Salmos 78
78
Runankunapa favorninpi Diospa ruwasqanmanta
Yachachinapaq Asafpa takisqan
1Kuyasqay llaqtalláy,
yachachikuyniyta uyariy,
rimapayasqayta kumuykuspa uyariy.
2 #
Mt 13.35. Rikchanachiykunatam rimarisaq,
ñawpaqmanta pakasqa kaqkunatam rimarisaq.
3Chaykunataqa uyarispam yacharqaniku
ñawpaq tayta-mamaykum willawarqaku.
4Chaykunataqa mirayninchikkunamanpas mana pakaspam willasunchik,
hamuq miraykunamanpas Tayta Diospa atiyninmantam willasunchik,
admirakuypaq ruwasqankunamantam willasunchik.
5Jacobmanmi kamachikuyta qorqa,
Israelmanmi allin kawsakuyta yachachirqa,
ñawpaq taytanchikkunatam mirayninkunaman yachachinanpaq kamachirqa;
6chaynapi hamuq miraykunapas yachanankupaq,
paykunapas mirayninkumanta mirayninkukama yachanankupaq;
7Diosllapi hapipakuspa paypa ruwasqankunata ama qonqanankupaq,
kamachikuyninkunata kasukunankupaq,
8manaña ñawpaq taytanku hina kanankupaq.
Ñawpaq taytankuqa mana kasukuq, mana yachayniyuq,
Diosta qepanchaq iskay uya runakunam karqaku.
9Efrainpa mirayninkunaqa allin flechaqkunam karqaku,
ichaqa guerraman rispankum manchakuymanta ayqerqaku.
10Diospa pactontapas manam waqaycharqakuchu,
kamachikuynintapas manam kasukurqakuchu.
11Diospa admirakuypaq ruwasqankunata rikusqankutapas qonqarurqakum.
12 #
Ex 7.8—12.32. Ñawpaq taytankupa qayllanpim Tayta Diosqa,
Egipto nacionpi tarikuq Zoán pampapi
hatun milagrokunata ruwarqa.
13 #
Ex 14.21-22. Lamar qochata iskayman rakispam chayninta pasachimurqa,
yakutam perqata hina sayarachirqa.
14 #
Ex 13.21-22. Punchawmi puyuwan pusarqa,
tutanñataqmi ninapa kanchariyninwan.
15Chunniqpim qaqakunata iskayman chitqarqa,
paykunamanmi yakuta achkanpi tomachirqa.
16 #
Ex 17.1-7; Nm 20.2-13. Qaqamantam yakuta achkanpi pawachimurqa,
mayuta hinañam kallpachirqa.
17Chaywanpas runakunaqa
sapa kutillam Diospa contranpi huchallikurqaku,
Tukuy Atiyniyuqpa contranpim chunniqpi hatarirqaku.
18Munasqanku mikuyta mañakuspankum
Tayta Diosta tentarqaku.
19Diospa contranpim kaynata ninakurqaku:
¿Yaqachu mikuyta kay chunniqpipas qoykuwachwan?
20Arí, qaqata chitqaspam yakuta pawachimurqa,
allpata nuyunankamam mayuta hinaña kallpachirqa,
ichaqa ¿yaqachu tantatawan aychata qoruwachwan? nispanku.
21Chayta uyarispam Tayta Dios piñakururqa,
Jacobpaqmi nina hina ratarirurqa,
Israelpaqmi sinchita piñakururqa;
22Chaynaqa, pasakurqa
Diospi mana hapipakusqankuraykum,
yanapakuyninpipas mana creesqankuraykum.
23Chaywanpas Diosqa puyukunatam kamachirqa,
cielokunapa punkunkunatam kicharirqa.
24 #
Jn 6.31. Maná sutiyuq tantatam parachimurqa,
hanaq pacha trigotam parachimuspa mikuchirqa.
25Angelkunapa mikunantam runa mikurqa,
Diosqa saksanankukamam mikuchirqa.
26Cielomanta intipa qespimunan lawmanta wayrachimuspam,
atiyninwan sur lawmanta wayrata pukuchimuspam,
27llaqtanpaq allpata hinaña aychata parachimurqa,
lamar qochapi aqota hinañam pawaq animalkunata qomurqa.
28Maymi yachasqankupa chawpinmanmi,
carpankupa muyuriqninmanmi wichichimurqa.
29Saksanankukamam mikurqaku,
chaynatam munasqankuta Dios qorqa.
30Ichaqa manaraqpas saksachkaptinkum,
mikusqankupas siminkupiraq kachkaptinmi,
31 #
Ex 16.2-15; Nm 11.4-23, 31-35. paykunaman Diospa piñakuynin wichiykamurqa,
kallpasapa runakunatam wañurachirqa,
Israelpa akllasqa runankunatam chinkarachirqa.
32Chaywanpas kasqallanmi huchallikurqaku,
admirakuypaq ruwasqankunatapas mana kaqpaqmi hapirqaku.
33Chayraykum waspiyta hinalla paykunata chinkarachirqa,
mancharikuypaq ñakariywanmi wañurachirqa.
34Paykunamanta kaqkunata wañuchiptillanmi Diostaqa maskaqku,
kutirikuspankum mana samaykuspa maskaqku.
35Chayraqmi Diosqa waqaychaqninku kasqanta yuyariqku,
chayraqmi tukuy imapa hawanpi munaychakuq Diosqa salvaqninku kasqanta yuyariqku;
36ichaqa simillankumantam sumaqllataña rimapayaqku,
qallunkuwanñataqmi llullakuqku,
37 #
Hch 8.21. hawa sonqollam kuyaqku,
pactontapas manam kasukurqakuchu.
38Chaywanpas Diosqa kuyapayaykuspam,
huchankumanta pampachaykuspam,
mana puchukarachirqachu;
achka kutitam piñakuynintapas asurichirqa,
manam piñakuyninwanqa apachikurqachu.
39Tayta Diosqa,
wañuq runalla kasqankutam yuyarirqa,
chinkaruq wayra hinalla kasqankutam yuyarirqa.
40Achka kutitam Diospa contranpi hatarirqaku,
chaynatam chunniqpi llumpayta llakichirqaku.
41Tayta Diostam ñataq-ñataq pruebarqaku,
Israelpa chuya Diosnintam llakichirqaku.
42Manam yuyarirqakuchu
ñakarichiqninkupa makinmanta
atiyninwan Diospa hurqomusqantaqa;
43manam yuyarirqakuchu,
Egipto nacionpi milagrokuna ruwasqanmantapas,
Zoán pampapi admirakuypaq kaqkuna ruwasqanmantapas.
44 #
Ex 7.17-21. Mayukunatam yawarman tikrarurqa,
Egipto runakuna mana tomanankupaq.
45 #
Ex 8.20-24. #
Ex 8.1-6. Nana-nanaq kachukuq chuspikunatam kachamurqa,
tukurunanpaqmi achka-achka karyakunata kachamurqa.
46 #
Ex 10.12-15. Tarpuyninkutam urukunawan tukuchirqa,
llamkasqankupa ruruntam aqaruwaywan tukuchirqa.
47Uvasninkutam runtu parawan tukurachirqa,
higos sachankutam qasarachirqa.
48 #
Ex 9.22-25. Animalninkutam runtu parawan wañurachirqa,
uywankunatam rayokunawan wañurachirqa.
49Sinchi piñakuyninpim paykunaman kacharirqa;
hatun sasachakuyta, piñakuyninta hinaspa ñakariyta.
Chaykunam karqa ñakarichikuq tropankuna.
50Piñakuynintam llutanpiña kachaykurqa,
mana llakipayaykuspam peste onqoywan wañurachirqa.
51 #
Ex 12.29. Egipto nacionpi piwi churikunatam wañurachirqa,
Cam castakunapa piwi churinkunatam carpakunapi wañurachirqa.
52 #
Ex 13.17-22. Israelpa mirayninkunatam ovejakunata hina hurqomurqa,
llaqtantam chunniqninta pusamurqa.
53 #
Ex 14.26-28. Allinta waqaychaspam mana manchakunankupaq pusarqa,
enemigonkunatam ichaqa lamar qocha pamparurqa.
54 #
Ex 15.17; Jos 3.14-17. Diosmi chuya allpanman llaqtanta pusamurqa,
atiyninwan vencespa qechusqan orqokunamanmi pusamurqa.
55 #
Jos 11.16-23. Israelpa ñawpaqninmantam nacionkunata qarqorqa,
allpankutapas sapa ayllumanmi rakinarqa,
carpankutapas Israel ayllukunamanñam qoykurqa.
56 #
Jue 2.11-15. Ichaqa paykunam pruebaman churaspa
tukuy imapa hawanpi munaychakuq Diosta piñachirqaku,
kamachikuyninkunatapas manam kasukurqakuchu.
57Aswanqa ñawpaq taytanku hinam
Diosninkuta qepanchakururqaku,
flechapa mana allin ruwasqa arcon hinam qewikururqaku.
58Idolokunata yupaychanankupaq
moqokunapi capillakunata ruwaspankum Diosta piñachirqaku.
59Chaykunata qawaspam Tayta Diosqa llumpayta piñakurqa,
Israel runakunatam pasaypaqta cheqnipakururqa.
60 #
Jos 18.1; Jer 7.12-14; 26.6. Silo llaqtapi santuariontapas
runakunawan yachanan carpantapas saqerurqam.
61 # 1 S 4.4-22. Atiyninta qawachikunan Arcatapas enemigonkunawanmi qechurachirqa.
62Runankunapaqmi anchallataña piñakururqa,
guerrakunawanmi paykunata wañuchirqa.
63Jovenkunam kañasqa wañurqaku,
sipaskunapas manañam casarakuy takita takirqakuñachu.
64Sacerdotenkunapas espadapim wañurqaku,
viudankupas manam waqarqakuchu.
65Tayta Diosmi ichaqa
puñusqanmanta rikcharichkaq hina rikcharirurqa,
sinkasqanmanta kallpasapa qari mallaqyachkaq hinam qaparirqa,
66hinaspam enemigonkunata venceruspan ayqechirqa,
wiñaypaqmi penqayman paykunata churarurqa.
67Joseypa miraynintam qepancharurqa,
Efraín ayllutapas manam akllarqachu.
68Payqa Judá ayllutam akllarqa,
kuyasqan Sión moqotam akllarqa.
69Chuya wasintam cielota hina hatunta ruwachirqa,
kay pachata takyachisqanta hinam wiñaypaq takyachirqa.
70Serviqnin Davidtam akllarqa,
oveja michisqanmantam hurqomurqa.
71 # 1 S 16.11-12; 2 S 7.8; 1 Cr 17.7. Ovejakunapa qepanmantam,
llaqtanta michinanpaq pusamurqa,
Israel llaqtanta michinanpaqmi pusamurqa.
72Davidmi Diospa llaqtanta michirqa,
allin yachaywan cheqap sonqowanmi
paykunata michirqa.
Chuya Qellqa Revisión @ Sociedad Bíblica Peruana, 2012