle: Jûdit kajusimavut tuksiarvigijomavlutit, ᴋaupat Paulusemik âtauᴋojerᴋovlutit kiglisiniartut sânganut, sorlo piluartomik kiglisiniaromavlugo.
21Igville nâlangniarnagit, taipkoa akorngane anguteᴋarmat ununersanik 40 nit, tâpsominga pinasuartunik, taipkoa angeᴋatigêlaukput nerrijomanginermik imeromanginermiglo, Paulusemik toᴋotsilauᴋâratik, mânalo opalungairsimavut, utaᴋivlutiglo angerniarnernik.
22Tagva angajoᴋâviksûb inôsuktok aularᴋolerpâ, perᴋolâllo, inungmut atautsemullônêt oᴋarᴋonago, tamattominga nalojungaitinamiuk.
23Angajoᴋângniglo maggungnik ᴋaiᴋojivok, oᴋautivlugiglo: Sorsuktuksanik 200 inik opalungaijaitikik, stundeme 3 me unnuame, Zesarêamut aijuksanik, horsitalingniglo 70 nik, pitiksilingniglo 200 inik;
24Nergjutsoarmiktauk Paulusib atoraksanganik âdlugolo saputijaulerlune Fêliksemut atanerusermut.
25Aglakkivok taipsomunga imâk:
26Klaudiusib Lîsiasib ᴋuviasuᴋovâ atanerusek nakornerpângojok Fêlikse!
27Angut una Jûdit tigulaukpât, taipkonungalo toᴋotaukasalaukpok, uvangale sorsuktuksat ilagivlugit aᴋsâriartorpakka tâpsominga, Rômiôjok tukisilerapko.
28Patsitiksanginik tussaromagama, kiglisiniarvinganut âlauᴋpara.
29Sunaubva tukkisivunga, perᴋojanginik apersûtit pivlugit pasijaungmat; patsitiksaᴋangilarle ômunga toᴋotaujutiksamik ᴋelaksortautiksamiglônêt.
30Tusaumaleramalo, Jûdit ilangita angigutjivlutik pinasuarmatsuk tokotsomavlugo, katsungailunga ilingnut tilikliutivara, pasiklertuttauk oᴋarᴋolaukpakka sângne, sumik patsitiksaᴋarmangâta tâpsomunga. Inôtsiarpagit!
31Sorsuktuksat tagva, sorlo perᴋojaungamik, Pauluse tiguvât, aularutivâllo Antipâtrisemut unnuame.
32Kaungmalle aiᴋolerpait horsitalit sorsuktuksat, (nangminerle) uterput sorsuktuksat igloᴋarvinganut.
33Taipkoale Zesarêamut pigamik, aglait tunivait atanerusermut, Pauluselotauk sakᴋertipât tâpsomunga.
34Atanerusiub aglait atuaramigit, apersorpok, nunat nalianit pingmangât? Tusaramelo, Zilîziamit pingmat, oᴋarpok:
35Kiglisiniaromavagit, pasiklertut ilingnik tamaunga pingmikpatta. Itertitauᴋovâlo Herôdesib igloksoanganut kiglisiniarviojomut.
S'ha seleccionat:
Apostelit Piniarningit 23: LIHB08
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Labrador Inuttitut Heritage Bible © Canadian Bible Society, 2008.