ROMA 12
12
Mauri suria na obaniha iana God
1Hoita, goaku igê na tongesuriha, renia God ki takuigia ngavê, inê be kanukanugamu vikê: mu tagarenigamu maremi manga na vogasiha tanga God, ma igê na mêrihami hagenani mu tagara koro tanga God, ma kamu hagakoro obana. Na morana na hagarahenga kani ikê: i tuguhigamu, vi gamu tanua. 2Siana ka arâ na bâhanami surigi na tauhata na enoni, ga pe tongesuri, ma kamu hagamarumungenia hete God, ki urisigi na aitangihami, hanana na parongami ka arâ getea hagetage tenia i nago. Manga ngekana, hanana mu page giraragi na obaniha iana God, ma na ta ki koro, ma na ta ki hagakoro obana God, ma na ta ki arari ngavê.
3Hoi, suria God ki mahata tangê, inê be vi tangagamu, igamu hato: Siana kamu hagarahasigamu maremi. Mu takotako maninga. Mu maresuria nga, ma kamu haritagi. Na ara ni hitangimi ki tuguhia, i suria so marena suria na tongesuriha, God i bani vatea renia. 4Na apena na enoni ki gi tage ma, ma ki nahunigi rako na agua, ga nahunigi na tagaraha, ga râ hegitigi. 5I tagenana ma tangagia igia. Henaka vi igia ka rako, ma igia ki na haku gi tage, ga obahaku henia o Kirisito, ma igia ka heratorato igê na haku gi tage mangagi na agua i na apena gi tage na enoni, ga heratorato. 6Igia hato ka nahunigi hegitigi na votovoto, ga tora hegitigi. I tuguhigia, ga hagatagarahigi na mahatanga iana God ngegê suria na tarana, God i obania. Manga vi igia, ma ka nahunia na votovoto, ga tarohenia na tamasinga iana God, ki tuguhigia, vi ga tarohenia suria na tongesuriha iaka. 7Manga vi igia, ma ka nahunia na votovoto ni hagesuringa, ki tuguhigia, ga hagesurira na ani getera. 8Manga vi igia, ma ka nahunia na votovoto, ga kanukanura na enoni getera, ki tuguhigia, ga kanukanura. Na enoni, i nahunia ta na marâ, ma ki metongani râ ta na enoni, ki tuguhia, i mahata. Na enoni, i araha, ki tuguhia, i tagara ramo. Na enoni, i korokoro tangara na ani getera, ki tuguhia, i vagevage renia.
9Siana kamu hagaparu, vi igamu kamu hetakuiheri. Mu kikitenia na eraha, ma kamu taua gatagata na koroha. 10Igamu kamu hetakuiheri bâraha mangara na hegoata, ga obahaku i Kirisito, ma kamu agana kamu hagabângenia, vi igamu kamu hehanetasige. 11Mu tagara ramo. Siana kamu marababaga. Mu tagara tanga na Araha i mêrihami hagenani. 12Mu ama ni vagevagesia nga na nasiha iami. Mu piringiape, matena ga tarahugamu na bagabevoani. Ma kamu nunginungi tare. 13Mu meratongani na goami igê na tongesuriha na nahuninga iami, ma kamu unira banu i pasimi na enoni mahuara.
14Mu nungia God, hanana i korokoro tangara na enoni, ga hagamamasiagagamu. I monari, mu nungia God, ki korokoro tangara. Ma siana kamu nungia, ki aerasira. 15Matena na enoni ka vagevage, mu vagevage nogami henira. Matena i rugurugu na obata na enoni, i rugurugu nogami na obami henira. 16Mu obâbahaku. Siana kamu paroparo. Mu haritagi. Siana kamu hagarahasigamu maremi, vi igamu ka na enoni takotako.
17Manga ta na enoni, ma ki erasigamu, siana kamu barua aporo na eraha tanga. Ma kamu uhungia nga hete, kamu tanugi na marâ, na enoni ga takusigi, vi ga koro. 18Igamu maremi, mu ama ni uhungia nga, hanana mu komanira na enoni hato. 19Tamaku koro, siana hagetage, kamu usumia ta na enoni. Mu naka ma vê na siva tanga God, hanana i hagaitangia na enoni. Renia igê na Buka Apuna na Araha ki vi,
“Inê be katoa na siva;
inê be barua.”
20Ma igamu siana, renia na Buka Apuna ki vi:
“Manga na merongami, ma ki magê,
mu hagangêa.
Manga vi ngaia, ma ki mamata na riona,
mu vatea ki totono.
Igê na tarana ngekê igamu kamu katoa,
ki takotako rugu ma ki maki.”
21Siana kamu hagamarumungenia na eraha, ki teharigamu. Ma ki tuguhigamu hete, mu teharia na eraha renia na koroha.
S'ha seleccionat:
ROMA 12: KCB
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2011 Bible Society of the South Pacific