Éxodo 17
17
Entsa muchignumia jiinkimu
1Yuus nunii wetarum tinu asamtai, Sinnumia jiinkiar aya nugkanmag we wenakua, Refidim tutainam jeawar pujusaru ainawai. Turasha nuigka entsa atsau. 2Tuma asamtai umartin entsa sukartusta tusar Moisésan pegkerchau chicharaina. Tuinakai nitan chicharuk: Winaka entsa umartin sukartusta tusarmeka pegkerchauka chichartumain ainatsrume. ¿Atumka Yuuska inka yainmamainchauk enentaimtarum?, tusa tinaiti. 3Takaisha senchi kitamaina asar, Moisésan chicharainak: ¿Ii ainatika ina uchiri, tura ina tagkuri ainajaimak kitakai ashi jinati tusamek Egipto nugkanam pujarin jiikratkimam? tusar tiaruiti. 4Tuinakai Moisés Yuusan aujeak: Apuru, shuar kitamainak seatainawai, tumaina asarmatai warina susartataj nu turutta. Shuar aina ishichik arusarka kayajai tukuriar mantuawartatui, tusa tinaiti. 5Tama Yuus Moisésan chicharuk: Entsa awatim numpa amajsamiam nu ushukrutairam jukim, amee shuar ainan apuri yaruakam wetá. 6Wika nain Sinaí Horeb tutainum muchig a nui nakattajme, tusa tinaiti. Tusa tutai israelita ainan apurin yaruak wuwaiti. Tuma muchig amaunam jeaa nita emtin ushukrutairijai muchigkin awatnaiti. Turam entsa jiinmatai shuar aina ashi umararuiti.#1Co 10.3-6 7Nu nugkanka Meribá tu anaikaruiti.#17.7 Meribá ta nuka israelita aina entsa sukartusta tusar pegkerchau chichakaru ainawai taku tawai. Tura nuiyasha Masá tu anaikaru ainawai.#17.7 Masá ta nuka israelita aina Yuus nina senchirijai kuitammaitak Yuuska inka kuitamramtsuji tusar tiaru ainawai taku tawai.
Israelita aina amalecita ainajai maanikmau
8Israelita aina Refidim nugkanam pujuinai amalecita aina nitajai maaniattsa jeawaruiti. 9Tumawarmatai Moisés Josuén chicharuk: Shuar aina etegkram amalecita ainajai maaniattsam kashin káshikmasam wetá. Antsu wika ushukrutain Yuus surusua nuna jukin, nain wakan takusan wajastatjai, tusa Moisés tinaiti. 10Tusa timau asa Josué shuar ainan etegkar, amalecita ainajai maaniattsa wenakai, Moiséska Aarónjai, tura Hurjaimak wear muranam wakaruiti. 11Tuma kunturin takui wajakaigka israelita aina, amalecita ainan nepetaina. Antsu Moisés yaweki kunturin nenamtaigka amalecita aina, nitan nepetaina. 12Moisés kunturin takui wajau asa yaweakai Aarón Hurjai kayanam ekentsaruiti. Turawar uwejnum akantsag achikar wajasaruiti. Turamu asa Moisés kunturin nenatsuk etsan akatmaknaiti. 13Tuma asamtai Josué amalecita ainan nepetkauwaiti. 14Turamtai Yuus Moisésan chicharuk: Israelita aina, amalecita ainajai yamai maanikara nu pachisam atak aneartin chikichik papiinum aarta. Amalecita ainanka ashi ijinattajai. 15Tusa timatai Moisés tagku aina maa patasa epetain najanawaiti. Nuna tura umik Yuuska ina shuarin nepetak ayamturmauwaitji, tu anaikauwaiti. 16Tura chichaak: Yuus ina shuarin nepetturmauwa nu amalecita ainanka tura nita weantu ainajaigka tuke maaniske atinaiti, tusa tinaiti.
S'ha seleccionat:
Éxodo 17: hubDBL
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2010, Wycliffe Bible Translators, Inc. All rights reserved.