MATEO 19
19
O Jesu ki tamasi renia na hekasigi
(Mk 10.1-12)
1Matena o Jesu ki visigi hato na tarani ngegana, ngaia ki pania i Galilea, ma ki aporo tanga na apanena i Jutea, i na apanena tarê na ve i Jotano. 2Rako era vê na enoni, ga takua, ma ngaia ki rikira i ngekana.
3Tani na Pariseo ka râ me tanga ma ka uhungia, ka hagatea, ka vi: “Na Ramata iaka i na Buka Apuna ka hagamarumungenia ma vari na mane, hanana vi kasia na gete iana renia, i pe koro igê na ani mavê na marâ, se mareha?”
4O Jesu ki arami, ki vi: “E, mu pe bani tomania na tarana ngekana igê na Buka Apuna, i vi, ‘Igê na haganegana God ki hagavorara na enoni, na ani mane ma na ani hehene. 5Ma ngaia God ki vi, “Tahema na mane ki page panirerua o vaemana ma kenana, ma ki page goga haku tare henia na gete iana, ma ngairerua karu voravora re na vere tage togo ma.’” 6Vikana ngairerua ki mareha, vi garu manga na vererua, ma karu manga hete na vere tage togo ma. Hoi, siana na enoni ki voasirerua hegitigi na mane ma na gete, suria God ki takurerua.”
7Na Pariseo ka hagatea, ka vi: “Ma ki hega na Ramata iana o Moise, kani hagamarumungenia na mane, hanana vi vatea na gete iana na pepa ni hekasigi ma ki kahu kasia?”
8O Jesu ki arami, ki vi: “O Moise ki hagamarumungenigamu, kamu kasira na gete iami, suria ma igamu kamu guguruga bâraha, ma igê na haganegana ki pe manga ngekana. 9Hoi, be vi tangagamu: na anima na mane, i kasia na gete iana, nga noga ma igê na êragiha na ramata ka manimania ngaia na mane ki gamogamo, manga vi auragia ta na gete getea.”
10Na kariana ka vi tanga, ka vi: “Manga vi na berarogaterua na mane ma na gete iana, ma ki manga ngekê, ki araria ma, vi siana na enoni ka auragi.”
11O Jesu ki arami, ki vi: “Mareha vi na enoni hato, kani ge girara, ge arâ suria na hagesuringa ngekê; nga noga ma na enoni, God i tamanira, kani ga arâ suria. 12Renia tani na enoni ka pe girara, vi ge auragi, suria ngaira ka vora vikana nogata; tani ka pe girara, vi ge auragi, suria na enoni ka katora vikana; ma tani ka pe auragi renia na Arahanga iana God. Na enoni, i girara i arâ suria na hagesuringa ngekê, ki koro, i arâ suria.”
O Jesu ki têbuhira na kare
(Mk 10.13-16; Lk 18.15-17)
13Tani na enoni ka merarâ me na kere kare tanga o Jesu, hanana vi têtêbuhira, ma ki nungia God tangara. Ma na kariana ka ramonira na enoni ngegana. 14O Jesu ki vi: “Mu nakara na kere kare ke râ me i pasiku; siana kamu vi pusira, renia na enoni, ga mangara na kere kare ngegê, ngaira ka tê viteana God.” 15Ma ngaia ki têbuhira hato ma ki kahu râ.
Na mane haoru i ruruguha
(Mk 10.17-31; Lk 18.18-30)
16Ta na tangiana ta na mane ki râ me tanga o Jesu. Ngaia ki hagatea, ki vi: “Araha, na ta ki tuguhiê, vi ve katoa, hanana ve nahunia renia na mêriha mora ma tarema?” 17O Jesu ki arami, ki vi: “Tanu hega go hagateê renia vi na tarana ta ki koro? Na vere tage togo ma ki koro. Manga go obania, vi go nahunia na mêriha mora ma tarema, hoi, i tuguhigo, go marupegi na ramata.”
18Ngaia ki hagatea, ki vi: “Na anita na ramata?” O Jesu ki arami, ki vi: “Siana ko nahunahu enoni; siana ko gamogamo; siana ko hanago; siana ko hagaparu; 19go hanetasirerua o vaemamu na kenamu; ma ko takuira na enoni getera manga igo maremu.”
20Na mane haoru ki arami, ki vi: “Inê kê bani râ surigi na ramata hato ngegana. Na ta nikâ ki arariê, vi gê katoa?” 21O Jesu ki vi tanga, ki vi: “Manga vi igo, ma ko obania, vi go korokoro ngavê, go arâ ma ko hagavuringenigi na nahuninga hato iamu, ma na haga na meni ko vatera na enoni, ga matareha, ma hanana go page nahunigi na ruruguha i pasina God; ma hemuri ko arâ me ma ko takuê.” 22Matena na mane haoru ki rongo vikana, ngaia ki babau ma ki ahoro vê ki râ, suria ngaia ki ruruguha bâraha.
23Ma hemuri o Jesu ki vi tangara na kariana, ki vi: “Be vi tangagamu: na enoni ruruguha ki bara ngavê tanga, hanana vi ge tê viteana God na Araha. 24Be vi tangagamu nikâ: i bara tanga na kamelo, vi ge tara banu igê na maana na nila, ma ki bara teha ngavê tanga na enoni ruruguha, vi ge tê viteana God.” 25Matena na kariana ka rongo vikana, ngaira ka kone teha ngavê, ma ka hagate, ka vi: “Se, va ti kani girara i tahitahi?” 26O Jesu ki ono rapurapu renira, ma ki arami, ki vi: “Tangara na enoni ki asa, ma tanga God na ara ni marâ ki pe asa.”
27Mo Petero ki tamasi. Ngaia ki vi: “Bâ, igami kami bani panigi na ara ni marâ hato iamami, ma kami takugo, ma na ta kani vigami page nahunia?” 28O Jesu ki vi tangara, ki vi: Be vi tangagamu; matena na ara ni marâ ka page haoru aporo, o Karena Enoni ki page goga so igê na atohana na araha, ma igamu na kariaku tangahuru matarerua kamu page goga so nogami igê na atohami, hanana mu surira na varo ninuni tangahuru matarerua iana o Isiraele. 29Ma na ara ni enoni, i bani panigi na ruma iana, se i panira na goana, se o vaemana, se kenana, se na karena, se na mako iana, reniê inê, ngaia ki page nahunigi kê nikâ na tangarê na marâ haritonga teharigi na nahuninga iana i nago, ma ki page nahunia na mêriha mora ma tarema. 30Ma na ani rako, ga hagenago i na matena i ngekê, ka page hagemuri; ma na ani rako, ga hagemuri i na matena i ngekê, ka page hagenago.
S'ha seleccionat:
MATEO 19: KCB
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2011 Bible Society of the South Pacific