MATEO 17
17
O Jesu ki bâ riariaga
(Mk 9.2-13; Lk 9.28-36)
1I murini na tangiani gi ono o Jesu ki merarâ o Petero mo hegoana o Jakobo mo Joane, ma ki meratagare igê na hungana, ngaira getera. 2Matena ga bâsia, o Jesu ki bâ riariaga: na maana ki mave ngavê manga na arito, ma na tuguni iana ki togatoga ma ki siki ahuru ngavê. 3Me muri na kariana gi oru ka bâsirerua o Moise mo Elia, garu metamasi o Jesu. 4Vikana o Petero ki tamasi ma ki vi tanga o Jesu, ki vi: “Araha, i ararigami, mi oga ikê. Manga go obania, ma be toregi so na ruhu gi oru ikê: tani tangago, tani tanga o Moise, ma tani tanga o Elia.”
5Matena i tamasi mênga, ma na vaha togatoga ki buhira, ma God ki tamasi igê na vaha ki vi: “Ikê o Kareku hetakui. Inê kê ageagesia bâraha. Mu rongoa na tamasinga iana!” 6Matena na kariana ka rongoa na ringena, i tamasi, ngaira ka magu ngavê ma ka aba so i ano. 7O Jesu ki râ tangara ki hatarira ma ki vi: “Aharaga! Siana kamu magu!” 8Ngekana ngaira ka atakê, ma ka pe bâsia ta na enoni, nga noga ma o Jesu.
9Matena ga rere me tenia na hungana, o Jesu ki hagapêpura, ki vi: “Siana kamu hagarongoa rârâ ta na enoni renia na marâ, mu rigia i ngekê, mataro me ki mauri aporo o Karena Enoni tenia na mera.” 10Ma hemuri na kariana ka hagatea o Jesu, ka vi: “Tanu hega ngaira na mane ni hagesuringa na rotu kaniga vi, vi o Elia ki hagenago me?” 11O Jesu ki arami, ki vi: “I monari, o Elia ki arâ me hagenago, hanana i hagarêgi na ara ni marâ. 12Ma be vi tangagamu: o Elia ki bani râ me noga, ma na enoni ka pe bâgirara, ma ka katogi ma tanga na ani mavê na marâ, ga obanigi. I tagenana ma o Karena Enoni, ngaira ka page kikitenia nogana.” 13Ma na kariana ka kahu rongogirara, o Jesu i tamasi tangara renia o Joane Batisita.
O Jesu ki hagakomaga na kere mane i atataroga
(Mk 9.14-29; Lk 9.37-43a)
14Matena ngaira ka râ vurusira na enoni, ta na mane ki râ me tanga o Jesu ma ki susure i maana. 15Ma ngaia ki vi: “Araha, gu takia o kareku! Ngaia ki manumanuga. Hagarako ngaia ki votavota tare igê na gi ma i ve, matena i manumanuga. 16Inê kê merâ i pasita na kariamu, ma ki asa iata, vi ge hagakomaga.”
17O Jesu ki arami, ki vi: “Igamu, ki mareha vê, vi gamu tongesuri, ma ki era ngavê na parongami! Hagehita kanigê pe oga henigamu? I na keta ke hato? Arihu me noga inê kê hatamia na mamasiaganiha renigamu. Torea me na kere mane!” 18O Jesu ki bonasia na ataro era, ki hura vê tenia na kere mane. Ma ngaia ki kahu komaga ototo râ.
19Ma hemuri na kariana ka râ me pinihi tanga o Jesu, ma ka hagatea, ka vi: “Tanu hega kani asa tangagami, vi gami paia na ataro era?” 20O Jesu ki arami, ki vi: “Suria i pe gatagata na tongesuriha iami. Mu rongo! Manga na tongesuriha iami, ma ki raharaha manga na kere maana sisite na apinige, mu girara ma, mu vi tanga na kere hungana ikê, kamu vivi, ‘Râ tenia ikê tanga i ikana!’ Ma ngaia ki arâ. Mu girara ma, mu tanugi na ani mavê na marâ. 21Nga noga ma na nunginungiha ma na hariharinga kaniga girara, ga paia hura na ataro era manga na ani ikê, mareha vi ta na marâ râ nikâ.”
O Jesu ki tamasi nikâ renia na mera iana
(Mk 9.30-32; Lk 9.43b-45)
22Matena na kariana hato ka haku me i Galilea, o Jesu ki vi tangara, ki vi: “I sugia ma, vi ge mahatangenia o Karena Enoni tangara na mane, 23ga page nahuia; ma igê na oruta na tangiana ngaia ki page mauri aporo.” Na kariana ki rugu bâraha na obata.
O Jesu ki vuria na takesi tanga na Ruma ni Rotu
24Matena o Jesu ma na kariana ka ata vê i Kapenamu, na mane totora takesi tanga na Ruma ni Rotu ka râ me tanga o Petero, ma ka hagatea, ka vi: “Na Araha iamu ki vuria vari na takesi tanga na Ruma ni Rotu?” 25O Petero ki arami, ki vi: “Mako!”
Matena o Petero ki banu vê i ruma, o Jesu ki tamasi hagenago, ki vi: “Simone, na ta na takoha iamu? Na maneraha ka tavotavo takesi se na haga tenira o ti? Tenira na avanuni marê se tenira na mahuara?” 26O Petero ki arami, ki vi: “Tenira na mahuara.” O Jesu ki arami, ki vi: “Hoi, i vi, vi na avanuni marê ki pe tuguhira, vi ge vuria na takesi. 27I pe ararigia, vi ge hagaerasira na enoni igê. Vikana gu râ igê na rano ma ku kasikasi garo. Ko okea na siare, na ani i arara hagenago, ma i harana igo ko page tarahua igê na haga, i ararigerua, garu vuria renia na takesi tanga na Ruma ni Rotu.”
S'ha seleccionat:
MATEO 17: KCB
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2011 Bible Society of the South Pacific