Ap 22
22
1Chirix chik a'an li ánjel kixk'ut chiwu li xnima'ul li yu'amha', nalemtz'unk jo' li krixtal, na'elk chaq sa' li xnimaqwal k'ojarib'aal li Yos ut li Karneer. 2Ut sa' xyi li nimb'e ut chi xka'pak'alil li nima' wank li che' nak'ehok yu'am: kab'laju sut na'uuchink, junq sut rajlal po, ut eb' li xxaq li che' a'in nak'anjelak cho'q xb'aneb' li tenamit.#22,2 Gn 2,9-14; Ez 47,12; Ap 21,6. 3Maa'ani chik taamajewaaq aran.#22,3 Gn 3,17; Zak 14,11. Li Qaawa' Yos ut li Karneer neke'loq'oniik ru chi xkab'ichaleb' (cf. Ap 5,3; 7,10). Li xnimajwal k'ojarib'aal li Yos ut li Karneer taawanq sa' li tenamit a'an, ut eb' laj k'anjel chiru te'loq'oninq re. 4Te'ril li xnaq' ru, ut li xk'ab'a' wanq chi xpeekemeb'. 5Aran maak'a'aq chik q'oqyink; moko te'raj ta ru xsaqenkil li xam chi moko xsaqenkil li saq'e, xb'aan naq li Qaawa' Yos taakutanob'resinq reheb', ut te'awab'ejinq chi junelik q'e kutan.
Haye'k re li xk'ulunik li Qaawa'
6Moqon li ánjel kixye we: “Paab'ajel li aatin a'in ut tz'aqal yaal. Li Qaawa' Yos li na'eek'asink reheb' li propeet, ak xtaqla chaq li x'ánjel re xk'utb'al chiruheb' li xmoos li k'aru taak'ulmanq chi seeb'”.#22,6 Ap 1,1-3; 22,16; Dn 8,26.
7“K'e reetal, tinchalq chi seeb'. Us xaq re li ani naxk'uula sa' xch'ool li raatin propeet wankeb' sa' li hu a'in!”.
8Laa'in, laj Jwan, kin'ab'ink ut kin'ilok re chixjunil a'in. Ut naq kiwab'i ut kiwil, kint'ane'k rub'el roq li ánjel li kik'utuk chiwu chixjunil a'in, re xloq'oninkil ru. 9A'ut a'an kixye we: “Maab'aanu a'in! Laa'in aawech moosil; wech moosileb' ajwi' laawas aawiitz'in propeet ut eb' li neke'xk'uula sa' xch'ool li aatin wankeb' sa' li hu a'in. A' li Yos tento taaloq'on ru”.
10Kixye ajwi' we: “Maatz'ap rik'in tz'apleb' li raatin propeet wankeb' sa' li hu a'in, xb'aan naq nach' chik wank li xq'ehil. 11Ani ink'a' tiik xch'ool, xb'aanuuq wan li maa'usilal; ut li ani muxb'il, toj xmuxaq wan rib'.#22,11 Us ta eb' li tenamit ink'a' te'ajoq re, ab'an li xnimal xk'a'uxl li Yos sa' xb'een li ruuchich'och' taatz'aqloq ru (cf. Dn 12,10). Ani tiik xch'ool, mixkanab' xb'aanunkil li tiikilal, ut li sant mixkanab' xsantob'resinkil rib'”.
12“K'e reetal, laa'in tinchalq chi seeb' ut tink'am chaq linq'ajkamuhom re xtojb'al li junjunq jo' chanru li xyehom xb'aanuhom.#22,12 Sal 62,13; Jr 17,10; Mt 16,27; Ro 2,6; Ap 2,23. 13Laa'in li Alfa ut li Omega, li xb'een ut li rosob'l, li xtiklajik ut li roso'jik”.#22,13 Is 41,4; 44,6; 48,12; Ap 1,8.17; 2,8; 21,6.
14Us xaq reheb' li neke'xpuch' li raq'eb': chi jo'kan te'ruuq chi tz'aqk rik'in li che' nak'ehok yu'am ut te'ok sa'eb' li rokeb'aal li tenamit. 15Elqeb' li tz'i', eb' laj tuul, eb' laj muxuleb' rib', laj kamsineleb' ras riitz'in, eb' laj loq'oninel li yal k'oxlanb'il yos ut chixjunileb' li neke'xra ut neke'xb'aanu li tik'ti'!#22,15 Jachb'ilaqeb' li ink'a' useb' xch'ool (21,7-8.27) rik'ineb' laj paab'anel (7,9.14) sa' roso'jikeb' li kutan.
16“Laa'in, li Jesus, xintaqla lin'ánjel eerik'in re xyeeb'al a'in chirixeb' li Iklees. Laa'in li xtuxm ut li ralal laj David, laa'in li kaq chahim nalemtz'unk toj eq'la”.
17Li Musiq'ej ut li Ixaqilb'ej neke'xye: “Chalqat!”. Li taa'ab'inq re, chixyehaq: “Chalqat!”. Ut li taachaqiq re, chalqaq; li taa'ajoq re, chixk'ulaq chi maatan li ha' nak'ehok yu'am.#22,17 Li Ixaqilb'ej a'an li Iklees, rixaqil li Kriist. Rochb'een li Musiq'ej naxye re li B'eelomej: Chalqat! Sa' li aatinob'aal arameo nayeemank: Maraná tha. Jo'ka'in neke'tijok eb' li kristiyan sa' xtiklajik: neke'xtz'aama li xnimal xk'ulunik li Jesus (cf. 1 Ko 16,22).
18Ninch'olob' xyaalal chiruheb' chixjunil li te'ab'inq re li raatin propeet wankeb' sa' li hu a'in: Wi ani tixtiqeb' ru li aatin, li Yos tixteneb' sa' xb'een chixjunileb' li rahilal tz'iib'anb'il sa' li hu a'in. 19Ut wi ani wank k'aru trisi reheb' li raatin propeet wankeb' sa' li hu a'in, li Yos tixmaq' chiru li b'arwan taatz'aq wi' raj rik'in li che' nak'ehok yu'am jo'wi' sa' li santil tenamit, a' li tz'iib'anb'il resil sa' li hu a'in.
20Li Jesus li nach'olob'ank xyaalal chixjunil a'in naxye: “Relik chi yaal naq tinchalq chi seeb'”.
Jo'kan taxaq. Chalqat, at Qaawa' Jesus!#22,20 Ap 1,3.7; 3,11; 22,7; Hch 3,20-21; 1 Ko 15,23.
21Li rusilal li Qaawa' Jesus chiwanq taxaq rik'ineb' chixjunil. Jo'kan taxaq!
S'ha seleccionat:
Ap 22: QQC
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Q'eqchi DC Bible © Bible Society in Guatemala, 2005.