Apostelit Piniarningit 17
17
Paulusib oᴋâlaninganik Tessalonikame, Berêame Atênemelo.
1Amfipolis apᴋotigigamikko Apolônialo, Tessalônikamut pivuk; tagvane Jûdit katimaveᴋalaukput.
2Paulusib itervigivait ilusimitut, oᴋâlavigivlugillo Sabattine pingasune aglait atuarlugit.
3Tukeᴋartipaillo tâpkonunga, unertuivlune Kristusemik âniatitaujariaᴋalauktomik, toᴋungajunillo makitsariaᴋalauktomik; Jêsuselo tâmna (oᴋarpok) oᴋautigijara, Kristuseongmat.
4Ilangillo okpilerput, Pauluse Silaselo ilagilerdlugik; Grîkittauᴋ Gûdemik nâlektut unudlalauᴋput, arnattauk angajoᴋaunersat ikitôlungitut.
5Jûdille okpingitut ningarosulerput, angutillo ilangit iluluktoksuit kassêtut ingmingnut katitipait, ileratsâdlarᴋovlugit pikablâtilaitalo iglugasaksoarmiut, Jasonib iglungata silatânut pivut, pinasuarpullo tâpkoa âtsomavlugik inuit akornganut.
6Naninginamikigle, Jason okpertullo ilangit aularupait iglugasaksuit angajoᴋânginut nipliadlarlutiglo: Inûk ipkua silaksûb inunginik tamainik asserorterijuk tamaungarivuk.
7Tâpkoa Jasonib ingminut itertilaukpak; tâpkoalo ilûnatik ataniviksûb perᴋojangit malingilait, oᴋarlutik taipsoma asiagôᴋ ataniviongmat, Jêsusegôk.
8Uimajârtidlarpaille inuit, iglugasaksuillo angajoᴋângit, tamattominga tusartut.
9Jasoniblo ilagijangitalo akiorningit tusaramigit, aularᴋovait.
10Unnuamele ᴋatangutigêt Pauluse Silaselo erinesârdlugik aulartipakit Berêamut. Tagvunga pigamik, Jûdit katimavinganut iterpuk.
11Tâpkoa ajunginerojut Tessalônikamiunit; oᴋautsillo ilaliorpait ᴋunutuidlutik, uvlullo tamaita atuarpait ᴋenerdlutik taimaingmangâta (Paulusib oᴋausingititut).
12Tâpkonangat unuktut tagva okpilerput, ikitôngituttauk Grîkit angajoᴋaunersat angutillo arnallo.
13Jûdille Tessalônikamiut tusaumaleramik, Gûdib oᴋausingit Berêametauk oᴋâlatigijaungmatta Paulusemut, ᴋaivut, tagvanelotauk inuit pikablâtilugit.
14Katangutigêlle tagva tuavidlutik Pauluse aulartipât, imânut ailerᴋovlugo, Silasele Timôteuselo tagvanêlerpuk.
15Paulusible ᴋanilârtingita âpât Atênemut. Oᴋarᴋongmagillo Silasemut Timôteusemullo, tuavilutik tikerᴋovlugik tâpsomunga, utilerivut.
16Atênemele Paulusib utaᴋileramigik, ilungertudlalerpok anernermigut, iglugasaksoarmiut tautugamigit Gûdeungitunik angijomik nâlektut.
17katimavingmelo Jûdit Gûdemiglo nâlektut oᴋâlavigigalloarpait, niuvervingnelo uvlut tamaita tagvunga pijut.
18Epikurêerillo ilangit Stoikerillo Filosôfit (ilisimaneksiortit) akkerartorpât; ilangillo oᴋarput: Kaneᴋadlartok una ᴋanok oᴋauseᴋarᴋâ? Ilangille oᴋarivut: Sorlo Gûdinik takorngartanik oᴋâlajomajok; oᴋautsinik tusarnertunik Jêsusemik makitoᴋaromârtomiglo oᴋautilaungmagit.
19Tiguvâllo, kiglisiniarvingmullo âpât oᴋarlutiglo: Tukisititaujungnaralloarpitâ ajoᴋertûtsemik nutâmik ajoᴋertûserijarnîk?
20Siutiptingnut tusarngartanik pigavit; tagva tusaromadlarpogut tamattominga, ᴋanok tukeᴋarmangât.
21Atênemiulle ilûnatik, takorngartattauk tagvanêtut, nutânik kisênik oᴋauseᴋaromavlutik tusaromavlutiglo kajungilâlaukput.
22Paulusele kiglisiniarviub ᴋerᴋane nangerpok oᴋarlunelo: Ilipse angutit Atênemiojose, tukisilerpapse ilûnaine okperluluadlarapse Gûdeungitunik.
23Tamâne arvertarama, tuksiarvise nautsertulaukpakka, Altârelo naipipara aglalik imâk: Gûdemut nalonartomut. Tuksiarvigijase tâmna nalojase oᴋautigivara mâna ilipsingnut.
24Gûde silaksoarmik pingortitsijok pinginiglo tamainik, Nâlegaugame ᴋilangmullo nunamullo, katimaviksoarne aggangnut sanamajune iniᴋangilaᴋ;
25Inuit agganginuttauk kivgartortaujariaᴋangilak, sumik ajoᴋsartotut; nangminek tamaita inôtingmagit anerneᴋalertilaitalo, piksanginiglo tamainik tunitjivigingmagit.
26Inugasaksuillo kinguvângoᴋatigêt tamaita pingortilaukpait aungmit atautsemit, nunaksoak ilûnât inuᴋalertilugo, sivorngagullo isumasimatigivait naliuningita sivitujariangit, ᴋanorlo ᴋaningitigijomut nunaᴋariangit;
27Nâlekamik ᴋeneriarᴋovlugit, misigilermangârmitsuk nagvârmangârmitsuglo; ungasingigalloarmatigut tamapta:
28Tâpsomane inôgapta aulavlutalo ipogut; taimaktauk oᴋarivut imgerusiortit ilangit ilipsingnêtut: Tâpsoma ilagivâtigut.
29Tagva ilaᴋarapta Gûdemik, isumajuksaungilagut Gûdioniub adsingingmago inungoak goldeojok, silbereojorlônêt, ujaraujorlônêt, inub isumaminut sanajanga.
30Naliutune inuit nalojôtilugit Gûdib kamagingitsertulaukpait; mânale inuit ilûnaita nunalingne tamaine ᴋaᴋialerᴋovait;
31Uvlormik taisimalaurame, silaksoarmiunik idluarsaivlune erᴋartuijomârvingminik angutikut piniarᴋojamigut, ilûnaita okpertitsomavlugit, toᴋungajunit tupaktinamiuk.
32Toᴋungajunit makinermik tusaramik, ilangit mitauteᴋarput, ilangille oᴋarput: Tamattominga ama tusaromavaptigit.
33Paulusib tâva ᴋemakpait.
34Angutille ilangita najugarivât, okpilerlutiglo; taipkoa ilangat Dionîsiuse, kiglisiniarpaktut ilangat, arnarlo Damarisemik atilik; asingitalo ilagivait.
S'ha seleccionat:
Apostelit Piniarningit 17: LIHB08
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Labrador Inuttitut Heritage Bible © Canadian Bible Society, 2008.