MATEO 9
9
O Jesu ki rikia na mane i meapeape
(Mk 2.1-12; Lk 5.17-26)
1O Jesu ki tage igê na kere haka ma ki aporo tanga na apanena tarê na rano, ma ki ata me i hinua iana. 2Tani na enoni ka tugia na mane, i meapeape, ma ka merâ me tanga o Jesu. Matena o Jesu ki rigia na tongesuriha raha i pasita, ngaia ki vi tanga na mane, i meapeape, ki vi: “Goaku, siana ko magu. Na tasi iamu ka bani bonotenigi.”
3Ma tani na mane ni hagesuringa ni rotu ka tako munimuni i obata, ka vi: “E, veka ki tamasi erasia God!” 4O Jesu ki giraragi na takotako iata, ma ki vi: “Tanu hega kanimu hingiê bera vikana? 5I mataku vari, vi ga vivi, ‘Na tasi iamu ka bani bonotenigi,’ se ga vivi, ‘Gu aharaga ma ku râ’? 6Hoita, inê kê hagatanga monari tangagamu, o Karena Enoni ki tonga na raramohana i maveta, hanana i bonotenigi na tasi.” Hoita ngaia ki vi tanga na mane, i meapeape, ki vi: “Gu aharaga. Gu tavoa na banamu ma ko aporo i pasimu.”
7Na mane ki aharaga, ma ki aporo i pasina. 8Matena na enoni ka bâsia, ngaira ka magu ma ka visia raha God, renia i hagatarêngenia na ramoha ngekê tangara na enoni.
O Jesu ki atea o Mateo
(Mk 2.13-17; Lk 5.27-32)
9O Jesu ki tavoraha nikâ, ma na matena i râ, ngaia ki bâsia ta na mane, i totora takesi. Ngaia ki no Mateo. Ngaia ki oga i ruma ni tagaraniha iana. O Jesu ki vi tanga, ki vi: “Gu takuê.” Mo Mateo ki aharaga ma ki takua.
10Matena o Jesu ki ngêngê i ruma iana o Mateo, rako na mane, ga totora takesi, ma na enoni, ga aharê igê na ramata, ngaira ka râ me ma ka mengê o Jesu ma na kariana. 11Tani na Pariseo ka rigia na tarana vikana, ma ka vi tangara na kariana o Jesu, ka vi: “Tanu hega na araha iami kani merangê na mane, ga totora takesi, ma na enoni, ga aharê igê na ramata?” 12O Jesu ki rongora ma ki arami, ki vi: “Na enoni, ga apekoro, ka pe naasia na mane mangata, ma na enoni hete, ga maeha, kaniga naasia na mane mangata. 13Mu tarahua na ta ki na girarana na tamasinga igê na Buka Apuna, i vi, ‘Inê kê pe obania na vogasiha ma kê obania ma hete na takuiha.’ Inê kê pe râ me be unira na enoni, ga marupegi na ramata, ma kê râ me tangara hete na enoni, ga aharê igê na ramata.”
Na hagatenga renia na hariharinga
(Mk 2.18-22; Lk 5.33-39)
14Ma hemuri na kariana o Joane Batisita ka râ me, ka hagatea o Jesu, ka vi: “Tanu hega igami ma na Pariseo kanimi harihari tare, ma na kariamu ki mareha ngavê, vi ge harihari?” 15O Jesu ki arami, ki vi: “Igamu kamu takusia vari, vi na enoni, ga goga igê na ngêra na hagataku, ki rugurugu na obata, matena na mane, i êragi haoru, ki goga mênga henira? Mareha vê! Ma ki page râ me na matena, ga page merâ vê igê na mane i êragi haoru tenira, ma igê na matena ngekana ngaira ka kahu harihari.
16I asa ta na enoni, vi ge aba na bani tuguni renia na tarisigana, i pe herugirugi. Manga i katokato vikana, na tarisigana, i mamênga vige herugirugi, ki tarisia tagua na bani tuguni, ma na tuguni ki tatari raha. 17Ma nikâ i asa ta na enoni, vi ge ringia na vaini haoru i na rarona na bani anga na gavota na puruka. Manga i katoa vikana, na anga ka page raboa, ma na vaini ki page mea, ma na anga ka page era. Naka vê! Karingia na vaini haoru igê na anga haoru, ma hanana garu korokoro tagenaterua na anga ma na vaini.”
Na kere gete i bani me ma na gete i têa na gapugapu raha
(Mk 5.21-43; Lk 8.40-56)
18Matena o Jesu ki tamasi vikana tangara, ta na mane, i bâsuria na ruma ni sukuru iata na Siu, ki râ me tanga o Jesu, ki susure so i maana, ma ki vi: “Ka kareku ki kahu me râ ma. Gu râ me ku têbuhia, ke tahi aporo.” 19O Jesu ki aharaga ma ki mumuria. Ma na kariana ka râ henia.
20Ta na gete, i têa na gapugapu raha surigi na harisi tangahuru matarerua, ki ahehe me i murina o Jesu, ma ki hataria na taretarena na tuguni iana. 21Ngaia ki tako, ki vi: “Manga inê, ma kê hataria râ ma na tuguni iana, inê kê page komaga renia.” 22O Jesu ki ahoro râ, ki bâsia na gete, ma ki vi: “Goaku, siana ko magu!” Na tongesuriha iamu ki bani hagakomagago.” Ma igê na matena ngekana na gete ki komaga aporo.
23Hoi, o Jesu ki banu i ruma iana na mane, i bâsuria na ruma ni sukuru. Matena i bâsira na enoni, ga êhihi tanga na enoni i me, ma na enoni, ga angiangi maramara bâraha, 24ngaia ki vi: “Igamu hato, mu hura! Na kere gete ki pe me. Ngaia ki mêru ma!” Ma ngaira hato ka rurusia. 25Matena ga bani taringenira hura hato na enoni, o Jesu ki oto râ ki banu i na kiboru iana na kere gete, ma ki têa i rimana, ma ngaia ki aharaga. 26Ma na rongoha renia na tarana ngekê ki râhigi na ara ni hinua hato i ngekana.
O Jesu ki hagamaravagi na maaterua na mane gi rua
27O Jesu ki tavoraha nikâ, ma na matena i râ, na mane gi rua, ki guru na maaterua, karu haganega karu mumuria. Ngairerua karu ngere, karu vi: “Karena Tavite! Gu takuigamirua!” 28Matena o Jesu ki bani banu vê i ruma, na mane, i guru na maaterua, karu râ me tanga o Jesu, ma ngaia ki hagatererua, ki vi: “Igamurua kamuru tongesuria vari, vi inê kê girara, gê katoa na tarana, muru obania?” Ngairerua karu arami, karu vi: “Mako, Araha!” 29Mo Jesu ki hatarigi na maaterua ma ki vi: “Ge vora me na tarana, muru tongesuria!” 30Ma na maaterua ka kahu marava aporo. Mo Jesu ki ramonirerua, ki vi: “Siana kamuru hagarongoa rârâ ta na enoni renia na tarana ngekê.” 31Ma ngairerua karu râ ma karu tokorenia na rongoha renia o Jesu igê na ara ni hinua hato i ngekana.
O Jesu ki rikia na mane i bi
32Matena garu aporo vê na mane ngegana tani na enoni ka merâ me ta na mane, i bi tanga o Jesu, suria i atataroga. 33Matena o Jesu ki bani paia na ataro tenia, na mane ki haganega ki tamasi ototo râ. Na enoni hato ka konekone. Ngaira ka vi: “Igia ka pe bâsia noga na tarana ge manga ngekê i Isiraele!” 34Ma na Pariseo ka vi: “Suria nga na araha iata na ataro kani tamania, tahema ngaia ki girara i paira na ataro.”
O Jesu ki takuira na enoni
35Hoi, o Jesu ki râ ki vatugigi na ara ni hinua hato, na ani raha ma na ani sisite. Ngaia ki hagesurira na enoni i ruma ni sukuru iata, ma ki ateate renia na Taroha Koro renia na Arahanga iana God, ma ki rikira na enoni, i tarahura na ani mavê na maeha ma na mera. 36Matena i bâsira na hakuta na enoni, ngaia ki takuira ngavê, suria ngaira ka anumanuma ma ka pe tako togo, mangara na sipi, ga pe nahunia na avanuta. 37Vikê ngaia ki vi tangara na kariana, ki vi: “Na mu ni harisi ki raha ma ki mêa, ma ka pe rako na enoni tagara, hanana vi ge opaopa. 38Mu nungia na avanuna na mu ni harisi, ke kasira me nikâ na enoni tagara, tanga ga opaopa.”
S'ha seleccionat:
MATEO 9: KCB
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2011 Bible Society of the South Pacific