2 Samuel 23
23
Wañukunallanpaqña Davidpa rimarisqanmanta
1Davidpa wañukunallanpaqña kachkaspa rimarisqankunam kaykuna. Isaipa churin Davidmi, Tayta Diospa hatunchasqan runam, Jacobpa Diosninpa akllakusqan reymi, Israel nacionpi miskillataña takiqmi nirqa:
2Tayta Diospa Espiritunmi ñoqantakama rimarin,
palabrankunam simillaypiña kachkan.
3Israelpa Diosninmi rimarirqa,
Israelta waqaychaq Diosmi niwarqa:
Pipas allinta ruwaspa runakunata kamachiqmi,
pipas Diosta kasukuspa runakunata kamachiqmi,
4achikyaykamuptin intipa kanchariynin hina kanqa,
mana puyuyuq punchawpi kanchamuq inti hinam kanqa,
allpamanta pastota ikllichimuq para hinam kanqa.
5Mirayniykunapas Diospim allin hapipasqa kachkan;
paymi ñoqawan wiñaypaq pactota ruwarqa,
allin terminonpi hinaspa allin ruwasqata.
Payqa salvaykuwaspam tukuy munasqayta ruwanqa.
6Mana allin ruwaqkunaqa kichka hina wischusqam kanqaku,
mana pipapas makiwan hoqarinanmi kanqaku.
7Hoqariyta munaqqa tenazawan otaq lanzawanmi hoqarinqa,
hinaspam ninaman wischusqa kaspanku pasaypaqta ruparunqaku, nispa.
Davidpa tropankunapa allinnin qari-qari capitanninkunamanta
(1 Cr 11.10-47)
8Kaykunam Davidpa allinnin qari-qari soldadonkuna karqaku: Tacmón casta Joseb-basebet, paymi Davidpa tropankunapa kimsa capitanninkunapa kamachiqnin karqa. Paymi huk kutipi pusaq pachak soldadokunata lanzanwan wañurachirqa. 9Iskay kaqñataqmi karqa Ahohíta ayllumanta kaq Dodopa churin Eleazar, paymi karqa Davidpa kimsa allinnin qari-qari soldadonkunapa huknin; paymi Israel tropakuna lluptikuptinku Davidwan tarikurqa Filistea tropakunawan Pas-damimpi peleanankupaq. 10Eleazarmi ichaqa sunita sayaykuspa Filistea soldadokunata makinpas utinankama wañuchirqa makinpas espadanman laqakunankama. Tayta Diosmi yanapaykurqa chay punchawpi vencenanpaq, chaymi Israel soldadokunaqa Eleazarpa kasqanman kutirqaku wañuqkunapa llapa imankupas hoqarikuqllaña.
11Kimsa kaqñataqmi karqa Agepa churin Sama, payqa karqa Arar lawpi kaqmi. Filistea tropakunam huñunakurqaku Lehi law lentejayuq chakrapi, chaymi Israel tropakuna Filistea tropakunamanta lluptirqaku. 12Samañataqmi chay chakrapa chawpinpi sayaykuspan defienderqa, hinaspam Filistea tropakunata vencerurqa. Chaypim Tayta Dios vencechirqa.
13Huk kutipim cosecha tiempopi, kimsa chunka capitanninkunamanta, kimsa allinnin qari-qari soldadonkuna uraykurqaku, Adulampa machayninpi David kachkaptin. Filistea tropakunañataqmi Refaim Qechwapi kaq campamentonkupi kachkarqaku. 14Davidmi pakakusqan sitiopi tarikurqa. Chay tiempopim Filistea tropakunapa cuartelnin kachkarqa Belén llaqtapi. 15Chaypim ganasllawanña David nirqa:
¡Imaynaraq Belén llaqtapa punkunpi pozomanta yakuta tomaykuyman! nispa.
16Hinaptinmi chay kimsan allinnin qari-qari runakuna, Filistea tropakunapa campamentonman yaykuruspanku Belén llaqtapa punkupa waqtanpi kaq pozomanta yakuta hurqomuspanku Davidman apamurqaku. Davidmi ichaqa mana tomaspan chay yakuta Diosman ofrendata hina tallispan 17nirqa:
¡Diosyá libraykuwachun kay yaku tomanaymanta! ¿Imaynataq tomayman kay runakuna vidanta wañuypa makinman churaykuspa apamusqanku yakuta? nispa. Chaymi mana tomarqachu.
Chaykunatam kay kimsa allinnin qari-qari runakuna ruwarqaku.
18Sarviapa wawan, Joabpa wawqen Abisaimi kimsa chunka allinnin qari-qari capitankunapa kamachiqnin karqa, paymi huk kutipi kimsa pachak soldadokunata lanzanwan wañurachirqa. Chaynapim paypas chay kimsa allinnin qari-qari runakunawan kuska ancha reqsisqa karqaku. 19Chay kimsa chunkamantam Abisaiqa ancha reqsisqa karqa, hinaspam paykunata kamachirqa, ichaqa manam chay kimsa allinnin qari-qari runakuna hinachu karqa.
20Chaymantam karqa Cabseel llaqtamanta kaq Joiadapa churin Benaía. Paymi Moab nacionniyuq Arielpa iskay allinnin qari-qari churinkunata wañurachirqa. Huk punchawmi lastamuchkaptin huk leonta wañurachirqa yakuta waqaychananku uchkupi. 21Egipto nacionniyuq hatunkaray runatapas wañurachirqam lanza makintin hamuchkaqta. Benaiam huk kaspillawan chay Egipto runamanta lanzanta qechuruspa chay lanzallanwan wañurachirqa. 22Chaykuna ruwasqanwanmi Joiadapa churin Benaía chay kimsa chunka capitankunapi ancha reqsisqa rikurirurqa. 23Chay kimsa chunkamanta ancha reqsisqa kachkaspapas manam chay kimsan allinnin qari-qari runakuna hinachu karqa. Chayraykum Benaiata David churarurqa waqaychaqnin soldadokunapa kamachiqnin kananpaq.
24Chay kimsa chunka capitankunapa wakiqninmi kaykuna: Joabpa wawqen Asael, Belén llaqtayuq Dodopa churin Elhanán, 25Sama hinaspa Elica, paykunaqa Harod llaqtayuqmi karqaku, 26Bet-pelet llaqtayuq Heles, Tecoa llaqtayuq Iquespa churin Ira, 27Anatot llaqtayuq Abiezer, Husah llaqtayuq Mebunai, 28Ahoa llaqtayuq Salmón, Netofa llaqtayuq Maharai, 29Netofa llaqtayuq Baanapa churin Heled, Benjamín lawpi Gabaa llaqtayuq Ribaipa churin Itai, 30Piratón llaqtayuq Benaía, Gaas wayqopi yachaq Hidai, 31Arabá qechwamanta kaq Abi-albón, Bahurim llaqtayuq Azmavet, 32Saalbim llaqtayuq Eliaba, Jasenpa churin Jonatán, 33Arar llaqtayuq Sama hinaspa Arar llaqtayuq Sararpa churin Ahiam, 34Maacat lawpi Ahasbaipa churin Elifelet, Gilo llaqtayuq Ahitofelpa churin Eliam, 35Carmel llaqtayuq Hezrai, Arab llaqtayuq Paarai, 36Soba llaqtayuq Natanpa churin Igal, Gad llaqtayuq Bani, 37Amón llaqtayuq Selec, Beerot llaqtayuq Naharai, paymi karqa Sarviapa wawan Joabpa yanapaqnin, 38Jatir llaqtayuq Ira hinaspa Gareb, 39chaynataq Het llaqtayuq Urías. Llapallankum kimsa chunka qanchisniyuq allinnin qari-qari capitankuna karqaku.
Chuya Qellqa Revisión @ Sociedad Bíblica Peruana, 2012