TAGARAHA IATA NA APOSOTOLO 15
15
Na hekarigiana i Jerusaleme
1Tani na mane ka ata me i Antioko tenia i Jutea, ma ka haganega ka hagesurira na tamata, ga tongesuri, ka vi: “God ki asa, vi ge hagatahigamu, manga vi ga pe retegi râ na gavoni na varami surigi na Ramata iana o Moise.” 2O Paulo mo Banebasi karu merahekarigi bâraha, ma karu merahetamasi renia na tarana ngekana. Tahema ka vi, vi o Paulo mo Banebasi ma tani na enoni getera i Antioko ki ararira, viga arâ i Jerusaleme, ma ka tamasi tangara na aposotolo ma na meraha renia na tarana ngekana.
3Na enoni i na rotu ka hagatorangenira, ma na matena ga aharêvoro i Punisia me Samaria, ngaira ka hagarongora na enoni, ga tongesuri i ngekana, renia i manga i he na enoni, ga pe Siu, ka kahu tongesuria God. Na rongoha ngekê ki hagakoro obata bâraha na tamata, ga tongesuri. 4Matena ngaira ka ata vê i Jerusaleme, na enoni i na rotu, na aposotolo, ma na meraha ka vagevage renira, ma ka unira banu i pasita. Mo Paulo mo Banebasi karu hagarongora, renia vi i manga i he God ki tamanirerua igê na tagaraha iaterua. 5Ma tani na enoni, ga tongesuri, ga pane henira na Pariseo, ka aharaga, ma ka vi: “I tuguhira, viga retegi râ na gavoni na varata, ma i tuguhira, viga arâ surigi na Ramata iana o Moise.”
6Na aposotolo ma na meraha ka hekarigi renia na tarana ngekana. 7Ngaira ka hekarigi arihu era noga, mo Petero ki aharaga, ma ki vi: “Goaku! Igamu kamu bani girara, vi i nago vê God ki bani ateê i berarogami, hanana gê ateate renia na Taroha Koro tangara na enoni, ga pe Siu, hanana vi ngaira ka rongoa ma ka tongesuria God. 8Ma God ki giraragi na aitangihata na enoni, ma ki hagabângenia, na enoni, ga pe Siu, i koro ma viga tongesuri nikâ, suria ngaia ki vatera na Higona Apu, tagenana manga i bani vategia igia. 9Ma tanga God igia hato, na Siu ma na enoni, ga pe Siu, ka tagenaka ma. Ngaia ki bonotenigi na tasi iata, suria ngaira ka tongesuri. 10Hoita, tanu hega igamu kanimu obania, vi gamu uhungia God i ngekê? Renia mu obania, mu hagahigera na enoni, ga tongesuri, renigi na tauha, ma kamu girara, na êvarika ma igia nikâ ki bara tangagia, vi ge râ surigi. 11I asa vê! I pe koro! Igia ka tongesuria, God i hagatahigia renia na korohana na Araha Jesu, tagenana ma manga God i hagatahira ngaira!”
12Na enoni hato, ga hekarigi, ka muni, matena ga rongorerua o Banebasi mo Paulo, garu tamasi renigi na tagaraha raha hato ma na mena, God i bani tanugi i pasita na enoni, ga pe Siu, igê na tagaraha iaterua. 13Matena garu tamasi hato, o Jakobo ki tamasi nogana, ki vi: “Goaku, mu rongoê! 14O Simone ki kahu ramatenigi tangagia, vi manga i he God ki haganega ki takuira na enoni, ga pe Siu, renia ngaia ki atera tani i berarogata, ka vora re na kariana. 15Na poropete ka vi vikê nikâ. Renia na Buka Apuna ki vi: 16‘Na Araha ki vi:
I na bevoana i muri me inê kê page aporo,
ma kê page torea aporo
na ruma iana o Tavite, i ahoge,
ma kê page surungia na ruma,
i kakaga hagetage,
ma kê page torea aporo.
17Ma vikana na enoni hato getera
ka page garia na Araha.
Na enoni hato i maveta, ga pe Siu,
inê kê bani atera, ka vora re na kariaku.
18I tamasi vikana na Araha,
suria i nago noga
ngaia ki bani hagagirarara na enoni
renia na tarana ngekê.’”
19O Jakobo ki tamasi nikâ, ki vi: “Na takotako iaku, ki tuguhigia, vi siana ka hagahigera na enoni, ga pe Siu ma ka tongesuria God. 20Ma ki arari ma, viga segea na leta, ma ka hagarongora, vi siana ka ngêngê na ngêra, i apu, vi ge ngê, suria ga bani susu renia tangara na ataro. Ma nikâ, vi siana ka gamogamo, paronga iera ma na tarani vigana. Ma nikâ, vi siana ka ngaugi na ganiana, ga ngurira, se vi ga ngêngê na gaputa. 21Suria i bani haganega ma i nago, mataro me i na matena i ngekê, igê na ara ni Tangiana ni Mamaroha, ka tomanigi tare igê na Ramata iana o Moise i na ruma ni sukuru, ma ka ateate renigi igê na ara ni hinua.”
Na leta tangara na enoni, ga pe Siu ma ka tongesuri
22Ma hemuri na aposotolo ma na meraha henira na enoni hato i na rotu ka vi, ka atera tani na mane i berarogata, ma ka hagatorangenira, ka râ i Antioko henirerua o Paulo mo Banebasi. Ngaira ka atererua o Juta, ga hêtana nikâ vi o Basabasi, mo Sailasi. Na enoni i na rotu ka hanetasirerua bâraha. 23Ngaira ka hagatorangenirerua henia na leta ikê akê, i vi: “Igami na aposotolo ma na meraha, igami na goami igê na tongesuriha. Igami kami hagamauru koro tangara na tamamami hato, ga pe Siu ga oga i Antioko, i Siria, me Silisia. 24Igami kami bani rongoa, vi tani na mane i pasimami ka râ ma ka hagakonegamu renigi na tamasinga iata. Megami kami pe vi tangara, vi ge tamasi vikana. 25Tahema mi hekarigi, ma kami vi, vigami atererua na mane, karu totora tamasinga iamami tangagamu. Ngairerua karu page arâ vê henirerua o Banebasi mo Paulo, na tamaka koro. 26Na mane ngegê karu haga ni pirisia na tagaraha tanga na Araha o Jesu Kirisito. 27Ma i ngekê igami kami hagatorangenirerua vê o Juta mo Sailasi tangagamu. Ma karu page visigi tangagamu na marâ, ga tagenani ma manga na marâ, mi segegi. 28Renia na Higona Apu ma igami kami pe obania, vi gami hagahigamu, ma ki tuguhigamu, mu arâ surigi na ramata igê agê. 29Siana kamu ngaua na ngêra, ga bani susu renia tangara na ataro. Siana kamu ngênge na gapu se na ganiana ga nguria. Ma siana kamu gamogamo, se vigamu paronga iera ma na tarani vigana. Na parongami ka page korokoro, manga vigamu arâ surigi na ramata ngegê. Mauri koro!”
30Ngaira ka hagatorangenirerua na mane tora tamasinga, ma ngairerua karu râ i Antioko. Ma i ngekana ngairerua karu hagahakura igê na enoni hato, ga tongesuri, ma karu vatera na leta. 31Matena na enoni ka tomania na leta, ngaira ka vagevage bâraha, renia na tamasinga igê na leta, i kanukanura. 32O Juta mo Sailasi, ngairerua ka na poropete nogaterua nikâ, karu tamasi arihu era henira na tamaterua, ga tongesuri, ma karu kanukanura, ma karu hagaramonira. 33Ngairerua karu oga arihu sisite i ngekana, ma hemuri na tamaterua, ga tongesuri, ka arirerua, ma karu aporo tangara na enoni, ga bani hagatorangenirerua. 34[Mo Sailasi ki obania ma, vi gâga mavê i ngekana.]
35O Paulo mo Banebasi karu kere oga arihu i Antioko. Ngairerua henira rako na tamaterua ka hagesurira na enoni renia na tamasinga iana na Araha, ma ka ateate tangara renia.
O Paulo mo Banebasi karu muri hegitigi
36Igê ta na matena i muri o Paulo ki vi tanga o Banebasi, ki vi: “Garu aporo suri ugakerua, ma karu vatugira na tamakerua, ga tongesuri, igê na ara ni hinua, garu bani ateate me igê renia na tamasinga iana na Araha. Ma karu arâ karu bâsira, manga vi ngaira ma ka gâga mênga igê na tongesuriha, se mareha.” 37O Banebasi ki obania, vi garu merâ o Joane Mareko. 38Mo Paulo ki vi, i pe koro, vi garu merâ, renia i nago o Joane Mareko ki pe oga henirerua mataro me ki hato na tagaraha iaterua. Ma ngaia ki aporo, ma ki panirerua i Pamupilia. 39Vikana ngairerua karu mehekarigi ngavê, ma karu muri hegitigi. O Banebasi ki merâ o Mareko, ma karu tage igê na haka karu râ i Saipero. 40Mo Paulo ki atea o Sailasi, ma na tamaterua, ga tongesuri, ka nungia God, ki anumasirerua, ma karu râ vê, karu râ. 41Ma ngairerua karu vatugira na hakuta na enoni, ga tongesuri, i Siria me Silisia, ma karu hagaramonira igê na tongesuriha.
S'ha seleccionat:
TAGARAHA IATA NA APOSOTOLO 15: KCB
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2011 Bible Society of the South Pacific